ТҮРКІСТАН ҚАЛАСЫН ДАМЫТУДЫҢ ІІ КЕЗЕҢІ ҚАРҚЫНДЫ ЖҮРУДЕ

Тарихи қала Түркістанның айрықша дамып жатқаны баршаға белгілі. Ай сайын жаңа нысандар қолданысқа беріліп, аз ғана уақыт ішінде талай туристің табаны тиген шаһарға айналғаны да жасырын емес. Қалада жүріп жатқан құрылыс сапасын облыс әкімі Өмірзақ Шөкеевтің өзі жіті бақылап, тиісті тапсырмалар беріп келеді.

Қазіргі таңда Түркістанды дамытудың І кезеңі аяқталып, негізгі әлеуметтік-инфрақұрылымы қаланды. 251 жоба іске асып, 123 нысанның құрылысы аяқталды. Енді шаһарды дамытудың ІІ кезеңі қарқынды жүргізіліп жатыр. Түркістан облысының әкімі Өмірзақ Шөкеев қаладағы құрылыс нысандарын жаяу аралап, жұмыс барысын кезекті рет қадағалаудан өткізді.
«Алдымызда Түркістанды Түркі әлемінің орталығына айналдыру міндеті тұр. Бұл – үлкен жауапкершілік. Сондықтан жауапты басшылар, инвесторлар, осында құрылысқа атсалысып, жобаны жүзеге асырып жүрген азаматтар өз істерін адал атқарулары тиіс. Қаланы 100 пайыз газдандыру нәтижесінде экологиясы жақсарды. Жан-жақтан су көздерін тауып, қаланы жасыл желекпен көмкерудеміз. Тұрғындарға және қонақтарға қолайлы жағдай жасау бағытындағы жұмыстар жүйелі түрде атқарыла береді» деген өңір басшысы әрбір нысан бойынша өз ұсыныстарын мен ескертпелерін білдірді. Мердігер компания басшыларымен, құрылысшылармен сөйлесті.
Облыс әкімі қалалық саябақ, Б.Саттарханов даңғылының сол жақ бөлігін абаттандыру, осы даңғылдағы желілік саябақтарды ел игілігіне беру бағытындағы жұмыстарды да көріп, тиісті тапсырмалар берді.