Маңызды

 

Кешегі аптада ақпараттық-коммуникациялық орталығында Шымкент қаласы Абай ауданының әкімі Б.Парманов және тауарлар мен көрсетілетін қызметтердің сапасы мен қауіпсіздігін бақылау басқармасының аудандық басшысы А.Шажаевтың қатысуымен коронавирус пандемиясына қарсы ауданда атқарылып жатқан жұмыстар және сақтық шаралары жөнінде брифинг өтті.

 

— Қаланың бас санитарлық дәрігері қабылдаған қаулыға сәйкес барлық шектелген шаралардың орындалуы бойынша күнделікті рейдтік іс-шаралар атқарылуда. Сонымен қатар, карантинге жабылған жеке секторлардағы тұрғын үйлердің қатты тұрмыстық қалдықтары аптасына бір рет, көпқабатты тұрғын үйлердің қалдықтары күнделікті «Спецавтотранспорт» ЖШС мекемесінің арнайы техникасымен бөлек шығарылуда және көшелер мен тұрғын үйлер залалсыздандырылуда. Қазіргі таңда аудан аумағында төрт мобильді топ сауда орындары мен ірі нысандарда санитарлық талаптарды сақтау бойынша тексеру жұмыстарын жүргізуде, — деді Б. Парманов.

Абай аудандық тауарлар мен көрсетілетін қызметтердің сапасы мен қауіпсіздігін бақылау басқармасының тексеруі барысында бетперде тағу режимінің орындалмауы, тепловизорлардың жоқтығы мен әлеуметтік қашықтықтың сақталмауына қатысты тәртіп бұзушылықтар анықталған. Соған байланысты тиісті түсіндірмелер мен кеңестер берілуде.

Бүгінгі таңға дейін 4 мобильдік топ бекітілген аумақтары бойынша 674 кәсіпкерлік нысанға мониторинг жұмыстары жүргізіліп, ескерту парақшалары таратылды. ҚР «Әкімшілік құқық бұзушылық туралы» Кодексінің 462 бабы, 3 тармағы бойынша аудандағы кәсіпкерлік нысандарға 11 айыппұл хаттамасы толтырылды. Жалпы аудан аумағында санитарлық талаптарды сақтамағандарға 2 млн. теңгеге жуық айыппұл салынып, 450 хаттама толтырылған.

 

Шымкент қаласының аудандық тауарлар мен көрсетілетін қызметтердің сапасы мен қауіпсіздігін бақылау басқармаларының қызметкерлері, жергілікті полиция қызметкерлері және аудандық әкім аппараттарының кәсіпкерлікті қолдау бөлімі қызметкерлерінен құрылған мониторинг топтары Шымкент қаласының Жібек Жолы, Рысқұлов, Алдияров, Мақталы, Уәлиханов, Нұршашу, М.Маметова, Мақталы, Б.Момышұлы, Қазиев, Қабанбай батыр, Жангелдин, Байтұрсынов, Тәжібаев, Ерманов, Төле би, Арғынбеков, Бәйдібек би, Төреқұлов көшелері, Бәйдібек би даңғылы, «Теріскей» мөлтек ауданы, «Шапағат» мөлтек ауданы, «Авто-Нұр» базары, «Бозарық» саяжайында орналасқан нысандарға мониторинг жүргізді.

Осылайша мамандар 77 нысанды тексерді.Оның ішінде, тамақтану орындары мен базар, өндіріс орындары бар.

Сонымен қатар, Шымкент қаласы бойынша 8 саябақ, 37 гүлзар мен 4094 аялдама залалсыздандырылды.

Қоғамдық көліктер де коронавирусқа қарсы дәріленді. Атап айтар болсақ, дезинфекциялау жұмыстарымен 64 автопарк, 323 бағыттағы автобустар қамтылды.

Мониторингпен қамтылған нысандардың барлығында коронавирустық инфекцияның (COVID -19) таралуына жол бермеу жөнінде санитариялық-ағарту, түсіндірме жұмыстары жүргізілді. Алдын алу шаралары жөнінде кеңестер берілді.

Шымкентте 39 259 азамат баспанаға мұқтаж. Бұл туралы Шымкент қаласы әкімінің қатысуымен өткен жиналыста Тұрғын үй және тұрғын үй инспекциясы басқармасының басшысы Ғ. Төлепов айтты.

 

Бір қуанарлығы, жыл соңына дейін 450 көпбалалы отбасы, 394 әлеуметтік жағынан осал топтағы азамат, 300 жас баспаналы болады.

