Маңызды

Бүгін Шымкент қаласының әкімі Ерлан Айтаханов «Shymkent» әлеуметтік-кәсіпкерлік корпорациясы» ҰК» АҚ ұжымымен кездесті.
Кездесу барысында ұзақ мерзімді әлеуметтік маңызы бар жобаларды іске асыру арқылы инвесторларды тарту, жұмыс орындарын құру, халықтың өмір сүру сапасын жақсарту мәселелері талқыланды. Қазақстан бойынша ұзақ мерзімді кезеңге арналған әлеуметтік мәселелерді шешу ӘКК-нің жұмысының басты басымдығы болуға тиіс.
Бұдан бөлек, «Автобус паркін жаңарту», «Шымкент сити» және «7-20-25» бағдарламасы бойынша тұрғын үйлер салу, әлеуметтік нысандар құрылыс жобасын сәтті жүзеге асырудың жолдары мен мәселелері қарастырылды.
Өз кезінде қала әкімі Е. Айтаханов шағын және орта бизнесті дамыту қаланың орталық бөліктерімен ғана шектеліп қалмай, шалғайдағы елдімекендерді де қамтуы керек екенін атап өтті.
Әлеуметтік кәсіпкерлік корпорациясының бүгінгі таңдағы негізгі басым аспектісі инвесторлар үшін қолайлы орта құру және жаңа әлеуметтік маңызы бар жобаларды іске асыру үшін әлеуетті инвесторларды іздестіру болып табылады.
Жобалық кеңсе институтын енгізу — бұл уақыт талабы екеніне тоқталған қала басшысы, бұл жобаларды сапалы орындауға мүмкіндік беретінін атап өтті. Қазіргі уақытта «Shymkent» ӘКК» АҚ жобалық басқаруға өтті, оның артықшылықтары жоба мен міндеттерді басқару, мобильді кеңсе және жобаға бағдарланушылық болып табылады.
Кездесу соңында қала әкімі тиісті салалық басқармаға корпорациямен бірлесіп жүзеге асырылатын жобаларға бақылауды күшейтуді айтты.

Шымкент қаласы әкімдігінің
баспасөз қызметі.

Арыс қаласындағы зақымданған 7613 үйдің 7166-сында жөндеу жұмыстары жүрсе, 447 үй қайта салынып жатыр. Қазіргі таңда 7000 үйдің жөндеу жұмыстары толық аяқталып, 23 үй қайта салынып бітті.
Қалған үйлердің құрылыс-жөндеу жұмыстарын 1 қыркүйекке дейін толық аяқтау жоспарланып отыр. Секторлар бойынша Атырау, Жамбыл, Қызылорда, Түркістан, Шығыс Қазақстан, Қостанай, Ақмола облыстары жөндеу жұмыстарын аяқтаса, Қарағанды, Қызылорда, Солтүстік Қазақстан облыстары жөндеу әрі қалпына келтіру жұмыстарын толық аяқтап отыр. Бүгін бұл туралы Арыс қалалық әкімдігінде өткен аппараттық жиында ҚР Индустрия және инфрақұрылымдық даму Бірінші вице-министрі Қайырбек Өскенбаев мәлімдеді.
Жиында облыс басшысы Өмірзақ Естайұлы құрылыс жұмыстары кенжелеп тұрған секторларға жауапты облыс өкілдеріне жұмысты тездетуді тапсырып, қыркүйек айына дейін толық аяқтауды жүктеді.
Сондай-ақ, басқосуда баяндама жасаған «Самұрық-Қазына» жылжымайтын мүлік қоры» АҚ басқармасының төрағасы Арман Жетпісбаев Арыс қаласындағы 68 әлеуметтік нысанның 56-сында құрылыс жұмыстары аяқталып, 12 нысан алдағы апта түгел пайдалануға берілетінін жеткізді. Сонымен қатар, жиында облыстық Қаржы басқармасының басшысы Абдрахман Тасыбаев арыстықтарға берілетін 100 мың теңге әлеуметтік жәрдемақыны беру жұмыстары бойынша 5 млрд. 67 млн. теңгенің халыққа үлестірілгенін баяндады. Бұдан өзге, облыстық Жолаушылар көлігі және автомобиль жолдары басқармасының басшысы Ролан Ибрагимов Арыс қаласында Көктем мөлтекауданы мен Ақымбеков, Қонаев сынды орталық көшелердің жөндеу жұмыстары қыркүйек айында толық аяқталатынын айтты.

