«ҚАМҚОРЛЫҚ» ОРТАЛЫҒЫНДА 100-ГЕ ЖУЫҚ БАЛА ҚЫЗМЕТ АЛУДА
![](https://uaqyt.kz/wp-content/uploads/2023/07/ҚАМҚОРЛЫҚ.jpg)
Ана мен баланы қорғау – мемлекеттің басты міндеттерінің бірі десек, артық айтқанымыз емес. Сәйкесінше, бүгінгі таңда елімізде аталған бағытта түрлі бастамалар қолға алынып, жүзеге асырылып жатыр. Оның ішінде Шымкентте жүзеге асырылып жатқан жұмыстар жетерлік. Тарқатайық…
Шымкенттегі «Қамқорлық» №8 балаларға арналған әлеуметтік қызметтер көрсету орталығында бүгінгі күні 100-ге жуық бала қызмет алуда. Орталықта аутизм және аутистік спекторының бұзылыстары бар балаларға түзету-дамыту, қоғамға бейімдеу және әлеуметік оңалту шаралары көрсетіледі. Білікті мамандар сөйлеу тілінің жалпы дамуында бұзылыстары бар балалармен түзету-дамыту жұмыстарын жүргізеді. Мамандардың айтуынша, арнайы педагог мамандардың жеке және топтық жұмыстарының нәтижесінде балалардың визуалды қабылдауында, қарапайым қимыл-қозғалыстары мен дағдыларында оң өзгерістер байқалады. Логопедиялық жұмыстар жүргізу арқылы артикуляциялық аппаратында бұзылыстары бар балалар дыбыстар мен жеке сөздерді анық айта бастаған.
Қалалық жұмыспен қамту және халықты әлеуметік қорғау басқармасына қарасты 110 орынға есептелген мекеме жартылай стационарлық негізде қызмет көрсетеді. Заманауи үлгіде жабдықталған орталық қосымша білім беру және әлеуметтік-тұрмыстық бағдарлау, интерактивті, сенсорлық бөлме, робототехника және лего-бөлмелері, музыка-терапия, арт-терапия бөлмелері мен тігін, ағаш, қыш шеберханаларымен қамтамасыз етілген. Мұнда балалар арнайы педагог мамандарының бақылауында болып, медициналық тексеруден өтеді. Ерекше күтімді қажет ететін балаларға логомассаж тағайындалады. Сондай-ақ балалармен аптасына 2 күн жеке жұмыс жүргізіледі.