КЕЛЕСТЕ БИЫЛҒЫ БИДАЙ ОРУ ЖҰМЫСЫ БАСТАЛДЫ

Келес ауданының дихандары астық оруды бастап кетті. Агротехникалық талаптарды тиянақты атқарған Ақтөбе ауылдық округіндегі «Дәурбек» шаруа қожалығы қазір егістіктің әр гектарынан 23-25 центнерге дейін өнім жинап жатыр. Соның нәтижесінде биыл қамбаға мол дән құйылмақ.

Аталған шаруа қожалығы 423 гектар аумаққа бидай еккен. Шаруашылықта жер жырту, тұқым себу және жерді өңдеу секілді жұмыстар дер уақтылы істелген. Соның арқасында қазір қырманға мол астық тасылып жатыр. «Дәурбек» шаруа қожалығы 30 адамды жұмыспен қамтып отыр. Қазір 2 комбайн, 5 камаз, 1 трактор жұмыс істеуде.
Айта кетейік, биыл Келес ауданында 8 397 гектар аумаққа астық дақылдары егілсе, оның 1 830 гектарына бидай, 5 138 гектарына дәндік жүгері дақылдары себілген. Одан бөлек 407 гектар аумаққа бұршақты дақылдар егілді. Жалпы соңғы уақытта аталған ауданда ауыл шаруашылығының өнімін арттыра отырып, агроөнеркәсіптік кешенді ілгерілету ісіне айрықша мән беріліп отыр.