Маңызды

Пандемияға байланысты елімізде оқушылардың 77 пайызы немесе 2,6 млн. бала қашықтан білім алып жатқаны белгілі. Ал Түркістан облысындағы оқушылардың 89 пайызы немесе 446 109 бала сабақты партада емес, платформа арқылы оқып жатыр. Алдын ала жүргізілген мониторингке сәйкес, осыншама оқушылардың ішінде 79 214 бала үшін қашықтан білім алуда аса қажет компьютерлік техника мен планшет қолжетімсіз екені анықталған.
Осы мақсатта мектептен 24317 компьютер оқушыларға уақытша пайдалануға берілген-тін. Қалған балалардың қажеттілігін қамтамасыз етудің қарқыны қандай? Оқу жылының басталғанына бір жарым ай уақыт өтті. Бірінші тоқсанның қорытындылануына да екі аптадай уақыт қалды. Ал құрылғысы жоқ қанша оқушы әлі күнге дейін құр алақан отыр.
Жалпы облыста оқушылар онлайн арқылы ойдағыдай білім алуын қамтамасыз ету үшін әу баста ел Үкіметі резерві қаражатынан 57190 компьютерлік құрылғы атап айтқанда 43527 — ноутбук, 5952 – компьютер, 7711-і планшет сатып алу жоспарланған.
Өткен қыркүйек айында өңір оқушыларына 4000 планшет сатып алынып, үлестірілген. Осы айдың басында тағы 3711 планшет қабылдап алынды. Жаңа құрылғылар екі ай уақытқа арналған «Білім» тарифі қосылған сим карталарымен берілді.
Түркістан облысы адами әлеуетті дамыту басқармасының мәлімдеуінше енді қалған 49 479 құрылғы (5952 компьютер, 43527 ноутбук) ағымдағы жылдың 30-қазанына дейін алынып, оқушыларға беріледі деп күтілуде.
Қашықтан оқытуды тиімді ұйымдастыру мақсатында алынатын компьютерлер мен ноутбуктер негізінен аз қамтамасыз етілген және көпбалалы отбасыларға, жетім және ата-анасының қамқорлығынсыз қалған, ерекше білім алуды қажет ететін балаларға үлестіріледі. Техникалардың әр оқушыға жеткізілуін Түркістан облысы адами әлеуетті дамыту басқармасы жанынан құрылған жетекші топ мүшелері қадағалауда.
Жалпы Түркістан облысында 912 жалпы білім беретін мектеп бар. Мектептерде 502 737 бала білім алады.

Жылдар бойы тау болып үйіліп тұрған Шымкенттегі бұрынғы қорғасын зауытының қалдықтарын жою мәселесіне нүкте қойылатын болды.
Бұл туралы Шымкент қаласы әкімдігінің баспасөз қызметі хабарлады.
Енді жетпіс жылдан астам уақыттан бері жиналып, қоршаған орта мен экологияға зиянын тигізіп келген өндіріс қалдықтарын қажетке жарату үшін түсті металл концентратын шығаратын өндіріс орны іске қосылды. Бірегей жобаның жұмысымен ҚР Индустрия және инфрақұрылымдық даму министрі Бейбіт Атамқұлов пен Шымкент қаласының әкімі Мұрат Әйтенов танысты. Мемлекеттік индустриялық-инновациялық даму бағдарламасына енгізілетін жобаны «Standard Steel KZ» ЖШС жүзеге асырды. Жаңадан іске қосылатын кәсіпорын жылына 400 мың тонна өндіріс қалдықтарын қайта өңдеуден өткізетін болады.
Бүгінгі таңда жобаның жылына 250 мың тонна қалдықтарды өңдейтін бірінші желісі жұмысын бастады. Зауыт биыл қараша-желтоқсан айларында толығымен іске қосылғанда 400 адам жұмыспен қамтылады.
Бүгінде қоршаған ортаны қорғау, түсті металл өндірісін дамытуда қалдықтарды қайта өңдеудің маңызы өте зор. Жоба толығымен іске қосылса, экологияны зиянды қалдықтардан тазартуға зор үлес қоспақ.
Кәсіпорын жұмысымен танысқан Бейбіт Атамқұлов аталған өндіріс орнының экологиялық тиімділігімен қатар, әлеуметтік-экономикалық рөлі де зор екенін атап өтті.
Өндіріс ошағы толық қуаттылығында жұмыс істегенде, аумақ зиянды қалдықтардан 3-4 жылда тазартылатын болады.
Естеріңізге сала кетсек, кезінде Шымкент қорғасын зауытында КСРО аумағында өндірілген қорғасынның 70 пайызы өндірілетін ірі өндіріс орны болған.