Түркістан облысы әкімдігінің баспасөз қызметі.

Созақ даласының қасиеті шексіз. Неге басқа өңірде некен-саяқ жүзден асқан әулие Созақта жатыр? Неге Келіншектауға түйелер шөккен, Қыземшек пен Қотантас құпиялары, үш жүздің басын қосқан «Таңбалы тас» тылсымдары болашақ ғалымдардың басын ауыртып, миын қатыратын тың жаңалықтар болары анық.
Осындай ғажайып өлкеде дүниеге келген каратэ шебері қаратаулық Болат Алтынбек, кезінде Қаратау ауылында аз уақыт болса да мекен еткен атақты Нелли Ким, зілтемірші Шәдібекова, боксшы Біржан жақып, футболшы Таңат Нөсербаев, кеше ғана Қазақстанды ғана емес, көршілес мемлекеттердің таңдайларын қақтырған Акбар Елубайұлы осы Созақтың перзенттері, Теріскей даласының батырлары десек болады. Елді елең еткізіп отырған тағы бір атып келе жатқан жаңа, жас жұлдызымыз Нұрлантегі Мейіржан Нұрәділұлы. Бұл баламыз 2009 жылы 25 маусымда Жартытөбе ауылында дүниеге келген. Шайбалы хоккейімен 2015 жылдың 14 ақпанынан бастап айналыса бастады. Ең алғаш Шымкент қаласындағы мұз сарайына атасымен бірге жаппай сырғанаққа коньки тебуге барып, сол жерде хоккей ойнап жүрген балаларды көріп менде хоккей ойнайыншы деп қызығушылығын білдіріп «Торнада» командасының жас балаларымен жаттыға бастайды. Сол жылы наурыз айында бірінші рет Өзбекстан мемлекетінің астанасы Ташкент қаласына барып «Бинакор» командасының балаларымен жолдастық кездесу өткізіп жеңіспен оралады. 2017 жылы қазан айында мұзсарайының әкімшілігінің бастамасымен тек қазақ балаларынан құралған «Тұран» командасы қатарында шабулшы болып ойнауда. Көптеген ойындарда өзін жақсы жағынан көрсетіп команданың бірінші бестігінде ойнап нәтижелі шабуылшы бола білді. 2017 жылы Қырғызстан мемлекетінде Бішкек қаласының мэрі атындағы халқаралық турнирде АҚШ, Ресей, Литва, Өзбекстан, Қырғызстан, Қазақстан, командалары арасында «Тұран» командасы жүлделі 4-ші орын алып Мейіржан «Ең үздік шабуылшы» атанды. 16 гол және 11 голевой пас беріптіі. 2017-2018 жылы Астана қаласының 20 жылдығына арналған турнирде «Тұран» командасы 24 команданың ішінде 4 орынға ие болып Қазақстан чемпионатында 2009-2010 жылғы балалар арасында Қазақстан чемпионы атанды. Сол ойындарда Қазақстан бойынша үздік 10 мерген шабуылшылар арасында «Барыс» (Астана), «Торпедо» (Өскемен), «Құлагер» (Көкшетау) командаларының хоккейшілерімен болған ойында бірдей нәтиже көрсетіп үздіктер қатарынан көрініп, «Ең үздік ойыншы» деген марапатқа ие болды. «Тұран» командасы Қазақстан тарихында Оңтүстік Қазақстанның ең бірінші хоккей тарихында чемпион атағын жеңіп алған команда болды және жасөспірімдер арасынан 1-разряд нормасын орындады. Мейіржанның үлкен атасы да спортта өзін көрсете білген тұлға. Кішкентай батырымыз Созақ ауданынан шыққан спорт шебері, Қазақстанға еңбек сіңірген жаттықтырушы, Қазақстанға еңбек сіңірген спорт қайраткері атасы Ерманов Сәбит Болысбекұлының жолын жалғастырып Созақ ауданынан шыққан спорттың хоккей түрінен алғаш чемпион болған азамат ретінде есімі еленетін болады. Осы жазда үздік ойыншы ретінде «Барыс» командасының спорттық базасының шақыртуымен «Бригантина» спорт лагерінде оқу жаттығу жиынында болып қайтты. Мейіржанның әкесі Нұрәділ жол полиция қызметкері, анасы Ақерке мұғалім, атасы Нұрлан да ұстаздық қызметте болып зейнет демалысына шыққан. Әжесі Кенже де талай жылдар мектепте басшы қызметте болып бүгінде еңбек демалысында. Бір ғана отбасыны емес, бүкіл ауыл, аудан, облысымызды әлемге танытуға талпынып жүрген жас талантымызға тек сапарларда жолы сәтті болсын деген ыстық тілегімізді айтамыз. Алар асуың биік, бағындырар белестерің көп болсын «Мерген Мейіржан» дейміз.

