Маңызды

Ербол Садыр Шымкенттің облыстан бөлінген кезіндегі
кемшіліктерді жайып салды

Былтыр Шымкент мегаполис мәртебесін алып, Оңтүстік Қазақстан облысының құрамынан шығарылғаны белгілі. Сол уақытта өз арбасын өзі сүйреуге қадам басқан мегаполис қаланың құзырына 40-тан астам міндет жүктелген. Бұл міндеттердің бағыты ішкі саясат және дін, денсаулық сақтау, жұмыспен қамту және әлеуметтік қорғау, мәдениет және спорт, төтенше жағдайлар бойынша, табиғатты қорғау және кәсіпкерлік, ауыл шаруашылығы мен білім беру салаларына қарасты болған. Кезінде сол функцияларды Шымкент аумағында орындау үшін Оңтүстік Қазақстан облысы бюджетінен 16,3 млрд. теңге қаржы қаралған. 2018 жылы сол қаржылар жаратылып келген. Енді ол жұмыстардың 2019 жылға қажеттілігі 19 млрд. теңгені құраған. Алайда Шымкент облыс аумағынан шығып, дербес қала ретінде бөлінген кезде осы қаржыларды өзінің үлесіне ала алмаған.
Бұл туралы журналистерге қала әкімінің орынбасары Ербол Садыр мәлімдеді.
Бөлініс кезінде бюджеттен бөлінуі тиіс қаржыларды ала алмаудың салдарынан тұралаған тірліктер, ақсаған тұстар қандай болды? Бұл туралы Ербол Садыр бүй дейді.
– Мысалы, денсаулық сақтау саласы бойынша бізде барлық азаматтар кепілдендірілген тегін медициналық қызметпен қамтамасыз етілген. Ал соның ішінде ерекше аурулармен сырқаттанатын азаматтар бар. Оларға берілетін дәрілер үшін қаржы көлемі жергілікті мәслихаттың шешімімен беріледі. Ол өте қымбат дәрілер. Бір науқасқа 20 млн. теңгеден 200 млн. теңгеге дейін қаржы жұмсалады. Міне сондай мақсатқа кезінде ОҚО бойынша 130-ға жуық азаматқа 1 млрд. 398 млн. теңге қаржы бөлініп отырған. Әкімшілік-аумақтық бөлініс кезінде Түркістан облысына тиісті қаржы берілген де, Шымкенттегі 60-тан аса азаматтың денсаулығына қажетті сома қаралмаған. Бұдан соң мүгедектерге көмек көрсету мен қажетті функцияларды мемлекеттік бюджет есебінен қамтамасыз ету үшін кезінде ОҚО бюджетінен 2 млрд. 010 млн. теңге қаржы жұмсалып келген. Соның ішінде Шымкент қаласының азаматтарына 593 млн. 931 мың теңге қаржы қарастырылатын. Бірақ әкімшілік-аумақтық бөлініс кезінде бұл қаржылар Шымкент қаласына берілмеген.
Біраз адам Шымкентте ауыл шаруашылығы жоқ деп санайды. Бұл сала қаладағы ең өзекті мәселе. Өйткені Түркістан облысындағы жайылымдық жерлер мен егістік жерлерде өндірілген өнімдердің барлығы дәл осы қалада қайта өңдеуден өтіп, ары қарай өзге өңірлер мен елдерге сатуға жөнелтіледі. Яғни, Шымкент –логистикаға ең тиімді аймақ. Соған сәйкес Шымкентте өндіріс орындары да дамыған. Қалада 63 мың гектар жерге жуық егістік жер бар. Ал енді сол кезде осы бағытқа ОҚО бойынша 24 млрд. 659 млн. теңге қаржы қаралып келген болса, соның 5 млрд. 378 млн. теңгесі Шымкентке жаратылған. Дәлірегі, Шымкенттегі ауыл шаруашылығы саласының мамандарына бағытталған. Алайда, әкімшілік-аумақтық бөлініс кезіндегі уақытта тиісті қаржылар Шымкентке алынбаған. Осы сынды мысалдар жетерлік. Мен бұл жерде негізгі салаларын ғана айттым.
Шымкент облыстан бөлінген кезде өзіне тиісті үлесінен қағылып қана қоймай, артық шығын шығаратын жағдайларға жол берген көрінеді. Тарқатып айтар болсақ, кезінде Оңтүстік Қазақстан облысы 10 жекешелік әріптестік жобаға міндеттеме алған. Сол міндеттемеде көрсетілген талаптар бойынша облыс әкімдігі инвесторларға 16 млрд. теңге төлеуі тиіс. Ол кезде Шымкент облыстың құрамында болғандықтан, оның мұндай шешім қабылдайтын құзыреті болмаған. Соған қарамастан 2018 жылы әкімшілік-аумақтық бөлініс кезінде аталған 10 жоба Шымкентке берілген. Нәтижесінде қабылданған міндеттеме бойынша биыл қала 4,1 млрд. теңге төлеген. Бір қызығы әкімшілік-аумақтық бөлініс кезінде Шымкент міндеттеме бойынша төлеуге тиіс қаржыларды алмаған.
