Маңызды

 

Жуырда журналист Амангелды Батырбеков өзінің фейсбук әлеуметтік парақшасы арқылы тұманды ойларға жетелеген күмәнді мәселені көтерді. Өз кезегінде ол Келес ауданындағы тұрғындардың үйіне алаулатып газ жеткізіп беруге жауапты «Келестрансгаз» мекемесінің басшысы Данияр Өтебайдың абоненттерден жиналған 300 миллион теңгені құмар ойынға құртып қойғаны туралы ақпаратың ел арасында желдей есіп жүргені туралы жазба қалдырған. Белсенді Келеске көгілдір отынның келуінің кілт тоқтап қалуы жұрт айтып жүргендей құбырдағы апаттан емес, осы жағдайға тікелей қатысты болуы мүмкін екенін жеткізген. Және жергілікті жердің прокурорына істің ақ-қарасын анықтап, әділдіктің салтанат құруын сұраған екен.

Бұл ақпараттың шындықтың ауылына қаншалықты жақын екені алдағы күннің еншісінде әрине. Десе де, «жел тұрмаса шөптің басы қозғалмайтынын» ұмытпаған абзал.

Соңғы кездері құзырлы орган анықтаған түрлі заңбұзушылық әрекеттерді сараптай отырып, «Келес ауданы көлеңкелі істердің ордасына айналған ба?» деген ойда қаласың. Сөзіміздің қайнар көзі ретінде мамыр айында ҚР Сыбайлас жемқорлыққа қарсы іс-қимыл агенттігінің Түркістан облысы бойынша департаменті Келес ауданы, Жамбыл ауыл округінің әкімін құрыққа түсірген дерегін айтуға болады. Өз кезегінде ауыл әкімі 400 мың теңге пара алған. Әкім мырзаның бұл параны азаматқа жер телімін берудегі «жәрдемі» үшін алғаны анықталған. Қазіргі таңда оның үстінен сотқа дейінгі тергеу жүруде.

Одан алдын дәл осы Келес ауданының білім бөлімінің басшысы Бахтияр Абдиевте пара беру үстінде ҚР Сыбайлас жемқорлыққа қарсы іс-қимыл агенттігінің Түркістан облысы бойынша департаменті қызметкрелерінің құрығына түскен. Білдей бөлім басшысы өзінің үстінен қозғалған қылмыстық іс бойынша әрі қарай қудаламау үшін, делдал арқылы А.Батырбековке 5 миллион теңге беруге барған. Осы ретте көкейде «неге білдей бөлім басшысы параны Батырбековке беруге оқталған?» деген сауал көлкіп шыға келетіні анық.

Себебі, Келес аудандық білім бөлімінің басшысы Бахтияр Абдиевтің түсірген арызымен Түркістан облысының Сарыағаш аудандық соты журналист А. Батырбековты 2019 жылдың 23-қыркүйегінде “жала жабу” және “қорлау” бабымен айыптап, 2 жыл 3 айға бас бостандығынан айырған. Бірақ араға үш айдан астам уақыт өткеннен соң, дәлірегі ағымдағы жылдың 9-қаңтарында Түркістан облыстық сотының апелляция алқасы журналист Амангелді Батырбековтың ісі бойынша шешім шығарды. Сот журналистті ақтап шығарған.

Бір айға жуық уақыт өткеннен соң А. Батырбековтың арызы негізінде Бахтияр Абдиевке қатысты «Сотта жәбірленушінің көрінеу жалған айғақтары» деген баппен қылмыстық іс ашылған. Алайда ол іске қатысты әлі нүкте қойылмаған.