Мақсат Қарғабай.

Созақ ауданының бағбандары өткен жылы қауын-қарбыз егіп, экспортқа
шығарған болатын. Бұл істі биылғы жылы да қолға алып отыр.

Созақ ауданының диқандары 15 келіден асатын қарбызды егіс алқабынан жинап алуда. Демек, шаруалар биылдан бастап қауын-қарбыздарын шетелге саудалайтын болады. Диқандар биыл жалпы 107 гектар аумаққа бақша өнімдерін отырғызыпты. Оның 40 гектарына қауын егілсе, 66 гектардан астам жерге қарбыз көшеті отырғызылған. Мәселен, аудандағы 3 шаруа қожалығы бірігіп, биыл 600 тоннадан астам өнімді экспортқа шығармақ. Ал өткен жылы бір ғана серіктестік 10 гектар жерінен 250 тонна өнім алған. Сол өнімінен азғантай көлемде шетелге жіберген. «Тапқан табыс та көл-көсір болған еді», – дейді шаруалар. Айта кетейік, Созақ ауданының табиғаты ерекше. Қысы қатал болатындығына қарамастан тұрғындар мал шаруашылығымен айналысады. Түйе бағып, оның сүтін өндіреді. Ал бау-бақша ұстап, одан өнім алып экспорттау Созақ ауылының шаруалары қолға алып отыр. Созақ ауылы округінің әкімі Батырхан Аяповтың айтуынша, 3 шаруақожалық бірігіп, 600 тоннадан аса өнімді экспортқа шығаруды жоспарлап отыр. Ендігі 2020 жылға тағы 3 шаруа қожалық қосылатын болады. Бүгінде қарбызды экспортқа шығарып, жақсы табысқа ие болды. Негізінен, бақша өнімдерінің көбі Ресейге барады. Жергілікті тұрғындардан да сұраныс көп. Соның ішінде Қазақстанның ішіне және солтүстік өңірлерге барып жатыр.

Созақ ауданы әкімдігінің баспасөз қызметі.

Таяуда Қазақстан мұсылмандары діни
басқармасының Шымкент қаласы бойынша өкілдігі «Мектепке жол» атты қайырымдылық акциясын өткізді.

Іс-шараға ҚМДБ Қайырымдылық және Уақып істері бөлімінің меңгерушісі Тұрдыбаев Камалжан Бекбосынұлы, ҚР Сыбайлас жемқорлыққа қарсы іс-қимыл агенттігінің (Сыбайлас жемқорлыққа қарсы қызмет) Шымкент қаласы бойынша департамент басшысының 1-ші орынбасары Серікбаев Талғар Әбдінәбиұлы, Шымкент қаласы Абай ауданы әкімі Бұқарбай Парманов, Шымкент қаласы ардагерлер кеңесінің төрағасы Рысбай Исамуддин Наштайұлы, ҚМДБ-ның Шымкент қаласы бойынша өкіл имамы Бейсенбаев Бақтыбай Қыдырбайұлы және ата-аналар қатысты.
Шымкент қаласына арнайы іс сапармен келген ҚМДБ Қайырымдылық және Уақып істері бөлімінің меңгерушісі Камалжан Тұрдыбаев құттықтау сөз алып, өзінің және ҚМДБ төрағасы, Бас мүфти Серікбай қажы Ораз хезреттің құттықтау лебізін жеткізді.
Сондай-ақ, бөлім басшысы К. Тұрдыбаев жергілікті «Оңтүстік», «Айғақ», «Отырар», «Нар ТВ» және «Оңтүстік» радиосына және т.б. БАҚ өкілдеріне сұқбат берді.
Шара қатысқан мәртебелі қонақтар кезек-кезегімен сөз алып, ата-аналар мен оқушыларға өздерінің ақ тілектерін жаудырды.
Жалпы, Шымкент қаласы бойынша 1100 оқушыға мектепке қажетті сөмкелері мен құрал-жабдықтар табыс етілді. Жалпы соммасы 7 500 000 (жеті миллион бес жүз мың) теңге қаражатты құрайды.
Осындай игі бастамаға қолдау білдірген барша азаматтарға Алла разы болсын дегіміз келеді.

