ЕУРОПАДА ҚЫЗЫЛШАМЕН АУЫРҒАНДАР САНЫ РЕКОРДТЫҚ ДЕҢГЕЙГЕ ЖЕТТІ
Қызылша – өте жұқпалы вирустық ауру, ол әсіресе балалар мен иммунитеті төмен адамдар үшін қауіпті. Бұл індеттің алдын алу және оны жою мақсатында әлем елдері әртүрлі вакцинация, медициналық бақылау және ақпараттық кампаниялар сияқты шараларды жүзеге асырып келеді.
Дүниежүзілік денсаулық сақтау ұйымы қызылшаны толық жоюдың негізгі жолы – жаппай вакцинация екенін дәлелдеді. Көптеген елдер екпе алуды міндетті етіп, балаларға қызылшаға қарсы MMR (қызылша, паротит, қызамық) вакцинасын екі рет егуді ұсынады. Бұл тәсіл Еуропа, АҚШ, Канада, Жапония сияқты елдерде қызылшаның таралуын күрт азайтуға көмектесті. Дегенмен соңғы уақытта жағдай өзгеріп келеді. Жаңа есеп бойынша, өткен жылы Дүниежүзілік денсаулық сақтау ұйымының Еуропалық аймақтық бюросына мүше елдерде қызылша ауруының 127 мыңнан астам жағдайы тіркелген. Бір алаңдатарлығы, бұл — 2023 жылғы көрсеткіштен екі есе көп және 1997 жылдан бері тіркелген ең жоғары көрсеткіш.
Дүниежүзілік денсаулық сақтау ұйымы мен ЮНИСЕФ-тің осыған байланысты талдауы бойынша Еуропа мен Орталық Азияның 53 елі кіретін аймақта қызылша диагнозы қойылған науқастардың 40 пайыздан астамы — бес жасқа дейінгі балалар. Бұл өсім коронавирустық пандемия кезінде вакцинациямен қамтудың төмендеуіне байланысты. Бірақ сарапшылар әлі де бірқатар елдерде вакцинацияны қабылдау пандемияға дейінгі деңгейге оралмағанына алаңдайды. Бұл эпидемия қаупін арттырады. ЮНИСЕФ пен ДДҰ қызылша індеті белсенді дамыған елдердің үкіметтерін шұғыл түрде ауруды анықтауға және вакцинациялау науқанын күшейтуге шақырды. Жалпы әлемдік тәжірибе көрсеткендей, қызылшамен күресте басты фактор – вакцинация. Қазақстан да осы бағытты ұстана отырып, балаларды уақтылы екпе алуын қамтамасыз ету, жалған ақпаратпен күресу және халықтың медициналық сауаттылығын арттыру шараларын жалғастыруы қажет. Бұл – қауіпті аурудың таралуын болдырмаудың ең тиімді жолы болып қала бермек.