Айта кетейік, ағымдағы жылы «2-10-20» бағдарламасы бойынша 1047 аз қамтылған отбасы электронды түрде несие арқылы пәтер алуға өтінім берген. Қазіргі таңда құжаттарды тексеру жұмыстары жүргізілуде.

Ал «7-20-25» бағыты бойынша 219 азамат, «Тұрғын үй құрылыс жинақ банкі» арқылы 73 азамат баспаналы болған.

Жыл соңына дейін «2-10-20», «7-20-25» бағдарламасымен бастапқы жарнаның бір бөлігіне әлеуметтік көмек ретінде қайтарымсыз негізде жергілікті бюджеттен ақша қаралып, сертификаттар беру жоспарланған.

Жалпы Шымкентте кезекте тұрғандар: жетім және ата-ана қамқорлығынсыз қалғандар – 1631, көпбалалы – 5188, әлеуметтік жағынан әлсіз топ – 12829, мемлекеттік және бюджеттік ұйым қызметкерлері – 19585, жалғыз тұрғын үйі апатты деп танылған – 26.

Түркістан облысы, Шардара ауданы, Қоссейіт ауылдық округінде тұратын жалғызбасты төрт баланың анасы Есболатова Нұргүл Бекжанқызы 1983 жылы туған мектеп түлектерінің демеушілігімен баспаналы болды.

 

Айта кетерлігі, 1983 жылы туған мектеп бітіруші түлектер 20 жылдық кездесулерінде өздері туған ауыл тұрғынына қамқорлық жасап, көпбалалы анаға 3 бөлмелі тұрғын үйдің кілтін табыстады. Олар мектептен 2000 жылы түлеп ұшқан еді. Сондай-ақ, тұрмыстық техникаларды сыйға тартты. Игі шараға ауыл әкімі мен билері де мұрындық болған.

Қоссейіт ауылында жыл сайын ізгі іс жасау үрдіске айналып отыр. Ізгіліктің шапағатын көріп, өз үйінің табалдырығын аттаған Нұргүл Бекжанқызы көмек қолын созған барша азаматтарға алғыс білдірді.

 

10 айлық нәресте Жетісай ауданынан «Облыстық фтизиопульмонология орталығына» туберкулез ауруынан емделуге жатқызылған. Тексеру барысында баладан COVID-19 инфекциясы анықталған. Сәби бірден Ленгір қалалық жұқпалы аурулар ауруханасына жеткізіліп, екі апта бойы ем қабылдайды. Білікті дәрігерлердің коронавирус індетін шұғыл түрде анықтап, дер кезінде емдік шара көрсетуінің арқасында науқас сәбидің өміріне де ешқандай ерекше қауіп жоқ.

«Өкпенің 2 бірдей қауіпті дертпен зақымдалғаны бала өміріне үлкен қауіп төндірді», дейді дәрігерлер. Сәбидің науқас азаматпен қарым-қатынаста болғаны белгілі. Қазір ол COVID-19 инфекциясынан емін толығымен аяқтап, талдамасының «теріс» болуына байланысты «Облыстық фтизиопульмонология орталығында» туберкулезге қарсы емін жалғастыруда.

«Өкпе ауруына ұшыраған азаматтар онсыз да әлсіз келеді. Науқастарды барынша Сovid-19 инфекциясынан қорғауға тырысамыз. Барлық сақтық шаралары қамтамасыз етілген. Ауруханада тіпті коронавирусты ерте анықтау мақсатында арнайы вирусологиялық зертхана қызмет көрсетеді. Зертхана соңғы үлгідегі аппараттармен жабдықталған. Мамандарымыз оны жақсы меңгеріп, халыққа көрсетілетін медициналық қызмет сапасын арттыруға өз үлестерін қосуда»,-дейді «Облыстық фтизиопульмонология орталығының» бас дәрігері Болатхан Сағымбеков.

Мәліметке сүйенсек, Түркістан облысында бүгінгі күнге дейін коронавирус індетін 1 жасқа дейінгі 10 бала жұқтырған. Олардың сегізі жазылып шықты. Екеуі инфекциялық емдеу орталығында ем қабылдауда. Жалпы, өңірде коронавирустық инфекцияның расталған 400 жағдайы тіркелген. Дәрігерлердің арқасында 257 науқас дертінен жазылып, отбасына оралды.

