Маңызды

Шымкент қаласының әкімі Мұрат Әйтенов құрылыс саласына көп көңіл бөліп келеді. Қалаға әкім болып келгеннен бастап осы салаға бел шешіп, білек түріп кірісіп кеткенін бізде қалыспай жарыса жариялап жүрміз. Кезінде осы салаға қатысты жұртқа асыға айтқан жаңалығымыздың бірі «Асар» шағынауданында сыртқы сылағының сапасы сыр беріп, салдарынан көркі қашып тұрған 5 қабатты 30 тұрғын үйдің қасбетінің ретке келтірілетіні болды.

 

Аталған үйлердің құрылысы 2015 жылы басталып, 2017 жылы пайдалануға берілген. 900 пәтерлі тұрғын үйлердің құрылысына кезінде 7 миллиардтан астам қаржы қаралған. Бірақ көп ұзамай сыртқы келбеті сыр берген. Осылайша тұрғындар баспана тауқыметін тартқан қиын күндерін артқа тастап, қуанып жүрген шақта сапасыз жұмыстың салдарынан көңілдері су сепкендей басыла қалады. Сөйтіп, қыруар жұмыс істейміз деп бюджеттің қомақты қаржысын алып талтаң басып жүрген «Корпорация АҚ ордасы» ЖШС мердігер мекемесінің басшысын іздей бастайды. Алайда тұрғындардың оның соңына «шам алып түсіп», шағым айтуынан түк шықпайды. Себебі, нысанның кепілді мерзімі бар болғаны үш жылды қамтыған. Дегенмен де, тұрғындар күн өткен сайын қиқы-жиқы болып бара жатқан үйлерінің сыртына қарап, қалалық әкімдікке қарата шағым жолдаудан шаршамайды. Әйтеуір, Әйтеновтың назарын осы мәселеге аударады.

Оның нәтижесі ақпарат құралдарында «Асар» шағын ауданындағы 30 тұрғын үйдің ірге тасын қалаған «Корпорация АҚ ордасы» құрылыс компаниясы кепілдік мерзімінің өтіп кеткеніне қарамай өз қаражаты есебінен олардың қасбеттерін жөндеу жұмыстарын бастап кетті»,-деп жазылған еді. Тіпті бұл үшін тұрғындар қала әкімі мен мердігер мекемеге алғыс жаудырған-тын. Ол жерде тұрғындардың қала әкімін қайдам, мердігер мекеме басшысы Садулла Қалыбековке алғыс айтуы артық еді. Керісіше мердігер мекеме басшысы жұрт алдына шығып, жұмысшылардың тірлігі «жаны ашымастың қасында басың ауырмасынның» керін кигенге көп ұқсағаны үшін кешірім сұраса ұпайы кеміп қалмайтын еді. Ол басқаратын мекеме жұмысты сапасыз орындағаны үшін көп тұрғынның ашуын тудырғаны жасырын емес. Жұмыс сапасыз атқарылмаса, кепілді мерзім уақыты енді түгесілген шақта тұрғын үйлердің сылағы бірінен соң бірі күпінің битіндей сыпырылып түспес еді ғой.

Айтпақшы сол кезде тілшілер, соның ішінде біздің басылым да «Корпорация АҚ ордасы» қолға алған бұл жұмысты осы жылдың 19-маусым – Қала күні мерекесіне дейін аяқтайтыны туралы тұрғындарға уәде бергенін де түртіп өткен. Алайда бұл мерзімде жұмыс аяқталмаған.

Шымкент қалалық әкімдігінің баспасөз қызметінің 27-шілдедегі «Асар» шағын ауданында 30 көпқабатты үйде сыртқы әрлеу жұмыстары жүргізілуде. Оның ішінде 18 үйдің құрылысы толық бітіп, 12 үйдің құрылысы бір ай ішінде аяқталады. Көпқабатты үйлердің құрылысына 500 млн. теңгеден астам қаражат жұмсалуда»,-деген мәліметі соның жарқын мысалы.

