Маңызды


Республикалық «Уақыт» газетіне 2019 жылдың 1-ші жарты жылдығына «Қазпошта» АҚ мен Шымкенттегі «Эврика медиа», «Тайма-пресс», «Үндемес», «Евразия-пресс» және «Ернұр-пресс» компанияларының барлық бөлімшелерінде жазылым жүргізіліп жатқанын хабарлаймыз. Сондай-ақ, газетті редакция арқылы да жаздырып алуға болатынын мәлімдейміз.

Газетке жазылу ИНДЕКСІ – 64425.

P.S. Толық мәлімет алу үшін мына телефонға хабарласыңыз:
8 775 733 04 28.

Қазіргі қоғам адамнан барынша ашықтықты, айқын эмоцияны талап ететіндей. Аузында айтатын сөзі, нақты жеткізетін ойы бар адамның жанына барлығы да үйірсек болады. Ғылыми тілде ондайларды экстраверттер дейді. Бірақ біз бүгін экстравертке қарама-қайшы тип интроверттер жайында сөз қозғамақпыз.

Сонымен интроверт деген кім? Алғаш рет бұл ұғымды психология ғылымына енгізген Карл Густав Юнг пен Канс Юрген Айзенк болған. Сонымен, экстроверттер ойын ішіне бүкпей, ашып айтса, керісінше интроверттік мінез-құлыққа сай адамдар көп сөйлемейтін, эмоциясын жасырып ұстайтын қасиетке тән екен. «Ішімдегіні тап» деп бұқпантайлап жүретін бұл типтегі адамдар көбіне қарым-қатынасқа келгенде жалғыздыққа бейім. Олар өзінің ішкі әлеміне үңіліп, әрқашан сыртқа сыр білдірмей әрекет етеді. Сырт көзге олар қоғамнан алшақ, ештеңеге бейімі жоқ болып көрінуі мүмкін. Дегенмен, олардың «аз сөйлеп, семіз шығатын» тұстары бар. Өйткені интроверттік типке тән тұлғалар кез келген жәйттің мәнісіне жан жақты үңіліп, оны терең талдағанға бейім келеді. Ақырын жүріп, анық басатын мұндай адамдар ғылым жолында көптеген жаңалықтар ашуға қабілетті келетінін уақыттың өзі талай көрсеткен.
Әйгілі физик, математик, механик және ғылымға үлкен революция алып келген астраном – Исаак Ньютонның өмірі сол сөзімізге мысал. Оның 1687 жылы жарық көрген «Табиғи философияның математикалық бастамалары деген еңбегі ғылым тарихындағы ең ықпалды шығарма болып саналады.
Сонымен қатар, биологияда табиғи сұрыптау теориясын түзіп, үлкен революция жасаған ағылшын натуралисті – Чарлз Дарвин, үнді елінің азаттық жолында күресуіне көп еңбек сіңірген саяси тұлға – Махатма Ганди, ”Салыстырмалы теориясын» жасаушы, бұдан бөлек тарих, ғылымдар философиясы және публистистика саласындағы 300-ден астам еңбектердің иесі, 150-дей кітап пен мақалалардың авторы – Альберт Энштейндер интровертті адамдар тобына жатқызылған. Адамдардың өзін-өзі жетілдіруі, тұлғалық қасиетті қалыптастыратын бірнеше психологиялық кітаптардың авторы Дейл Карнеги де дәл осы интроверттік типке сай мінездің иесі болған.
Жалпы жаңалықтарды жаһанға паш еткен тұлғалардың дені интоверттік типке сай индивид болатынға ұқсайды. Ал сіз қай типке жатасыз? Үнемі қимыл-қозғалыста жүріп, айналаңызға жақын-жуығыңызды жинап алып, көп ортасында жүргенді хош көретін экстровертсіз бе немесе «сен тимесең мен тиме» деп ішкі әлеміңізді құлттап ешкімге сыр алдырмағанды қалайтын интровертсіз бе?

З. ДӘУЛЕТҚЫЗЫ.


Кеше Түркістан облысы əкімінің орынбасары болған Ұласбек Сəдібеков қызметінен босатылды. Саясат алаңындағы бұл ауыс-түйісті жұрттың дені осыдан бірнеше ай бұрын Сарыағашта орын алған бассыздықпен көп байланыстырып жатқаны жасырын емес. Естеріңізде болса, биыл наурызда Сарыағашта 7 жасар бала мектебінде жоғары сыныпта оқитын оқушылардан зорланып келгені туралы ащы шындық əшкереленген. Жұрт жағасын ұстатқан осы жағдайдан кейін облыс басшысы бірқатар шен-шекпенділерге шара көрген. Солардың қатарында Ұ.Сəдібековте болып қатаң сөгіс алғаны белгілі. Сол кезде аймақ басшысы 7 жасар баланың тəлкек көргені тергеу нәтижесінде дəлелді болса, бірқатар жауапты мамандарды тіпті, өз орынбасарын орынтағынан босататынын қадап айтқан еді. Көп кешікпей əлгі баланың басынан кешкені шындық болып шықты. Сол кезде күнгейдегі қалың қауымның көкейінде «Түймебаев шегелеп айтқан сөзін жүзеге асырады ма екен?» деген сауал кептелген. Алайда, облыс басшысы «отыз тістен шыққан сөзін» бірер айдан соң ғана орындады.
Түймебаевтың «темірді қызған кезде соқпауының» сыры неде? Жəне білім саласындағы бұл былыққа оған жауапты басқарма басшысының қатаң сөгіспен ғана шектеліп орнында қалуының құпиясы қандай? Бұл жерде мақсат шара көру ме әлде ортадан шеттетіп, команда жинау ма?..
Түймебаевтың экс-орынбасары Ұ. Сəдібековтың орнын басқан Мəлік Отарбаевтың бұған дейін Қазақстанның Түркия елшілігіндегі үшінші хатшысы болғанын ескерсек, жоғарыдағы жұмбақтың жауабы шыға келгендей бола ма, қалай өзі?!.

Қ. ҚАЛИЕВ.


Шымкенттегі «Отырар» медиахолдингінде жаңа басшы. Бұған дейін Шымкент қаласы əкімінің кеңесшісі әрі əкімдік аппараттың баспасөз қызметінің жетекшісі болған Əйкерім Жұмағұлова (суретте) енді тіршілігі қызған еңбек ұжымын басқаратын болады.
Ендігі кезекте құрамында «Отырар — TV» телеарнасы, «Оңтүстік Рабат», «Рабат»газеттері мен otyrar.kz сайттары бар медиахолдингтегі мың сан шаруаның шатқаяқтамауы Əйгерімнің іскерлігіне көп байланысты болары сөзсіз. Осыған орай біз жас маманның жауапкершілік жүгі ауыр бұл жолдағы жұмысына жеміс пен сəттілік тілейміз.

