БІРЫҢҒАЙ ЕСЕП БЕРУ КҮНІ ӨТТІ
Қазіргі уақытта Шымкент қаласында көптеген игі бастамалар көтеріліп жатыр. Мұның өзі шаһардағы сан қырлы мәселелердің шешімінің табуына септігін тигізіп келе жатыр. Осы орайда, жуырда заң талаптары талқыланған жиын өтті. Шымкент қаласы әкімінің орынбасары Айдын Кәрімовтың төрағалығымен өткен жиынға прокуратура, сыбайлас жемқорлыққа қарсы қызмет және басқа да бақылау-қадағалау органдарының, кәсіпкерлер палатасының, салалық басқармалар мен аумақтық департаменттердің басшылары, кәсіпкерлер қатысты.
Қала басшысының орынбасары жыл сайын өткізілетін ауқымды жиынның мақсаты – ҚР заң талаптары бұзылуының алдын алу, кәсіпкерлердің құқықтық сауаттылығын арттыру екеніне тоқталды. Өз сөзінде «ҚР Кәсіпкерлік кодексіне сәйкес жылына бір рет Бірыңғай есеп күні өткізіледі. Былтырғы кездесуде айтылған ұсыныстар жүзеге асырылуда. Мұндағы мақсатымыз – ҚР заң талаптарын бұзудың алдын алу, кәсіпкерлердің құқықтық сауаттылығын арттыру. Сонымен қатар мемлекеттік органдар мен бизнес-қауымдастық арасындағы байланысты нығайтады» деді Айдын Мейрамбекұлы. Жиын барысында мемлекеттік органдардың басшылары 8 айда атқарылған жұмыстары туралы баяндама жасап, кәсіпкерлер тарапынан туындаған сұрақтарға жауап берді.
Шымкент қалалық мемлекеттік кірістер департаменті басшысының орынбасары Сапарбек Ешанқұлов тиісті жұмыстар нәтижесінде ашықтыққа ұмтылған кәсіпкерлер саны артқанын айтып, нәтижесінде бюджетке түсімдер көбейгеніне тоқталды. Жиын барысында «Өздеріңізге белгілі, жыл басынан бері жан-жақты жұмыс жүргізу нәтижесінде Шымкент қаласының бөлшек салық мөлшерлемесі 4 пайыздан 2 пайызға дейін төмендетілді. Оған қоса өзін өзі жұмыспен қамтығандар үшін арнайы салық режимін қолдану жеңілдетілді. Сонымен қоса, салық берешегін мәжбүрлеп өндіру барысына өзгеріс енгізілді» деді Сапарбек Ешанқұлов. Жиын соңында қала әкімінің орынбасары Айдын Кәрімов бөлшек салық мөлшерлемесінің екі есеге төмендегені бойынша түсіндіру жұмыстарын күшейтуді ұсынды.