Қала әкімі Ерлан Айтахановтың тапсырмасымен жүргізілген талдау-сараптау жұмысы кезінде билікте отырған басшылардың анықтаған түйіткілдері осымен шектеліп қалмапты. Бұл туралы Е. Садыр:
– Оңтүстік Қазақстан облысы Түркістан облысы болып қайта құрылып, Елбасының Жарлығымен бекітілген орталығы Түркістан қаласына көш түзегені белгілі. Содан алдын бұған дейін облыстық әкімдіктің меншігінде болған қала аумағындағы 99 нысан Шымкент меншігіне өткен. Кезінде олар облыс меншігінде болғанда нысандарды ұстау шығындары үшін қазынадан 32 млрд. теңге бөлінген. Мегаполис меншігіне өткізілген соң қажетті деп сұралған 30 млрд. теңгенің 20 млрд. теңгесі ғана бөлінген. Яғни, қажетті қаржылар толық көлемде бөлінбеген,-деді.
Бұл «былықтар» сол кезде қала әкімі болған Ғабидолла Әбдірахымовтың қателігі ме әлде оған жасалған «қастандық» па? Қазақстанда жылдар бойы облыс құрамындағы қала болып келген өңірдің мегаполис атанып жататыны жиі болмайтыны баршаға аян. Оған елімізде мегаполис мәртебесіндегі үш қаланың ғана бар екені дәлел. Сондықтан да сол кездегі қала басшылығы мұндай мәселеге терең мән бермеуі, бақылауға алмауы да бек мүмкін. Бірақ сол кезде облыс басшылығы қанша жылдан бері әкімшілік орталығы болып келген қарамағындағы қаласына жөнін айтып, дұрыс жолды көрсетпеуіне не жорық? Тап сол кезде Ербол Садырдың өзі білдей облыс әкімінің орынбасары қызметінде болғанын, соған қарамастан оның үнсіз отырғаны қаншалықты дұрыс?.
Бұл сұраққа Ербол Садыр мырза «Мен бөлініс кезінде экономика және қаржы саласына жауап берген жоқпын. Ауыл шаруашылығы мен әлеуметтік мәселелері жөніндегі орынбасар болғанмын. Содан соң қазақта сөз бар «Жыламаған балаға емшек қайда?» деген. Сол сияқты әкімшілік-аумақтық бөлініс кезінде әркім өзінің дәлелімен, талдауымен мәселені шешіп алуы керек деп ойлаймын. Бұл сол кезде жіберілген кемшіліктер» деп қайырды.
Жалпы Ербол Садыр брифингте осы және өзге де мәселелер бойынша көптеген мәселелерді талдап, тарқатып айтып берді. Тілге тиек еткен деректерінің барлығы көз жұма қарайтын кемшілік емес. Оның сөзін ұйып тыңдаған кез келген адам «Ғабидолла Әбдірахымовтың командасы мүлдем жұмыс істемеген» деген ойға қалатындай дерсің…
Осындай ойымызды ортаға салғанда ол кісі «Ол кездегі жағдайдың қандай болғанын білмеймін. Біз қала бойынша талдау жасап шықтық. Мені көпшілігіңіз білесіздер. Облыс бойынша экономика саласын 10 жыл басқарғанмын. Біз жылына 115 мектепке дейін салғанбыз. 100 денсаулық сақтау мекемесінің құрылысын жүргізгенбіз. Ұзын-ырғасы 70 елді мекенде 320 мың халықты сумен, көгілдір отынмен қамтығанбыз. Шешілген мәселелер қыруар. Соның барлығы бюджеттің, инвестицияның басқа да қаржылардың есебінен орындалған. Ал қалаға келсек, кемшіліктер орын алған. Мұны цифрлардың өзі көрсетіп тұр. Оған тек қана қала әкімі кінәлі сияқты болып көрінеді. Қаланың әкімі – қаланың басшысы. Ал енді әр салаға жауап беретін мамандар болады. Бұл сол азаматтардың жіберген кемшіліктері шығар. Оған өздеріңіз баға берерсіздер. Мен баға бермеймін. Бізге қала әкімінің қойып отырған талабы қордаланған мәселені шешу жолдары. Соған сәйкес біз талдау жасап, көрсеттік», — деді.

