Маңызды

Үшінші мегаполис Шымкентте 18-маусымда «Fontan» аквапаркі ашылды. Салтанатты шараға жергілікті билік басшылары мен нысанның ашылуын асыға күткен шаһар тұрғындары қатысты. Қаланың кескінін аша түскен нысан туралы облыс басшысы Ж. Түймебаев:

– Бүгін баршамыз қуанышты оқиғаның куәсі болып отырмыз. Жаңадан ашылып отырған заманауи аквапарк барлық талапқа сай етіп жасалған. Бүгінде Шымкентте халықтың тынығып, демалуына арналған орындар көбейіп келеді. Мәселен, жуырда ғана қаланы қақ жарып ағатын Қошқар ата өзенінің бойы абаттандырылып, онда суға шомылуға арналған орындар пайда болды. Мұндай жұмыстар әлі де жалғасын табатын болады, – деді.
Соңғы үлгіге сай жарақтандырылып бой көтерген аквапарктің жалпы аумағы 2 гектарды құрайды. Онда 8 су сырғанағы бар. Оның екеуі 22-метрді құрайды. Мұндай биіктікті қамтитын су сырғанақтары еліміздің ешбір аумағында кездеспейді. Қалашықтағы жасанды толқыны бар бассейнде келушілердің көңілінен шығатын болады. Аквапарк басшылығы бұл демалыс орнының Орта Азия бойынша ересектер мен балаларға арналған ең үлкен су қалашығы екенін мәлімдеуде.
Бір тәулікте 2 мыңға жуық адамға сапалы қызмет көрсету мүмкіндігіне ие аквапарктің ендігі кезекте 200-ге жуық адамды тұрақты жұмыспен қамтитын болады.

С. НҰРАЙ.

Осы аптада мемлекет басшысының «Болашаққа бағдар: рухани жаңғыру» атты бағдарламалық мақаласы мен Астана қаласының 20 жылдығына орай Түркістан облысының (Оңтүстік Қазақстан) Астанадағы үш күндік мәдени күндері өтті. Үш күнге жалғасқан мәдени күндер аясында елордадағы «Оқушылар» сарайында «Кино – руханияттың көзі» жобасымен күнгейде түсірілген анимациялық және көркем фильмдер көрсетілімі болды. Онда балалардың рухани әлемін байыта түсетін, патриоттық рухта тәрбиелейтін тарихи-танымдық «Отырарды қорғау», «Киелі Қазығұрт» анимациялық фильмдері мен «Көне жетігеннің сыры» атты телехикая астаналық балғындардың назарына ұсынылды.

Аталған фильмдер Елбасы Н.Назарбаевтың «Болашаққа бағдар: рухани жаңғыру» бағдарламалық мақаласы аясында 2017 жылы аймақ басшысы Ж.Түймебаевтың бастамасымен өңірдегі «САҚ» киностудиясы түсіргенін айта кетейік.
Өз кезегінде бұл тарту ондағы балалардың тарихи танымын кеңейтіп қана қоймай, оларға естен кетпес рухани қуаныш сыйлады.
Түркістан облысының Астанадағы мәдени күндері аясында жергілікті қолөнершілер мен қылқалам шеберлерінің 500-ден астам туындысы қала тұрғындары мен қонақтарына «Астана» концерт залының фойесінде ұсынылды.
Кешенді көрмеде келушілер назарына Оңтүстік Қазақстан облысының қасиетті, киелі жерлер тізіміне енген тарихи-мәдени орындары, мәдени іс-шараларда түсірілген көркем, анимациялық, деректі фильмдер туралы видео және суреттер, белгілі қылқалам шеберлерінің шығармалары, қолөнер шеберлерінің жасаған бұйымдары, облыстың көркем жерлері бейнеленген фотосуреттер, ақын-жазушылардың кітаптары мен ұлттық киімдер, Астананың көрікті орындары бейнеленген кілемдер, «Қазақстандағы 100 жаңа есім» жобасына енген азаматтар туралы мәліметтер орналастырылды.
Осы шара аясында облыс шеберлерінің кенеп бетін көмкерген бас қаламыз туралы туындылары жұрт көңілінен шықты. Келушілерді қатты таң қалдырғаны ол «Ақорда», «Әзірет Сұлтан», «Нұр Астана» сынды қаланың кескін көрінісін ашатын бас нысандарының кілем бетіне айнытпай түсірілгені болды. Өз кезегінде олар Шымкенттегі «Бал Текстиль» және «Назар текстиль» сынды қос бірдей кілем зауытында дайындалған.
Іргелі зауыттың шеберлері дайындаған мұндай қайталанбас туындылардың арасында Астананың ажарын ашатын жоғарыдағы нысандардан бөлек, «Ғашықтар саябағы», «Хан шатыр» сауда орталығы, «Мәңгілік ел» қақпасы, «Бәйтерек» монументі, Есіл жағасы мен қаланың қос жағалауын байланыстырып тұрған көпірлердің кілем бетіне тоқылып, дәл суреттегідей айқын бейнеленгені жұртшылықтың таңдайын қақтырды. Шымкенттік тоқыма шеберлері Елорданың көкпен таласқан тұрғын үйлерін де кілем бетіне ерекше үйлесіммен түсірген.
Бұл туындылардың барлығы келушілерге ерекше эстетикалық ләззат сыйлайды.
Бұдан бөлек «Ән мен күй әлдилейді Астананы» атты Түркістан облысының Астанадағы мәдени күндері аясында Елорда төрінде «Асқақтай бер, Астана!» атты облыс өнерпаздары дайындаған гала-концерт болып өтті.
Ол «Шарықтай бер, Астана» театрландырылған-хореографиялық композициясы бойынша басталып, күміс көмей әншілердің дәстүрлі әндер шеруі, қазақ және классикалық әндер айтуымен жалғасты. Сонымен қатар, Ш.Қалдаяқов әндерінен попурри айтылып, «Дала рухы» композициясы көрсетілді.
Жалпы үш күнге созылған мәдени күндер аясында облыстағы өнер қауымының жұртшылыққа көрсеткен мерекелік шаралары мерейімізді асырып, рухымызды асқақтатты.