Жалпы журналист А. Батырбековтың желідегі парақшасындағы жазбаларына көз тоқтатып қарасаңыз оның Келес ауданындағы білім саласында болып жатқан біраз мәселелерді бүкпесіз жайып, жауапты басшыларды ортақ мәселені шешуге шақырып жүргеніне көз жеткізесіз. Мәселен ол, 20-сәуірдегі жазбасында Келес аудандық білім бөлімінің басшысы Бахтияр Әбдиев Түркістан қаласында өткен сотқа өзінің орынбасары Омаров Мұқағалиды заңсыз апарып жүргенін мәлімдеп, бұл ақпарат бойынша тексеру жүргізуді сұрап, Келес ауданының прокуратурасына ресми хат жолдағанын жазған. Сөйтіп аудандық прокуратура бұл ақпараттың рас екенін анықтап, аудан әкімі Ақментай Есбаевқа білім бөлімінің басшысына шара көруді шегелеген екен. Осыған байланысты Б. Абдиевтің ісі әкімдіктің 9-шы сәуір күнгі тәртіптік кеңесінде қаралып, нәтижесінде оған ешқандай шара көрілмегені белгілі болған. Батырбеков прокурор сөзінің осылайша жерде қалғанын айтып, әкімдіктегі кадр бөлімінің басшысы Ербол Сапаровтың Бахтияр Абдиевтің туған ұлы екенін тілге тиек етіп, мәселенің түп-төркіні қайда жатқанын тұспалдап жеткізген. Бұл ретте «Келес ауданы әкімі көп шындыққа көз жұма қарап жүр ме?» деген ойға батады екенсің.

Бұл мысалдар Келес ауданының әкімі Ақментай Есбаевтың алдағы қызметіне қалай әсерін тигізеді? Осы қызметке тағайындалғанына жуырда екі жыл толатын Есбаевтың қол астындағы кадрларының «қия» басып, ылдиға кетіп бара жатқаны оған абырой әпермейтіні анық. Кемшіліктері жіпке тізіліп, бірін-бірі жетелеп бара жатқан мұндай жөнсіздіктер аудан әкімі Ақментай Есбаевқа деген басшылардың сенімін сарқылтуы да бек мүмкін.

 

А. САТЫБАЛДЫ.

Билік сөзінің салмағы түсіп, қадірі кетіп бара ма?

 

Бүгінде биік мінберлерде басшылардың айтқан әрбір уәделі сөзі орындала бермейтіні ешкімге жұмбақ болмай қалды. Халық басшылардың көп сөзі шындықтың ауылынан алыс болып жататынына еті үйренгендей ме дерсің… Бұл сөздердің Шымкент қаласы әкімі мен оның қарамағындағы қызметкерлерге тікелей қатысты болып отырғаны өкінішті.

Естеріңізде болса ағымдағы жылдың 25-мамырында Шымкент қаласының әкімі Мұрат Әйтенов COVID-19 инфекциясының тез таралуына жол бермеу мақсатында әкімшілік тарапынан атқарылып жатқан жұмыстарды баяндау үшін журналистермен онлайн конференция өткізген болатын. Сол кезде мегаполистің басшысы қалада құрылысы жүріп жатқан 200 орындық жұқпалы ауруларға арналған госпиталь 1-маусымда пайдалануға берілетінін нық сеніммен айтқан. Бұл құрылыс нысаны үшін 5,8 млрд теңге қаржы жұмсалатынын айта кетейік.

Бірақ әкім айтқан межелі мерзімде госпитальдың лентасы да қиылмады. Нысан пайдалануға да берілмеді. Бірақ мойындау қажет бұл үшін денсаулық сақтау саласының басы жарылып, көзі шығып жатқан жоқ. Десе де, жұмыс айтқан уақытта тындырылмаған соң, оның себебі мен салдарын қала тұрғындарына түсіндіре кету артық етпес еді. Әкім алдағы уақытта «Әйтенов айтады да қояды» деген сөздерден өзін арашалап алу қажет еді. Бірақ ләм демеді. Кім біледі, ол нәрсе оның ойында да болған шығар. Бірақ қарбалас жұмыстардан бас көтере алмай жүргенде, есінен тарс шығып кеткен де болар. Бірақ әрдайым жанында жүретін жауапты мамандары мен орынбасарларының ойына мұндай ой неге келмеген екен?

