Маңызды

Бүгінгідей қоғамның барлық саласындағы қызметтер цифрлық жүйеге көшіп жатқан уақытта мобилді интернеттің маңызы арта бермек. Қала берді, уақыт бір орында тұрмайды. Күн сайын құбылып, дамып барады. Сәйкесінше, сапалы интернетке деген сұраныс да артуда. Бұл тұрғыдан келгенде, Шымкент қаласында бірқатар жұмыстар жүзеге асырылып келе жатыр. Толығырақ тарқатайық…

Бүгінгі таңда шалғай орналасқан елді мекендерді сапалы интернетпен қамтамасыз ету жөніндегі қала әкімі Мұрат Әйтеновтің тапсырмасына сәйкес, Қайтпас-1 және Құрсайда оптикалық желі арқылы жоғары жылдамдықты интернетпен қамту жұмыстары жүргізілуде. Жұмыс толығымен аяқталса, Құрсай шағын ауданы 100 пайыз оптика желісімен қамтылып, тұрғындар сапалы интернетті қолдана алады. Ал Қайтпас-1-де Академиялық, Ғалымдар, Аққайнар көшелеріне оптика желісі тартылады. Көркем және Али Түзелбаев, Астық көшелеріне магистралды желі кабельдері тартылды. Сонымен қатар серверлік үй-жайда порттарға қосу жұмыстары атқарылып, Wi-fi роутерлардың конфигурациялары жазылды. Қыркүйек айына дейін жалпы 80 көше толық оптика желімен қамтылып, аталған елді мекен тұрғындары сапалы интернетке қосылуға мүмкіндік алмақ.

Айта кету керек, бұған дейін қалалық цифрландыру басқармасының басшысы Әсет Әбдіраханов ақпараттық-коммуникациялық орталығында арнайы баспасөз брифингін беріп, тұрғындарды толғандырған біршама сауалдарға жауап берген еді. «Ағымдағы жылы мобильді байланыс операторларымен интернет сапасы төмен 12 елді мекеннің координатасы келісіліп, сәулет қала құрылысы және жер қатынастары басқармасы тарапынан жер телімдерін рәсімдеу жұмыстары атқарылып, инвесторға ұсынылды. Бүгінде инвестор тарапынан Ақниет, Қызылжар, Игілік, Жаңаталап, Тәуелсіздікке 20-жыл, Азат, Тұран, Асар елді мекендерінен анықталған жер телімдерін қазу, бетон құю және антенна-мачталық құрылғыларды орнату жұмыстары атқарылуда. Ал жеке нысан иелерімен келісу арқылы Елтай, Тоғыс, Маятас және Бозарық елді мекендеріне базалық станция орнатылып іске қосылды. Тиісті жұмыстар жыл соңына дейін атқарылса, 71 000 жуық қала тұрғындарын сапалы мобильді интернетпен қамтылып, жыл соңында сапалы интернетпен қамту үлесі 95%-ға жетеді деп жоспарлануда» деген еді басқарма басшысы өз сөзінде.

Шымкент қаласында жол құрылысы қарқынды жүруде. Жол құрылыс жұмыстарын жүргізу барысында бекітілген жоспарға сәйкес, жыл сайын орташа жөндеу жұмыстары бойынша қаланың орталық магистралды көшелерімен қатар, аудандық маңызы бар ішкі орамдық көшелер басты назарға алынады.

Аталған жоспар негізінде жүзеге асып жасып жатқан жұмыстар қарқын алған. Мәселен, Еңбекші ауданы Айнатас тұрғын алабының Бесқұлан, Сарыөзен, Желді, Ақшығанақ, Құмтөкей, Көкорда, Шоқтас, Озыген, Бестерек көшелеріне асфальт төсеу жұмыстары жүргізілді. Аталған жұмыстар тамыз айының соңына дейін толығымен аяқталып, пайдалануға беріледі. Тұрғын алаптағы асфальт төселген жолдың жалпы ұзындығы 5 шақырымнан асады.