Сонымен қатар әкімдік таратқан мәліметте «құрылысқа кеткен шығынның барлығын «Корпорация АҚ ордасы» ЖШС көтеріп жатыр» деп, мінсіз жұмыс істей алмайтын мердігер мекеменің мерейі үстем етіліпті.

«Корпорация АҚ ордасы» мердігер мекемесінің жұмысына мін көп екенін әкімдік колмен ұстап, көзбен көріп отыр. Бірақ соған қарамастан оған сенім артуын тияр емес. Мәселен, ағымдағы жылдың сәуір айында қалалық құрылыс басқармасының басшысы Шымкентте құрылыс басқармасы арқылы 104 инвестициялық жобаның құрылысы жүргізіліп жатқанын мәлімдеген болатын. Сонымен қатар ол, аталған жобалардың ішінде 58 жоба 78 тұрғын үйдің құрылысын қамтыса, 20 жоба инженерлік инфрқұрылым жұмыстарын құрайтынын жеткізген. Бұдан бөлек аталған жобалар аясында 13 білім беру нысаны бой көтеріп, 3 нысанда абаттандыру жұмысы қолға алынғанын, 2 мәдениет, 3 спорт нысаны, 1 әкімшілік және 1 өрт сөндіру депосы бойынша да құрылыс қарқын алғанын, ал ауыл шаруашылық бағыты бойынша 3 жоба негізінде құрылыс жұмыстары жүруде екенін хабарлаған.

Одан алдын қала әкімі Мұрат Әйтенов қашықтан өткізілген кезекті мәжілісте жауапты басқарма басшысына аталған жобалар аясында тұрғын үй құрылысының жұмыстарын ширатуды және дер кезінде аяқтауды тапсырған. Соған сәйкес, Шымкент қалалық жұмыспен қамту орталығы арқылы құрылысқа қандай жұмысшылардың қажеттігі туралы хабарландырулар берілген. Қажетті мамандарды қажет ететін мердігер мекемелердің санатында дәл осы «Корпорация АҚ ордасы» серіктестігі де бар болатын. Сонда аталған мердігер мекемеге әкімдіктің сенім артуының сыры неде?

 

P.S.

Өз кезегінде біз бұл мәселені Шымкент қаласы әкімінің орынбасары Бауыржан Мамыталиевтің назарына жолдай отырып, аталған мердігер мекеменің «Асарда» атқарған жұмыстарының үш жыл ішінде сыр беруінің себебі неде екенін ашып айтуын сұраймыз. Және аталған мердігер мекемеге қандай нысандардың құрылысы тапсырылғанын тізе кетуін сұранамыз.

 

Қ. ҚАЛИЕВ.

Қазақстан мұсылмандары діни басқармасының төрағасы, бас мүфти Наурызбай қажы Тағанұлы биыл алғаш рет онлайн құрбандық шалу іске қосылғанын мәлім етті, деп хабарлайды Елорда Инфо тілшісі.

 

«Құрбан айт ұлық мейрам әрі жағдайы келген мұсылманға құрбан шалу уәжіп болып есептеледі. Осынау ұлық ғибадатты орындау мақсатында Діни басқарма ел мұсылмандарының өтінішін ескере отырып, биыл алғаш рет Құрбан айт қарсаңында халықаралық тәжірибелерге сүйеніп, қашықтан құрбан шалу жобасын қолға алдық. Осы мақсатта qurban2020.kz сайты ашылып, 24 шілдеден бастап жұмыс істейді. 30 шілдеге дейін онлайн құрбандық шалуға тапсырыс қабылдайды. Кез келген азамат онлайн түрде құрбан шалуға тапсырыс бере алады», – дейді бас мүфти.

Ол өз сөзінде онлайн құрбандық әлемнің бірқатар елдерінде бар тәжірибе екенін тілге тиек етіп өтті.

