ҚЫСҚА ДАЙЫНДЫҚ МӘСЕЛЕЛЕРІ ПЫСЫҚТАЛДЫ
Қытымыр мінезді қыс мезгілі де келіп қалды. Алда аязды күндер бар. Әдетте осындай суық мезгілде орын алатын жайсыз апаттардың әлеуметті біраз әбігерге салатыны белгілі. Сондықтан төтенше жағдай қызметі қашан да әзір болуы шарт. Осы орайда, Шымкент қала әкімінің орынбасары Айдын Кәрімовтің төрағалығымен төтенше жағдайлардың алдын алу және оларды жою жөніндегі жоспарлы комиссия отырысы өтті.
Күн тәртібінде осы бағыттағы бірқатар өзекті мәселе талқыланды. Қыс маусымында халықты, қала аумағындағы мекемелерді сапалы табиғи газбен, жылумен, электр қуатымен қамтуда, оқыс жағдайларды алдын алуда атқарылған жұмыстар пысықталды. Сондай-ақ жауаптылар көлік жолдарындағы қозғалысқа қолайлы жағдай жасау бағытындағы шараларды баяндады.
Көпқабатты тұрғын үйлер мен жеке ғимараттарда сирень-сөйлеу құрылғыларын орналастыру, пиротехникалық заттарға қатысты қауіпсіздік шараларын күшейту жұмыстары қарастырылды. Сонымен қатар комиссия отырысында қала аумағындағы хостелдердегі өртке қарсы қауіпсіздік мәселелері баяндалып, құзырлы органдарға келеңсіздіктерді алдын алуда нақты тапсырмалар берілді. Комиссия отырысында қала халқының қауіпсіз тыныс-тіршілігін қамтамасыз етудегі өзекті мәселелерді шешуде, төтенше жағдайлардың алдын алуда шұғыл түрде шаралар қабылдау бойынша бірқатар тапсырма жүктелді.