Н. САДЫҚ.Ф

Кез келген қуанышқа ортақ болу адамзат баласына керемет көңіл күй сыйлайды. Кісінің жақсылығына шын қуанып, оған тарту жасау қазақ халқының ең бір игі қасиеті. Биыл Сарыарқа төсіне туын тіккен еліміздің еңселі Елордасы Астананың 20 жылдығы қарсаңында да тұтас қазақ халқы осы бір жақсы әдетінен жаңылмағаны қандай ғанибет десеңізші.

Бас қаламыздың 20 жылдық мерейтойына аймақтардың барлығы бірауыздан келісіп, бір-бір әлеуметтік маңызға ие нысандарды салып беру туралы бастаманы екі сөзге келмей қабылдағаны сол сөзіміздің жарқын мысалы. Соған сәйкес әрбір облыс еңсені тіктеп, өздеріне бір міндетті жүктеп алды. Осы бағытта Елордада қолға алынатын жұмыстар да белгілі болды. Атап айтқанда, Ақтөбе облысы қаланың кескінін аша түсетін «Бейбітшілік қақпасы» композициясын, Алматы қаласы 240 орындық балабақша салуды, Алматы облысы Арай саябағы базасында спорттық-сауықтыру қалалық паркін, ал Атырау облысы Есіл өзені арқылы өтетін велосипедшілер мен жаяу жүргіншілер көпірін салатын болады. Сонымен қатар, Қызылорда облысы «Космос» тақырыбына ашық алаңы бар гүлзар-бақ пен экспозиция тартуға кіріссе, Шығыс Қазақстан облысы Ботаникалық саябаққа жарықты-музыкалық фонтанның құрылысын жүргізеді. Елордаға іргелес Қарағанды облысы «Қазақ еліне мың алғыс!» монументі мен жаяу жүргіншілер бульварын тұрғызады. Каспийдің жағасында орын тепкен Маңғыстау облысы бас қаладағы Достық үйін қайта қалпына келтіреді. Батыс Қазақстан облысы болса Жеңіс пен Бөгенбай батыр даңғылдарының қиылысына гүлзар салмақ. Ал қалған Солтүстік Қазақстан, Павлодар, Қостанай, Ақмола, Жамбыл, Түркістан облыстары мен Шымкент қаласы бірігіп Елорданың торқалы тойына тарту ретінде 56 шақырым веложолды салады. Тұрғындардың талғамынан жүз пайыз шығатын бұл жоба негізінде Астанадағы қалалық саябақтан бастап Ильинка кентіне дейінгі жалпы ұзындығы 56 шақырымға созылған веложол ел игілігіне берілетін болады. Осы ретте Астанаға тарту ретінде салынатын веложолдың қалалық саябақтан бастап Министрлер үйіне дейінгі 5,173 шақырымын Түркістан облысы мен Шымкент қаласы атқаратынын айта кетейік. Торқалы той қарсаңындағы бұл тартулардың игілігін тек астаналықтар емес, тұтас ел жұрты көретін болады.
Астананың 20 жылдығына орай аймақтардың жоғарыдағыдай тарту жасауы біздің бірлігімізді нығайтып, іргемізді бекем етері сөсіз. Жалпы Түркістан облысы мен Шымкент қаласы Астананың 20 жылдығы мерекесіне ерекше қуанып, оның әрі қарай дами түсуіне шын тілектестік білдіріп жатқанын нақты тірліктермен көрсетіп отыр. Мәселен, осы айда Қазығұрт ауданындағы «Аманкелді» жауапкершілігі шектеулі серіктестігінің диқандары Алаштың асқақ айбары ару Астананың осынау мерекесіне орай Елордаға 20 тонна қызыл шиені тең-тең ғып