«Онлайн режимде тапсырыс қабылдап, құрбандық етін көмекке зәру жандарға тарату тәжірибесі Түркия, Индонезия, Малайзия, БАӘ елдерінде бұрыннан қалыптасқан және жыл сайынғы дәстүрге айналған. Бұл жүйенің басты ерекшелігі – құрбандық еті түгелдей мұқтаж азаматтарға таратылады. Алғаш рет іске қосылғалы тұрған бұл жүйенің кейбір кемшіліктері болуы мүмкін. Техникалық кемшіліктер орын алып жатса, түсіністікпен қарауды өтінеміз», – дейді Наурызбай қажы.

Сондай-ақ онлайн құрбандық ашудағы мақсат сын сағатта пайда табу емес, халықтың құрбан шалуға деген қажеттілігін жүзеге асыру екенін бас мүфти ерекше айтып өтті.

 

Рашид Аюпов тұрғындарға не деп уәде берді?

Түркістан облысының әкімі Өмірзақ Шөкеев аймақтағы барлық аудан, қала әкімдеріне жергілікті тұрғындарға коронавируспен күрес және өзге де сұрақтар бойынша ақпарат беру туралы тапсырма берген.

Соған сәйкес, кешегі аптада тікелей эфир арқылы Түркістан қаласының әкімі Рашид Аюпов тұрғындармен байланыс орнатты.

Киелі қала әкімі алдағы уақытта қабылдауға жазылып қойған 149 тұрғынмен «ZOOM» бағдарламасы аясында ретімен қабылдау жүргізетінін жеткізді. Жыл басынан бері қала әкімінің жеке қабылдауында 160-қа жуық азамат болған екен. Қала әкімі наурыз айында жарияланған төтенше жағдай мен карантиндік шараларға байланысты қабылдау кілт тоқтағанын алға тартты.

Сонымен қатар ол карантинге байланысты тұрақты жұмысынан айырылып отырған азаматтарды қаланы дамыту бағытында көгалдандыру, абаттандыру мен құрылыс нысандарындағы жұмыстарға қатысып, қаржы табуға шақырды. Ол үшін азаматтар «Халықты жұмыспен қамту орталығына» баруы қажеттігін айтты.

Қазіргі таңда Түркістан қаласында баспанаға мұқтаж жандардың көпшілігі үй кезегінің жылжымай жатқанына наразылықтарын білдіруде. Мұның себебін Рашид Абатұлы құрылыс алаңында жұмысшылардың аздығымен түсіндірді. Оның айтуынша елімізде төтенше жағдай жарияланған кезде жергілікті жердегі жұмысшылардың дені өз өлкелеріне қарай бет алып, салдарынан жұмыс қарқыны саябырсыған. Бірақ алдағы қыркүйек-қазан айларында мемлекеттік бағдарламалар арқылы 1002 пәтер несиеге берілетін болса, 450 пәтер кезекте тұрған азаматтарға табысталатын болады. Сондай-ақ, Түркістан әлеуметтік кәсіпкерлік корпорациясы тарапынан да 4 үй кезектегі адамдарға беріледі деп күтілуде.

Қала басшысы алдағы уақытта тұрғындардың «Көшемізге жол қашан салынады?», «Су қашан келеді?» деген сұрақтармен әкімдік есігін қағып, шағым айтпауы үшін қандай жұмыстардың атқарылып жатқанын да хабардар етті. Өз кезегінде ол ендігі кезекте азаматтарға инженерлік инфрақұрылымдық жұмыстар толық жүргізілген аумақтардан ғана жер телімі берілетінін айтты.

Рашид Аюповтың жолы салынған, суы тартылған, көгілдір отыны келіп, электр желісі жүргізілген аумақтардан ғана жер телімін беру туралы мәселеге білек түріп кіріскені қуантады. Бірақ оның орындалуы қалай болады? Жарты жолда қалып кетуі де бек мүмкін ғой. Себебі, «әкімдер келеді, әкімдер кетеді…» деген қағида бар. Кез келген әкім бұрынғы басшының бастаған жұмысын лайықты түрде жалғастыра бермейді. Не де болса әліптің артын күтелік.

