ҮШІНШІ МЕГАПОЛИСТЕ ТАҒЫ БІР САЯБАҚ АШЫЛДЫ

Бүгінде Шымкентті жасыл қалаға айналдыру бағытында қыруар іс атқарылып жатыр. Күні бүгінге дейін қала аумағында бірнеше жерде саябақтар ашылып, көптің пайдалануына берілді. Қазіргі уақытта құрылысы жүріп жатқан нысандар да баршылық. Жуырда осындай заманауи келбетке енген саябақ қолданысқа берілді. Бүгінгі материалымызда осы тақырып турасында тарқата баяндамақпыз.

Ашып жазсақ, қала күні мерекесі қарсаңында қаладағы Жібек жолы — Сайрам көшелері қиылысында тағы бір жаңа гүлзар ашылып, пайдалануға берілді. 10 000 шаршы метр аумақта тұрғындардың демалысы үшін барлық қолайлы жағдай жасалған. Қала әкімі Ғабит Сыздықбеков жаңа гүлзардың ашылуына қатысып, тұрғындармен кездесті. Жоба бизнестің әлеуметтік жауапкершілігі аясында жүзеге асырылды. «Демеушілер мен мердігер компания өкілдеріне атқарылған жұмыстар үшін алғысымды білдіремін. Мақсатымыз – қаланы халыққа өмір сүруге барынша қолайлы ету. Біз саябақтар мен алаңдарды абаттандыру мен көгалдандыруды бірегей стильде жасауға тырысамыз. Халық көп шоғырланатын орындарды көгалдандыруды жалғастырамыз» деді қала әкімі.
Осыған дейін сауда нысандары заңсыз орнатылған аумақ халықтың серуен алаңына айналды. Мұнда шағын архитектуралық пішіндер, табиғи тастан жасалған орындықтар, жарықтандыру шамдары орнатылып, көгал төселіп, 200-ден астам ағаш отырғызылды. Жалпы жасыл аумақ шамамен 7500 шаршы метрді құрайды. Балаларға арналған екі ойын алаңы бар.