3 МЛН ТОННА КӨКӨНІС, БАҚША, КАРТОП ӨНІМДЕРІ ЖИНАЛДЫ

Ауыл шаруашылығының ел экономикасындағы маңызы зор, міндеті айрықша. Соңғы әлемдегі геосаяси оқиғаларды ескерсек, азық-түлік өндірісін дамыту арқылы халықтың тұрмыстық жағдайын жақсартуға, кәсіпкерлік саланы ілгерілетуге болады. Жалпы бұл сала турасында сөз тарқатқанда Түркістан облысын айналып өтуге әсте болмайды. Бүгінде өңірде агроөнеркәсіптік кешенді дамыту бойынша қыруар іс атқарылуда. Сонымен қатар агросалада өндірілетін өнім көлемі де жыл санап артып келе жатыр.

Мәселен, жыл басынан бері Түркістан облысында егістікті әртараптандырудың нәтижесінде 3 млн тонна көкөніс, бақша, картоп өнімдері жиналды. Жыл соңына дейін өнім көлемін арттыру көзделген. Биыл 360 млрд теңгеге ауыл шаруашылығы өнімдері өндірілді. Ауыл шаруашылығы дақылдарының егіс көлемі өткен жылдан 10 мың гектарға ұлғайып 870 мың гектарға жетті. Елімізде салынған жылыжайлардың 71 пайызы облысқа тиесілі. Жалпы көлемі 1 мың 577 гектарға жетіп, 117 мың тонна өнім өндірілді. Мемлекет басшысының тапсырмасына сәйкес, халықтың табысын арттыру бойынша облыс деңгейінде іс-шаралар кешені қабылданды.
2027 жылға дейін 500 гектарға жаңа жылыжай салу жоспарланған. «Бір алқаптан жылына 2-3 өнім алу» тәжірибесі аясында 9,5 гектарда 2 мың 411 жоба жүзеге асырылды. 241 мың тонна көкөніс өнімі жиналды. Салаға бағытталған инвестиция 1,5 есе артып, 47,7 млрд теңгеге жетті. Нарықты отандық өнімдермен қамтамасыз ету мақсатында облыста 10 млрд теңгенің 25 жобасы инвестициялық іске асырылып, 334 жұмыс орны ашылды.