 

А. САТЫБАЛДЫ.

Науқастардың мұндай қолдауға ие болуы оңай бола ма?

Кеше Міндетті әлеуметтік медициналық сақтандыру қорының төрағасы Болат Төкежанов коронавирус жұқтырған әрбір науқас үшін қанша қаржы кететінін мәлімдеді. Оның сөзінше коронавирус инфекциясының жеңіл түрімен ауыратын пациентті емдеуге – 292 600 теңге, орта жағдайда – 446 100 теңге, ауыр науқастарды емдеуге 1 500 000 теңге жұмсалады. Ал өте ауыр жағдайда жатқан пациенттің ем-домы үшін қор арқылы 1 700 000 теңге жұмсалады.

Міндетті әлеуметтік медициналық сақтандыру қорының басшысы болғанына екі апта уақыт енді асқан Болат Төкежанов медициналық сақтандыру қоры коронавирус пен пневманиядан жазылып шыққандардың шығынын өтеп беретінін айтты. Шығынды өтеу механизмін Б. Төкеженов төмендегіше түсіндірді.

«Маусымда індет өршіген кезде ауру жұқтырғандардың көпшілігі коронавирус пен пневмонияның диагностикасына және емдеу шараларына өз ақшасын жұмсады. Дегенмен де, олардың ішінде аурудан кейінгі оңалту шараларына аса мұқтаж адамдар бар. Сол себепті медициналық сақтандыру қоры денсаулық сақтау министрлігімен бірге емделіп шыққан пациенттерді оңалту алгоритмін дайындауда. Соған сәйкес оңалту шаралары науқастың жалпы ахуалына қарай көрсетілетін болады. Атап айтқанда, емханадағы күндізгі стационарларда ем-дом көрсету, жергілікті жердегі денсаулық сақтау басқармаларына қарасты шипажайларға немесе аурудың салдарына қарай санитарлық-курорттық ұйымдарға жіберу мәселесі де қаралатын көрінеді.

Қор тарапынан көрсетілетін мұндай қолдаулар 1-тамыздан бастап қолға алынады.

Естеріңізде болса індет есігімізді қағып кірмей тұрғанда билік басында отырған азаматтар вируспен күресіп, ауруларды емдеуге толық дайынбыз дегенді нық сеніммен бірнеше рет айтқан болатын. Бірақ коронавирус пен пневманиямен сырқаттану күрт өскен кезде ауруханада орын, дәріханада дәрі тапшы болғанын ел әлі ұмыта қойған жоқ. Енді қор басшысының айтып отырған оңалту шараларының шарапатына халық қалай бөлінетінін болжау қиын.

Айтпақшы қордың басқарма төрағасы Болат Төкежановтың айтуынша, жылдың басында қордың активтері 251 миллиард теңге болған. Бірінші жартыжылдықта түскен ақшаның сомасы 260 миллиард теңгені құраған. Оның 147 миллиардын мемлекет аударса, 76 миллиард теңге жұмыс берушілерден түскен. Сонымен қатар, бірінші жартыжылдықта өзін-өзі жұмыспен қамтығандар 37 миллиард теңге аударған. 2020 жылы 1-шілде күні медициналық сақтандыру қоры активтерінің қалдығы 361 миллиард теңгеден асқан.

 

С. НҰРАЙ.

Түркістан облысында барлығы 910 мектеп бар. Ондағы оқушылардың жалпы саны 499 535 балаға жетеді. Алдағы күндері олардың саны арта түсетіні сөзсіз. Себебі, балаларды eGov.kz порталы арқылы 1-сыныпқа қабылдау бойынша өтініштер 1-тамызға дейін қабылданады. Бүгінде аталған білім ұяларында еліміздің Білім және ғылым министрлігінің шешіміне сәйкес оқушыларды қашықтан оқыту жүйесіне дайындық жұмыстары жүргізілуде.