Бірақ әкім орынбасарларының өздеріне де айтқан сөздерінің, берген уәделерінің уақытын көрсетіп тұратын адам қажет сияқты. Мәселен, сәуір айында Шымкент қаласы әкімінің орынбасары Махсұт Исахов Шымкенттегі ақпараттық-коммуникациялық орталықта өткен брифингте 1-маусымнан бастап қоғамдық көліктер электронды төлем жүйесіне көшетінін сүйіншілей жеткізген болатын. Сол кезде біз бұл ақжолтай жаңалықтың аз уақыттың ішінде жүзеге аса қоятынына аздап күмәнданған едік. Себебі, Шымкент билігі оған дейін де (2015 жылы және 2019 жылы) қоғамдық көліктерде электронды төлем жүйесін енгізетінін хабарлағанын, кейіннен оның жәй ғана сөзбұйдаға айналып кеткенін дәлел ретінде келтіре кеткен едік.

Сөйтіп жүргенде 1-маусымда келіп жетті. Бірақ өзгерген дәнеңе жоқ. Есесіне 29-мамыр күнгі кезекті брифингте Мақсұт Исахов қоғамдық көліктерде электрондық төлем жүйесінің енгізілуі ағымдағы жылдың шілдесінен басталатынын айтты.

Бұл билік сөзінің салмағы түсіп, қадірі кетіп бара жатқанының көрінісі ме?

 

Қ. ҚАЛИЕВ.

Соңғы кезде әлеуметтік желіде Шымкент қаласы әкімдігінің аппараты мен қызметкерлері жайында әртүрлі алып-қашпа әңгімелер көбейді. Жұртшылық «қала әкімінің штаттағы және штаттан тыс кеңесшілері бар» деген сөзді түсінбей дал. Оның түп-төркінін былайғы жұрт нақты білмейді. Шынында, Шымкент қаласы әкімінің заңды кеңесшісі бар ма? Бар болса, олар кімдер?

 Мәселен, осы күндері әлеуметтік желіде «Отырар» телеарнасының директоры Әйгерім Жұмағұлова жайында саналуан пікірлер жазылып жүр. Сол пікірлер жазылған жолдарда әкімнің кеңесшілері мен қызметкер қыз-келіншектердің шетінен сұлу болатыны айтылып, небір дүдәмал әңгімелердің шеті шығып жатыр. Ал енді біреулер «бүгінде Шымкент қаласы әкімінің жұрт білмейтін кеңесшілері неге көбейіп кетті?» деген сұрақты төтесінен қояды. Жұрт жазбасында жүндей түтіп жүрген Ә. Жұмағұлова туралы аз-кем мәлімет бере кетсек. Ол бір кездері ОҚО әкімі болған Бейбіт Атамқұловтың, Шымкент қаласының әкімдері болған Ғабидолла Әбдірахымовтың, Н. Сауранбаевтың кездерінде әкімнің кеңесшісі-баспасөз хатшысы болған. Ғабидолла Әбдірахымов Шымкент қаласына екінші рет әкім болып келген кезде Зауытбек Тұрысбековтердің иелігіндегі «Отырар» телеарнасына директор болып тағайындалған.

Шымкентке Ерлан Айтаханов әкім болған кезде бұрынғы бірнеше басшылардың кезінде «тақтан түспеген» Әйгерім Жұмағұлова «сахнадан» бір мезгіл көрінбей қалған. Міне, енді қалаға М. Әйтенов әкім болып келіп еді, Ә. Жұмағұлова қайтадан көзге түсе бастады. Мысалы, әлеуметтік желіні белсенді пайдаланушының бірі, белгілі журналист Әсет Әссанди өз постында Жұмағұлованы Шымкент қаласы әкімінің кеңесшісі болып тағайындалды деп жазады. Ізінше бұған З. Мирзаходжаева, Н. Карешина сияқты фейсбук желісін қолданушылар өз ойларын білдіреді. Ондағы пікірлерде Ә.Жұмагұлованың нашар маман екені туралы және жеке басының талантына байланысты бірқатар өзгеше пікірлер айтылады.