жеткізуді қолға алған. Серіктестік мұнымен қатар өздерінің бау-бақшаларында өсірілген жүзім, алма, өрік, алқоры, алмұрт сынды дәмі тіл үйіретін жемістерді бас қалаға қарай бет алатын болады. Мұнымен қатар облыста тірліктің көзін таба алатын қасиетінің арқасында бизнес адымы ашыла түскен Уктам Абдурасулов есімді шаруа торқалы тойға тарту ретінде 90 мың түп барқытгүл, шырайгүл, сәлбен сынды гүлдерді жолдады. Өзінің қарамағындағы жылыжайға бір жылда миллион түп гүл өсіретін шаруаның Астананың көркіне ерекше көрік қосатын бұл жомарттығы нағыз азаматтық дерсің.
Елорданың тойы тек елордалықтардың қуанышы емес. Бұл тұтас елдің тойы. Мұны жергілікті жұрт санасына терең сіңдіру үшін облысымыз маусым айының екінші онкүндігінде «Астананың 20 жылдығына – 20 нысан» атты акцияны бастап кетті. Соған орай сол кездегі ОҚО басшысы Жансейіт
Түймебаевтың және сол кездегі облыс орталығы Шымкент әкімінің қатысуымен аудан, қалаларда әлеуметтік экономикалық маңызға ие 20 нысанның салтанатты ашылулары басталып кеткені белгілі. Олардың қатарында 19 маусымға дейін облыс орталығы саналған Шымкентте «Шымкент темір» жауапкершілігі шектеулі серіктестігі металлургиялық зауыты, ұлттық теннис орталығы, зообақтың «Африка» бөлігі, Астана даңғылы бойындағы гүлзар, облыс аумағында ашылатын төрт балабақша, Шардара ауданында 10 пәтерлі екі қызметтік үй, Төлеби ауданында 20 пәтерлі бес қабатты тұрғын үй, Бәйдібек ауданында 1 пәтерлі 20 коммуналдық тұрғын үй, киелі кент Түркістанда «Яссы құс» шаруақожалығының базасында сыйымдылығы 200 тоннаны құрайтын көкөніс және жеміс-жидек сақтайтын қойма болмақ. Бұдан бөлек осы акция аясында аймақта халықтың рухани сұранысын қанағаттандыратын 200 орынды мәдениет үйі, 600 орынға лайықталған мектеп, 60 балаға шақталған «Ақкен» емдеу-сауықтыру лагерінің ашылу салтанатының лентасы қиылатын болады. Бүгінде олардың басым бөлігі салтанатты түрде ашылып, пайдалануға беріліп қойды. Солардың бірі Шымкент зообағындағы «Африка» бөлігі болып табылады. Саванна тіршілігіне сәйкестендіріліп жасалған осы аумақтың салтанатты ашылу рәсімінде Ж. Қансейітұлы Астананың 20 жылдығына орай Шымкент зообағы аумағынан Елордаға 20 аңның атап айтқанда, арыстан, Амур жолбарысы, пума, қоңыр аю секілді жыртқыштар мен кезқұйрық, тілеміш, тазқара, үкі құстары сынды жануарлардың тарту етілетінін атап өткен-тін.
Осылайша Астананың 20 жылдығы қарсаңында тұтас ел аумағында нағыз мерекелік ауан қалыптасып жатыр. Бұлай болуы да заңдылық. Себебі Астана Қазақстандағы барлық өңірдің ағасы болып табылады.

Қазіргі таңда Шымкентте ең ескі ғимарат, 1949 жылы салынған «Арал» ресторанына күрделі жөндеу жұмыстары жүргізіліп жатыр. Бұл туралы Шымкенттегі ТVK арнасының тілшілері тарқатып айтты.