Т. ДҮЙСЕБАЙҰЛЫ.

Түлкібаста тұтас елге үлгі боларлық баянды іс орын алды. Аудан әкімі Нұрбол Тұрашбековтың бастамасымен ғалым, профессор Мекемтас Мырзахметовке туған жері Майтөбе ауылынан шығармашылық үйдің кілті тарту етілді.

Қазақтың қайталанбас тұлғасы атақты ақын Абай Құнанбаевтың, даңқты қолбасшы Бауыржан Момышұлының ұрпаққа аманат еткен бай мұраларын терең зерттеуде өлшеусіз еңбек еткен мерейлі Мекемтас Мырзахметовке жасалған бұл тосынсый жерлестерінің атынан табысталды. Демеушілер есебінен бой көтерген үй бес бөлмеден тұрады. Оны салу кезінде заманауи талаптардың барлығы ескерілген. Сонымен қатар, баспананың үй іргелік аумағы да толықтай қоршалып, абаттандырылған.
Бүгінде тоқсан жастан асқан абзал ағамыз қазақ ғылымының дамуына, әдебиетіміздің өркендеуіне сүбелі үлес қосқан жан. Сонымен қатар ол қашанда сүбелі сөз бен құнды ойдың кені ретінде танымал. Осыдан бірнеше ай бұрын отандық БАҚ Мекемтас ағамыздан «Абай Құнанбаевтың іліміндегідей «Толық адам» қандай болуы керек?» деген сауал қояды. Оған М. Мырзахметов «Абайдың «Толық адамы» – ақылды адам. Ақылы нұрлы ақыл болуы керек. Қазақ мінезін одан ары құрдымға кетірген – бүгінгі капиталистік қоғам. Капиталистік қоғамда бай одан сайын қоңдана береді. Ал кедейдің сіңірі шыға береді. Бұл сондай опасыз қоғам. Испанның бір ғалымы «бай мен кедей арасындағы осы қашықтықты қалай жоямыз?» деген сұраққа бар өмірін арнапты. Сол ғалым бір ғана жол тапқан. Қалай дейсіз бе? Ол «Байлардан алынатын салықты көтеру керек. Түскен салықтың белгілі бір бөлігін кедейлер мен орта шаруаларға бөліп беру керек. Сонда ғана гармония болады», – деп жауап береді.
Өзінің жылдар бойғы еңбегінің арқасында абырой мен құрметке кенелген азаматқа шығармашылық үйдің кілтін аудан әкімі Нұрбол Тұрашбеков пен Түркістан облыстық ардагерлер кеңесінің төрағасы Жеңісбек Мәуленқұлов салтанатты жағдайда табыс етті.

А. САТЫБАЛДЫ.

Шымкенттегі балалар темір жолының орнына жүгіру
мен веложол салынатын болады.

Шымкент қалалық мәслихатының хатшысы Ғани Ташқараев жергілікті «Панорама Шымкента» газетіне берген сұхбатында осындай мәлімдеме жасаған. Өз кезегінде ол дәл осы мәселені көтерген кезде қатты толқығанын, Қазақстандағы балаларға арналған алғашқы бұл теміржол Шымкенттің тарихы болып қалатынын тілге тиек еткен. Бірақ оны қазіргі заман өрендерінің талғамынан шығатындай етіп қайта қалпына келтіру, және оны ұстау шығыны үшін бюджеттен қыруар қаражат қажеттігін алға тартқан. «Сондықтан да нысан орнына жүгіру және веложол салу туралы тиімді шешім қабылданды. Дұрысы, қала тұрғындары спортпен шұғылданып, салауатты өмір салтын ұстансын» деп ой түйеді мәсхатшы.