Бұлардан басқа бірталай азаматтар да Әйгерімнің расымен қала әкімінің заңды кеңесшісі ме әлде қала басшысын сырттай мақтап отыратын «штаттан тыс кеңесшісі ме деп, күмәнді ойларды алға тартады.

Шынтуайтына келгенде, «Ә. Жұмағұлованың қала әкімінің кеңесшісі болып тағайындалды» деген нақты дерек әкімдіктің ресми сайтында жарияланған жоқ. Бұған байланысты да, әлеуметтік желіде талай-талай пікірлер көтерілді. Бірақ бізді қынжылтатын бір нәрсе Ә. Жұмағұлованың осы әрекеттеріне қатысты түрлі жазбаларға байланысты әкімдік тарапынан ешқандай пікір білдірілмегені. Түйіп айтсақ, әкімдік осыған қатысты сөздерді көріп, біле отырып, түрлі жағымсыз пікірлерден өзін арашалап алатын мәлімдеме жасамады. Жарияламады. Сөйтіп, көп көкейінде көлкіген сұрақты басы ашық күйінде қалдырып келеді.

Жұрт арасында дәл осы шынашақтай қыздың білімі басшылық қызметке сай еместігі туралы сөздер де айтылып жүр. Расында, аталмыш пікірлердің астарында ақиқат жатса, ол бүгінгі әкімдердің жеке басына, сөз жоқ, нұқсан келтіретіні шындық. Оған қоса, қызметтік абыройына да дақ түсіретіні даусыз.

Бәрімізге белгілі, дәл қазір елімізде коранавирус індетіне байланысты карантин жүріп жатыр. Карантин талабына сәйкес бас санитариялық дәрігердің қабылдаған қаулысы бойынша, адамдар жиі шоғырланған жерлерде және жиналыстарда бетперделік режимнің қатаң сақталуы қажеттігі айтылып жүр. Жуырда Шымкент қаласының әкімі өткізген кезекті бір жиында көпшілік талқысына көп түсіп жүрген сол қарындасымыздың осы бір қағидадан қиыс кеткені сын тезіне алынды. Бұл жайында әлеуметтік желілер мен мерзімді баспасөздерде сыни пікірлер аз жазылған жоқ. Алайда, бұған әкімдіктің лауазымды қызметкерлері тарапынан да, Жұмағұлованың өзінен де қандай да бір түсініктеме берілген жоқ.

Негізінде, біздің бұл тақырыпты жазуымыздың мақсаты – «Ә. Жұмағұлова ақиқатында, қала әкімінің заңды кеңесшісі ме әлде әкімнің ісіне сырттай баға беріп отыратын штаттан тыс кеңесшісі ме?» деген сұраққа жауап алу. Біз Шымкент қаласы әкімдігінен осы сұраққа қатысты нақты жауап күтетін боламыз. Әйтпеген күнде қала әкімінің төңірегіндегі қаңқу сөздерге тоқтау болмайтын сияқты. Себебі бүгінгі жұртшылық кез келген нәрсенің ақиқатын білгісі және сол ақиқат төңірегінде сөйлегісі келеді!

 

«Уақыт».

 (Сурет Әйгерім Жұмағұлованың Фейсбук әлеуметтік

желісінен алынды).