Қаланы қақ жарып ағатын Қошқар ата өзенінің жағасындағы бұл нысан Шымкенттегі әбден тозығы жеткен ғимараттардың бірі болып табылады. Өз кезегінде ол жуырда ғана жөндеуден өткен Қошқар ата өзенінің жағасына жақын болғандықтан, сол төңіректің сиқын бұзып тұрғаны сөзсіз. Осыны назарға алған жергілікті билік оны қайта қалпына келтіру жұмыстарын қолға алу шараларын бастап кеткен.
Жалпы бұл орын игі естеліктерге толы. Кезінде осы «Арал» қазіргі аға буынның жиі баратын демалыс мекені болған. Өйткені ондағы ас мәзірі мен ғимараттың өзен жағасына жақын орналасуы келушілердің көңілінен қошының бабында болуына серпіліс берген. Құрылыс жұмысына жауапты компания өкілі Ақылбек Байдарбеков:
– Осыдан 69 жыл бұрын салынған «Арал» рестораны соңғы рет 1960 жылы ағымды жөндеуден өткен. Содан бері ол бір рет те жаңартылмаған. Біз құрылыс жұмыстарын шамамен бір ай бұрын бастадық. Толықтай қайта қалпына келтіру барысында біз оның бастапқы келбетінің нұсқасын барынша сақтап қалуға күш саламыз, -дейді.
Тоқсаныншы жылдардың басында «Арал» рестораны «Шаттық» болып өзгертілген-тін. Енді осы нысанның иесі жөндеу жұмыстары аяқталған соң оған бұрынғы атауын беретін болады. Бұл бағыттағы жұмыстар толық аяқталған соң «Арал» рестораны өткенге салауат айтатын біраз шымкенттік тұрғындардың сүйікті орнына айналады деген сенім мол.

Н. ҚАЛЖАН.

Оның бірі елу балаға лайықталған №37 «Әйгерім» балабақшасы болып табылады. Бұл нысан психикалық дамуы кешеуілдеген балаларға арналып ашылып отыр. Онда аутизм, Даун синдромымен туылған 2-7 жас аралығындағы балалар қабылданады. Өз кезегінде орталықта мұндай топтағы балғындарға шеберліктері шыңдалған педагогтар қазіргі заманға сай жасалған бағдарламалар бойынша дәріс өткізеді. Тілінде мүкісі бар балалар үшін дефектологтардың жұмыс істеуі жолға қойылған.
Екінші ашылған орталық 60 адамға лайықталған №17 «Достық» балабақшасы деп аталады. Тірек-қимыл аппараты бұзылған ұрпақтар үшін ашылған бұл бақшада бала денсаулығын қалпына келтірудің бар мүмкіндігі қарастырылған. Яғни, мамандар сал ауруына шалдыққан балаларға жан-жақты оңалту шарасын жүргізетін болады.
Ерекше балаларға арналған бұл қос коррекциялық балабақша аймаққа белгілі кәсіпкер, «ОТАУ груп» компаниясының президенті Қайрат
Молдасейітовтың демеушілігімен ашылып отыр. Кең пейілді азаматтың қолдауымен бой көтерген бұл жобаның жалпы құны 280 млн. теңгені құрайды. Тағдыр талайы ауыр дертпен күресумен өрілген балақайлардың игілігі үшін кәсіпкердің жасаған сауап ісі өзгелерге үлгі болары сөзсіз.
Бұл мекемелерде балғындар тегін тәрбиеленетінін де айта кетейік. Ол үшін ата-ана баланың денсаулығында ақауы барын растайтын анықтамалар мен құжаттарды Шымкент қалалық білім бөліміне өткізіп, кезекке тұрулары қажет.
С. БЕК.

Шымкентте халықтың цифрлық сауаттылығын арттыратын арнайы курстар жұмыс істеуде. Семинар-курс Елбасының «Цифрлық Қазақстан» бағдарламасы аясында қолға алынуда.

Курстар Шымкент қалалық білім бөліміне қарасты 30-дан астам мектептерде алдын ала бекітілген кесте негізінде маусым-тамыз айлары аралығында жүргізілетін болады. Шараның мақсаты мегаполис тұрғындарының уақытты үнемдеумен қатар, шығынды бірнеше есеге азайту арқылы ыңғайлы өмір сүру мүмкіндігін туғызатын сандық жүйені кең ауқымда пайдалануды көздейді. Соның негізінде адамдар «Базалық», «Электронды үкімет», «Ашық үкімет» және «Е-коммерция» бойынша оқыту семинар курстарын толықтай меңгеретін болады. Толық ақпаратты Шымкент қаласы әкімдігінің shymkent.gov.kz сайтында көрсетілген «Цифрлы Қазақстан» айдарына батырманы басу арқылы таныса аласыз.
Сөз соңында цифрлық сауаттылығын арттыратын арнайы курстардың бір дәрісі үш сағатты қамтитынын айта кетейік.
С. НҰРАЙ.