ҚМДБ-ның Шымкент қаласы
бойынша өкілдігінің баспасөз қызметі.

Шымкент қаласының әкімі Ерлан Айтаханов Халықаралық Түркі академиясының президенті, «Егемен Қазақстан» республикалық газеті» АҚ басқарма төрағасы Дархан Қыдырәлімен кездесті, — деп хабарлайды Шымкент қаласы әкімдігінің баспасөз қызметі.
Кездесуде тараптар Елбасының «Болашаққа бағдар: Рухани жаңғыру» мақаласында айтылған міндеттерді іске асыру жайын талқылап, еліміздің бас газетінің 100 жылдығына арналған шаралар жайлы да сөз қозғалды.
Оқырманға сенімді ақпарат таратуда алар орны бар салмақты басылымның алдағы жоспарларымен бөліскен Дархан Қуандықұлы газеттің ғасырлық тойы қарсаңында Алаштың аяулы азаматтары Тұрар Рысқұлов, Сұлтанбек Қожановтың туғанына 125 жыл толуына орай, Шымкент қаласында ғылыми конференция өткізуді талқылады.
Өз кезегінде қала басшысы «Egemen Qazaqstan» газетінің мерейтойымен құттықтап, еліміздің бас басылымының алдағы жұмысына сәттілік тіледі. Сонымен қатар әкім айтылған ұсыныстарды қолдайтынын жеткізді.

Кеше Шымкент қалалық ішкі саясат және дін істері басқармасының басшысы қызметіне Жанар Бектаева тағайындалды. Ол бұған дейін дәлірегі, 2019 жылдың қаңтар айынан бастап аталған басқарма басшысының орынбасары, кейіннен уақытша міндетін атқарушы болған.
Жанар Әлібекқызы 1982 жылы Жамбыл облысы, Қаратау қаласында өмірге келген. Білімі жоғары. 2006 жылы Қ. А. Ясауи атындағы ХҚТУ-тін саясаттанушы мамандығы бойынша бітірген. 2017 жылы Алматы экономика және статистика академиясын экономика мамандығы бойынша тәмамдаған.

Еңбек жолын 2004 жылы
Қ. А. Ясауи атындағы ХҚТУ Шымкент институтында оқытушы болып бастаған. 2006-2014 жылдары сол кездегі Оңтүстік Қазақстан облысы ішкі саясат департаментінде алғашында бас маман, кейіннен бөлім басшысы қызметін біркісідей атқарған. 2015-2016 жылдары ОҚО ішкі саясат және дін істері басқармасы басшысының орынбасары болған. 2016 жылы ОҚО Түлкібас ауданы әкімінің орынбасары болып тағайындалған.
Жалпы әкімдіктегі біраз құрылымның жұмысын сүйемелдеуде жетекші мәнге ие ішкі саясат жұмысын кез келген кадр іліп әкете бермейді. Себебі оның қыр-сыры өте көп. Қамтитын ауқымы да зор. Осынау күрделі саланы жүргізуді меңгеру үшін зор тәжірибе мен терең білім қажет. Ал Жанар Бектаеваның өмір мектебі оның бұл талаптың үдесінен табылатындығын айқын аңғартып тұр.
Ендеше ол өзіне жүктелген міндеттерді орындауда талайларға үлгі болып, оң өзгерістер әкеледі деп сенім артамыз.

«Уақыт».

Тауды да, құм мен жазықты да Созаққа жиып бере салған
Жаратқанның шексіз құдыретіне бас иесің. Қаратауға Қыдыр
аялдағандықтан, құт дарыған дейді. Қазынасын ешкім
санаған да емес, санай да алмас.