 

Шымкент қаласының ауыл шаруашылығы және ветеринария басқармасының жетекші маманы өз қызметін пайдалана отырып, теріс пайда тапқан. Жағымсыз тәжірибе елімізде коронавирусқа байланысты жарияланған төтенше жағдай кезінде орын алған. Яғни, мемлекеттік мекеме маманы қолындағы құзыреті арқылы ауыл шаруашылығы өнімдерін өткізетін азаматтың базар аумағына ет өнімін саудалауға шығаруы үшін одан сыйақы алып, заңсыз әрекетке барып отырған. Сонымен қатар ол, ауыл шаруашылығы мақсатындағы техниканы тіркеуге қою, оны жүргізу куәлігін ауыстыру туралы қызметке жүгінген тұрғыннан 50 мың теңге көлемінде пара алған. Бұл әрекетін аталған басқармадағы бас маманмен бірге жүргізген. Тергеу барысында жөнсіздікке барған мамандар құқықбұзушылық әрекеттерін толық мойындаған.

Бұл туралы ҚР Сыбайлас жемқорлыққа қарсы іс-қимыл агенттігінің Шымкент қаласы бойынша департаменті мәлімдеді.

Сыбайлас жемқорлықтың алдын алу оның алғышарттарын болдырмау мақсатында жуырда ҚР Сыбайлас жемқорлыққа қарсы іс-қимыл агенттігінің Шымкент қаласы бойынша департаменті аталған басқарманың ұжымымен кездесу өткізді.

Кездесуге қала әкімінің орынбасары М. Исахов, әкім аппаратының басшысы Е. Әлімқұлов, әкімдік қызметкерлері мен ауыл шаруашылығы басқармасының ұжымы қатысты.

Шара кезінде аталған департамент басшысы Асхат Жұмағали әр мемлекеттік қызметші өзіне жүктелген жауапкершілікті сезіну қажеттігін айтып, заңбұзушылықтардың алдын алмаған тұлғалардың жауапкершілігін қатаңдатуды ұсынды. Сонымен қатар департамент басшылығы қылмыс жасаған жетекші маман мен заң бұзушылықтардың жасалуына ықпал еткен бас маманды теріс себептермен жұмыстан шығару, олардың тікелей басшыларын жұмыстан босатуға дейін қатаң тәртіптік жауапкершілікке тарту туралы ұсыныс енгізді.

Өз кезегінде қала әкімінің орынбасары М. Исахов айтылған ұсыныстарды қолдап, тиісті шаралар қабылданатынын жеткізді. Енді басшылық қабылдаған шешім негізінде бөлім басшысы орнынан босай ма әлде басқарма басшысы қызметтен кете ме ол жағы әлі ашып айтылмады.

Естеріңізде болса былтырдан бастап елімізде алғаш рет басшылардың қол астындағы қызметкерлері үшін жауапкершілігі заңнамалық деңгейде бекітілген болатын. Сол заңға сәйкес қалалық ауыл шаруашылығы және ветеринария басқармасының басшысы Асқар Қаныбеков қандай жауапкершілікке тартылады екен?

Жалпы Асқар Қаныбековтың қарамағындағы қызметкерлерінің бұлайша заңсыз әрекеттерге баруы нені аңғартады? «Қамшыны бос ұстасаң» қолды кесетіні сынды бұл басқарма басшысының «жұмсақ» болғаны ма? Немесе оның әр бағыттағы жұмыстарға бақылауды өз деңгейінде жүргізбейтін атқамінер екенінен хабар бере ме?

Осындайда қол астындағы қызметкерлерін «бос қойған» басшы өзге жұмыстарды он орап әкете алады ма деген сауал туындайды. Жасыратыны жоқ Асқар Қаныбеков былайғы жұрт үшін атқарылған жұмыстарымен емес, мәжіліс депутаты Сәкен Қаныбековтың баласы ретінде жақсы таныс. Кіші Қаныбеков Шымкенттің ауыл шаруашылық басқармасына 2018 жылдың тамыз айында тағайындалған. Сол кезде оның бұл тағайындалуы туралы ақпараттарда әкесі Сәкен Қаныбековтың Мәжілістегі Аграрлық мәселелер комитетінің мүшесі екені де көрсетілген. Бұдан оның жоғарыда тіреуі бар кадр екенін түсіну қиын емес екені белгілі.