«Уақыт».

Өткен аптаның сәрсенбісінде Астана уақытымен сағат тілі 11:00-де республиканың барлық аумағында «Жалпыхалықтық диктант» жазылды. Қазақстан Республикасы Президентінің 2018 жылғы 19-ақпандағы Жарлығына және ҚР Премьер-министрінің 2018 жылғы 13 наурыздағы өкімімен бекітілген «Қазақ тілі әліпбиін латын графикасына 2025 жылға дейін кезең-кезеңімен көшіру жөніндегі іс-шаралар жоспарына» сәйкес республика тұрғындарының жасы мен жасамысы қолдарына қалам алды. Оған 15 жастан асқан барлық азаматтар – мемлекеттік қызметшілер, бюджеттік сала қызметкерлері, мемлекеттік қызмет ұсынатын ұйымдардың қызметкерлері, студенттер, оқушылар қатысты. Мақсат – жаңа қазақ әліпбиін барынша насихаттау, латын негізді қазақ әліпбиін тәжірибеде еркін меңгеру болып табылады.
Диктант бір уақытта әр аймақтағы тілдерді дамыту басқармалары дайындаған арнайы аудиторияларда өткізілді. Жаңа емле ережесін ел болып тез уақытта үйренуге баулу мақсатында ұйымдастырылған «Жалпыхалықтық диктант» шарасына 2 миллионнан аса қазақстандық қатысты. «Рухани жаңғыру» деп аталатын диктант мәтіні emle.kz, tilalemi.kz сайттарында, «Шалқар» және «Қазақ радиосы» арналарында тікелей эфир арқылы таратылып, ол жарты сағаттай уақытқа созылды.
80-ге жуық сөзден тұратын жалпыхалықтық диктантты жазуға Түркістандағы «Әзірет Сұлтан» мемлекеттік тарихи-қорық музейінің ұжымы да белсене қатысты.
«Әзірет Сұлтан» мемлекеттік тарихи қорық музейі мен оған қарасты тарихи мәдени орындардың қызметкерлері қазақ әліпбиінің жаңартылған нұсқасында диктант жазу арқылы латын графикасының қолданысқа енгізілуіне зор қолдау білдіретінін жеткізді.

Б. СӘДУАҚАСҰЛЫ.


Мемлекет басшысы Н. Назарбаевтың Жарлығымен құрылған Түркістан облысы әкімдігінің жаңа логотипін жасау, сол арқылы облыстың брендін қалыптастырып, оны Қазақстан мен шетелге таныту және ғаламтор желісінде аймақтың өзіне тән оң имиджін көтеру мақсатында облыстық ішкі саясат басқармасының ұйымдастыруымен «Түркістан облысының төлтаңбасы» байқауы жарияланды.

Осыған сәйкес Түркістан облысы әкімдігінің ресми сайтында байқаудың мазмұны мен ережелері таныстырылды. Онда аталмыш конкурсқа дизайнерлер, суретшілер және кез келген ынталы әлеуметтік желі қолданушыларының қатыса алатындығы жазылады. Өз кезегінде байқауға қатысушылар Facebook әлеуметтік желісінде Түркістан облысының төлтаңбасына қатысты өзінің авторлық жұмысын JPEG форматында бейнелеп, оның мән-мазмұнын қысқаша түсіндіріп (видео нұсқа да құпталады) пост жазып, оны #Түркістаноблысыныңтөлтаңбасы хэштегімен бөлісуі тиіс. Бұдан бөлек, жарияланған посттардың скриншоттарын (лайк, пікірлері, репост толық көрінуі тиіс) арнайы файл папкасына жинақтап, авторлық төлтаңба жобасын компьютерлік кескіндеме (3D) немесе JPEG форматында ontustikonimi@yandex.kz электронды поштасына жолдауы қажет. Сондай-ақ оны 2018 жылдың 20-желтоқсанына дейін Түркістан облысының ішкі саясат басқармасына тапсырулары керек.
Байқауға 2018 жылдың 14 қарашасы мен 20 желтоқсаны аралығында жарияланған материалдар қабылданады. Тапсырылған еңбектердің ішінен «жүзден жүйрік» шыққандарды іріктеу мен анықтау білікті суретшілер мен дизайнерлерден, бұқаралық ақпарат құралдары өкілдерінен, мемлекеттік мекемелер және үкіметтік емес ұйым мүшелерінен құралған арнайы комиссия жүргізетін болады.
Ұйымдастырушылар байқауға қатысушылардың логотип дайындаудағы жұмысында облыстың өткені мен бүгіні, өзіндік ерекшелігі көрініс табуы қажеттігін, қазақ халқының ұлттық болмысына тән элементтер болуын және мұның барлығы дизайнерлік шеберлікпен үйлесуі тиістігін алға тартуда.
Келешекте Түркістан облысының туризмін дамытуда және инвестиция тартуда да маңызды міндет атқаратын тартымды логотипті таңдау үшін ұйымдастырылған бұл байқаудың қорытындысы жыл аяғында белгілі болмақ. Ұйымдастырушылар жүлдегерлерге бағалы сыйлықтар тарту етілетінін мәлімдеуде.

«Уақыт».


«Жер байлықтың анасы болса, әкесі еңбек». Иә, жеріне дән егіп, оны ала жаз бойғы жанкешті еңбегімен баптап, облыс тұрмақ күллі елді ырысқа толтырып жатқан, кешегі аптада 90 жылдығын кең көлемде атап өткен Мырзашөл өңірінің бүгінгі тыныс-тіршілігіне қарап осы мақал еріксіз ойға келеді.
Бір ғасырға жуық уақытты артқа тастаған Мырзашөл өңірінің тоқсан жылдығына орай Мақтарал мен Жетісай аудандарында көңілге шаттық пен шабыт сыйлар шаралар болып өтті. Оның барлығына облыс әкімі Жансейіт Түймебаевтың өзі қатысты. Халықтың бірлігін бекемдей түскен тоқсан жылдық торқалы тойға облыс әкімі бастаған қонақтар ең алдымен ат басын Мақтаралға бұрды.