Шымкентте азаматтар жүргізуші куәлігін алу үшін делдалдардың көмегіне жүгінеді. Өз кезегінде бұл олардың артық ақша шығындалуына апаратын қадам екені белгілі. Заңсыз тіркеудің мұндай көрінісі халықтың цифрлық сауатының ақсап жатқанымен тығыз байланысты.

Оны жою үшін халыққа қызмет көрсету орталықтарының мамандандырылған бөлімдерінде жүргізуші куәлігін алушылар үшін «Екі есе төлеме!» атты акция ұйымдастырылды.
Көліктерді заңсыз тіркеу және автокөліктерді делдалсыз тіркеуді жолға қою мақсатында өткізілген шарада ұйымдастырушылар азаматтарға құжаттарды делдалдар көмегінсіз рәсімдеу бойынша түсіндіру жұмыстарын жүргізді.
Делдалдарсыз электронды түрде қызметті алу механизмінің ережесі өте қарапайым. Ол үшін азаматтар egov.kz порталына кіріп, өтінімді толтырып, өзінің жеке электронды цифрлық қолтанбасымен (ЭЦҚ) қол қойса жеткілікті.
Электронды түрде қызмет алуға тұрғындарда компьютер немесе басқа да құрылғыларды пайдалану мүмкіндігі болмаған жағдайда, Шымкент қаласында ХҚКО-да 315-ке жуық өзіне-өзі қызмет көрсету бұрыштары ашылғанын айта кетейік.
ҚР Мемлекеттік қызмет істері агенттігінің Шымкент қаласы бойынша департамент басшысы Ә.Көмекбаев куәлікті делдалдар көмегінсіз алатындардың саны алдағы уақытта өсе түсетініне бек сенімді. Себебі, азаматтар алтын уақыттарын сарп етпей, ХҚКО-ға бармай-ақ қол жеткізетін қарапайым және ыңғайлы шешімдерді таңдайды деп біледі.
Жалпы қалада ХҚКО-ның мамандандырылған бөлімдерінде күн сайын 200-ге жуық жүргізуші куәлігі беріліп, 600-ден астам көлік құралдары тіркеледі.