Тұрмыстық қатты қалдықтар – еліміздегі ең елеулі мәселелердің бірі. Бірақ елімізде қоқыс тарифін көтермей бұл мәселеге нүкте қойылу мүмкін емес. «Қазақстанның қалдықтарды қайта өңдеу стратегиясы» тақырыбы бойынша өткен Франция — Қазақстан сауда өнеркәсіп палатасының форумында Экология-геология және табиғи ресурстар вице-министрі Ахметжан Пірімқұлов осылай деді.
Вице-министрдің сөзінше ТМД елдері бойынша ең төменгі коқыс тарифі біздің елдің еншісінде екен. Өз кезегінде ол Қазақстанда тек Алматы қаласы ғана қоқыс шығару қызметі үшін төлем құнын 549 теңгеге көтергенін алға тартты. Ал еліміздің бас қаласында тариф көлемі 246 теңге екен.
Сонымен қатар ол, бағаны өсіру бойынша тариф бағасы 500 теңге немесе 1000 теңге болуы керек» деп айтудан аулақ екенін, бұл жергілікті атқарушы органдары кесіп-пішіп шешетін дүние екенін тілге тиек етті.
– Біз тариф кезең-кезеңімен көтерілуі керек деп санаймыз. Тариф бағасы әр аймақта бірдей бола алмайтыны түсінікті. Бұл ретте әр өңірдің ерекшелігін, қалдық мөлшерін, материалдық жағдайын, халықтың әлеуметтік топтарын ескеруіміз керек. Ол өте қиын мәселе», — деді вице-министр.

Қ. ҚАЛИЕВ.

Түркістан облысы бойынша әлеуметтік нанның орташа бағасы — 71,5 теңге көлемінде. Ал Түркістан қаласында арнайы дүкендерде 75 теңгеден сатылуда. Бұл туралы арнайы рейдтік шара аясында облыстық кәсіпкерлік және сауда басқармасының басшысы Нұрлан Байғұт мәлімдеді.
Түркістан облысы бойынша әлеуметтік нанның орташа бағасы — 71,5 теңге көлемінде. Ал Түркістан қаласында арнайы дүкендерде 75 теңгеден сатылуда. Бұл туралы арнайы рейдтік шара аясында облыстық кәсіпкерлік және сауда басқармасының басшысы Нұрлан Байғұт мәлімдеді.

Түркістан облысының әкімі Өмірзақ Шөкеевтің тапсырмасына сәйкес, облыс әкімінің орынбасары Мейіржан Мырзалиевтың төрағалығымен арнайы құрылған жұмыс тобы әлеуметтік нан бағасының өсуіне қарсы жүйелі жұмыстар атқаруда. Облыс орталығы Түркістан қаласында әлеуметтік нан бағасын бақылауға арналған рейдтік шаралар ұйымдастырылды.
Шара аясында сала мамандары мен БАҚ өкілдері Түркістан қаласында бірнеше маркеттер мен әлеуметтік дүкендерді аралады. Ондағы әлеуметтік нан мен азық-түлік бағаларымен танысты. Рейд барысында облыстық кәсіпкерлік және сауда басқармасының басшысы Нұрлан Байғұт бағаны тұрақтандыру үшін атқарылып жатқан шараларды баяндады.
«Қазіргі таңда Түркістан қаласына бидайды төмен бағамен жеткізу жөнінде келіссіздер жүргізілген. Сондай-ақ, жергілікті «Ақжол» ЖШС наубайханасымен келісім-шарт жасалды. Наубайхана күніне 25000 дана нан өнімін даярлап, қала сұранысының 80 пайызын қамтып отыр. Әлеуметтік нан өндіру үшін наубайхана арзандатылған 1-сұрыпты бидай ұнымен қамтамасыз етілетін болады. Өндірушілерге арзан бағадағы шикізатты жеткізе отырып, әлеуметтік нан бағасын тұрақтандырып отыратын боламыз. Күнделікті 1-сортты ұннан жасалған әлеуметтік нан Түркістан қаласындағы 20 сауда орнында (әлеуметтік дүкендер, «Шапағат», «Береке» сауда үйлері) 75 теңгеден сатылуда. Ал облыс бойынша әлеуметтік нанның орташа бағасы 71,5 теңге көлемінде. Мамандар нанның салмағын да қадағалауда ұстап отыр», — деді Нұрлан Мархабатұлы.
Шара аясында Түркістан қаласындағы азық-түлікті төмендетілген бағамен сататын әлеуметтік дүкендер де таныстырылды. Түркістан облысы бойынша Тұрақтандыру қорының басқарма директоры Марал Марасилов жергілікті тұрғындар арзан бағада азық-түлік алулары үшін Түркістан қаласында 8 әлеуметтік дүкеннің жұмыс істеп тұрғанын жеткізді.
«Біздің қорымызда 14 әлеуметтік дүкеннің 8-і жұмыс істеуде. Алдағы уақытта қалған дүкендерді іске қосатын боламыз. Әлеуметтік 19 тауардың бағасын тұрақтандыру үшін жұмыстар атқарылуда. Жалпы қазіргі таңда қоймада 12 мың тонна өнім бар. Бұл қор бағаны қалыпты ұстауға жеткілікті. Ал әлеуметтік нан бағасын көтермеу мақсатында наубайханаларға арзан бағада ұн, субсидия беруді қолға алып жатырмыз», — деді Марал Марасилов.