«Мақтааралым – мерейлі мекенім»

Бұл ауданның 90 жылдық мерекесіне арналған салтанатты шараның шымылдығы «Ақ алтын» мәдениет үйінде өткен «Мақтааралым – мерейлі мекенім» атты музыкалық театрландырылған қойылыммен түрілді. Оған жергілікті тұрғындармен қатар Өзбекстан Республикасындағы Сырдария облысынан келген бір топ делегат құрметті қонақ ретінде шақыртылды.
Жиналғандардың көңілдерін серпілтіп, туған жерге деген сүйіспеншіліктерін еселей түскен театрландырылған қойылымнан соң, Түркістан облысының әкімі Жансейіт Түймебаев сахна төріне шығып, «жерін баптап, астықтарын қаптап жатқан» мақтааралдықтарға деген ізгі тілегін жолдады. Өз сөзінде аймақ басшысы:
– Алғашында Мырзашөл атауымен белгілі болған Мақтаралдың тарихы облыстағы аудандар сынды өте бай. Ол өңірімізде жерінің жомарттығымен, мақталы мекен болуымен ерекшеленеді. Кезінде аға буынның ересен еңбегі мен ақылды алға салып тірлік етуінің арқасында – шөл даланы гүлді, жазиралы жәннәт мекенге айналдырды. Сол бір кездерде Мырзашөл даласын суландырудағы негізгі мақсат – мақта алқабын молайту еді. Алғаш рет ауданда мақта шаруашылықтары құрылып жатқанда Түркістан жер шаруашылығы халық комиссары қызметін атқарып жүрген ұлт мақтанышы Сұлтанбек Қожанов каналды қазушылармен болған кездесуінде мақтаның аса қымбат шикізат екенін, болашақта ақ алтын күллі Түркістан өлкесінің байлығы болатынын айтып, күн-түнмен санаспай еңбек еткен қауымды алдағы күннен жақсылық пен молшылық күтуге ерткен еді. Бүгінгі күннің көрінісі сол бастамалардың баяндылығының жарқын мысалы. Бүгінде Елбасымыздың тікелей қолдауымен Түркістан облысының жаңа дәуірі басталып келеді. Облысымыздың қиыр оңтүстігінде орналасқан, ақ алтынның ордасы – мақталы Мақтаарал ауданының мерекесі бәрімізге ортақ. Мақсат – той тойлау емес, бір ғасырға жуық уақыт аралығындағы оқиғаларды ой елегінен өткізу. Елдің бірлігін нығайтып, игі іске жұмылдыру, — деді.

«Жерге еткен жақсылық жерде қалмайды»

«Жер емгеннің ел болатынын» осылай өрбіткен өңір басшысы бұдан кейін Мақтаарал ауданының күзгі жиын-терім науқанын қорытындылауға арналған «Алтын күз – 2018» іс-шарасына қатысты. Мырзакент кентінің орталық алаңында болған бұл шарада төмендегідей көрсеткіштер сүйіншіленді.
Атап айтқанда, биыл мақтааралдық диқандар 60 926,3 гектар жерге егістік ексе, оның 38 593,2 гектары мақта дақылына тиесілі болған. Нәтижесінде аудан бойынша бүгінге дейін 96 мың 600 тонна «ақ алтын» жиналыпты.
Көңілді марқайтқан бұл шарадан соң жиналғандар Атакенттегі мәнді жиын дәлірегі, «Қазақ мақта шаруашылығы» ғылыми зерттеу институтында халықаралық ғылыми-теориялық конференциясына бет алды. Онда мақта шаруашылығының облысымыздың қоғамдық-саяси өмірдегі рөлі мен әлеуметтік-экономикалық жағдайымызға тигізген оң әсері, бүгіні мен болашағы туралы баяндамалар тыңдалды.
Бұдан кейін облыс әкімінің жұмыс сапары Жетісай ауданына қарай жалғасты.
Айтқандай Мақтарал ауданның айтулы күні «Терме–бойтұмарым» атты термешілер байқауы, «Палау фестивалі» іс-шарасы, жастар арасындағы жайдарман ойындары және аудан өнерпаздарының мерекелік концертімен жалғасты. Үш күнге ұласқан ауданның тоқсан жылдығы «Алпамыс батыр» стадионында тауар өндірушілер мен қолөнершілер көрмесі, «Бауырсақ фестивалі» іс-шарасы және бүкіл көрерменнің делебесін қоздырған көкпар аламаны ойынымен қорытындыланғанын айта кетейік.

Жер жәннаты – Жетісайда қос қуаныш

Жетісайға сапары кезінде Түркістан облысының әкімі Жансейіт Түймебаев бір күнде бес ауылға көгілдір отын берілген арнайы шараға қатысып, тұрғындардың көл-көсір қуанышымен бөлісті. Облыс басшысы қыс ауасында көмір жағып, күл шығарған күндерден арылған Ш.Ділдәбеков ауыл округіне қарасты Достық, Байдала, Зерделі ауылдары мен Атамекен ауылдық округіне қарасты Тыңдала және Қоғалы елді мекендерінің 5 мыңға жуық халқының тіршіліктеріне нәр, тұрмыстарына сән тіледі.
– Құрметті жетісайлықтар, сіздер мен біздер көптен күткен үлкен қуаныштың куәсі болғалы отырмыз. Бүгін бес елді мекеннің тұрғындары табиғи газға қол жеткізіп отыр. Қазіргі таңда Жетісай ауданында 104 елді мекеннің 46-сы, яғни 22 096 абонент табиғи газбен қамтылса, бұл аудандағы елді мекендердің жалпы санының 44,2 пайызын құрап отыр. Ал абонент саны бойынша 74,4 пайызға жетті, – деді Жансейіт Қансейітұлы.
Жалпы биыл Жетісай ауданындағы елді мекендерді газдандыру мақсатында 5 нысанның құрылысына облыстық бюджеттен 615,4 млн теңге қаралған болатын. Оның ішінде 1 нысанның құрылыс-монтаж жұмыстары 2018 жылдың шілде айында аяқталса, 3 елді мекеннің құрылысы жыл соңына дейін ел игілігіне тапсырылады деп болжануда.
Ауданның даму концепциясында Жетісайдағы 104 елді мекеннің барлығы жүз пайыз көгілдір отынның игілігін көру 2025 жылға дейін жүзеге асуы тиістігі жоспарланған.

Жаңаауылда ашылған мектеп үш ауысымды жойды

Жетісайдағы жұмыс сапары кезінде облыс әкімі Жаңаауыл ауылдық округі, Ынтымақ елдімекеніндегі Т. Рысқұлов атындағы 600 орындық жаңа мектептің лентасын қиды. Бұл нысанның аяқталуын жергілікті жұрт асыға күткен болатын. Өйткені ондағы ұжым білім ұясындағы орынның жетіспеушілігі салдарынан өскелең ұрпаққа үш ауысым жүйесінде дәріс беруге мәжбүр болып келген болатын. Енді оқушылардың заманға сай білім алуына кері әсерін туғызған сол жүйенің өткен күннің еншісінде қалғанына дән риза болған ұжымды аймақ басшысы құттықтап, ізгілік тіледі.
Тиісті талаптарға сай еңселі етіп соғылған мектептің сыныптарын аралап көрген Жансейіт Қансейітұлы ондағы шәкірттермен тілдесіп, олардың сабақтарды үздік оқып, озат атануға, сөйтіп, еліміздің үлгілі азаматтары болып бой түзеулеріне шақырды.