Осы аптада дәлірегі, 15-қазаннан бастап Шымкентте қоғамдық көліктерде «Төлем» электронды төлем жүйесі енгізіледі. Бұл туралы бұған дейін қала әкімінің орынбасары Мақсұт Исахов мәлімдегені белгілі. Электронды төлем жүйесі бойынша жол ақысын төлеу үшін қолданылатын төлем карталары қалада 10-қазаннан бастап сатуға шығарылды. Ол қаладағы сауда орындары мен дүкендерде сатылады. Құны небары 500 теңгені құрайды. Ал оны теңгерімге толтыру банктердің банкоматтары немесе мобильді қосымша арқылы жүзеге асады.
Электронды төлем жүйесін енгізу «QazSmartTrans» ЖШС-нің жеке инвестиция есебінен атқарылуда. Инвестиция көлемі – 1,2 млрд. теңге.
Қоғамдық көлікте төлем жасау үшін электронды карталардын 4 түрі қарастырылған. Олар стандарттық (жалпы пайдалануға), мектеп оқушыларына, студенттерге және жеңілдіктер ие азаматтарға арналған карталар. Қоғамдық көліктерде жүру үшін тиісті жеңілдіктерге ие азаматтарға карта тегін таратылады. Қалада жеңілдікке ие азаматтар санатына Ұлы Отан Соғысы ардагерлері мен мүгедектері, тыл еңбеккерлері (Ерен еңбегі үшін медалімен марапатталғандар) Батыр ана, Алтын алқа, Күміс алқа төс белгілерімен марапатталғандар және І-топтағы көру қабілеті нашар зағип жандар жатқызылады. Жергілікті билік қалада мұндай санатқа жататын азаматтар саны 14 мыңға жететінін алға тартады. Ал оқушылар мен студенттер төлем жасағанда картадан қазіргі қолданыстағы тарифтер ғана ұсталынатынын айта кетейік.
Шымкент қалалық жолаушылар көлігі және автомобиль жолдары басқармасының басшысы Ержан Жолдасов тұрғындар 1-қарашаға дейін жолаушылар автобустарда жол ақысын төлем карталарымен немесе қолма қол төлей алатынын айтады. Бірақ 1-қарашадан бастап қоғамдық көлікте электронды төлем жасайтындар үшін жол ақысы 70 теңге, ал қолма қол төлем жасайтындар үшін 100 теңге болмақ. Бұл жаңалықты базбір тұрғындар ат тепкендей қабылдап, мұны азаматтардың құқығын таптау деп қабылдайтындарын айтқан. Мұндай сарындағы пікірлерге қала әкімінің орынбасары Мақсұт Исахов мынадай ой айтты.
– Әрбір қала тұрғыны электронды картамен жол ақысын төлеу арқылы қаладағы транспорттық қызметтің дамуына үлес қосады. Электронды төлемге қадам жасау арқылы Сіз бен біз жолаушылар тасымалымен айналысатын компаниялардың кірісі мен шығысын білетін боламыз. Тиісінше, табыстың ашықтығына қол жеткізу арқылы біз салық түсімінің артуын жолға қоямыз. Төлемдерді электронды жүйеге көшкізбей, қоғамдық көлікті модернизациялау бағытында нақты шешім шығара алмаймыз. Шымкентте 24 транспорт компаниясы бар. Белгілі бір транспорт компанияларының бағыттарының жолаушылар үшін қаншалықты тиімді екенін, ондағы жолаушылар ағынының аз немесе көп екенін, белгілі бір бағыттарда автобустарды көбейту керек пе әлде азайту қажет пе деген сұрақтарға нақты жауап табуда электронды төлем жүйесінің маңызы зор. Бұдан өзге транспорт компанияларының жүру кестесін дұрыс орындап жатқанын білу, олардың тиісті ережелерді бұзғанын дәлелдеу электронды төлем жүйесі арқылы мүмкін екенін баса айтқымыз келеді. Қолма қол төлем үшін жол ақының белгіленген тарифтен бірнеше есе қымбат болуы азаматтарды электронды төлем жасауға баулудың төте жолы. Яғни, біз тұрғындарды осылайша ынталандырғымыз келеді. Сондықтан да мұны азаматтардың құқын таптау деп түсіну қисынсыз.
Осылай деген Мақсұт Пернебайұлы Алматы қаласында автобустарда «Оңай» электронды төлем жүйесі енгізілгеннен кейінгі екі ай уақыт ішінде тасымалдаушы компаниялардың табысы айқындалғанын да тілге тиек етті.
Бүгінде смартфон пайдаланушыларына арналған «Open Shymkent» мобильдік қосымша әзірленді. Тұрғындарға тиісті мәлімет беру үшін 4 операторы бар CALL-орталығы ашылды. Сіз қоғамдық көліктерде электрондық төлем жүйесіне қатысты мазалаған кез келген сұрақпен 8775 811 22 22 телефонына қосылған байланыс орталығына қоңырау шалып, тиісті жауап ала аласыз.

Шымкентте Елбасы Нұрсұлтан Назарбаев Қоры мен Қазақстанның іскер әйелдері қауымдастығы ұйымдастыратын «Мейірімділік керуені» атты республикалық байқауға өтінімдер қабылдау басталды.
Бұл туралы Шымкенттегі ақпараттық-коммуникациялық орталық алаңында Іскер әйелдер қауымдастығының Шымкент қаласы бойынша төрайымы Эльмира Созақбаева айтты.
Байқаудың мақсаты айқын. Ол ештеңеден именбей игі істер жасайтын адамдарды анықтап, көпшілікке таныстыру. Сол арқылы қоғамда адамгершілік құндылықтарды дәріптеу. Өз кезегінде байқау лауреаттары төмендегідей бес номинация бойынша анықталады. Атап айтқанда, қайырымдылық қызметі ұлттық салт-дәстүрлермен байланысты және ұлттық мәдениетті сақтауда белсенділік танытқандар үшін «Асар» номинациясы, білім беру, экология және абаттандыру, мәдени нысандарды қалпына келтіру және т.б. салаларда туған өлкесіне қайырымдылық көмек көрсететіндер үшін «Туған жер» номинациясы, ешқандай бұйрық күтпей, ерлік жасап, қайсарлық танытқандар үшін «Батыл жүрек» номинациясы белгіленіп отыр. Сонымен қатар белгілі бір уақыт аралығында өтеусіз тұрақты көмек көрсеткендерге «Мейірім жолында», ал БАҚ-та қайырымдылық тақырыбын көтеріп, қоғамның назарын әлеуметтік мәселелерге аударатын материалдары үшін журналист немесе шығармашылық ұжымға «Қайырымдылық тарихы» номинациясы тағайындалады.
Брифинг барысында Шымкент қаласы Олимпиадалық резервті даярлау орталығы мемлекеттік мекемесі директорының орынбасары Айнұр Ертай белсенді әрі батыл адамдарға арналған байқауға қатысуға өтінімдерді жолдау тәртібін түсіндірді. Өтінімдерді 2020 жылдың 1-қазанынан бастап 15- желтоқсанына дейінгі мерзімде caravan_dobroty@fpp.kz электронды поштасына жіберу қажет.
Адамдық істер жасайтын азаматтарға лайықты құрмет жасау бағытында ұйымдастырылған конкурс жеңімпаздары келер жылдың ақпан айының соңында Алғыс айту күні қарсаңында анықталатын болады.