 

 

Апталық мәжіліс отырысында Түркістан облысының әкімі Өмірзақ Шөкеев осылай деді. Атқарылған жұмыстар жайлы баяндаған Кентау қаласының әкімі Дәурен Махажанов шаһардың даму жоспарларымен бөлісті.

Кентау қаласы бойынша биыл бірқатар инвестициялық жобалар іске қосылмақ. Атап айтсақ, Кентау қаласы Қотырбұлақ елді-мекенінде салынып жатқан күн сәулесінен қуат алатын электростанция құрылысы жыл соңына дейін аяқталады. «Hevel Kazahstan» ЖШС жобасының құны 15,9 млрд.теңге мөлшерінде. Сондай-ақ, Кентауда полиэтиленді труба шығару цехы, радиатор істеу цехы және «Темір-бетон бұйымдарын өндіру зауыты» биыл іске қосылады.

«Биыл «Ауыл – Ел бесігі» бағдарламасы аясында Кентау қаласына қарасты Шаға және Ораңғай ауылдарында 1 мектеп күрделі жөндеуден өтті. 36 жол жөнделіп, жаяу жүргінші жолдары салынды, көшелер жарықтандырылуда. «Жұмыспен қамтудың жол картасы» бағдарламасымен 1 мектеп күрделі, 35 мектеп ағымдағы жөндеу жұмыстарын аяқтады. Көшелер реттеліп, саябақтар абаттандырылды. 1 көпір және жаяу жүргінші жолдар жөнделуде. Аталған бағдарлама аясында 300-ден астам жұмыс орнын ашу жоспарланған», – деді Кентау қаласының әкімі.

Өмірзақ Естайұлы кезінде өндірісі өркендеген өлке болған 65 жылдық тарихы бар Кентау қаласын Түркістанмен қатар дамытуды мықтап қолға алуды тапсырды. Қала басшысына Кентау қаласына қарасты ауылдық округ халқының әлеуметтік, құрылыс, инфрақұрылымдық мұң-мұқтаждары мен өзекті мәселелерін дер кезінде шешуді жүктеді. Ауылшаруашылығы, кәсіпкерлік және өндірісті дамытып, инновациялық жобаларға басымдық беруді міндеттеді.

 

 

Мақтарал ауданындағы Өргебас ауылының тұрғындары судан зақымданған үйлерін сүріп, құрылыс жұмыстарына кірісіп кетті. Ауыл тұрғындарының әрқайсысына ҚР Үкіметі резервінен 17 млн. теңге беріледі.

 

Айта кетерлігі ауылда жалпы 190 үй бар, бүгінде 168 үй иесіне 8,5 млн теңге аударылған. Қалған отбасылармен келісім-шарт жасалуда. Жалпы жәрдем қаржысы 3 бөлініп аударылатын болады.

Қазіргі таңда Өргебас ауылында 118 үй сүріліп, 35 үйдің іргетасы қаланып жатыр. Сондай-ақ, 3 үйдің дуалы өрілуде. Мәселен, ауыл тұрғыны Малыбек Жолдасов қаржының жартысын алып, қазір үйдің іртетасын қалау жұмыстарын аяқтауда.

«Мемлекеттен берілген 8,5 миллион теңгені алып, өзіміздің қалауымызша үй салып жатырмыз. Дуалын қыштан көтеремін деп жоспарлап отырмын. Құрылысын екі айда аяқтап, күн суығанға дейін кіріп аламыз деп отырмыз. Жұмысшылар жеткілікті, қаржы уақытында аударылды», — деді Малыбек Ергешұлы.

Сонымен қатар, Ә. Усманов қорының 1000 долларлық жәрдемақысын ауылдың 105 жанұясы алған, ал қалған отбасылардың құжаттары рәсімделуде. Ауылдағы үйлерді сүру, құрылыс қоқыстарын тазарту және құрылыс жұмыстарына 9 техника, 54 жұмысшы жұмылдырылған. Алдағы уақытта жұмыс күші бұдан да көбеймек.

 

Түркістан облысында «Евро – 5» стандартына сай отандық өнім, АИ-92 маркалы бензин, дизель жанармайы мен бензол, толуол, ксилол және үлгілі мазут өнімдері шығарылады. Бірегей жобаның ерекшелігі — бұл өнімдер көмірден өндіріледі.

Әлемде теңдесі жоқ жобамен облыс әкімі Өмірзақ Шөкеев арнайы танысып қайтты. Ордабасы ауданы, Бадам ауыл округіндегі «Стандарт Ресурсис» ЖШС көмір — химиялық комбинаты жылына 30 мың тоннаға дейін шикізат өндіруге қауқарлы.