Жемістердің ғажабы – Жетісайда

Бұдан соң аймақ басшысы Жетісай қаласындағы жұмысы қызған «AIIG Kazakhstan» ЖШС-нің мақта зауытына табан тіреді. Жалпы аумағы 5,6 гектарды алып жатқан аталған зауытта 660 адам жұмыс істейді. 2013 жылы құрылған өндіріс орнында мақта талшығы, техникалық тұқым, линт, улюк дайындалады. Мұнда өндірілген өнімдер еліміздің барлық аймағына жөнелтіледі.
Зауыт ұжымымен кездесу кезінде облыс әкімі «жерге еткен жақсылықтың жерде қалмайтынын» терең түсініп, талпынысты еңбек үлгісін көрсеткен жұмысшылар арасында белсенділігімен дараланған «Озат терімші, «Ең үздік комбайншы», «Ең үздік терімші» номинацияларының иегерлерін марапаттап, оларға сый-сияпат табыстады.
Жалпы Жетісай ауданында мақта теру науқанының аяқталуына санаулы күндер қалды. Қазіргі таңда аудан бойынша 48226,8 гектар мақта алқабынан 126 мың 192 тонна шитті мақта жиналды. Ақ алтынның түсімділігі әр гектарынан 26,2 центнерді құрап отыр. Бұл облыс бойынша ең жоғары көрсеткіш.
Бұл күндері Жетісай ауданында «Алтын күз – 2018» іс-шарасы тойланып, Жетісай қаласының күні мерекесі аталып өтілді. Қос тойдың қабат келуіне орай ауданда аталып өткен шаралардың бел ортасында облыс әкімі Жансейіт Түймебаевтың жүруі мереке көрігін қыздыра түсті. Өз кезегінде аймақ басшысы жемістерден жасалған пирамидаларды тамашалап қана қоймай, дастарханды даңғайыр етер сүт, нан өнімдері мен ауылдық округтердің ауыл шаруашылық өнімдерінің көрмесін аралап көрді.
«Алтын күз – 2018» мерекесі барысында «Бұқа», «Ләңгі», «Айыр ағашпен дәлдеу», «Көңілді старт» сынды спорттық сайыстардың ұйымдастырылуы мереке ажарын аша түсті. Шараға ағылып келген қонақтардың барлығы бауырсақтан жасалған пирамидадан дәм татты. Береке мен бірліктің символындай болған бұл шарада облыс әкімі:
– Жетісайлықтардың биылғы тойы жылдағыдан ерекше. Түркістан облысы, оның ішінде Жетісай ауданы негізінен ауылшаруашылық бағытындағы салалардың барлығын қатар алып келе жатқан, соның арқасында дамып, тіршілігінің берекесін келтіріп отырған аумақ. Аграрлық сектордағы бұл жетістіктерімізді барша облыс еңбеккерлерінің ортақ жеңісі деп бағалаймыз. Ауданның табиғаты бақша өнімдерін дамытуға өте қолайлы. Жалпы биыл Жетісай ауданында 839 гектарға қырыққабат егілсе, одан 30701,2 тонна өнім алынған. Оның 80 пайызы шетелге экспортталған, – деді.
Жетісай ауданында ауыл шаруашылығы дақылдарының жалпы егіс көлемі 78 мың гектарды құрайды. Соның биыл 48 262 гектарына ақ алтын дәні себілді.
Ауданда осы жылы 15019,2 гектарға бақша өнімдері отырғызылған. Ал, одан алынған өнімнің жалпы көлемі 426159 тоннаға жетті. Мәселен, 8621,7 гектарға қауын, 6397 гектарға қарбыз егілсе, оның 30 пайызы шетелге экспортталған. Бұл үлкен көрсеткіш. Бұдан бөлек, Жетісай өлкесінде майлы дақылдар, көкөністер толығымен жиналып алынды.
Сөз соңында «ауыл – алтын бесік» деген игі атқа ие болумен қатар, аграрлы аумақ ретінде ел ішін ауқатқа толтырып жатқан қос ауданның алар асуы мен бағындырар биігі көп болсын демекпіз. Тарихы қалыңдап, табысы арта түссін. «Елде болса ерінге тиеді» дегенді қаперге алсақ, бұл аудандардың молшылықтың ордасына айналуы облыстың көсегесін көгертіп, атын оздыра түсетіні айқын. Және оған сырттан қараған сырт көз болмай, өзіндік үлес қосуымыз Сіз бен біздің ортақ мүддеміз болуы тиістігін баса айтқымыз келеді.

С. НҰРАЙ.


Өткенінен сабақ алып, келешекке нық қадам басқан тәуелсіз Қазақстан бүгінде рухани жаңғыру жолына түсті. Әлем сәт сайын құбылып тұрған мына заманда даму үдерісінен кенже қалмау үшін әр азаматқа сана сілкінісі керек-ақ.
Мемлекет басшысы Нұрсұлтан Әбішұлы Назарбаев Қазақстандықтарға «Қазақстандықтардың әл-аухатының өсуі: табыс пен тұрмыс сапасын арттыру» дәстүрлі Жолдауын жариялағаны, онда агроөнеркәсіп кешенінің әлеуетін толық іске асыру арқылы ілгерілеудің жаңа сатылары белгілегені баршаңызға мәлім.

Осы жолдауда белгіленген міндеттерді жүзеге асыру үшін Түркістан облысының әкімі Жансейіт Түймебаев бірқатар ауқымды шаралардың бастамашысы болып үлгергенін де білеміз.
Оның бір парасы ретінде облысымызда бұрын соңды өткізілмеген «Қауын фест», «Қымызмұрындық» туризм әлеуетін арттырудағы «Шардара сафари» іс-шараларын атап өтсек болады.
Бұл бағытта Ордабасы ауданында да тиянақты тірліктер тындырылып, облыстың дамуында өзіндік орны белгіленіп келеді.
Ордабасы ауданы – кезінде бар қазақты бауырына жиған алқалы құрылтайымен тарихта қалған, бірліктің төлсипаты ретінде танылған киелі мекен. Бүгінде де барша жұртқа өнегелі ісімен танылуда.
Ортақ мақсатқа жұмылған Ордабасылықтардың ел жетістігіне қосар өзіндік үлесі, өзгеге үлгі боларлық игіліктері жетерлік.
Бұл ауданның экономикалық дамуының негізгі қозғаушы күші – ауылшаруашылық саласы.
Сол себепті де Ордабасыдағы диқандар мен шаруалардың мерекесі – «Алтын күз» жылдағыдан ерекше тойланды.
Жыл басынан бері 2 млрд. 711 млн. теңгені құрайтын 15 инвестициялық жоба іске қосылып, ауданның экспорт әлеуеті артты.
Келер жылғы ауылшаруашылық саласында өнім көлемін 47 млрд. 066 млн. теңгеге жеткізе отырып, 59 000 гектар жерге ауыл шаруашылығы дақылдарын орналастыру, облыс орталығы Түркістан қаласына жақын орналасқан Төрткүл ауыл округінен агроаймақ құру жоспарлануда.
Міне, жылды осындай жетістіктермен қорытындылаған аудан еңбеккерлеріне «Алтын күз» мерекесінде аудан әкімінің орынбасары Азат Оралбаев алғысын жеткізіп, арнайы «Алғыс хат» табыстады. Жұмысты тиісті деңгейде ұйымдастыра білген ауыл округі әкімдері де құрметтен тыс қалмады.
Ал, аудан тұрғындары асыл тұқымды мал, агроөнеркәсіп өнімдерінің, ауылшаруашылық техникасының көрмелерін тамашалап, жәрмеңкеден жергілікті көкөніс пен жеміс-жидектерді базар нарығынан төмен бағада саудалап жатты.
Жеңісі де, жемісі де ортақ Ордабасының жетістігі мұнымен шектелмейтіні аян.
Ел бірлігі мен ортақ мақсат әлі талай рет Ордабасы өлкесінің жақсы атын шығаратыны анық.