Елімізде алғаш рет цирк туралы фильм түсірілмек. Шымкентте түсірілетін тың туындыны «Сақ» киностудиясы мен «Шымкент-Цирк» мемлекеттік коммуналдық қазыналық кәсіпорны бірлесіп жарыққа шығармақ.
«Манеж» атауы берілетін фильм бастапқыда 10 бөлімді құрайтын болады. Егер фильм көрермен ықыласына бөленсе, түсірілім жалғасатын болады.
Бұл туралы қаладағы ақпараттық-коммуникациялық орталығында «Шымкент-Цирк» МКҚК-нің директоры Арман Алиев мәлімдеді. Цирк директоры «Манеж» сериалының мақсатын былай деп жеткізді:
– Сериалды түсірудегі негізгі мақсат – цирк өнерін насихаттап, оның қаншалықты күрделі сала екенін көрсету. Фильмде әртістердің төккен тері, ғажайыптар құпиясы және ерекше бағдарламалары көрсетіледі. Фильмде көрермен республикадағы үшінші кәсіби цирктің құрылуын, қалыптасуын, сондай-ақ, жастарды циркке баулуды және аңдармен жұмыс жасау өнері секілді қызықты оқиғаларды тамашалайды. Бұл сериал – еліміздегі алғашқы жоба, яғни, мұны Шымкенттің бренді ретінде қабылдауға болады.
Сериалды түсіру туралы негізгі идеяның авторы, «Сақ» киностудиясының талантты режиссері Батырхан Дәуренбеков.
Әрбір бөлімі 25 минуттан тұратын фильм «Сақ» киностудиясының өз қаржысына түсірілуде. Әр сериал үшін шамамен 4-5 млн. теңге қаржы жұмсалады. Осы жылдың соңына дейін екі сериясын жарыққа шығару жоспарланып отыр. Қос шығармашылық ұжым бірлесе отырып, цирктің күнделікті тыныс-тіршілігін көрсететін танымдық бұл көркем фильм Қазақ мемлекеттік циркінің 50 жылдығына арналады. Мұндағы сюжеттер «Шымкент-Циркте» және қаланың көрікті жерлерінде түсіріледі. Өз кезегінде Арман Алиев фильмді түсіруде техникалық қиындықтар өте көп екенін тілге тиек етті. Мысалы, бір ғана арыстанның жәй дайындық жұмыстарын түсіндіру үшін шығармашылық ұжым екі күн уақытты сарп еткен екен.

ал, олар қалай жүзеге асады?