Бұл туралы облыстық Өңірлік коммуникациялар қызметінде өткен брифингте облыстық Адами әлеуетті дамыту басқармасының басшысы Рақымбек Жолаев мәлімдеді.

Сонымен қатар ол, ата-аналардың өтініші бойынша облыстағы мектептерде бастауыш сынып оқушылары үшін кезекші сыныптардың жұмыс істеуі жолға қойылатынын жеткізді.

Басқарма басшысы облыстағы барлық мектептердегі 1-11 сынып оқушыларының қашықтан оқытылатынын айтты. Тек ғаламтор сигналы жоқ немесе мүлдем әлсіз шалғайда орналасқан 139 шағын жинақы мектептерде білім беру дәстүрлі түрде жүргізілетінін айтты. Бірақ ол жерлерде санитарлық талаптардың сақталуы басты назарға алынады. Ондағы эпидахуалдың тұрақтылығына да мән беріледі. Өз кезегінде Рақымбек Жолаев қазіргі таңда шалғайда шағын жинақы мектептердегі балалар саны 12378-ге жететінін алға тартты.

Сонымен қатар ол, облыстағы қалған мектептерде бастауыш сынып оқушыларының ата-аналарының өтініші бойынша, ахуал жақсарған жағдайда, қатаң санитарлық талаптарды сақтай отырып, кезекші сыныптардың жұмыс істеуіне мүмкіндік берілетінін де айтты.

Бұдан бөлек ол, қашықтан оқыту бойынша ұстаздар мен оқушылардың қажетті техникалық құрылғылармен қамтылуы туралы «Облыста 499 535 оқушы бар. Бұл 200 мыңнан астам отбасының балалары. Біз жүргізген талдау бойынша осы 200 мыңнан астам отбасының 28 пайызы немесе 130 мыңға жуық оқушы үй жағдайында интернет желісіне қосыла алмайды. Ал 34 пайызы немесе 60 мыңнан астам оқушыда компьютерлік техника жоқ»,-деді.

Басқарма басшысы қолында қашықтан оқитын құрылғы жоқ балаларға мектептердегі техникалар уақытша пайдалануға берілетінін айтты. Ал интернеттің қолжетімсіздігі мәселесін реттеу үшін тиісті жұмыстардың атқарылып жатқанын жеткізді.

Түркістандықтар өзіне қажетті дәріге қол жеткізу кезінде артық сабылмас үшін «Дәріхана» мобильді қосымшасын пайдаланады. Осыдан біраз уақыт бұрын іске қосылған қосымша көптеген тұрғындар үшін тиімділігін байқатты.

 

Аз уақыт ішінде қосымшаға 35 мың адам тіркеліп үлгерген. Қосымшаны қолданушылар өзіне қажетті дәрі-дәрмекті үйден шықпай-ақ смартфон арқылы тез табуға мүмкіндік алады. Ағымдағы жылдың шілде айының 14-23 күндері аралығында «Дәріхана» қосымшасынан түрлі аккаунттардан 187 311 рет дәрі-дәрмек ізделгені белгілі болды. Бағдарламаға мониторинг жасап отыратын мамандар аталған қосымша арқылы қандай медициналық препараттарға сұраныс артып отырғанын да анықтай алады.

Қазіргі таңда облыста 531 дәріхана бар. Олардың барлығының мекенжайын тап осы қосымша арқылы білуге болады. Бірақ олардың барлығы емес, тек 7-уі ғана аталған бағдарламаның іздеу жүйесіне қосылған. Қосымшаны қолданушылар іздеген дәрісін тапқан жағдайда бағдарлама сұратқан анкетаны толтыру арқылы сұраныс жасауға болады. Осы ретте Сіздің анкетаға енгізген өзіңіз туралы мәліметтер 48 сағаттың ішінде жойылатынын айта кетейік. Аталған қосымшадағы «Шағымдану» бөлімі арқылы адамдар дәрі бағасының негізсіз көтерілуі сынды шағымын да қалдыра алады.

