ТУРИЗМГЕ ТАРТЫЛҒАН ИНВЕСТИЦИЯ КӨЛЕМІ АРТЫП КЕЛЕДІ

Туризм – елдің беделін көтеретін, сонымен қатар қыруар қаржының келуіне ықпал ететін саланың бірі. Сондықтан бұл саланы дамыту ісіне айрықша көңіл бөлініп келе жатыр. Нәтиже де жоқ емес. Тарқата баяндасақ, осы жылдың қаңтар-мамыр айларында туризм саласындағы негізгі капиталға қосылған инвестиция көлемі өскені байқалады. Осы кезеңде көрсеткіш 271,2 млрд теңгені құрады.

Бұл өткен жылдың сәйкес кезеңімен салыстырғанда 2 есеге көп. 2023 жылы инвестиция көлемі 130,1 млрд теңгені құраған болатын. Бұл туралы ҚР Туризм және спорт министрлігі мәлімдеді. Туризм саласындағы негізгі капиталға қосылған инвестиция көлемі 14 бағыт бойынша бағаланады. Оларға өнер, тамақтану, ойын-сауық, демалыс және жатын орындары, көлік, кітапханалар, мұрағаттар мен мұражайлар, жалға беру қызметтері, туристік бизнес, спорт және демалыс ұйымдастыратын мекемелер кіреді.
9 облыста инвестиция көлемінің артқаны анықталды. Астана, Алматы қалаларында, Солтүстік Қазақстан, Қызылорда, Қостанай облыстарында көрсеткіштің айтарлықтай өскені белгілі болып отыр. «Бұл көрсеткіштер туризм саласының инвесторлар үшін тартымды бола түскенін дәлелдейді. Біз саланы одан әрі дамытып, оған капитал тарту үшін қолайлы жағдай жасауды жалғастырамыз» деді Туризм индустриясы комитетінің төрағасы Нұртас Кәріпбаев.