Түркістан облысы әкімдігінің баспасөз қызметі негізінде дайындалды.

Түркістан облысы Арыс қаласындағы орталық Әл-Фараби алаңында қала күні тойланды. Меркелік іс-шараға жергілікті билік өкілдері мен тұрғындар және арнайы келген қонақтар қатысты.

Бұл күні жарылыстан кейін қаланы қайта қалпына келтіруге үлес қосқан азаматтарға, ерен еңбектің үлгісін көрсеткен дала еңбеккерлеріне «Еңбек даңқы» төсбелгілері табысталды. «Алғыс хат» пен «Құрмет грамотасымен» марапатталып, бағалы сыйлықтар табыс етті. Арыс аспанын әнге бөлеген мереке одан әрі концерттік бағдарламаға ұласып, өнер иелері жиналған қауымға ән-биден шашу шашты. Сондай-ақ Арыс қаласында дәстүрге айналған «Алтын күз – 2019» жәрмеңкесі өтті. І-Арыс теміржол вокзалы алдындағы алаңшада шаруалардың өндірген өнімдері арзан бағада халыққа ұсынылып, көрме ұйымдастырылды. «Алтын күз – 2019» жәрмеңкесіне Ақдала, Байырқұм, Жиделі, Дермене, Монтайтас, Қожатоғай ауылдық округтерінен келген шаруа қожалықтары мен жеке кәсіпкерлер өздерінің өндірген өнімдерін халыққа базар бағасынан 20-30 пайызға төмен бағада ұсынды.

Түркістан облысы әкімдігінің баспасөз қызметі негізінде дайындалды.

Түркістан облысы, Ордабасы ауданының 55 жасқа толуына орай өткен дүбірлі тойға ҚР Премьер-Минстрінің орынбасары Бердібек Сапарбаев пен Түркістан облысының әкімі Өмірзақ Шөкеев қатысты. Аудан орталығы Темірлан қаласындағы Қажымұқан атындағы орталық стадионда өткен салтанатты шараға келген билік басшылары халыққа құттықтауларын жеткізді.

«Қазақ рухының қағбасы – Ордабасы» мерекелік шарасында түрлі бағдарламалар ұйымдастырылған. Қонақтарға «Алтын күз» айдары бойынша ұсынылған ауылшаруашылығы өнімдерінің, қол өнер шеберлерінің және түрлі ұлт өкілдерінің көрмесі ұсынылды. Азулы айтыскер ақындар додаға түсіп, өзара бақ таластырды. Тарихқа тұнған, тағылымы мол Ордабасы туралы ғылыми – танымдық конференция өтті. Көпшілікке «Күш атасын танымас» ұлттық спорт ойындары көрсетілді.
Түркістан облысының әкімі Өмірзақ Шөкеев Ордабасы ауданының әйгілі 10 азаматын «Ауданға сіңірген еңбегі үшін» төс белгілерімен марапаттады. Сондай- ақ, атаулы мерекеге орай аудан орталығы Темірлан елді мекенінде жаңадан бой көтерген тұрғын үйден көпбалалы және аз қамтылған 20 отбасыға пәтер кілттері табыс етілді. Мерекелік іс — шара ҚР эстрада жұлдыздарының шеруімен жалғасты.
Ордабасы тауының қойнауында 1726 жылы Орда тігіліп, қазақтың үш жүзінің игі жақсылары бас қосқан. Алаш жұртының пәтуаға келіп, жоңғар басқыншылығына қарсы күреске бірігуі тұтас елдің тағдырын шешкен тарихи оқиға болатын. Осы кезден бастап ол киелі, әулиелі жер саналып келеді. Бүгінде ауданда 120 мың халық тұрады.