Ал Абай ауданы Ақжар шағын ауданындағы 1,8 шақырымды құрайтын Мұратбаев көшесіне және Мұратбаев көшесінің тұйығы № 1,2,3 көшелеріне асфальтбетон қабатының екінші қабатын төсеу жұмыстары жүргізілуде. Аталған жұмыстарды тамыз айының соңына дейін аяқтау жоспарланған, төселген асфальттың қалыңдығы 10 см құрады. Сонымен қатар көшеге бір жақтама аяқ жол салынады. Айта кету керек, орташа жөндеу жұмыстары бойынша бүгінде 91 нысан — 202 көшенің жөндеу жұмыстары аяқталды. Атқарылып жатқан жұмыстардың жайын шаһар басшысы Мұрат Әйтеновтің өзі бақылап, орын алған кемшіліктер бойынша тиісті тапсырмаларды беріп келе жатыр. Нәтижесінде биыл қаладағы жақсы және қанағаттанарлық жолдардың үлесі біршама өсіп, тұрғындарды толғандырған мәселелердің біразы шешімін табатын болады.

Шымкент қаласында білім саласының өзекті мәселелері сөз болған маңызды жиын өтті. Педагогтердің дәстүрлі республикалық тамыз конференциясы-2022 шеңберінде «Үлгерімі төмен білім алушылармен жұмыс: оқушыға қалай көмектесу керек?» бағытында «Педагогтің үздіксіз кәсіби дамуы» секциясының жұмысы ұйымдастырылды. Шараның жоғары деңгейде өтуіне «Өрлеу «Біліктілікті арттыру ұлттық орталығының» Түркістан облысы және Шымкент қаласы бойынша филиалы ұйытқы болды.

Аталған жиын үлгерімі нашар білім алушылармен жұмыс істеуде педагогтерді қолдау арқылы білім беру сапасын арттыру аспектілері бойынша педагогтер, зерттеушілер, жұртшылық арасында тиімді диалог орнату мақсатын көздейді. Жиынға орта мектептер мен колледждердің басшылары мен педагогтері, психологтар мен әлеуметтік қызметкерлер, ЖОО профессорлық-оқытушылық құрамы, сондай-ақ «Сорос-Қазақстан» қорының және басқа да үкіметтік емес ұйымдардың өкілдері қатысты. Өзге де ата-аналар, педагогтер мен сынып жетекшілеріне жиынды онлайн форматта тамашалау мүмкіндігі де берілді.

Жиынды М.Әуезов атындағы Оңтүстік Қазақстан университетінің ректоры, ҚР Ұлттық ғылым академиясының академигі, тарих ғылымдарының докторы, профессор Дария Қожамжарова мен Шымкент қаласының білім саласында сапаны қамтамасыз ету департаментінің басшысы Нұргүл Шамшиева ашып берді. Ал Шымкент қаласы Білім басқармасының басшысы Жанат Тәжиева «Шымкент қаласының білім беру кеңістігі: жетістіктері, бағдарлары, міндеттері» тақырыбында, педагогикалық еңбек ардагері, «ҚР-ның республикалық әйелдер кеңесі» қоғамдық бірлестігінің филиалы «Шымкент қалалық әйелдер кеңесі» қоғамдық бірлестігінің төрағасы, ҚР Президенті жанындағы Әйелдер істері және отбасылық-демографиялық саясат жөніндегі ұлттық комиссиясының мүшесі Баян Жандосова «Педагогтардың ерекше білім беруге қажеттіліктері бар балалармен және олардың ата-аналарымен өзара әрекетінің этикалық және кәсіби аспектілері» тақырыбында баяндама оқыды.

Бұдан бөлек, презентациялық практикалар шеңберінде үлгерімі төмен оқушылармен педагогтер және психологтардың өзекті жұмыс тәжірибесі ұсынылды. Сондай-ақ қатысушылар үлгерімі төмен оқушыларға қолдау көрсету үшін әдістемелік және нормативтік-құқықтық ұсынымдарды талқылады.

