2024 ЖЫЛЫ 33 МЛРД ТЕҢГЕНІҢ АСТЫҒЫ САТЫЛДЫ
Елімізде аграрлық саланы дамытуға айрықша басымдық беріліп келеді. Әсіресе, агроөнеркәсіптік кешенді дамытуға ерекше көңіл бөлінуде. Жасыратыны жоқ, соңғы уақытта әлемде орын алған саяси оқиғалардың салдарынан логистикалық тізбек үзіліп, бірқатар жаңа нарықтар ашылды. Мұны Қазақстан пайдалана алды ма? Тарқатайық…
Азық-түлік корпорациясы жыл басынан бері 33 миллиард теңгеге жуық қаржыға 300 мың тоннадан астам астық сатқан. Құс және мал шаруашылықтары, қайта өңдеу кәсіпорындары дәстүрлі астықты сатып алушыға айналды. Бұл ғана емес, сатылған астықтың жалпы көлемінің 80 мың тоннасы экспортқа сатылды. Ұлттық компания жыл басынан бері Қытайға бидай, арпа және зығыр тұқымын жеткізу бойынша 11 экспорттық келісімшарт жасасқан. Азық-түлік корпорациясының ағымдағы резервтері ішкі және сыртқы нарықтағы сауда көлемін арттыруға мүмкіндік береді. Қазіргі уақытта 1,2 миллион тонна астық қоры бар.
Азық-түлік корпорациясы көлемдерді сатудан түскен қаражатты несиелер бойынша пайыздарды өтеуге және жаңа өнімнен жыл сайынғы астық сатып алуға жұмсауды жоспарлап отыр. Бұл астық пен жемшөптің тұрақты резервтік қорын қажетті көлемде жаңарту үшін қажет. Айта кетейік, Азық-түлік корпорациясы тауар биржасында биржалық сауда арқылы астық сатуды жалғастырып жатыр.
