АҚЖАЙЫҚҚА КӘРІЗ ЖҮЙЕСІ ҚАШАН ТАРТЫЛАДЫ?
Шымкент қаласына қарасты Ақжайық шағынауданына инженерлік инфрақұрылым тарту жұмыстары қарқынды жүргізіліп келеді. Атқарылып жатқан жұмыстар жайы қала әкімі мен әкімдігінің жіті бақылауында екенін де айта кету керек. Жуырда шаһар басшысы Мұрат Әйтеновтің өзі аталған шағынауданға барып, істелген жұмыстардың барысын тексерді. Қазіргі уақытта онда кәріз жүйесінің құрылысы жүріп жатыр.
Сметалық жобаға сәйкес, ұзындығы 22,1 шақырым кәріз жүйесі салынып, ол үшін бюджеттен 686,1 млн теңге қаралып отыр. Құрылысы биыл басталған нысанда қазір жұмыстың 10 пайызы орындалған. Жұмысты аяқтау мерзімі 2023 жылдың тамызына жоспарланған. Пайдалануға берілгенде шағынаудандағы 4200 үй кәріз жүйесіне қосылады. Жаңа кәріз жүйесін шағынаудан халқымен бірге кәсіпорындар, мектеп пен балабақшалар да пайдаланбақ.
Ақжайықта 35 көпқабатты үй бар. Қалғаны жеке тұрғын үйлер. Ауыз су, электр жарығы және табиғи газбен толық қамтылған. Қазір онда 3 мектеп пен 12 балабақша бар. Өткен жылы 8 балалар ойын алаңшасы мен 2 спорт алаңшасы салынып, пайдалануға берілген. Биыл 10 спорт алаңшасының құрылысы жүргізілуде. Шағынауданда осы жылы 13 көше орташа жөндеуден өтеді. Атап айтқанда, Жағатай көшесінің жалғасы, Оразбай ата, Бетеге жалғасы, Жағатай көшесінің жалғасындағы атауы жоқ көше, №12 көше, Сарбаз көшелеріне асфальт төселеді. Жоспарға сәйкес, жыл сайын орташа жөндеу жұмыстары қаланың орталық көшелері ғана емес, ауданның ішкі орамдық көшелері де қамтылады. Бүгінде жоспарланған 308 көшенің 145 көшесі жөндеуден өтіп, ел игілігіне пайдалануға берілді.
Бұдан бөлек, бүгінге дейін Ақжайықта 8 көше жарықтандырылған. Биыл Балқарағай, Асфендияров көшесі жарықтанса, 2023 жылы Байсбаев пен Қарасай, 2024 жылы Спанов пен Уали ата көшелеріне кешкі шам орнатылады. Аталған жұмыстар аяқталса, Ақжайық шағын ауданының тұрғындарын мазалаған маңызды мәселелер шешімін таппақ.