«BARCAMP–2022» іс-шарасы Шымкент қаласында басталып, табиғат аясында жалғасын таппақ. Азаматтық қоғамның дамуына арналған ауқымды бастама алғаш рет қызықты форматта ұйымдастырылып отыр. Бас-аяғы үш күнге созылатын шараға еліміздің барлық өңірімен қатар, Өзбекстан, Қырғызстан және Тәжікстан елдерінің үкіметтік емес ұйымдары, мемлекеттік делегаттары мен қоғам белсенділері қатысуда.

Үшінші мегаполистегі «Азаматтық ресурстық орталық» алаңында Қазақстанның түкпір-түкпірінен келген шара қатысушылары мен шетелдік үкіметтік ұйым өкілдері бас қосып, өзара танысты. Алғаш болып сөз алған Шымкент қалалық Азаматтық Альянс төрағасы Жұмағали Білісбеков қатысушыларды таныстырып өтті. Одан кейін көпшілікке «BARCAMP–2022» модераторлары мен іс-шараның жалпы бағдарламасы таныстырылып, шымкенттік және басқа қалалардағы үкіметтік емес ұйымдар өздері туралы баяндады.

«Іс-шараның басты мақсаты – мемлекеттік органдар мен азаматтық қоғам өкілдері болып табылатын үкіметтік емес ұйымдар болып, бірігіп, әрі қарай азаматтық қоғамды дамытуға қажет стратегиялық бағыттарды анықтау, қолданыстағы заңнамаларды жетілдіру бойынша ұсыныстар мен кеңестерді талқылау. Үш күндік ақылдасу барысында азаматтық қоғамды дамытуға қатысты пәрменді шаралар анықталады деп күтіп отырмыз. Пікірталас арқылы нақты қадамға келу – маңызды» дейді ҚР Ақпарат және қоғамдық даму министрлігі азаматтық қоғам істері комитетінің басқарма басшысы Жанаргүл Әлжанова.

Бүгінгі шарадан кейін қатысушылар Төлеби ауданына жол тартады. Онда екі бойы өтетін тимбилдингте азаматтық қоғамды дамыту тақырыбы талқыланбақ. Оған Шымкент қаласының әкімі Мұрат Әйтенов, ҚР Парламентінің Сенаты мен Мәжілісінің депутаттары Айгүл Қапбарова мен Ғани Ташқараев, Шымкент қаласы мәслихатының депутаттары мен ірі бизнес өкілдері қатысады деп жоспарлануда.

Шымкент қаласына қарасты шағынаудандар мен елді мекендердің мәселелері кезең-кезеңімен шешіліп келе жатыр. Мәселен, өткен оқу жылында Тұран шағынауданында №79 жалпы орта мектептің құрылысы аяқталып, пайдалануға берілді. Балалар 1200 орындық білім ордасында екі ауысыммен оқиды. Бұл мектеп типтік негізде салынған, ашық спорт алаңшасы бар. Ал бөбекжайлар мен балабақшалар мемлекеттік жан басына қаржыландыру негізінде жекеменешік нысандардың көмегімен жүзеге асырылып отыр.

Жаңа шағынаудандағы қуанышты жаңалық жаңа білім ұясы ғана емес. Көпқабатты үйлердің ауласына бүлдіршіндерге арналған ойын және спорт алаңшалары да салынған. Мәселен, 192 орамдағы 16 көп қабатты үйдің алдына 8 кешен орналасқан. Яғни әр 2 көпқабатты үйдің балалары өз ауласынан алыстамай, ата-анасының көз алдында ойнайды. Сондай-ақ игі іс биыл да жалғасын тауып жатыр. Қаратау аудандық қоғамның орта сапасын дамыту бөлімінің бас маманы Спандияр Ораловтың айтуынша, жыл соңына дейін тағы 4 ойын және спорт алаңшасы бар кешен ел игілігіне берілмек.

