МЕКТЕПТЕРДЕГІ ОРЫН ТАПШЫЛЫҒЫ ҚАЛАЙ ШЕШІЛІП ЖАТЫР?

Қазіргі таңда Қазақстанда мектептердегі орын тапшылығы өзекті мәселелердің бірі болып отыр. Әсіресе, бұл проблема халық саны өсіп келе жатқан ірі қалаларда, соның ішінде Астана, Алматы және Шымкент сияқты мегаполистерде қатты байқалады. Орын тапшылығының негізгі себептерінің бірі – урбанизация мен демографиялық өсім. Қалаларға қоныс аударушылар саны артқан сайын, жаңа мектептер салу қажеттілігі туындайды.

Осы орайда, 2024 жылы елімізде 373 мың оқушы орнына арналған 257 мектеп салынды. Биыл 300 мың орынға арналған 200-ге жуық мектептің құрылысы жүреді. «Мемлекет басшысы бастамашылық еткен «Жайлы мектеп» ұлттық жобасы аясында оқу жылының басынан 254 мың оқушы орнына арналған 105 мектеп пайдалануға берілді, оның 40 пайыздан астамы ауылдық жерлерде орналасқан. Білім беру инфрақұрылымын қолдау қоры арқылы 27 мың оқушы орнына арналған 25 мектеп ашылды. Биыл қосымша бес мектеп пен 3,3 мың орындық интернат құрылысы жүріп жатыр» делінген Оқу-ағарту министрлігі таратқан мәлімдемеде.
Министрліктен атап өткендей, білім беру нысандары құрылысының басым бөлігі Жетісу, Қызылорда, Батыс Қазақстан, Ақмола облыстарында және Алматы қаласында жүріп жатыр. Бұл жобаларды іске асыру оқушы орындарының тапшылығын қысқартуға, сондай-ақ апатты ғимарат мәселесін шешуге мүмкіндік береді. Барлығы жемқорлардан тәркіленген қаражат есебінен жалпы саны 100 мың оқушы орындық 89 мектептің құрылысы қаржыландырылды. Осы жылы елімізде 300 мың орындық 200-ге жуық мектептің құрылысы жүреді. Бұл шаралар 2026 жылға дейін оқушы орнының тапшылығын толықтай жоюға мүмкіндік бермек. Жалпы мектептердегі орын тапшылығы – уақытылы шешуді қажет ететін күрделі мәселе. Оған кешенді түрде қарау арқылы ғана балалардың сапалы білім алуына жағдай жасауға болады. Білім – елдің болашағы, сондықтан бұл мәселенің шешімі басты назарда болуы тиіс.