Шет елдердің ішінде технологиясы мен ғылымы, техникасы дамыған- бір мемлекет: «Қаратауды әр жерден үңгіп қазудың қажеті жоқ. Оны шетінен артып таси берсе де болады» деген екен. Қойнауы қазынаға толған өңірдің адамы да сондай рухани бай, әл-ауқаты бір басынан артылып ұрпағына жетерліктей болуы өзі ғұмыр кешкен мекеннің табиғатына тән болса керек.
Кәрі Созақтың өткен тарихын қанша жаза берсең де таусылмас. Ерінбесең болды. Ақыны қаншама?! Найза мен туды қолынан түсірмей өткен ержүрек батыры қаншама?! Қара қылды қақ жарған билер, тілдіге сөз бермес шешендер, елін, жерін қорғап, ат үстінде көз ілген жауынгерлерді санауға сан жетпес. Әрбіріміздің бабамыз батыр болмаса да жауына қылыш сермеп, туған елін, тұғырлы белін қорғай білген жаужүрек жауынгер болғаны ақиқат. Қаратау бөктерін атқа мініп, асықпай аралай білсең сен бұрын-соңды естімеген, құлағыңа шалынбаған, ел есінен таса қалған тарихи әңгімелерге кезігесің.
Осы таудың бөктеріндегі Тасбұлақ деген жерде мен осыдан 16-17 жыл бұрын болғаным бар.
Сарыжаз бен Раңның арасындағы суы мол, шабындығы жайқалған шұрайлы жер екен. Жаз айында бардым. Масадан, шыбын-шіркейден ада, тастаған дәнің бақшалыққа айналар топырағы құнарлы бөктер екен. Басында бұлағы, бақшалыққа ағатын тоспа суы да сарқырап жатты.
Жаз жайлау киіз үйдің іргесін түріп тастап, самаурынның қызыл күрең шайын ішіп, тер басып отырғанымызда сау етіп екі аттылы біз отырған үйге түсті.
Үй иесі Бектан қария:-Әбекең қария келді!-деді де алдынан жүгіре шықты. Келген кісі әйбике руының беделді ақсақалы Әбдімәлік қария екен. Жапа-тармағай амандық-саулық сұрастық. Күннің ыстығынан аздап шөліңкіреп қалған екен. Үш төрт кесе шай ішкен соң, қайтадан амандық сұрасысып, мал-жан түгендестік. Өлкенің шежірелі тарихын жетік білетін қариядан көп әңгіме естідім. Кейін араға 15 жыл салып, жүз жасқа иек артқан Әбдімәлік қариямен әңгімелескенімде сол уақыттағы әңгімесін ұмытпай, тура сол қалпында айтып берді. «Қоспасы жоқ сары алтын» деген теңеу осыған сай келетіндей.
Сонда қария Ақынбек қажы туралы өрелі әңгіменің тиегін ағытып еді. Өзінің ата -бабасынан бастап түп-тұқияндайтын қария, қойы қоралас, ауылы аралас жатқан қазақ ағайынның шежіресін білгенінше шертіп берген еді. Ақынбек қажы, Құлыншақ қажы Кемелұлының замандасы, әрі рулас ағайыны болған. Құлыншақ екеуінің жас шамасы да қарайлас болғанға ұқсайды. Құлыншақ ақын 1841 жылғы туған болса, Ақынбек 1848 жылдары дүниеге келген. Қажылыққа да барған уақыттары да шамалас болса керек. «Жол азабы-көр азабы» деген қиындықты бастан өткере жүріп, сенімдеріне селкеу ұялатпай мұсылмандық парыздарын өтеген. Әрі бұл екеуі кедей отбасынан емес, бақуатты бай отбасынан шыққан. Өрістегі мал кезегін жаюға есек таппай жүрген адам қажылық парызын қалай өтесін. Қолы ұзын, малды дүниелі адамдардың мақсатынан туған асыл парыз болса керек. Әрі халқымызда «ораза, намаз тоқтықта» деген тәмсіл деген айтылмаса керек. Енді Ақынбек қажының өзіне, өмірдерегіне тоқтала кетсек.
Ақынбек қажы 1848 жылы қазіргі Қозмолдақ ауылындағы Саңғыл бидің іргесіндегі Басбұлақ деген шағын ауылда дүниеге келген. Өзі бір атадан-Жүнсейден үш ағайынды тарайды. Үлкені Қалдыбек, ортаншысы Ақынбек, кенжесі Орақбай деген ағалары-інілері өрбиді. Ақынбектің өзінен Оспан, Оспанбек, Қорсынбай, Мұхи, Әлмен, Ахан есімді алты ұл дүниеге келеді. Ақынбек балалық шағында өте зерек, адамды жатырқамайтын көпшіл бала болады.
Қиялына ерік беріп Қаратаудың биік шыңдарына өрмелеп қыран құстың қанатына мініп өзі көрмеген, бірақ көргісі келетін, естімеген бірақ естігісі келетін басқа әлемге сапар шегетін.
Имандылық, әдептілік, тұрақшылдық қасиеттерді ата-бабасының қанымен бойына сіңірген бала Ақынбек адалдық пен адамдық ұғымның егіз екенін біліп, зерделеп өсті. Ақынбек ауыл молдасынан арапша оқып біледі. Оның үстіне Қаратаудың аңғарында отырып, Арқа төсіне сапарға шыққан жолаушылардың әңгімелерін тыңдап, қоржындарындағы кітаптарын тай қалап алып қалып жүріп сауатын молайта ашады. Көбіне көп ол уақытта діни бағыттағы жазба кітаптарды тауып оқитын. Ақынбек 1895 жылы Мекке-Мәдинаға қажылық сапарға бет алады. Жолға деп алдына азын-аулақ мал салып шығады. Сатса қаржы, жесе ауқат саналатын малы жол шығынын өтейді. Ары-берісі бар алты жыл жүріп 1901жылы қажы атанып елге оралады.
Дүниенің төрт бұрышын көрген жандай көкірек көзі ашылып, санасы сергектеніп қажылықтан оралған Ақынбек елге, жұртқа, кейінгі ұрпаққа пайдам тисін, сауаты ашылсын деген ниеттен медресе-мешіт ашады. Қаратаудың құт дарыған қойнауы мен түрлі шөпке бай бөктеріндегі дәрілік шөптерді халықтық медицинаға жаратып пайдаға асырады. Халық денсаулығын жақсартуға жұмсап ел ішінде емші атанады. «Ақынбек емдеген екен, құлан таза айығыпты» деген сөз ол уақытта жиі айтылып, мадақ сөз жиі естіліп жүреді.
Орта жүз қоңыраттың Қоңыр Жиенбеті ішінде Асан атасынан тараған Қалмырза деген бай кісі болыпты. Сол Қалмырзаның жалғыз ұлы шешек ауруымен ауырады. Ол уақытта бұл ауру ел ішінде жаппай тарап, жас балаларды қынадай қырып жатады. Амалы таусылып, бір Алладан медет сұраған Қалмырза Ақынбек қажыны өзі іздеп барып:
– Менің ұлымды ауруынан құлан таза айықтырып бер. Қалағаныңды беремін. Жалғыз ұлымның жаны қалуына қолыңнан келгенін аяма! Еңбегіңді өлшеусіз бағалаймын,-деп жалынышты үнімен үлкен өтінішін айтады. Арада айға жуық уақыт өткенде науқас дендеген баланың бетін бері қайтарады. «Уәде құдайдың аты» демекші Ақынбек емші Қалмырзаның қызы Мінсізді ұлы Мұхиға жар болуын қалайды. Мінсіз әжеміз Мұхиға күйеуге 1918 жылы он үш жасында келеді. Ал бұл уақытта Мұхидың жасы қырық жаста екен.
– Мұхи өте байсалды, салмақты, артық ауыз сөзі жоқ, келбеті түр-тұлғасына сай көрікті, бір сөзді азамат еді,-деп Мінсіз апамыз айтып отырады екен.

