МЕМЛЕКЕТТІК ҚАРЫЗДЫҢ КӨЛЕМІ ҰЛҒАЙЫП КЕЛЕДІ

Мемлекеттік қарыз жалпы ішкі өнімге шаққанда 32 пайыздан аспайды. Бұл туралы ҚР Премьер-Министрінің орынбасары-Қаржы министрі Ерұлан Жамаубаев айтты.

Сенаттың жалпы отырысында депутат Шәкәрім Бұқтұғұтов 2022 жылдың 1 қаңтарында мемлекеттік қарыз сомасы 21,9 трлн теңгені құрағанын, ал бір жылдан кейін бұл көрсеткіш 25,3 трлн теңгеге дейін өскенін айтты. Осы орайда ол Қазақстанның сыртқы қарыздары бойынша толыққанды аудит жүргізу және тартылған қаржының экономикалық тиімділігі жөнінде сұрақ қойды. Ал Ерұлан Жамаубаев өз сөзінде «Мемлекеттік қарыз мәселесі Үкіметтің тұрақты бақылауында тұр. Әлемде инфляцияның деңгейі өте жоғары екені белгілі. Сондықтан базалық ставка да өскен. Бұл тұрғыда сырттан қаражат тарту немесе бюджет тапшылығын қаржыландыру үшін іштен қарыз алу қымбатқа түседі. Әрине, инфляция деңгейі төмендесе, базалық ставка азайса, бұл жүктеме біршама жеңілдейді» деді.
Сонымен қатар ол биыл еліміздегі бюджет кірісі өсетінін де тілге тие етті. Айтуынша, Үкімет еліміздегі бюджет тапшылығын біртіндеп азайтады. Оның деңгейін биыл 2,7 пайыз шамасында қалдырған, себебі оны өсіруге болмайды. Осы орайда, оның сомасы 3,2 трлн теңгені құрап отыр. Биылғы нақтылаудан кейін бюджеттің кіріс көзі тағы да 42 пайызға өседі. Бұл тұрғыда салық әрі кедендік әкімшілендіру есебінен 720 млрд теңге қосымша қарастырылып отыр.
«Қазір негізінен ішкі нарықтан қаражат тартып отырмыз. Мемлекеттік қарыз жалпы ішкі өнімге шаққанда 32 пайыздан аспайды деп ескерілген» деді Ерұлан Жамаубаев. Айта кету керек, биылға арналған республикалық бюджеттің параметрлері келесідей қалыптасты, яғни бюджет түсімдері 1,5 трлн теңгеге ұлғая отырып, 19,3 трлн теңгені құрамақ. Тапшылық жалпы ішкі өнімге қарағанда 2,7% деңгейінде сақталды. Республикалық бюджеттің шығыстары 22,5 трлн теңге көлемінде жоспарланып отыр.