Жайна БОЛАТҚЫЗЫ.


Футбол Созақ үшін, ерекше спорт түрі. Мұнда жастайынан допты серік еткен жандарды жиі байқайсың. Қалыптасқан мектебі, шебер ойыншылары бар. Әр жарыс сайын жүлделі орыннан көрінеді. Ала допты серік еткендер «ылдидан салсаң, төске озған» нағыз сайыпқыранның өзі. Соңғы жылдары қалыптасқан тағы бір игі дәстүрді байқауға болады. Мұнда мектепішілік жарыстар жиі ұйымдастырылып тұрады. Бұл, салауатты өмір салты мен бұқаралық спортты дамытудың бірден бір жолы.

Осындай терең тарихы, жеңісті жолы бар Созақ футболы жақын арада тағы бір жағымды жаңалықпен қуантты.
Қазақстан Республикасы Мәдениет және спорт министрлігінің спорт және дене шынықтыру істері комитетінің футболдан 2005 жылы туылған ауылдық мектептердің жасөспірім-оқушылары арасында Қазақстан Республикасының біріншілігінде Созақ ауданының балалар мен жасөспірімдер футбол мектебі қатысып, күміс жүлдегер атанды. Қазақстан чемпионаты Жамбыл облысы, Тараз қаласы, Сарыкемер ауданында өтті. Өз тобындағы Солтүстік Қазақстан, Қызылорда облысы командаларын жеңіп, Жамбыл облысы, Байзақ ауданындағы құрдастармен топтан шықты. Ең тартысты ойындарда осы топтық жарыста болды. Еліміздің әр аймағынан келген спортшылар аянып қалмады. Алайда бағымен бабы қатар шауып, ұжымдық ойын көрсеткен командалар ғана жартылай финалға шығады. Созақ ауданы командасы жартылай финалдық ойында Қарағанды облысымен кездескен. Тартысты өткен жарыста қарағандылық құрдастарын 1-0 есебімен жеңді. Финалдық ойында топта қарсылас болған Жамбыл облысы, Байзақ ауданы командасымен кездесті. Төреші ысқырығы шалынысымен созақтықтар шабуылға шыққан, алайда Байзақтық қарсыластар, бірнеше шабуылды сауатты тойтара білді. Алма-кезек шабуылмен өткен бірінші кезеңде есеп ашылған жоқ. Екінші кезеңде де ойын тартысты өтті. Чемпионаттың ең үздік екі командасының ел біріншілігін ұтып алуға деген құлшыныстары зор болатын. Алайда ойын соңында сәттілік Байзақ ауданы командасына серік болды. Қорғаушының бір ғана қателігі, чемпиондыққа деген үмітті сөндірді. Соғылған голдан соң, ойын уақыты да түгесіліп, төреші ойынды аяқтады. Сонымен аудандық балалармен жасөспірімдер футбол мектебінің 2005 жылы туылған жасөспірім-оқушылары арасында Қазақстан Республикасының біріншілігінде Созақ ауданының балалар мен жасөспірімдер футбол мектебі күміс жүлдегер атанды.
Бұл үлкен табыс. Әрі бапкерлермен футбол мектебі басшылығының еңбегі. Мұндай жауапты жарыста команданы баптаған жаттықтырушы Д. Садуақасов пен оның көмекшісі А. Қосауов екенін айта кетуіміз керек.
Жалпы, республика чемпионатындағы жарыстарды санамаласақ, 2016 жылы 1999 жылы туылған жасөспірімдер арасында ел біріншілігінде аудандық футбол мектебінің оқушылары 1-орын иеленген. Сондай-ақ, еліміздің Білім және ғылым министрлігі тарапынан өткізіліген жасөспірімдер арасындағы ел чемпионатында қатарынан екі рет 3-орын алған. Ал, мұндай жетістіктің артында үлкен еңбек тұратыны белгілі.

Нар Болат.


Әлемде экономикадағы қарқыны төмендемейтін саланың бірі – туризм. Бүгінде туризмнің қайнаған ортасына айналған орындары бар Франция, Италия, Испания елдерінің әрбіріне жыл сайын 30 миллионнан астам туристер келеді екен. Сол арқылы олардың бюджеттеріне 10 млрд. долларға жуық қаржы құйылады. Ал Түркия мемлекеті болса туристік нысандарының арқасында 2,5 млн адамды тұрақты жұмыспен қамтуда.
Қазақстанда, соның ішінде Түркістан облысында туризмді алға сүйрейтін орындар мен нысандар жетерлік. Жуырда облыс орталығы Түркістандағы Қ.А.Ясауи кесенесіне миллионыншы мейманның келуі соның жарқын мысалы. Одан бөлек, облыста табиғи ландшафты ерекше Төлеби ауданының да туризмді дамытудағы мүмкіндігі мол. Ауданның осы және өзге де мүмкіндігін пайдалануда жергілікті билік қандай жұмыстарды атқарып жүр? Төлеби ауданының әкімі Бауыржан Омарбековпен болған сұхбатымыз осы бағытта өрбіген еді.

– Бауыржан Бақытұлы, қазіргі таңда Төлеби ауданының әлеуметтік-экономикалық әл-ауқаты өткен жылдармен салыстырғанда қандай? Ауданның өндірісі, мал мен егін шаруашылығы жөнінде мағлұматтарды келтіре кетсеңіз.
– 2018 жылдың 9 айында жалпы өңірлік өнім көрсеткіші 74 млрд. 718,1 мың теңгені құрап, 2017 жылдың тиісті кезеңімен салыстырғанда 9 млрд. 185,8 мың теңгеге артты. Өнеркәсіп саласында 2018 жылдың 9 айында 24 млрд. 503 млн теңгенің өнімі өндіріліп былтырғы жылдың тиісті кезеңімен салыстырғанда 4 млрд. 777 млн теңгеге ұлғайды. Ал ауылшаруашылық саласының өнім көлемі 2018 жылдың 9 айында 25 млрд. 419,3 млн теңгені құрады.

