МӘСЛИХАТ ХАТШЫЛАРЫ ТҮРКІСТАННЫҢ ДАМУ ҚАРҚЫНЫН ЖОҒАРЫ БАҒАЛАДЫ

«Қазақстан мәслихаттары депутаттарының бірлестігі» республикалық қоғамдық бірлестігі орталық кеңесінің отырысы Түркістан қаласында өтті. Алқалы жиынға Түркістан облысының әкімі Өмірзақ Шөкеев, облыстардың және Нұр-Сұлтан, Алматы, Шымкент қалалары мәслихаттарының хатшылары, депутаттар, Түркістан облысы қалалары мен аудандары мәслихаттарының хатшылары қатысты.

«Қазақстан мәслихаттары депутаттарының бірлестігі» республикалық қоғамдық бірлестігі және Түркістан облыстық мәслихаты ұйымдастырған жиында ҚР Президенті Қасым-Жомарт Тоқаевтың «Жаңа Қазақстан: Жаңару мен жаңғыру жолы» атты Қазақстан халқына Жолдауын жүзеге асыру жайы талқыланды. Шараны «Қазақстан мәслихаттары депутаттарының бірлестігі» республикалық қоғамдық бірлестігінің төрағасы Төлеубек Мұқашев жүргізіп отырды.
Өз кезегінде Түркістан облысының әкімі Өмірзақ Шөкеев мемлекет басшысы тарапынан аймаққа айрықша көңіл бөлініп отырғанын жеткізді. Түркістанның бірлік пен татулықтың орталығы ретінде дамитынын да тілге тиек етті. Жолдаудың басым бағыттарын сөз етіп, өңірдің даму қарқынын баяндады.
«Үш жылдам астам уақыт ішінде Түркістан өңірі жақсы дамыды. Жалпы өңірлік өнім көлемі 2,5 есеге артты. Облыста мұнай өңдеу зауыты және өзге де ауқымды жобалар қолға алынып, құрылысы жүріп жатыр. Ауыл шаруашылығын әртараптандыру, жаңа технологияларды енгізу, жаңбырлатып, тамшылатып суғару арқылы өнім көлемі арта түсті. Жылына 40 мыңдай жұмыс орнын ашу межесі қойылып, бұл жүзеге асу үстінде. Тағы бір айта кетерлігі, құрылыс саласында бұрын-соңды болмаған көрсеткішке қол жеткізілді. Былтыр 700 мың шаршы метрден астам үй берілді. Бір Түркістан қаласының өзінде 15 мыңдай пәтер салынып, 100 мың тұрғынға сай пәтер мен инфрақұрылым жасақталып отыр. Түркістан қаласындағы үйлердің 90 пайызына газ берілді. Экология жақсарды. Су каналдары бетондалып, жаңа су қоймалар пайдалануға беріліп жатыр. Міне, осы жобалар арқылы Түркістанның экологиясы жақсарып, жасыл қалаға айналады деген сенім мол. Барлық саладағы жұмыстар жалғасын таба береді. Бұның бәрі – ел бірлігінің, атқарушы орган мен мәслихаттардың бірлескен жұмысының жемісі» деді облыс басшысы. Сонымен қатар Өмірзақ Шөкеев мәслихат хатшыларымен пікір алмасып, Жолдауда айтылған бағыттарды талқылады.
Бұдан бөлек, жиында Түркістан облыстық мәслихатының хатшысы Қайрат Балабиев, Amanat партиясы Түркістан облыстық филиалының атқарушы хатшысы Бейсен Тәжібаев және өңірлерден келген мәслихат хатшылары баяндама жасап, пікірлерін ортаға салды. Еліміздің барлық аймағынан келген мәслихат хатшылары Түркістанның адам танымастай өзгергенін айтып, қаланың дамуы қарқынын жоғары бағалады.