Мақтаарал ауданындағы төтенше жағдайдан зардап шеккен ауыл тұрғындарына баспана салу үшін мемлекет тарапынан берілетін 17 млн. теңгенің тең жартысы үлестірілген. Жуырда ауыл тұрғындары екінші транш бойынша қалған қаражаттың 25%-на құжат өткізіп, қаржы ала бастады.

Бұл туралы Түркістан облысы әкімдігінің баспасөз қызметі хабарлады.

 

Бұдан бөлек, топан судың зардабын көрген барлық отбасыға кәсіпкер Әлішер Усмановтың қоры есебінен әрбір жанұяға 425 мың теңге (1000 АҚШ долларынан) берілген. Сондай-ақ, отбасының әр мүшесі мемлекет тарапынан 100 мың теңгеден қаржылай көмек алған.

Кешегі аптада Түркістан облысының әкімі Өмірзақ Шөкеев кезекті рет Мақтааралға жұмыс сапарымен барды. Аймақ басшысы Өргебас және Фирдоуси ауылдарын қалпына келтіру жұмыстарының барысын бақылады. Мырзакент кентіндегі жаңа мөлтек ауданында жүргізіліп жатқан құрылыс жұмыстарын тексерді. Салынып жатқан әлеуметтік нысандарды аралады. Жаңа ықшам ауданда 386 үй мен бірқатар әлеуметтік нысандар бой көтерген. Құрылыс алаңын аралаған аймақ басшысы Өмірзақ Шөкеев кезекті жұмыс сапары барысында құрылысы қарқын алған жаңа желілік саябақ пен гүлзарлардың абаттандыру жұмыстарын тексерді. Демалыс аймақтарында қазіргі сәтте веложол төселініп, су ағарлар орнатылған. Айналасы жасыл желекпен көмкеріліп, тұрғындар үшін барлық жағдай жасалынуда.

Мақтаарал ауданындағы су шайған Жеңіс, Достық, Жаңатұрмыс елді мекендері үшін 70 гектар жерде жаңадан бой көтерген Мырзакенттегі жаңа мөлтекауданда 1200 орындық мектептің, 280 орындық балабақша ғимараты мен дәрігерлік амбулатория, тірек пункті нысандарының құрылыс жұмыстары қарқынды жүруде.

Биыл Арыс қаласында тұрғындар үшін барлық жағдай жасалған үйлер пайдалануға беріледі. «Нұрлы жер» бағдарламасы аясында қаладағы «Көктем» шағын ауданынан бой көтерген 3 тұрғын үйдің, яғни 108 пәтердің кілті баспанаға мұқтаж, үй кезегінде тұрған отбасыларға табыс етілмек.

 

Игі істі жүзеге асырған қала әкімдігі мен тапсырысты орындаушылар Ел­басы Жолдауындағы «Жайлылық дегені­міз – ең алдымен тұрғын үйдің қол­жетім­ділігі, ауланың әдемілігі мен қауіпсіз­дігі, тіршілікке және жұмыс істеуге қолай­лы елді мекеннің және сапалы инфра­құрылымның болуы» деген тапсырмасын басшылыққа алғандарын айтуда.

Осыған орай, Арыс қаласында көпқабатты тұрғын үйлер құрылысы қарқынды жүріп жатыр. Биыл маусымда облыс әкімі Өмірзақ Шөкеев 60 пәтерлі жаңа баспаналардың құрылыс алаңында болып, құрылыстың сапасына және мерзімінде аяқталуына баса мән берген еді. Осыған орай мердігерге нақты тапсырмалар жүктелген болатын.