Шымкентте күн сайын көлік көбейіп келеді. Көліктің көбейгені жақсы. Бұл әлеуметтің жағдайы жақсарып, темір тұлпар тізгіндеуге қауқарлы болып келе жатқандар қатарының көбейе түскенін аңғартады. Дегенмен де таяқтың екінші ұшы бар.
Қазіргі таңда автокөлік санының артуынан Шымкенттегі Бәйдібек би, Республика, Тәуке хан даңғылдары, Темірлан тас жолы мен Т.Рысқұлов, Жібек жолы сынды магистралды көшелердегі көлік ағыны әу баста нысан құрылыстарын жүргізу үшін жасалған жобадағы көрсеткіштен екі есеге артқан. Тиісінше қала көшелерінде кептелістер көбеюде. Осыған орай Шымкентте көлік ағынын оңтайландыру мақсатында бірнеше жоба қолға алынбақшы. Аталған жобалардың негізінде қалада ірі магистрал көшелердің жалғасы салынып, шағынаудандар арасына барыс-келісті жақындататын төте жолдар түсетін болады.
Бұл туралы Шымкенттегі ақпараттық-коммуникациялық орталық алаңында қала әкімінің орынбасары Мақсұт Исахов мәлімдеді.
Мақсұт Пернебайұлының сөзіне сенсек, алдағы уақытта Шымкенттегі Бәйдібек би даңғылындағы көлік ағынын оңтайландыру барысында екі жоба қолға алынады. Бірінші жобаға сәйкес, Т.Өтегенов көшесі ұзартылады. Бүгінде Төлеметов көшесіне қиылысқаннан бастап жалғасы жоқ Өтегенов көшесі болашақта одан әрі 2,3 шақырымға дейін ұзартылып, «Асар» шағынауданына қосылады. Жобаның құрылысы 2021 жылы басталады. Нысан құрылысы 2 кезеңнен тұрады. Бірінші кезең үшін 1 млрд. теңге, екінші кезеңге 649 млн. теңге жұмсалады. Құрылысты екі кезеңге бөлудің өз жөні бар. Себебі, екінші кезеңде түсетін жол бойында 59 жер телімі (арасында үйлер де кездеседі) бар. Оны мемлекет меншігіне қайтару механизмі уақыт алады. Ал бірінші кезеңде құрылысқа кідіріс жасайтын мұндай жағдайлар жоқтың қасы. Бұл жоба жүзеге асқанда, Бәйдібек би арқылы Алматы айналма жолына шығып жүрген автокөліктер енді Т. Өтегенов көшесімен кететін болады.
Екінші жоба «Шымкент Сити» мен «Асар» шағын ауданын қосатын көше. Бұл бағыттағы жоба сала мамандарымен талқыланған. Мамандар бұл көшені салған дүрыс деп пайым айтқан. Егер екі шағын ауданды қосатын көше қолданысқа енгізілсе, Өтегеновпен көтеріліп келе жатқан көлік «Бозарыққа» баратын болса «Шым Сити» арқылы, ал әуежайға бет алса, «Асар» шағын ауданы арқылы жүріп өтеді. Болжам бойынша жалпы ұзындығы 1,3 шақырым болатын бұл көше құрылысына 800 млн. теңге жаратылады.
Келесі жоба алты жолақты С. Бәйтереков көшесін ұзарту арқылы оны «Тұран» шағынауданындағы магистралға қосу көзделіп отыр. Жоба бойынша көшенің ұзындығы 2,3 шақырым болады. Жоба аясында «Қайтпас-1» шағынауданындағы Алтынсарин көшесі кеңейтілмек.
Қазіргі таңда қаладағы Ж.Адырбеков көшесінің құрылысын аяқтау қиынға айналғаны белгілі. Мақсұт Пернебайұлы бұл нысанның жыры көп, даулы мәселеге айналғанын ашық айтты. Себебі, нысан құрылысын жүргізу үшін екі-үш мердігер компания бір-бірін сотқа сүйреп, біраз уақыт жоғалтып алған. Абырой болғанда компаниялар медиация арқылы бейбіт келісімге келген көрінеді. Осыған сүйене отырып, биліктігілер биыл құрылысшылар Ж.Адырбеков көшесін ең болмағанда С. Жандосов көшесіне дейін ашып береді деген үмітте отыр.
Айтпақшы Адырбеков көшесіне қатысты да тағы бір жоба бар. Қаладағы С. Жандосов көшесі Ж. Адырбековке қосылмайды. Бірақ екі көшенің ара қашықтығы 350 метр. Егер осы көшелерді жалғайтын өткел салынатын болса, Жібек жолы, Ә. Сасбұқаев, Ж. Адырбеков көшелеріндегі көліктердің өтуі азая түседі. Қала әкімінің орынбасары жоба үшін көп қаржы кетпейтінін, бар болғаны 200-250 млн. теңгенің айналасындағы қаржы шығындауға болатынын жеткізді.
Тағы бір мақұлданған жоба ауқымды нысан Әл Фараби көшесіне қатысты құрылыс. Жалпы аталған көшенің құрылысы 2018 жылы басталған. Транзит үшін аса маңызды магистрал саналатын көше құрылысының 80 пайызы аяқталған. Тұралап қалған тұсы көшенің Темірлан тас жолы және Алматы А-2 тас жолына қосылатын учаскелерін аяқтау жұмысы. Бұл жұмыстардың тұралауына көшелерді жалғайтын жолдар бойындағы жер телімдері мен үйлерді мемлекет меншігіне қайтару бағытындағы жұмыстардың күрделене түсуі себеп болған. Қазіргі таңда Әл Фараби көшесін Темірлан тас жолымен байланыстыратын тұсындағы жолдарда азаматтардан жерлерін мемлекет игілігі үшін қайтару жұмыстары түйінделген. Ал А-2 айналма жолына қосылатын аумақтағы 43 үй мәселесіне әкімдіктегілер біраз уақыт кетіретін сыңайлы. Мақсұт Пернебайұлы қайткен күнде де бұл жобаны келер жылы аяқтау маңызды екенін баса айтты. Соның негізінде Алматыдан келетін жүк транзиттері Түркістанға қарай апаратын бағытқа түсу үшін қалаға кіріп, жолдарға салмақ салмайтын болады.
Тағы бір күрделі жоба Д. Қонаев даңғылы жалғасының А-2 трассасына шығуы. Қазіргі таңда аталған даңғылдың жалғасын салу жұмыстары жүргізіліп жатыр. Биыл нысанның бірінші учаскесі бойынша Түркістан көшесінен бастап Қошқаратаға дейінгі аралық ашылады деп күтілуде. Одан әрі екінші учаскедегі құрылыс жұмыстары үшін биыл тендер жарияланады. Үшінші учаскеде «BI Group» компаниясы өз жұмыстарын жүргізу үстінде. Төртінші учаскеде көпір салынып тұр. Енді бесінші учаскеде даңғыл жалғасын «Сәуле» шағын ауданындағы «Әскери бөлім» орналасқан жерге дейін апарып, содан кейін даңғылды Алматы-Ташкент трассасына шығарып жіберу туралы жобаны қарастыру көзделген. Оның ұзындығы 1,6 шақырым. Бағасы шамамен 800 млн теңге болуы мүмкін. Мақсұт Исахов бұл аумақта да 35 жер телімі (кейбір аумақтарында үйлер де бар) мемлекет меншігіне қайтарылатынын ескертті.