«Тұран күн санап түрленіп келе жатыр. Шағынауданға алғашқылардың бірі болып қоныстандық. Ол кезде жол, қоғамдық көлік сынды мәселелер шешілмеген еді. Қазіргі уақытта мұндай проблемалар шешілген. Әсіресе, балалар үшін ауламызда ойын алаңшаларының ашылып, тренажерлердің орнатылуы қуантып жатыр. Кішкентай бүлдіршіндеріміз көз алдымызда ойнап, жасөспірім ұлдарымыз бұқаралық спортпен айналысып, шынығып жүр. Осындай жайлы ортада өсіп келе жатқан бүлдіршіндеріміз бақытты. Келешекте шағынауданда саябақ, аллея сынды демалыс орындары ашылып, мұнан да көркейе түсер деген сенімдеміз» дейді шағынаудан тұрғыны Ұ.Сыпатаева. Алдағы уақытта да көптің игілігі үшін атқарылатын жұмыстар әрі қарай жалғаса беретінін айрықша айта кеткен жөн.

Шымкент қаласының облыстан бөлініп шығып, республикалық маңызы бар қала мәртебесіне ие болған уақыттан бері қыруар іс қолға алынып келе жатыр. Қалада құрылыс қарқыны күрт артты. Заманауи әрі биік ғимараттар бой көтеріп, әлеуметтік нысандардың қатары қалыңдады. Мәдениет мекемелеріне де айрықша назар аударылып, материалдық-техникалық базасы кеңейді.

Қала әкімі Мұрат Әйтеновтің жетекшілігімен инженерлік-коммуникациялық желілер мен көлік инфрақұрылымын дамыту, қоғамдық қауіпсіздікті нығайту, қала аумағын абаттандыру мен көгалдандыру, тұрғындарды бұқаралық спортқа баулу, жалпы, халықтың әл-ауқаты мен өмір сүру сапасын жақсарту мақсатында өте ауқымды жұмыс атқарылып жатыр. Үшінші мегаполистің даму қарқынын көрсететін ірі жобалардың бірі — «Шымкент Сити» шағын ауданының құрылысы. Шаһардың солтүстік бөлігіндегі 427 гектар алаңды алып жатқан жаңа шағынауданның құрылысына мемлекеттік бюджеттен 27 млрд теңге бөлінген. Шағынауданда инженерлік инфрақұрылымның барлық түрлері жүргізілген.

Халықтың әлеуметтік осал топтары үшін 204 мың шаршы метр кредиттік және жалға берілетін тұрғын үйлер салынған. Жалпы 39 көпқабатты тұрғын үй немесе 2 338 пәтер және 1 орта мектеп бар. Қазірдің өзінде мұнда 10 мыңға тарта тұрғын өмір сүріп жатыр. Қалалық кәсіпкерлік және индустриялды-инновациялық даму басқармасының мәліметіне сүйенсек, жоба шеңберінде 2026 жылға дейін қалаға 432 млрд теңге мөлшерінде жеке инвестициялар тартылады. Жаңадан 300-ге жуық көп қабатты тұрғын үй немесе жалпы ауданы 1,6 млн шаршы метрлік 27 500 пәтер пайдалануға беріледі.

Мұнда жеке инвесторлардың қаржыландыруымен әрқайсысы 1200 орындық 3 мектеп салынады. Оның бірі дарынды балаларға арналған физика-математика мектебі болады деп жоспарланған. Мұнан бөлек балабақшалар, емхана, саябақ және конгресс-холл ашылады. Мұның барлығы мемлекеттік бюджеттің қаржысы пайдаланылмай, жеке инвесторлар есебінен жүзеге аспақ. Қазір «Шымкент Сити» аумағына 15 инвестор тартылған. Олардың арасында «BI Group», «Отау Строй», «Орда Инвест Групп», «Оңтүстік Құрылыс Сервис» сияқты отандық компаниялар бар. Бұдан бөлек, заманауи көпқабатты тұрғын үй, бизнес-орталықтар, әкімшілік ғимараттар, саябақ салуға шет мемлекеттердің де компаниялары тартылуда. Мамандардың айтуынша, аталған жобаның құрылыс материалдарын жергілікті тауар өндірушілер өндіретінін ескерсек, «Шымкент Сити» жобасы қаладағы өнеркәсіпті дамытуға да зор әсерін тигізбек. Қорыта айтқанда, қаланың әлеуеті артып, инженерлік инфрақұрылым мәселесі кезең кезеңімен шешіліп келе жатыр. Мұның өзі республикалық маңызы бар қала мәртебесін беру бастамасының жемісін көрсетеді.

