«КӨКТЕМ» БАЗАРЫНДА КӘСІП ЖАСАҒАН ЖАНДАР ЖАҢА НЫСАНҒА КӨШЕДІ

Шымкент қаласы – еліміздегі сауда-саттықтың дамыған орталықтарының бірі. Қалада көптеген ірі және шағын базарлар халыққа қызмет көрсетеді. Соңғы жылдары осы базарларды жаңғыртуға ерекше көңіл бөлініп, заманауи талаптарға сай қайта құру жұмыстары жүргізілуде.

Базарларды жаңғырту жұмыстары бірнеше бағытта жүзеге асырылып жатыр. Ең алдымен, санитарлық талаптарға сай жағдай жасау көзделген. Бұл бағытта ескі, тозығы жеткен нысандардың орнына жаңа, таза және қауіпсіз павильондар салынып, саудагерлерге ыңғайлы орындар ұсынылуда. Сонымен қатар базар аумақтарында кәріз, су, жарық және өрт қауіпсіздігі жүйелері жаңартылып жатыр. Жаңғырту жұмыстары тек инфрақұрылымды жақсартумен шектелмейді. Қалалық әкімдік электронды сауда жүйесін енгізу арқылы сауда мәдениетін көтеруге және қолма-қол ақша айналымын азайтуға күш салуда. Бұл өзгерістер халыққа да, кәсіпкерлерге де тиімді болмақ. Сондай-ақ жаңғырту барысында базарлар қала келбетіне сай сәнді әрі жинақы болып өзгеріп келеді. Бұл қала тұрғындарының өмір сүру сапасын арттырып қана қоймай, туристер үшін де тартымды орындарға айналуда. Осы орайда, Шымкенттегі «Көктем» базарының кәсіпкерлері өз қызметін жалғастыра алады. Олар базар жанында орналасқан жаңа үш қабатты сауда орталығына көшеді. Барлық кәсіпкерлер үшін 2025 жылдың 1 мамырына дейін жалдау ақысы алынбайды, бұл олардың бизнесін еш кедергісіз жүргізуге мүмкіндік береді.
Жаңа сауда орталығы – заманауи үш қабатты ғимарат, жалпы аумағы 7200 шаршы метр. Мұнда кәсіпкерлерге жаңа сауда орындары ұсынылады. Сауда орталығы келесідей бөлінеді. 1-қабат – сантехника және құрылыс материалдары, 2-қабат – күнделікті тұтыну тауарлары (көкөніс, жеміс-жидек, ет өнімдері) және 3-қабат – киім-кешек, ойыншықтар және басқа тауарлар. Айта кетсек, алғашқы 3 ай жалдау ақысы – тегін. Кейіннен жалдау құны олардың «Көктем» базарында төлеп жүрген деңгейінде сақталады. Мысалы, егер кәсіпкер бұрын 2×3 метр бутикті жалға алу үшін 25 мың теңге төлеген болса, жаңа сауда орталығында да осындай соманы төлейді. Кәсіпкерлермен түсіндіру жұмыстары жүргізілді. Жалпы Шымкент қаласындағы базарларды жаңғырту – бұл тек экономикалық қажеттілік емес, сонымен қатар заманауи қалалық мәдениетті қалыптастырудың маңызды бөлігі. Мұндай қадамдар қала дамуына жаңа серпін беріп, халықтың тұрмысын жақсартуға ықпал етеді.