Ол осы қызметке тағайындалғаннан бері Шымкенттің ауыл шаруашылығы саласында тындырылған тірліктерден гөрі келер күннің еншісіне қалып келе жатқан шаруалар көп.

Жыл басынан бері Шымкентте агроөнеркәсіп кешен бағытына жалпы құны 8,6 млрд. теңгені құрайтын 18 инвестициялық жоба жүзеге асырылатыны, бүгінде соның тек 4-уі іске қосылғаны сөзіміздің жалаң еместігін аңғартады.

М. ӘБДІРАЙЫМ.

 

Бір жерден екі-үш өнім алу тәжірибесі –ауыл шаруашылығы саласын дамытудың басым бағыттарының бірі. Облыс әкімі Өмірзақ Шөкеев былтырдан бері күнгей диқандарына осы талаптың үдесінен табылуды тапсырып келеді. Одан нақты нәтиже шығарып жатқан шаруалар жетерлік. Алайда тиімді тәсілді жүзеге асыруда сылбырлық танытып жатқандары да бар.

Жобаның тиімділігі – 1 га жерден жылына 6-7 млн. теңгеге дейін табыс табуға мүмкіндік беретіні болып отыр.

Осы аптада аймақ басшысы «Бір алқаптан 2-3 өнім алу» жобасын жүзеге асыруда Сарыағаш, Түлкібас, Жетісай, Отырар, Келес аудандары көш бастап тұрғанын айтты. Ал Бәйдібек, Төлеби мен Шардара аудандарында бұл бағыттағы жұмыстар ақсап тұр.

Саланы дамыту бағытында атқарылып жатқан жұмыстар сараланған кезекті мәжілісте аймақ әкімі осы мәселені айта келе, тиісті жұмыстарды пысықтауды тапсырды.

Оған дейін де аймақ басшысы ауыл шаруашылығы саласы бойынша еңбек өнімділігін дамыту үшін үш негізгі бағыттағы жұмыстарды барынша жандандыруды атап өткен болатын.

Бірінші бағыт агроқұрылымдарды ірілендіре отырып, заманауи озық технологияларды енгізу, екінші бағыт кооперативтерге бірікпейтін 2-3 га жері бар агроқұрылымдар үшін бір алқаптан жылына 2-3 өнім алу жобасын ендіру, үшінші бағыт жеке қосалқы шаруашылықтардың ауласына тамшылатып суару технологиясын ендіру арқылы ерте пісетін көкөніс, картоп, бақша өнімдерін өндіру болып табылады.

Осыларды алға тартқан аймақ басшысы жауапты мамандарға осы жұмыстарды ары қарай дамыту жолдарын қарастыруды міндеттеген.

Соның негізінде облыста бірқатар жұмыстар қолға алынғаны да белгілі. Мәселен, бірінші бағыт бойынша, Түркістан қаласы аумағында азық-түлік белдеуін қалыптастыру аясында жаңбырлатып суғару технологиясы іске қосылып, қурап, бос жатқан жерлерге су келе бастағанын бұған дейін де хабардар еткенбіз. Өмірақ Естайұлы бұл бағыт бойынша жаңбырлатып суғару технологиясын кеңінен ендіру қажеттігінің маңызы зор екенін, жауапты мамандар осыған білек сыбана кірісу керектігін шегеледі. Ал «Бір алқаптан 2-3 өнім алу жобасы» ірі, орта шаруашылықпен айналысатындар үшін де, үй іргесіндегі жерлер үшін де тиімді. Аймақ әкімі не тал жоқ, не егіс жоқ бос жатқан жерлері бар кейбір аудандар осы жоба бойынша жұмыс істеу керектігін баса айтуда. Және де ерте пісетін көкөніс, картоп, бақша өнімдерін өндіруде жеке қосалқы шаруашылықтардың ауласына тамшылатып суғару технологиясын ендіру қажет. Бұл тәсіл Израиль мемлекетінде кеңінен қолданысқа енгізілген.