Жастар – елдің болашағы, қоғамның қозғаушы күші. Осы орайда, өткен аптада Шымкентте халықаралық жастар күніне орай Жастар ресурстық орталығы «Жастар – ел болашағы» атты жастар кешін өткізді. Іс-шараның мақсаты – қала жастарын мерекемен құттықтап, кешкі уақытын қызықты әрі тиімді өткізу.

Мерекелік шараға Шымкент қаласының ішкі саясат және жастар істері басқармасының басшысы Мұратжан Шотанов қатысып, қала жастарын айтулы мерекемен құттықтады. «Тәуелсіз еліміздің гүлденіп, қарыштап дамуы үшін жастардың тың идеялары, алғыр шешімдері, оң бастамалары қажет. Жастар — қоғамның қозғаушы күші. Біз жастардың өмірден өз орнын табуына, түрлі дағдыларды игеруіне қолдау көрсетуге әрқашан дайынбыз» деді басқарма басшысы өз сөзінде.

Мерекелік кеште қала тұрғындары мен жастары үстел теннисінен сайысқа түсіп, белсене қатысқан азаматтар сыйлықтарға ие болды. Жас бүлдіршіндерден бастап үлкен кісілерге дейін караокеде ән шырқап, уақыттарын көңілді өткізді. Жалпы өңірімізде жастардың жан-жақты дамуы мен қабілетін ұштауға айрықша көңіл бөлініп келе жатыр. Жыл сайын түрлі шаралар ұйымдастырылуда. Жұмыспен қамту шаралары да қарқын алған. Мұның өзі бүгінгі жастардың қоғамда өз орнын тауып, елдің дамуына еңбек сіңіруіне айрықша жол ашады.

Шымкент қаласы, Қаратау ауданына қарасты Достық шағынауданындағы ең өзекті мәселенің бірі – сапалы электр қуатымен қамту. Дегенмен аталған мәселені шешу мақсатында ешқандай жұмыс қолға алынып жатқан жоқ деуден аулақпыз. Бастамалар көтеріліп, қолға алынған.

Толығырақ тоқталар болсақ, бүгінде электр тарату бекетіне керекті жабдықтар орнатылды. Жалғап қосу, қосылу көзіне кабель желісін жалғау және 13 электр трансформаторларын орнату, 7 шақырым 10 кВ кабель желісін тарту жұмыстары жүргізілуде. Қазіргі уақытта құрылыс жұмыстарының 83%-ы аяқталды. Қарашада абоненттеу жұмыстары жүргізілмек. Сапалы электр қуатымен қамту үшін 8 нысанда құрылыс жұмыстары қарқын алған.

Айта кету керек, Достық шағынауданына жуырда көгілдір отын берілген болатын. Оның құрылысы 2021 жылы басталған. Биыл жалпы ұзындығы 46,06 шақырымды құрайтын газ жүйесі тартылып, ел игілігіне берілді. Құжаттары түгел үйлер көгілдір отынға қосылып жатыр. Жалпы Достық шағын ауданында 2686 үй, нақты 15 750 тұрғын бар. Абонемент саны – 2 625. Мердігер мекеме «ГХ Шымкентгаз» ЖШС-гі жобаны 957,838 млн теңгеге атқарып, жұмысты мерзімінде аяқтаған. Осылайша, қаладан шалғайда жатқан шағынауданның мәселесі бірте-бірте шешіліп келе жатыр.