1,5 млрд. теңге инвестиция құйылған жоба аясында 100-ге жуық жаңа жұмыс орны ашылмақ. Мемлекет тарапынан «Бизнестің жол картасы-2020» бағдарламасы аясында инфрақұрылым желісі жүргізіліп, 3 шақырым жерде темір жол тартылған. Қазіргі таңда зауытта құрылыс жұмыстары аяқталып, іске қосылуға дайындық үстінде.

Өмірзақ Естайұлы экспериментальды жобаны кеңінен жүзеге асыруды қолға алу керектігін танысу барысында ерекшелеп айтты. Ол үшін теңдесі жоқ технологияның қыр-сырын жаппай үйретуді тапсырды. Өнім тек ел көлеміндегі нарыққа ғана емес, ТМД елдеріне экспортталмақ. Негізгі мердігері-мұнай химиясы саласындағы нарық көшбасшыларының бірі болып табылатын ресейлік «ЭТН Циклон» компаниясы.

 

 

Түркістан облысында туризм саласын дамыту үшін туристік нысандарға баратын жолдардың жағдайын жақсарту бағытында ауқымды жұмыстар атқарылуда. Негізінен Төлеби ауданы туристер көп жиналатын демалыс орындары мол өлке қатарында.

 

2019-2020 жылдары Төлеби ауданындағы Бірінші Мамыр-Жаңажол елді мекендері арқылы «Сайрам-Өгем» ұлттық паркіне баратын облыстық маңызы бар КХ-112 автомобиль жолының 11 шақырымы орташа жөндеуден өтіп, пайдалануға берілді. Аталған жол соңғы 15 жылда ешқандай жөндеуден өтпегендіктен жағдайы қанағатсыз болып келген. Қазіргі таңда Түркістан облысы жолаушылар көлігі және автомобиль жолдары басқармасының тапсырысы бойынша мердігер мекеме «Бірлік» ЖШС-і тарапынан жол негізін арнайы техникамен нығыздау (ресайклерлеу) жұмыстары жүргізіліп, асфальт жабындысы толық жаңартылды.

Сонымен қатар, аталған жолдың бойында орналасқан Бірінші Мамыр және Жаңажол елді мекендерінде аяқжолдар төселіп, диодты жарықтандыру шамдары орнатылып, іске қосылды. Бұдан өзге жол таңбалары мен жаяу жүргінші өтпелері сызылып, 2 дана су өткізгіш құбыр ауыстырылды. Сондай-ақ, қауіпті аймақтарға көліктердің жылдамдығын баяулататын жол кедергілері орнатылды.

Жөндеуден өткен жол Төлеби ауданына оңтүстік аудандардан келетін демалушылар мен басқа да көлік жүргізушілері үшін өте қолайлы. Жол жүру уақыты біршама қысқарады. Осы бағыттағы келелі жөндеу жұмыстары алдағы уақытта жалғасатын болады.

 

Түркістан облысының әкімі Өмірзақ Шөкеев облыс орталығында салынып жатқан халықаралық әуежайдың және онда баратын автомобиль жолының құрылысын тексерді.

 

Қаладан 16 шақырым қашықтықта орналасқан әуежай халықаралық стандартқа сай және заманауи құрылыс технологиясымен бой көтеруде. «YDA Group» түрік компаниясы салып жатқан Түркістан халықаралық әуежайы жыл соңына дейін пайдалануға беріледі. Қазіргі таңда құрылыс алаңында инвестордың 102 арнайы техникасы мен 300-ден аса құрылысшысы тынымсыз еңбек етуде.

Туризм әлеуетін арттыру үшін облыста арнайы бағдарлама әзірленіп, 2025 жылға дейін турист санын 5 миллионға жеткізу көзделіп отыр. Осы мақсатта халықаралық әуежайдан екі күнде бір рет Түркістаннан Меккеге тікелей ұшақ ашу көзделген. Бұл мәселе былтыр желтоқсан айында өткен Түркістан облысының Мәскеудегі күндері барысында айтылды. Іс-шараға туристік компаниялар, туризм саласындағы қоғамдық бірлестік ұйымдары, қауымдастықтар мен мемлекеттік ұйымдар қатысты.

Әуежай 900 гектар аумақты қамтиды. Онда терминал, ұшу-қону жолағы және басқа да нысандар салынады. Әуежай терминалы жылына 3 миллионға жуық жолаушыға қызмет көрсете алады.