– Мінсіз десе мінсіз еді жарықтық. Ақынбек бабаның текті шаңырағына өле-өлгенше дақ түсірмей өтті. Ұлы Отан соғысы жылдары жетім қалған балаларды, жесір қалған аналарды босағасына тартып, талқанын бөліп беріп, бабадан қалған шаңырақтың киелі шаңырақ екенін жан жылуымен дәлелдеп кеткен аяулы ана осы -Мінсіз еді,-деп Әбдімәлік көке ризашылық пейілмен айтып еді. Мінсіз әженің өзі де «Бұл қара шаңырақ тегін шаңырақ емес. Бабамыз қолына құран кітабын алып оқып отырып қара суды теріс ағызған кісі болатын. Тегі тегіннен жаралмаған киелі шаңырақ. Сол себепті алыс-жақыннан келгендер алдымен осы шаңыраққа келіп тізе бүгіңдер» деп айтып отырады екен. Әже туралы әсерлі әңгімені ауыл қариялары жиі айтатынын Ақынбек қажының бүгінгі ұрпақтары Оспанов Әмзе, Ермахан Оразхан, Төлегенов Бақыт, Мұхиев Жәнібектер де қуаттайды. Уақтысында Мінсіз әжеміз туралы Жұматай Молжігітов, Сұлтан Жорабеков сияқты ел ақсақалдары жақсы пікір, жылы сөз, есті естеліктер қалдырған. Бұл күнде ол қариялар келместің кемесіне мініп кетті. Ендігі ұрпақ бабаларының кім болғанын білуі керек. Осы қағиданы ұстанған ұрпақтары Ақынбек қажының басына үлкен күмбезді кесене тұрғызып, есімін қара тасқа қашап жазды. Әруақтардың руқына бағыштап құран оқытып, ас берді. Ескерткіш кесененің айналасын көріктендіру-көгалдандыру мақсатында 100 түп жеміс ағаштарын отырғызды. Алдағы көктемде екі жылдық көшеттер алғашқы жемісін де беріп қалар.
Сондай-ақ жақсы жанның ұрпақтары биылғы жылы тамыздың аяғында елді жиып ас беріп, әруақтарға бағыштап құран оқытып, жастарға ұлттық салт-дәстүрлерді, ұлттық тағамдарды, ұлттық ойындарды насихаттауды ниет етіп отырған жайы бар.
Бұл тарихи танымдық мақаланы жазудағы мақсатым «Рухани жаңғыру» бағдарламасы аясында Ақынбек қажы, әрі әулиенің есімін ұлықтау, алаш ардақтыларын тану арқылы өз елінің тұлғаларын кейінгі ұрпаққа насихаттау дер едім.