Түркістан қаласында игі бастама қолға алынды. Қожа Ахмет Ясауи атындағы ХҚТУ-нің базасында «Bolashaq Books» яғни, «Болашақ кітаптары» сөресі ашылды. Бұл сөренің кәдуілгі кітапханадағы сөрелерден ерекшелігі өзің оқып тауысқан кітапты сөреге қойып, орнына ондағы кез келген басқа туындыны алып оқитындығыңда.

Облыс орталығында тұңғыш рет ашылып отырған «Болашақ кітаптары» кітап сөресінің ашылуына қала әкімі Рашид Аюпов қатысты. Құрметті қатысушы ретінде сөз алған шаһар басшысы «Адам мен адамды тең қылатын, ол — білім. Ал артық білім кітапта екені бәріне аян. Кітаптың рухани байлығымыз бен құндылығымызды арттыруда маңызы зор. Ендеше, барлық таныстарымды, достарымды осы жерде оқыған кітаптарын өзгелерге бөлісуге шақырамын»,-деді.
Өз кезегінде қала әкімі бұған дейін айына бір кітап оқығанын, бірақ жұмысының көптігіне орай бұл үрдісі бұзылып, тоқсанына бір туындыны әрең тауысатынын айтты. Және де ол бастапқы қалыпқа қайта түсу қажеттігін атап өтті. Ол үшін алғашқы қадамын да жасап үлгерді. Яғни ол, өзі оқып, аяқтаған кітапты «Bolashaq books» сөресіне қойып, орнына жаңа кітапты қабыл алды. Қала әкімі қолтығына қыстырған кітабын оқып болғаннан соң, міндетті түрде осында баспа-бас басқа шығармашалық дүниеге ауыстыратынын жеткізді.
Кітап оқуды насихаттаудың мұндай қадамы арқылы ол «Bolashaq Books» кітап сөресін қолданушырдың қатарын көбейтуге ниетті.
Іргелі оқу орнының қабырғасында ашылған кітап сөресіне дәл қазіргі уақытта 30 дана комикстер және 10 дана «Супер қыз» кітабы қойылған. Одан өзге, 30 шақты кітапты QR-код арқылы смартфонда қосымша арқылы оқуға мүмкіндік бар. Сондай-ақ, Қ. А. Ясауи атындағы ХҚТУ-дің кітапханасы тарапынан да қосымша кітап сөресі қойылған.
Республика бойынша ашылған №14 кітап сөресіне кез келген азамат кітап айырбастап оқуына болатынын айта кетейік.