Жаңа оқу жылының басталуына санаулы күндер қалды. Жақын арада жазғы демалысқа шыққан балалар қолына бір шоқ гүлін алып, алтын ұя мектебіне ағылады. Ал қаламыздағы білім ордалары жаңа оқу жылына дайын ба? Жөндеу жұмыстары жүріп жатқан мекемелердің қазіргі күйі қандай? Құрылыс жұмыстары аяқталды ма? Тарқатайық…

Газетіміздің бұған дейінгі сандарында Шымкент қаласында ескі мектептердің күрделі жөндеуден өтіп жатқанын жазған едік. Солардың бірі — А.Байтұрсынов атындағы №50 мектеп-гимназиясы. Осы орайда, құрылыс жұмыстарын көруге арнайы барған шаһар басшысы жауапты тұлғаларға тапсырылған істің сапалы орындалуын тапсырды. Қазіргі таңда А.Байтұрсынов атындағы №50 мектеп-гимназиясының ішкі бөлмелері сыланып, есік, терезе, электр жүйелері жаңартылуда. Алғашқы әскери дайындық, робототехника, биология, химия, физика кабинеттері де заман талабына сай жабдықталды. Қосымша су жаңа 500 ноутбук, 150 компьютер, 100 планшет сатып алынды.

Ғимаратты аралау барысында шаһар басшысы жұмыстың жүйелі түрде атқарылып жатқанына көз жеткізді. «Құрылысты мерзімінде тапсыруға асығамыз деп, сапаны естен шығармайық» деген қала әкімі тиісті сала басшыларына құрылыс қарқынын жіті бақылауды тапсырды. Мұнда күрделі жөндеу жұмыстарының 65%-ы біткен. Ендігі кезекте «отмостка» құю, сыртқы қоршауды салу, көгалдандыру сынды шаруалар атқарылуы тиіс.

Бұдан бөлек, шаһар басшысы бүгін күрделі жөндеуден өтіп жатқан А.Навои атындағы №11 жалпы орта мектебіне барды. Аталған білім ошағы осы кезге дейін күрделі жөндеу көрмеген. Биыл шатырынан бастап, есік, терезе, еденіне дейін толық жаңартылды. Жылу жүйелері 100%-ға ауыстырылып, жаңа қоршау салынды. Сонымен қатар химия, физика, биология, информатика және өзге де зерттеу-лабороториялық кабинеттері қосылды. Материалдық-техникалық базаның 250 ноутбук, 100 компьютер, 10 панельмен толыққанын да айта кету керек.

Өз сөзінде қала басшысы «Мұның барлығы үлкен жұмыс және жауапкершілік. Жаңа оқу жылы қарсаңында оқушылар жаңа ғимаратқа көшкендей әсерде болады деп ойлаймын. Қандай да ақау шықса, жауапты мердігер мекеме жіберген қателіктерін 5 жыл ішінде қайта түзеп беруі тиіс. Осы жағын дұрыстап қадағалаңыздар» деді. Дәл қазіргі уақытта жұмыстың 85 пайызы орындалған. Қыркүйек айына дейін жөндеу жұмыстары толық аяқталады.

Қала әкімі табан тіреген мектептердің қатарында күрделі жөндеуден өтіп жатқан Сайрам тұрғын алабындағы Ю. Сареми атындағы №107 мектеп-лицейі де бар. 2000 орынға арналған мектеп 3 қабаттан тұрады. Бұл білім ошағының жылу жүйесі 11 жыл бұрын ауыстырылса, шатыры мен бірнеше есік-терезесінің қойылғанына 8 жыл болған. Биыл ғимараттың тозығы жеткен тұстары бүтінделіп, шатырының 955 м2 аумағы ауысты, электр жүйелері 100%-ға жаңарды. Информатика, физика, химия, биология, логопед кабинеттері заман талабына сай жаңғырып, 2 интерактивті тақта, 350 ноутбук, 130 компьютер, 200 планшет, 8 панель сатып алынды.