Түркістан облысы әкімдігінің баспасөз қызметі негізінде дайындалды.

Түлкібас ауданында Тұңғыш Президент саябағындағы «Жастар аллеясының» ашылу салтанаты өтті. Бұл бастама ағымдағы жылдың ақпан айында жастар жылына орай аудан әкімдігінің ұйытқы болуымен өткен «Жастар жалыны» атты форумда ауданның белсенді жастары тарапынан ұсыныс ретінде айтылған болатын.

Бүгінгі таңда өңір жастарының көтерген мәселесі назардан тыс қалмай, аудан әкімі Н. Тұрашбековтың бастамасымен іске асып отыр. «Тұңғыш Президент» саябағында бүгінгі күнде «Жастар аллеясының» құрылыс жұмыстары толығымен аяқталып, пайдалануға берілді.
Аллеяның ашылу салтанатына аудан әкімі Н. Тұрашбеков, Абайтанушы, филология ғылымдарының докторы, профессор М. Мырзахметов Түркістан облысының ардагерлер кеңесінің төрағасы Ж. Мәуленқұлов бастаған облысымыздың әр ауданынан келген зиялы қауым өкілдері қатысты.
Сонымен қатар, салтанатты шара барысында келген қонақтар отау құрған жас отбасыларға неке куәліктерін тапсыру рәсімінің куәсі болып, аллея аумағына ағаш көшеттерін отырғызды.

Түркістан облысы әкімдігінің баспасөз қызметі негізінде дайындалды.

Аймақ басшысы Өмірзақ Шөкеев алдымен Қазығұрт ауданындағы Дінмұхаммед Қонаев көшесінің бойындағы абаттандыру жұмыстарымен танысты. «Ауыл – Ел бесігі» арнайы бағдарламасы аясында «Мемлекеттік рәміздер» және «Рухани жаңғыру» аллеяларының құрылысы екі ай ішінде толығымен аяқталып, ел игілігіне тапсырылған.

Мұнан соң Түркістан облысының әкімі жөндеуден өткен орталық стадионда болды. Осыдан жарты ғасыр бұрын салынған спорт алаңы осы уақыт ішінде алғаш рет күрделі жөндеуден өткен. Қазір жаңа тыныс бітіп, жасөспірімдерді қабылдауға дайын. Стадионда 28 балалар тобы спортпен айналысады.
Келесі нысан — Қызылқия ауыл округіндегі «Амангелді» шаруа қожалығы. Диқандар тамшылатып суару әдісін қолданып, бау-бақша баптау кәсібімен айналысады. Жоғары сұрыпты алма, шабдалы, шие, алхор, өрік және алмұрт, жүзім өсіреді. Шаруа қожалық қоймасында 2 мың тонна жеміс-жидек сақтауға болады.
Аймақ басшысы Шарбұлақ ауыл округіне қарасты «Сапа-2002» ЖШС- ін аралап көрді. Қожалық егін егіп, мал бордақылау кәсібімен айналысады. 10 мың бас уақ мал бордақылау кешенінен жарты жылда 150 мың тоннадан астам ет экспортталған.
«Мал шаруашылығын дамыту үшiн бiрiншi кезекте ветеринария саласын дамыту керек. Бұл мәселені дұрыс жолға қоя алмасақ, ет экспорты туралы айту да әбестік. Бізде ет өнімдерінің, оның ішінде сиыр еті мен қой етінің сыртқы саудадағы потенциалы өте жоғары. Дегенмен, алдымен ішкі нарықты қамтамасыз ету жағын алға қою керек», — деді Өмірзақ Естайұлы шаруалармен кездесу кезінде.
Шаруалар Қазығұрт қымызына сұраныстың өскенін айтып өтті. Сондай-ақ таңқурай өсіруді кәсіп еткен жергілікті диқандар жылына 2-3 өнім алу әдісін мықтап қолға алған.
Ауданда өсімдік майын өндіру цехы дайын өнім шығарады. Өндіріс қуаттылығы жылына 1000 тонна өнімді құрайтын цех Қытай Халық Республикасына мақсары майын экспорттайды. Кәсіпорын мақта майын да өндіреді.