Мемлекет басшысы Қасым-Жомарт Тоқаев коронавирус індетімен күрес жұмыстары кезінде кәсіби қырымен белсенділік танытқан азаматтар мен еріктілер үшін «Халық алғысы» медалін тағайындаған болатын. Мұндай медалға Шымкент қаласынан 20 адам лайық деп танылды. Арнайы медальді қала әкімі Мұрат Әйтенов табыстады. Марапатқа ие болғандардың қатарында «Визит» ЖШС бас директоры — Вельким Злавдинов, Тауарлар мен көрсетілетін қызметтердің сапасы мен қауіпсіздігін бақылау департаментінің басшысы — Әбдіманап Төлебаев, «Юг Oil pro» ЖШС бас директоры — Шыңғыс Қозбахов, Қалалық диагностикалық орталықтың бас дәрігері — Шолпан Мырзахметова, Азаматтық альянс президенті — Жұмағали Білісбеков, «Хабар 24» телеарнасының журналисі — Катерина Попкова және т.б білім беру, денсаулық сақтау, әлеуметтік қорғау және өзге де сала өкілдері мен еріктілер бар. Эпидахуалды тұрақтандыру мақсатында белсенділігімен көзге түскен мапарат иелеріне Мұрат Дүйсенбекұлы «Бұл марапат — бүкіл әлемде орын алып отырған дертпен күресте халық игілігіне қызмет етіп, қайсарлық пен мейірімділіктің нағыз үлгісін көрсеткен азаматтарымыздың орасан еңбектері мен ерліктерін бағалау болып табылады. Мұны қиын кезеңде ерлік жасап отырған сіздердің және сіздермен бірге тығыз жұмыс атқарып, аянбай еңбек етіп жатқан ұжымдарыңыздың да жетістігі деп білемін», — деп лебіз білдірді.

Байланыс саласы Созақ ауданында 1929 жылы құрылып, «Байланыс кеңсесі» /Контора почты/ аталып оның алғашқы бастығы болып Батырбеков Дүйсенбек тағайындалған болатын. Бұл кісі дүниеден өткенінше байланыс саласында 53 жыл қызмет еткен азамат. Газет-журналдар Түркістан-Ащысай арқылы түйемен Шолаққорғанға тасылып тұрған деуші еді Дүйсекең. 1936 жылы Ащысай,Серго,Түркістан бағытымен желі тартылып Шымкент қаласымен телефон байланысы орнатылған. 1958 жылы Шолаққорған ауылына МБ арқылы 74 телефон орнатылып, оның бір номері Сталин/қазіргі Аққолтық/ аулына орнатылған.