– Ауданда қандай салалар бойынша даму динамикасы байқалады? Керісінше қай салада түйіткүл көп?
– Ауданда кәсіпкерлікке бет бұрғандардың қатары қалыңдаған. Мысалы өткен жылы ауданда 15203 кәсіпкер жұмыс істеген болса, биыл олардың саны 15794-ке, яғни 2,5 пайызға көбейген.
Жоғарыда өнеркәсіп саласында жалпы өндірілген өнім көлемі өскенін атап өттік. Бірақ нақты өндірілген өнім көлемі біршама төмендегенін жасырғым келмейді. Мәселен, сүтті өнімдер өндіру бойынша ағымдағы жылдың 10 айында 16 695 тонна өнім өндірілді. Бұл өткен жылдың есепті кезеңімен салыстырғанда 1000 тоннаға аз. Есепті кезеңде кондитерлік өнімдерді өңдеу 8,5 пайызға, құрылыс кірпіштерін өңдеу 14.8 пайызға төмендеген.

– Аудандағы көгілдір отын, су, жарық яғни, коммуналдық мәселелер бойынша атқарылып жатқан жұмыстарды айтып өтсеңіз. Осыдан біраз бұрын Төлеби ауданында біраз жұрт иісі қолқаны қабатын су ішіп отырмыз деп ашынған болатын. Жалпы аудан әкімі ретінде осы сынды көлеңкелі мәселелерге нүкте қоюда қандай жұмыстар атқарып жүрсіз?
– Ауданда 55 елді мекен бар болса, соның 51-і орталықтандырылған ауыз су құбырына қосылған. Бұл аудандағы 116 мыңнан аса халықтың 93,7 пайызы орталықтандырылған ауыз су құбыры арқылы тіршілік көзін тұтынады деген сөз. Су құбырымен қамтылған 51 елді мекеннің 41-і суды тәулік бойы тұтынса, қалғаны шекті көлемде алады. Орталықтандырылған ауыз су жүйесіне қосылмаған Әлішер Навой, Тағайна, Алатау, Сарқырама елді мекендерін сумен қамту мақсатында бюджеттен қаржы қаралып, тиісті жұмыстар жүргізілуде. Ауыз су жүйелерінің жалпы ұзындығы 929,9 шақырымды құрайды. Бірақ олардың 43 пайызының тозығы жеткен. Жаңарту жұмыстарын қажет етеді. Өзіңіз жоғарыда атап өткен мысалдардың орын алуына сол су құбырларының тозуы өзіндік әсерін тигізбей қоймайды. «Ескі есіңді алады» деген сөз тегін айтылмаған ғой. Осыған орай, Қаратөбе, Тасарық, Көксәйек
елді мекендеріне баратын магистральды су құбырын аяқтауға 20,6 млн. теңге қарастырылып, құрылыс жұмыстары толық аяқталды. Жеті елді мекеннің, атап айтқанда, Жаңажол, Нысанбек, Керегетас, Бейнеткеш, Зертас, Ақайдар, Мәдени елді мекендерінің су құбырларын қайта құру жұмыстарын жүргізу үшін жобалық-сметалық құжаттар әзірленуде.
Төлебидегі халықтың 85% көгілдір отынмен қамтылған. Яғни, аудандағы 42 елді мекенге табиғи газ жеткізілген. 2018 жылы аудандық бюджет есебінен 9 елді мекенді табиғи газбен қамтамасыз ету үшін жобалық-сметалық құжаттамалары әзірленіп мемлекеттік сараптамадан өткізуге 32,7 млн теңге қарастырылды.

– Балалардың балабақша, мектеппен қамтылуы қандай?
– Ауданда 68 мектеп бар болса, соның 56-сы типті, 12-сі ыңғайластырылған ғимаратта орналасқан. 21 мектеп бір ауысымда, 47 мектеп екі ауысымда жұмыс істейді. Ауданымызда үш ауысымдық жүйедегі мектеп жоқ. Биыл облыстық бюджет есебінен «Бірінші Мамыр», «Жаңа – Ұйым», Әл-Фараби және М.Әуезов атындағы жалпы орта мектептері, аудандық бюджет есебінен Аршалы бастауыш мектебі және Жеңіс орта мектептері жөндеуден өтті. Сонымен қатар, №5, Қайнар, №16 Ш.Уалиханов, Қ.Тыныбеков атындағы білім ұялары мен Көксәйек
елді мекеніндегі 100 орындық бастауыш мектептерге жөндеу жұмыстарын жүргізу үшін жобалық-сметалық құжаттамалар дайындалды. Бірақ атқарылған бұл жұмыстар осы бағыттағы түйіткілдердің түйінін толықтай тарқай алмайды. Яғни, ауданда әлі де жөндеу жұмыстарын жүргізуді қажет етіп отырған сегіз мектеп бар. Олар №2, Қ.Мамытов, Майбұлақ, Т.Тоғысбаев, Б.Биболатұлы атындағы және Ынтымақ, Диханкөл, №8 білім ұялары. Оларға тиісті жұмыстарды жүргізу үшін жобалық-сметалық құжаттамалар дайындалуда.
Аудан бойынша балалардың балабақшамен қамтылуы жоспарға сай орындалуда. Қазіргі таңда 71 мектепке дейінгі ұйымда 6116 бүлдіршін тәрбиеленуде. Бұл балабақшада тәрбиеленетін жастағы қара домалақтардың 99,0 пайызын құрайды.

– Елбасының «Рухани жаңғыру» бағдарламасына сәйкес «Туған жер» жобасы аясында былтыр ауданның атпал азаматтары өз ауылына біраз абаттандыру жұмыстарын жүргізген болатын. Жұртқа үлгі етіп айтар осындай мысалдарды тарқатып өтсеңіз.
– Иә, биыл жалпы құны 43 млн.мың теңгені құрайтын 44 жоба жоспарланған. Оның ішінде 16 жоба іске асты.
«Туған жер» жобасы аясында нағыз азаматтықтың үлгісін көрсетіп жатқан азаматтар бар. Олардың қатарында облыстық мәслихаттың депутаты Мұрат Төлтебаевтың есімін бөле-жара атап өткен дұрыс сияқты. Өз кезегінде ақберен азамат Жоғарғы Ақсу ауылдық округі, Сарқырама елді мекеніне өз қаражаты есебінен қоршаулар орнатып, көгалдандыру аймақтарына гүл отырғызып, көшеттер екті. Атпал азаматтың ықпалымен аталған ауылдағы орталық көшеге Д. Қонаевтың есімі беріліп, ұлы тұлғаның құрметіне ескерткіш орнатылды. Мақсатты істердің бел ортасында жүруді дәстүрге айналдырған Мұраттай ағамыздың бұл қыры өзгелерге өнеге, ал тірлігі түзеліп, кәсібі өрге басқан жандарға үлгі боларлық тірлік дерсің.

