БЕЛСЕНДІ ЗЕЙНЕТКЕРЛЕР ҚАЛАНЫҢ КӨРІКТІ ЖЕРЛЕРІН АРАЛАДЫ
Бүгінде елімізде зейнет жасындағы қарттарды сауықтыруға арналған бірқатар шаралар жүзеге асып келеді. Тіпті, еліміздің әрбір аумағында арнайы орталықтар жұмыс істейді. Ол қатарда Түркістан қаласы да бар. Газетіміздің бұған дейінгі сандарында бұл орталықтардың қызметі турасында тарқата баяндаған едік. Енді жуырда орталық тағы бір игі іске мұрындық болды. Тарқатайық…
Түркістан қалалық «Белсенді ұзақ өмір сүру орталығы» мен «Тең қоғам орталығының» қызмет алушылары Арыстан баб, Қожа Ахмет Ясауи кесенелеріне зиярат етіп, тарихи тұлғалардың рухына құран бағыштады. «Керуен сарай» туристік кешенін қайықпен аралады. «Ұлы дала елі» орталығындағы мұражайына соғып, ондағы фольклорлық-этнографиялық эскпозициялармен танысты. Саяхат «Отырар» қалашығы мен табиғат аясында жалғасып, белсенді зейнеткерлер демалысты ұйымдастырған орталық мамандарына ризашылық білдірді. Түркістандағы «Белсенді ұзақ өмір сүру орталығы» – 2022 жылдан бастап зейнеткерлерге қызмет көрсетеді. Жылына 3 мыңға жуық азаматты қабылдап, әлеуметтік-медициналық, әлеуметтік-психологиялық, әлеуметтік-құқықтық секілді 7 бағыт бойынша көмек береді. Егде жастағы ата-әжелер мұнда қолөнер және спортпен шұғылданады.
«Тең қоғам орталығы» – 2021 жылдан бері мүмкіндігі шектеулі және зейнет жасындағы азаматтарға қызмет етіп келеді. Жылына 700-ден аса азаматқа құқықтық және психологиялық кеңес беріп, кәсіпке баулу, қажетті құралдармен қамтамасыз ету, жұмысқа орналастыру сияқты мәселерін шешуге атсалысады.