Сол жылдары ЦБ 960 қондырғысы арқылы қосымша 120 телефон орнатылып облыстық байланыс басқармасы бастығы Жақуповтың басшылығымен ауылдарға байланыс желілері тартыла бастады.1970 жылы аудан орталығында 500 номерлік аналогтік автоматты стансасы іске қосылды. Почта мен электрбайланыс қызметтері бірге болып 1993 жылға дейін Созақ аудандық байланыс торабы аталып халыққа қызмет етіп келді. Заман талабына сай, 1993 жылдың 1 тамызынан бастап аудандық байланыс торабы екі ашық акционерлік қоғамдардың бөлімшесі болып екіге бөлінді. Бірі «Созақ аудандық Қазпошта торабы» аталып, оның тұңғыш бастығы болып Нысанбаев Айдархан Әлтенұлы тағайындалды. Бірі «Созақ аудандық телекоммуникация торабы» аталып оны Нұртаев Спандияр Әзімбайұлы басқарды.
Бүгінгі күні аудандық телекоммуникация саласына қарасты 16 автоматты станциялардың бәрі санды станцияға ауыстырылды. 7 радиорелейкалық WLL CDMA EVDO станциялары арқылы шалғайда орналасқан Раң ата, Жуантөбе,Тасты, Шу ауылдарына телефон, Интернет қызметтері ұсынылуда. 2013 жылы тұрғындар көп шоғырланған Таукент елді мекеніне аудан орталығынан заманауи талапқа сай 52 шақырым ОК-24 оптикалы-талшықты кабель салынып 1000 Мбит/с ағым беріліп тұтынушыларға жоғары жылдамдық Интернет пен ID TV/телевидение/ қызметі берілуде. Бұл қызмет түрлері аудан орталығы, Созақ, Жартытөбе ауылдарында да ұсынылуда. Аудан бойынша 5319 телефон қызметін пайдаланатын абоненттер бар, оның 4491 жеке секторларда. Кең жолақты Интернет қызметін 3210 тұтынушы пайдалануда. Altel 4G, Теле-2 ұялы қызметтерін 1110 абонент пайдалануда. Білім саласының Интернет қызметінің жылдамдығын арттыру мақсатында аудан орталығындағы орта мектептерге 8 Мбит/с-10Мбит/с жылдамдық берілсе, биыл Балдысу, Сызған, Қозмолдақ, Шаға, Жаукебаев, Абай, Қарбұлақ елді мекендеріндегі мектептерге 10-30 Мбит/с жылдамдықпен Интернет қызметін беретін радиокөпір орнатылды. Биыл аудан орталығында орналасқан 6 орта мектептерге де оптикалық талшықты кабель тартылып ол мектептер 10-20 Мбит/с жылдамдықпен Интернет қызметін пайдалануға қол жеткізеді. «Цифрлы Қазақстан» Үкімет бағдарламасына сай, биыл ауданымыздың Бабата, Аққолтық, Сызған, Созақ, Қарағұр және Құмкент елді мекендеріне оптикалы-талшықты кабель салу жоспарланған, бүгінгі күні аталған елді мекендерге магистральды кабель жер асты салынып АТС тарға жеткізілді. Бабата, Аққолтық елді мекендерінде орта мектептер мен ФАП-тарға оптикалық кабель іске беріліп ол мекемелер 10-20 Мбит/с дейін жылдамдықпен Интернет қызметін ала алады. Құмкент елді мекенінде оптикалық талшықты кабель АТС-тен ауыл әкімшілігіне, мектепке және ауруханаға тартылып қазан айында іске қосылады. Созақ аулында да аурухана, Созақ лицейі мен Навои орта мектептеріне де кабель тартылып,қазан айының 10 дейін берілетін болады. Жоспарланған алты елді мекенге кабель салу жылдың соңына дейін аяқталады деп жопарлануда. Бұл жұмыстардың сапалы жүргізілуін ҚР «Құрметті байланысшысы» Нысанбаев Айдархан бастаған білікті мамандар жіті бақылауда. Тарихқа үңілсек ауданның байланыс саласының дамуына көп жыл қызмет етіп еңбектері сіңген азаматтар бар атап айтқанда: Еңбек Қызыл Ту орденінің иегері Байжанов Сұлтанмұрат, Еңбек Қызыл Ту орденінің иегері марқұм Қуанышбаев Асубай, Жанысова Шырайкүл, Сазанбекова Дәметкен, Отаров Жанайдар, Қуатбеков Айтжанғали, Мұқымбеков Жақып, Нүркеева Татьяна, Қораласбаев Жұмабек, Мұстафаев Қуандық, Атаулаев Ергешбай, Шәрібеков Нәлібек сынды көптеген ардагерлердің аттарын атап кетуіміз керек. Қазақтелеком АҚ құрылғанына 25 жыл толуына орай, осы мекемеде 25 жылдан астам жұмыс істеген «Қазақтелеком» АҚ Созақ ауданы бөлімшесінің басшысы Нысанбаев Айдархан, жетекші инженер Отаров Жанайдар, станция электромеханигі Байжанов Рашид, оператор Бименова Гүлсім, оператор Оспанова Айгүл, станция инженері Мұқымбеков Жақып, Оператор Бармағанбетова Светлана, кабель дәнекерлеуші Кемелбаев Ділдабек, монтер Тәтібаев Айтмет, электромонтер Шаймерденов Қайрат сияқты он қызметкерге мерекелік медальды мекеме басшысы А.Нысанбаев салтанатты түрде табыс етті. Бүгінгі күні Созақ ауданынан Қазақстан Республикасының «Құрметті байланысшы» атағын алған төрт азамат бар олар, Байжанов Сұлтанмұрат, марқұм Нұртаев Спандияр, Толов Абдолла және Нысанбаев Айдархан. Айтулы шара еліміздегі төтенше жағдайға байланысты күндіз,санаулы адамдармен карантин ережесін сақтай отырып шұғыл түрде өткізілді.

Мақсат ЖЕҢІСҰЛЫ.