Ғимаратты аралау барысында шаһар басшысы бірнеше кемшіліктерді аңғарып, ескертулер де жасады. «Тексеруші топпен істің 100% сапалы орындалуын келіп, қайта көретін боламыз» деді Мұрат Дүйсенбекұлы. Барлық кемшіліктер жойылғаннан кейін мектеп оқушыларға есігін айқара ашпкақ. Қазіргі уақыттағы мектептің жаңа оқу жылына дайындығы 90 пайызды құрайды. Мектепте аяқжолдар төселіп, асфальттау жұмыстары жүргізіліп жатқанын да айта кетейік.

Жалпы мемлекет басшысы білім беру жүйесіндегі орын тапшылығын жою мақсатында елімізде 2025 жылға дейін 1000 мектеп салуды міндеттеген. Оның оннан бір үлесі Шымкентке тиесілі. 2022 жылы үшінші мегаполисте 34 мектептің құрылысы жүргізілуде. Жаңа оқу жылында 11 703 орындықты 24 мектеп пайдалануға беріледі. Нәтижесінде үш ауысымды мектептер саны 9-дан 5-ке дейін, ыңғайластырылған мектеп саны 4-ден 3-ке дейін азаяды. 2023 жылы қалада үш ауысымды мектеп мәселесі толығымен шешіледі

Жыл басынан бері Шымкент қаласына қарасты Абай ауданында қыруар іс қолға алынып, жүзеге асырылған. Бұл туралы Ақпараттық-коммуникациялық орталығында өткен баспасөз брифингінде Абай ауданының әкімі Бұхарбай Парманов айтты.

«Абай ауданың аумағындағы 34 елді мекеннің 31-і немесе 96 пайызы мемлекеттік электр жарығымен қамтылып отыр. Ал қалған 3 елді мекен немесе 4 пайызы жекеменшік трансформаторларды пайдаланады. Биыл Абай ауданы аумағы 100 пайыз электр жарығымен қамтылады» деді аудан басшысы. Спикердің сөзінше, аудан аумағы бойынша 34 елді мекеннің 33-і сапалы ауыз сумен қамтылып, 97%-ды құрап отыр.  2022 жылы 5,2 млрд теңгеге 1 жобаның (Құрсай, Арғымақ) құрылыс жұмыстары жүргізілуде. Жыл соңына дейін құрылыс жұмыстары аяқталып, елді мекендер сапалы ауыз сумен қамтылатын болады.

Ауданның 8 елді мекені 115,9 мың адам немесе жалпы тұрғындардың 36 пайызы орталықтандырылған кәрізбен қамтылған, қалған 26 елді мекен 207,0 мың адам немесе 64 пайызы кәрізбен қамтылмаған. Ал 2025 жылға дейін 59 пайыз орталықтандырылған кәріз жүйесімен қамтылады деп күтілуде. Сонымен қатар аудан аумағы бойынша 34 елді мекеннің 24 елді мекені (73,5%) табиғи газ жүйесімен қамтылса, қалған 10 елді мекен қатты отынды пайдалануда.

2021 жылға дейін ауданындағы 71 көше жарықтандырылған болатын. Бұл көрсеткішті арттыру мақсатында биыл мемлекеттік-жекешелік әріптестік аясында аудандағы 111 көшеге жарықшам орнатылды. 2023-2025 жылдары  жарықтандырлған көше саны 259-ға жетеді.

Айта кетейік, 2022 жылы 56 шақырым жол пайдалануға берледі. Жалпы 39 жобаға құны 2,4 млрд теңге қаралған. Басты ерекшелігі, ағымдағы жылы қала орталығындағы емес, шалғайда жатқан шағынаудандар мен елді мекендердің ішкі орамдық көшелерін жөндеуге баса мән беріліп отыр. Жұмыстар басталып та кеткен. Ал құрылысы біткен нысандардың сапасын қала әкімінің өзі барып бақылап, тексеріп, тиісті тапсырмаларды беріп келе жатыр.