Мақсат ҚАРҒАБАЙ.

Қажы бабаға

Қапалы жанға дем берген,
Құсалы жанға ем берген.
Ризалығын алып Тәңірдің,
Пейіліне кенелген.

Қаратау жері киелі,
Ел біледі көнеден.
Ақынбек баба сізге алғыс,
Бізге қалды өнегең.

Құлыншақ ақын екеуің,
Қажылық сапар шектіңдер.
Иманға мойын ұсынып,
Аллаға сеніп өттіңдер.

Меккені көріп көзбенен,
Парызды өтеп өмірден.
Арманда болмай кеттіңдер.

Жылаған жанды жұбаттың.
Мылқауға дейін тіл қаттың.
Өзгеден ерек ұлтыңды,
Ұлтым деп биік ұнаттың.

Сусаған жұртқа білімнің,
Бұрғыздың көсір арнасын.
Ұраның болды нарбаба,
«Білімсіз ұрпақ қалмасын!»

Медресе салдың кесектен.
Қорықпай от пен өсектен.
Оқыттың қазақ баласын,
Тұрғызып суық төсектен.

Құтқардың талай баланы.
Қызылша, оба, шешектен.
Суды да теріс ағыздың.
Деміңді салып кезекпен.

Дұшпанға болдың мейіріміңді,
Қанша болсын мезі еткен.
Алла да дедің есебі.
Береді өзі кезекпен.

Дәрілік шөппен емдедің.
Ауырған жанды сүзекпен.
Еміңмен елді емдедің.
Науқасы келсе тыз еткен.

Өзің ең мейір иесі.
Пенденің денін күзеткен.

Артыңда қалды ұрпағың,
Кесенең тұрды жаңғырып.
Есімін қалды еліңде.
Қаратау төсін ән қылып.

Әруақ құдай жар болып,
Қабыл ет елдің тілегін.
Ауылға қырдан қарайды,
Ұрпағым деген жүрегің!

Мақсат ҚАРҒАБАЙ.