– Ауданда абаттандыру, көгалдандыру бойынша шешімін күтіп тұрған тағы басқа мәселелер бар ма?
– Қазіргі таңда Төлеби және Қапал батыр көшелерінің қиылысындағы ұзындығы 17,27 шақырым шатқал, Ленгер қаласындағы Төлеби және Бірлік көшелеріндегі ұзындығы 7,5 шақырым жол, Біргөлік-Екпінді автожолының ұзындығы 6,2 шақырымы абаттандыру, көгалдандыру жұмыстарына сұранып тұр. Осы мақсатта аталған аралықтарға тиісті жұмыстарды жүргізу үшін жобалық-сметалық құжаттамалар әзірленіп, қаржыландыруға жіберілді.

– Тұнық ауа, керемет көрініс, аспанмен таласқан тау. Осындай кереметті бойына жинаған ауданның бүгінгі туристік әлеуеті қандай? Жалпы бес баллдық шкала бойынша ауданның туристік әлеуеттілігін қалай бағалайсыз?
– Әрине жоғары бағалаймын. Өйткені бұл аумақ елімізде барлық табиғат сұлулығын бойына жинаған өлкенің бірі болып есептеледі. Аты әлемге әйгілі Ақсу-Жабағылы қорығының 99 474 гектары аудан территориясына кіреді. Табиғаты шұрайлы ауданымызда еліміздің туристік инфрақұрылымын дамытуға арналған көрікті мекендер көп. Олардың қатарына «Алма Тау», «Тау самалы», «Саутс-Ойл» қонақ үйлерін, «Біркөлік» емдік сауықтыру санаториясын, «Тау самалы», «Эдельвейс» балалар лагерін, «Сайрам-Өгем» мемлекеттік ұлттық паркін және әртүрлі 34 демалыс аймақтарын қосуға болады.
Ауданға келген қонақтарға тиісті талаптарға сай қызмет көрсету үшін осы жылы Ақмешіт шатқалына баратын Екпінді-Ақмешіт жолының 2,5 шақырымы ойдағыдай аяқталып, пайдалануға берілді. Облыстық маңызы бар КХ 82 автомобиль жолында орналасқан «Тау Самалы» демалыс аймағының 30 шақырымы күрделі жөндеуден өтіп, кеңейтілді. Бұл жұмыстардың барлығы ауданның туристік әлеуетін арттыра түсетіні сөзсіз. Сонымен қатар, бізде туристік тартымдылықты арттыра түсетін 30-дан аса тарихи-археологиялық нысан бар. Олардың қатарында сақ заманының қорғандары, орта ғасырлық қалашықтардың орындары және халық арасында аты аңызға айналған тарихи маңызы бар «Жылақ ата», «Ғайып Ерен Қырық Шілтен», «Нұр ата», «Ақ мешіт» секілді көпшілік мінәжат ететін әулиелі орындар бар.

– Осыдан біршама жыл бұрын аудандағы біраз жер телімдері бірқатар азаматтарға жекеменшікке берілгені, бірақ олар нақты іс жүргізбей жатқандықтан, учаскелерді қайтадан мемлекет меншігіне қайтару жұмыстары қолға алынғандай болған еді. Осы жайында ашып айтып берсеңіз.
– Иә, игерілмей жатқан жер телімдерін анықтау бойынша түгендеу жұмыстары жүргізілді. Соған сәйкес, Қаратөбе ауылдық округіндегі 8, Қоғалы ауылдық округіндегі 12, Қасқасу ауылдық округіндегі 34, Алатау ауылдық округіндегі 9 жер учаскелерінің мақсатты пайдаланылмай жатқаны анықталды. Соған сәйкес облыстық жер инспекциясына осы фактілерге орай шара көру үшін хат жолданды. Бүгінде жер телімдерінің мақсатты пайдаланылуы бойынша өзге де ауылдық округтерде түгендеу жұмыстары жүргізілуде.

– Төлебидің ауасы «қоңыр салқын малға жай» дейміз. Бірақ ауданда жайылым жерлер аз. Бұл ауданның мал шаруашылығына қандай әсерін туғызып жатқанын айта кетсеңіз. Бүгінде аудандағы мал басы туралы көрсеткішті өткен жылдармен салыстырып берсеңіз.
– Ірі қара мал басының ұлғаюы 60,8 мың басқа жеткізу болса, нақты 66,7 мың басқа жетіп 109,7 пайызды құрады. Ұсақ мал басының ұлғаюы 180,7 мың басқа жеткізу болса, нақты 201,1 мың басқа жетті. Жылқы басының ұлғаюы 29,6 мың басқа жеткізу болса, нақты 26,6 мыңды құрады. Ауданда жалпы жайылым көлемі 29746 гектар. Жайылымның шектеулі болуына байланысты мал басын қарқынды көбейту мүмкіндігі болмауда. Алайда, мал басын асылдандыру бағытында жұмыстар жүргізілуде.