Түркістан облысы әкімдігінің баспасөз қызметі негізінде дайындалды.

ҚР Президентінің халыққа арнаған Жолдауын түсіндіру мақсатында Түркістан облысына келген
жұмысшы топ өңірдің жұртшылығымен кездесті.

Премьер-Министрдің орынбасары Бердібек Сапарбаев бастаған топ мүшелері облыс әкімі Өмірзақ Шөкеев пен басқарма басшылары, ардагерлер мен көпбалалы отбасылар, зиялы қауым мен үкіметтік емес ұйымдардың өкілдері, білім, денсаулық сақтау, спорт, мәдениет саласының қызметкерлері мен жастар, бизнес және азаматтық қоғам өкілдері бас қосқан жиында Жолдаудың басым бағыттары мен мемлекеттік бағдарламалардың жүзеге асу барысын баяндап өтті.
Кездесуде алғашқы сөз алған Бердібек Сапарбаев атаулы әлеуметтік көмектің жаңартылған формасы мен міндетті әлеуметтік-медициналық сақтандыру жүйесі, білім беру, құқық қорғау салаларындағы реформалар туралы баяндады.
«Халық денсаулығы туралы» Кодекстің жобасы Парламенттің қарауына енгізілген. Оған сәйкес 2020 жылдан бастап МӘМС жүйесі жұмыс істей бастайды. Қазіргі қолданыстағы жүйе бойынша тегін көрсетілетін қызметтер сол қалпы сақталып қалады. Сақтандыру жүйесі қосымша қызметтерді қамтиды. Жаңа жүйе бойынша халықты дәрі-дәрмекпен қамту, медициналық оңалту қызметтері жетіле түседі. Сондай-ақ, 2025 жылға дейін барлық елдімекендерде ең кемінде медициналық бекет немесе емхана болуы тиіс деген мақсат бар. Мұнан бөлек апатты жағдайдағы барлық медициналық мекемелер жөнделеді әрі олардың материалдық-техникалық базасы халықаралық талаптарға сәйкестендіріледі», — деді вице-премьер.
Бердібек Мәшбекұлының айтуынша, 2019 жылы бір ғана Түркістан облысында мұқтаж отбасыларға атаулы әлеуметтік көмек беруге 63 миллиард теңгеден астам қаржы жұмсалған. Көпбалалы отбасыларға табысына қарамастан төленетін мемлекеттік жәрдемақы мен әлеуметтік пакеттің тағайындалуына орай келер жылдан бастап бұл сомма еселеп арта түспек. Сондай-ақ, Президент Жолдауында дарынды балаларды қолдаудың Жол картасын әзірлеуді тапсырғаны белгілі. Осыған орай Үкімет «Ел үміті» атты жоба жасап шықты. Жоба аясында келер жылдан бастап Қазақстан бойынша ең дарынды 1 000 бала іріктелініп, мемлекеттің толықтай қамқорлығына алынбақ. Кездесуде тұрғындар өздерін мазалаған мәселелерге байланысты ой пікірлерін ортаға салып, сауалдарын қойды. Мұнан кейін Бердібек Сапарбаев бастаған үкімет мүшелері өңірдің ардагерлерімен кездесті. Келелі басқосуда ел ағалары халықты толғандыратын мәселелерді айтып көкейде жүрген ойларын жеткізді. Оңтүстік өңірінде атқарылып жатқан ауқымды тірліктерге ризашылықтарын білдіріп, Мемлекет басшысы Қ. Тоқаевтың қойған мақсаттар мен мiндеттер орындалып жатқанын атап өтті. Ақсақалдар кеңесінің мүшелері бұл тұста Түркістан облысының басшысы Өмірзақ Шөкеевтің атқарып жатқан еңбегіне оң бағасын берді.

Түркістан облысы әкімдігінің баспасөз қызметі негізінде дайындалды.