«Нұрлы жер» мемлекеттік бағдарламасы аясында бой көтерген 3 қабатты үйлер алдағы күзде тұрғын үй кезегінде тұрған арыстықтарға тапсырылады. Жаңа көпқабатты баспаналар Көктем-2 тұрғын ауданында салынуда. Арыс қаласында биыл бұдан басқа тағы 60 пәтерлі көпқабатты тұрғын үйлердің құрылысы басталған. Жаңа баспаналар келер жылы пайдалануға беріледі.

 

Шардара ауданында қайырымды жандардың демеушілігімен 12 отбасыға баспана тарту етілді.

 

Игі шара «Қамқорлық» бағдарламасы аясында іске асқан. Аталған бағдарламаның мақсаты жылдар бойы баспана тауқыметін тартып жүрген жандарға қайырымды азаматтардың демеушілік етуімен үй табыстау болып табылады. Сол арқылы баспанаға мұқтаж болып жүрген азаматтардың «өз үйі – өлең төсегі» пайда болды.

Шардара ауданы әкімдігінің мәліметінше, ағымдағы жылы аталған бағдарламамен тұрмысы төмен жанұяларға 9 баспана беру жоспарланған. Алайда жаны жомарт жандар мұқтаж азаматтарға 12 баспана алып берді. Тұрғын үйге қол жеткізгендердің қатарында көпбалалы отбасылар, жалғызбасты аналар, мүмкіндігі шектеулі азаматтар, әлеуметтік жағынан аз қамтылған және көмекке зәру жанұялар бар.

Солардың қатарында 8 баланың анасы Регина Сүйеуова да бар. Ол жылдар бойы Шымкент қаласында пәтер жалдап тіршілік етіп келгенін айтады. Тұңғышы 13-те болса, кенжесі әлі жасына да толмаған. Өзі бала күтімімен үйде отырады. Ал күйеуінің тұрақты жұмысы жоқ. Әр жұмыстың басын бір шалып, табыс табады. Енді олар баспана тауқыметін тартпайды. «Қамқорлық» бағдарламасының арқасында олар Шардара қаласына қарасты «Өтеғұл» елдімекеніне тұрақтады.

Аудан әкімдігінің өкілдері жыл соңына дейін осы бағдарлама аясында тағы да 3 отбасыға тұрғын үй табыстауға мүмкіндік туып отырғанын айтады. Қазіргі таңда ауданда мемлекет тарапынан 4 қабатты 40 пәтерлі 2 тұрғын үй кешенінің құрылысы салынуда. Оның құрылысы аяқталса жыл соңына дейін тұрғын үй кезегінде тұрған 80 отбасы баспанаға қол жеткізетін болады.

Елімізде дәрі-дәрмектерді заңсыз сатумен күрес жұмыстары жалғасуда. Жуырда Түркістан қаласындағы «Фиркан» азық-түлік дүкенінде дәрілік заттардың сатылып жатқаны анықталды. Заң талаптарына қайшы бұл жағдай қалалық прокуратура мен полиция басқармасы бірлесе жүргізген тексеру шаралары кезінде белгілі болған.

Аталған дүкен қаланың Б.Саттарханов даңғылы және Х.А.Яссауи көшесінің қиылысында орналасқан.

Ондағы шұжық, ірімшік, жұмыртқа және басқа да азық-түліктер сақталатын тоңазытқышта қазіргі таңда көп сұранысқа ие анальгин, грипго, стрептоцид, терафлю, ампициллин, нолгрипп, нафтизин және басқада дәрілер сақталған. Құзырлы орган өкілдері ол дәрілердің барлығын заңсыз сатылымнан шығарып, уақытша сақтау үшін денсаулық сақтау нысандарына тапсырған.

Аталған дерек Түркістан қалалық полиция басқармасының тіркелді. Енді дүкен иесі «Заңсыз фармацевтикалық қызметпен айналысу» және «Дәрілік заттар мен медициналық бұйымдардың айналымы бойынша қағидаларды бұзу» баптарымен әкімшілік жауапқа тартылады.