– «Рухани жаңғыру» бағдарламасы аясында ауданда бірқатар орындар атап айтқанда, Бекасыл әулие, Мыңшейіт тарихи орны, Көз ата әулие, Үңгірлі әулие, Қотыр ата бұлағы сынды нысандар жергілікті жердегі тарихи маңызы бар нысандар тізіміне енгені белгілі. Осы нысандар төңірегінде тарих қандай сыр шертетіндігі туралы мазмұнды әңгіме өрбітсеңіз.
– Бұл әулие-әмбиелердің жүріп өткен жолдары кез-келген туристі еліте кетеді. Мәселен, Бекасыл Ғұлама молда әулие — Адам Ата -Хауа Анадан бермен қарай тіршілік заңдылықтарын, әлем жаратылысын, тылсым табиғатты, Алланың атымен айтылатын баян-хиқаяттарды, тарихи шежірелерді терең білген, ілім-білімді игерген. Ол жұлдыздар сырын таныған, дұғалар құпиясын меңгерген, сәуегей әрі көріпкел, жұлдызшы әрі шипагер болған. Қара суды теріс ағызатын құдіретке ие болған. Және мұның бәрін қасиетті бабамыз тек ілімге, ғылымға сүйеніп жасаған. Осының өзі оның білімділігін, көп оқығандығын аңғартады.
Ал Мыңшейіт тарихи орны мен өңірдегі қасиетті жерлер тізіміне енген аудандағы өзге де нысандар туралы деректер де ауданға келген туристерді ерекше қызықтыратыны сөзсіз.
Үңгір әулие атымен көпшілікке кеңінен таңылған киелі орынның бірі. Бірінші мамыр әкімшілігіне қарасты Қоңырбөрік ауылдың орта тұсында орналасқан орта мектептің шығысында, шағын өзен бойынан 35-40 метрдей биікте, беткейде орналасқан. Үңгірдің үсті қатпар тасты келген. Алыстан қарағанда осы көрініс екі көзбен мұрынды, ал қатпарлы тастар қалын қасты адамның бетбейнесін көз алдыңызға елестеді. Осы жерді жергілікті халықтар «Үңгірлі әулие» деп атап, басына айналасын тазалап, күтіп баптайтын шырақшы қойған. Үңгірлі әулиенің күтуші шырақшысы Қоңырбөрік елді мекеннің тұрғыны Қосқұлақов Сәлімханның әңгімесіне қарағанда, бұл ара «Дәу ата», «Көз ата», «Үңгір әулие» деп бірнеше атаумен аталады екен. Ол атаулар суының шипалық қасиетіне байланысты аталған. Яғни, бұлақ суының ең басты қасиеті көзге ем. Бауыр, бүйрек, өт сияқты ішкі ағза мүшелерін тазартып ондағы ас қалдықтары мен тасқа айнала бастаған қатты заттарды түсіруге, мидың дұрыс жұмыс істеуін қамтамасыз етіп, бойды сергітетін қасиеті бар екен.
Көзді ата әулиесі Кемеқалған ауылына қарасты Ақбастау ауылынан екі шақырым оңтүстік-шығысындағы ескі қорымда орналасқан. Қорым «Көзді ата әулие» атымен аталады. Көзді атаның аты Сейіткәрім қары деген молда екен. Шамамен 1714 жылдары өмір сүрген, осы өңірде егін егіп, Исламды насихаттап, елді ашаршылықтан аман алып қалған екен. Көзді атаның әулиелігі де, ол топырағында, тасында. Суын ішіп, жуынады. Топырағына аунайды. Өйткені әулие иесі – айдаһар! Айдаһардың бүкіл дене бітімі қасындағы тасынан көрінеді. Бастысы соқырлар көзін ашады. Талай адам ниеттеніп келіп, қуанып кеткен екен.

– Қазіргі таңда ауданға келуші туристердің саны қанша? Олардың санын көбейту мақсатында нақты бір жоба-жоспар бар ма?
– Туристердің ағынын көбейту үшін біз демалушылардың қажеттілігін толық қанағаттандыра алатын сервистік қызметті жетілдіруге көп мән берудеміз. Сонымен қатар, биыл біз ауданға келетін туристердің санын 27 мыңға жеткізуді межелеген болатынбыз. Ағымдағы жылдың 10 айында ауданға бет бұрған қонақтардың саны 28 мыңға жуықтады. Төлебиге келетін туристердің қатарын көбейту бағытында «AISA» және «SAIRAM SU resort» демалыс аймақтары іске қосылды. Бұл бағыттағы жұмыстар алдағы уақытта да жалғасын табатын болады.

– Мырзашөл өңірі ақ алтынымен мақтанады. Сарыағаш курортты аймағымен жақсы таныс. Арыс тоғыз жолдың торабындағы қала ретінде ерекшеленеді. Созақ өндірісі өркен жайған аудан ретінде алға шығады. Ал Түлкібастың алмасы нарықта көп сұранысқа ие екендігімен ерекшеленеді. Сол сынды Төлебидің бренді қандай?
– Төлеби ауданының бренді – қымыз деп айтар едім. Осыған байланысты соңғы жылдары Қамбар ата төлдерін мүмкіндігінше көбейтіп, қымыз өндіру ісін қарқынды дамыту қолға алынған. 2015 жылмен салыстырғанда жылқы басы 1,5 есеге артып, қымыз өнімділігі артқан. Өнімдердің тауарлық белгісін қалыптастыру үшін ұлттық сусынымызды арнайы бөтелкелерге құйып дайындайтын 4 шаруашылықтың жұмысы жолға қойылған.
Бұдан бөлек, таулы территорияда орналасуы себепті Төлебиді туризм саласының бренді деп айтар едім. Себебі, Алатау және Қасқасу ауылдық округтері сауықтыру аумақтарына жатады. Мұнда жылдың кез келген мезгілінде туристер таңғажайып тынығуды бастан кешіретін «Тау самалы», «Изуми тау», «Алтын Дән», «Eco Village Қасқасу» демалыс аймағы мен «Алатау» шаңғы базасы жұмыс істейді.

– Елбасының жуырда Қазақстан халқына арнаған «Қазақстандықтардың әл-ауқатының өсуі: табыс пен тұрмыс сапасын арттыру» атты Жолдауы бойынша өз пікіріңізді айта кетсеңіз.
– Жолдау Елбасының қазақстандықтар үшін жасалып жатқан шынайы қамқорлығның кезекті дәлелі десек болады. Айқын алты басымдық алға тартылған құжатта Қазақстан дамуының стратегиясы белгіленіп, оның дамуымызға қаншалықты қарқын беретіні көрсетіліп отыр. Сол бойынша алға қойған межелерге қол жеткізуде адам факторы зор маңызға ие екені екшеледі. Бұл туралы Президентіміз «Әрбір Қазақстандық жүргізіліп жатқан реформалардың мәнін сезініп, олардың Отанымызды өркендету жолындағы маңызын жете түсінуге тиісті» деп атап көрсеткен. Реформаларды табысты жүзеге асыру үшін халықтың ортақ мақсатқа жұмылуы аса маңызды.
Жолдауда халықтың әлеуметтік көңіл-күйін айқындайтын негізгі салаларда үлкен шараларды іске асыру ұсынылған. Әсіресе, мемлекет басшысының еңбекке қатысты идеологияны ілгерілету туралы сөзі қоғамдық бірлестіктерге зор жауапкершілік жүктеді.
Президентіміздің келесі жылы «Педагог мәртебесі» туралы заңның әзірленіп, оның қабылдануын қадап айтуы ұстаздар тарапынан зор қолдау тауып отыр. Жастардың заманға сай білім алуында жетекші мәнге ие мұғалімдер білімінің артуына жағдай жасау ел болашағын жарқын ету жолындағы аса маңызды іс.
Қазақта «ауруды елемеген өледі, дауды елемеген төлейді» деген сөз бар. Сол сынды қоғамды тұтас бір ағзаға теңеп, ондағы кейбір дерттердің қылаң беруіне мән бермесек, соңы ушыққан құбылысқа айналары анық. Ал ағымдағы жылдың 5-қазанындағы Елбасының жариялаған жолдауы қазіргі қоғам дертін тап басып, оның дауасын дәл тапқан игілікті құжат десек артық айтқандық емес.

– Әңгімеңізге рахмет!

Сұхбаттасқан: Т. ДҮЙСЕБАЙҰЛЫ.