БІР ЖЫЛДА ЖҮРЕККЕ 13 МЫҢНАН АСТАМ АШЫҚ ОТА ЖАСАЛҒАН

Адам баласының бүкіл тіршілігін тоқтатып тастайтын жұмыр жүректің ауруын емдеп, оған қайтадан өмір сыйлау – нағыз ерлікпен тең. Қазіргі таңда қазақ медицинасы, әсіресе оның ішіндегі алтын діңгек саналатын кардиология мен кардиохирургия саласы жоғары қарқынмен дамып келеді. Денсаулық сақтау министрлігінің мәліметіне сүйенсек, елімізде жоғары технологиялық кардиологиялық көмек көрсету жүйелі түрде жолға қойылып, 2025 жылдың қорытындысы бойынша жүрекке 13 106 ашық операция жасалған.

Бұл көрсеткіш өткен 2024 жылмен салыстырғанда 7,2 пайызға артық болып отыр. Мұндай күрделі хирургиялық араласулардың басым бөлігін, яғни 46,1 пайызын аортокоронарлық шунттау операциялары құраса, 22,7 пайызы жүректің жүре пайда болған кемістіктерін емдеуге, ал 13,1 пайызы туа біткен жүрек ақауын түзетуге бағытталған. Отандық дәрігерлердің осындай жанкешті еңбегі мен кәсіби шеберлігінің арқасында Қазақстан кардиохирургия саласындағы толағай табыстарымен әлемнің ең озық 30 елінің қатарына нық қадаммен енді.
Бүгінде қазақстандық ақ халаттылар жүрекке жасалатын ең күрделі ашық операцияларды, тамыр ішімен жасалатын эндоваскулярлық ем-домдарды және жоғары технологиялық медициналық көмектің сан алуан түрін өз елімізде-ақ еркін жүргізіп жатыр. Қазіргі таңда отандық кардиология саласында медициналық көмектің 80-нен астам күрделі түрі сәтті көрсетіледі. Осы орайда, отандық трансплантология саласындағы айтулы белес – 2025 жылы елімізде жүректі ауыстырудың, яғни транспланттаудың 100-ші операциясының сәтті аяқталуы болды. Бұл оқиға қазақстандық хирургтардың біліктілігі мен кәсіби даярлығының жаһандық деңгейге көтерілгенін, ажал аузында жатқан талай тағдырға екінші өмір сыйлай алатын деңгейге жеткенін айқын дәлелдейді.
Соңғы бес жылдың ішінде қанайналым жүйесі ауруларымен ауыратындардың саны 15 пайызға азайса, осы кеселдің салдарынан болатын өлім-жітім көрсеткіші бірден 35,1 пайызға дейін құлдырады. Бұл үрдіс ағымдағы 2026 жылдың алғашқы бес айында да қарқынды түрде жалғасып жатыр. Нақтырақ айтсақ, қанайналым жүйесі аурулары 6,6 пайызға, артериялық гипертензия 9,7 пайызға, жүректің ишемиялық ауруы 10,1 пайызға бәсеңдеді. Сонымен қатар кенеттен келетін қатер – жедел миокард инфаркті 5,7 пайызға және мидың қан айналымының жедел бұзылыстары, яғни инсульт деңгейі 6,1 пайызға төмендегені анықталды.
Осынау зор жетістіктер өздігінен болып жатқан жоқ. Бұл – елімізде инсульттік және кардиологиялық орталықтар желісін жүйелі түрде дамытудың, заманауи халықаралық клиникалық хаттамаларды тәжірибеге енгізудің және жедел медициналық жәрдем қызметін барынша жетілдірудің жемісі. Сондай-ақ ауруды басынан емес, асқынғанда емдемей, алдын алу мақсатында профилактикалық тексерулердің ауқымы кеңейтіліп, жүрек-қантамыр ауруларына шалдыққан пациенттерді тегін дәрі-дәрмекпен қамтамасыз ету ісі де қолжетімді бола түсті.