Өзбекстанның бұрынғы президенті Ислам Каримовтың үлкен қызы, қазір Ташкент түрмесінде қаржы қылмысына байланысты жазасын өтеп жатқан Гүлнара Каримованың үстінен тағы бір қылмыстық іс қозғалды.
Өзбекстан бас прокуратурасы 19 тамызда таратқан ақпаратта Каримова екі цемент зауытындағы мемлекеттің үлесін «негізгі құнынан арзанға» заңсыз сатып алған және кейін шетелдік кәсіпкерлерге сатқан деген күдікке ілінген. Прокуратураның мәліметінше, күдікті сатып алушылардың «кейінгі заңсыз іс-әрекетін қорғаштап, мемлекетке аса ірі көлемде зиян келтірген».
Бұған қоса бас прокуратура Каримова «азаматтар мен түрлі компаниялардың иелерін күш көрсетемін деп қорқытып, олардың мүлкін өзіне тиесілі компанияларға аударуға мәжбүрлеген» деп хабарлады.
Азаттық хабарласқан Каримованың адвокаты Грегуар Манжа клиентіне қарсы тағылған жаңа айыптарға байланысты пікір білдіруден бас тартты.
Биыл наурызда Өзбекстан билігі үйқамақта отырған 47 жастағы Гүлнара Каримованы «жаза өтеу шарты мен тәртібін қасақана бұзғаны үшін» түрмеге қамаған. 2017 жылы желтоқсанда Өзбекстан соты Гүлнара Каримованы 10 жылға бас бостандығынан айырған. 2018 жылы шілде айында сот Каримованың жазасын жеңілдетіп, бес жылға бас бостандығын шектеу жазасына ауыстырған.
Өзбекстан билігі Каримованың шетелдегі жалпы құны бір жарым миллиард доллардан астам мүлкін мемлекет иелігіне қайтарғысы келеді. Шілде айында адвокат Манжа Швейцария билігі Каримованың ісі бойынша тәркіленген 555 миллион долларды Өзбекстанға қайтаруды тоқтатып қойғанын хабарлаған. Заңгердің мәлімдеуінше, мұндай шешімге Каримованың құқығы бұзылғаны және оған дер кезінде медициналық көмек көрсетілмегені туралы хабарлар негіз болған.
Маусым айында Гүлнара Каримованың қызы Иман қамауда отырған анасының денсаулық жағдайы нашарлап кеткені туралы мәлімдеме таратқан.
Бір кездері Өзбекстандағы ықпалды тұлғаларының бірі саналған және кәсіпкер әрі әнші ретінде де танылған Гүлнара Каримова 2014 жылы президент әкесінің қырына ілінген соң көпшілікке көрінбей кеткен. Ислам Каримов Өзбекстанды 1989 жылдан бастап 2016 жылы қайтыс болғанға дейін басқарған.

Орта Азия
жаңалықтар қызметі.

Қазақстанда автокөлік жасау мен автобустарды құрастыру көрсеткіші жыл сайын артып келеді.
Бұл туралы Қазақстан автобизнес қауымдастығы мәлімдейді. Мәселен, 2019 жылдың қаңтар-шілде айында елімізде 24 687 көлік құралы жасалған. Оның 22 280-і жеңіл автокөлік болса, 1 196-сы жүк көлігі, 754-і автобус, 35-і арнайы техника, 422-сі тіркеме мен жартылай тіркеме болып табылады.

Еліміздегі жалғыз автожасаушы – экспорттаушы «СарыарқаАвтоӨнеркәсіп» кәсіпорны шілде айының өзінде Ресей нарығына 694 JAC кроссоверін жөнелткен. Жалпы жыл басынан бері экспортқа 6 512 млн. теңгенің дәл осы маркадағы 1 219 көлігі жіберілген.
2019 жылдың шілде айында барлық үлгідегі 4 064 көлік құралы шығарылып, автоөнеркәсіптің нарықтық үлесі сол айда 61 пайызға бір-ақ жеткен. Мамандар мұны жыл ішіндегі рекордтық көрсеткіш деп санайды. Биыл 7 айдағы жиынтық нәтиже өткен жылдың дәл осындай кезеңіндегі көрсеткіштен 65,1 пайызға артық болып тұр.