Өз кезегінде бұл мемлекет ауыл шаруашылығы өнімін өндіру, экспорттаудан үздіктер қатарында болып табылады.

Сарыағаш ауданының шаруалары облыс әкімі Өмірзақ Шөкеевтің көңілінен шықты. Былтыр аймақ басшысы осы ауданға жасаған кезекті сапары кезінде шаруа қожалықтарына егістік жерден жылына 2-3 өнім алу жоспарын іске асыруды тапсырған болатын. Әкім айтқан тапсырма аяқсыз қалмады. Бүгінгі таңда диқандар ерте көктемде еккен бірінші өнімін жиып-теріп отыр.

  Нәтижесінде 36704 тонна картоп, орамжапырақ, қызанақ, қияр жинап алынды. Осылайша сарыағаштық диқандар қажырлы еңбегінің арқасында аймақ басшысының оң бағасын алып қана қоймай, облыс бойынша «бір алқаптан 2-3 өнім алу» жобасын іске асыруда көш бастады.

Ендігі кезекте 379 шаруа қожалық иелері 860 гектар жерге 2-ші өнім егу жұмыстарын жүргізсе, қалғаны қызу дайындық жасауда. Жоба аясында жұмыс жүргізуге жалпы 399 шаруа қожалығы ниет білдіріп, көлемі 917,6 га болатын егістікте инновациялық жобалар іске асырылуда.

Ауданда бір жерден екі үш өнім алумен қатар, үй іргелік жерге тамшылатып суару әдісін қолдану жобасы да сәтімен іске асып келеді. Бұл жобаның жүзеге асуы Дербісек және Жемісті ауылдық округтеріне қарасты ағын суы жоқ елді мекендерде қолданылуда. Жобаға қатысушы әр азаматқа мемлекет тарапынан 555 мың теңге көлемінде қаржылай грант бөлінген.

 

Елімізде қуаттылығы мол трансформаторлар шығарумен айналысатын бірден бір өндіріс орны «Кентау трансформатор зауыты» акционерлік қоғамы өнімінің тең жартысы Әзірбайжан, Ауғанстан, Ресей, Өзбекстан сынды әлемнің 14 еліне экспортталады.

Заманауи үлгідегі трансформаторлар дайындалатын алпауыт компанияда жылына 28 млрд. теңгенің өнімі шығарылады. Кәсіпорын көбіне электромеханика жабдықтарын жасайды.

Алпыс жылдан асқан тарихы бар алып зауытта 1200-ден астам маман жұмыс істейді. Олардың барлығы жергілікті жердің азаматтары. Моноқала мерейі болып саналатын кәсіпорын үшін кадрлардың қабілеті зор маңызға ие. Осы бағытта зауыт жанынан кәсіби колледж құрылған. Онда дайын мамандар даярланады. Сонымен қатар маман тапшылығы өндірістегі істің тұралауына себеп болмас үшін кәсіпорында кадрлық қор әзірлеу назарға алынған.

Кәсіпорында мамандарға қойылған талап қатал. Тиісінше өз ісін ілгері жүргізе білгендер үшін де қамқорлық пен қолдау күшті. Зауыттың басқарма төрағасы, Түркістан облысы кәсіпкерлер палатасының өңірлік кеңес мүшесі Хайрулла Қожабаев өндіріс орнындағы отбасын құрған жастарға, сәбилі болған жанұялар мен әлеуметтік жағдайы төмен жандарға әрдайым қолдау көрсетіп отырады. Мәселен, компания атынан соңғы 10 жылда зауыт қызметкерлеріне 248 үй берілген. Осындай мақсатта өндіріс орны биыл 40 пәтерлі үй салу үстінде. Баспаналарды қыркүйек айында пайдалануға беру жоспарланған. Бұдан бөлек жас мамандарды қолдау үшін 500 орындық жатақхана салынуда екен.

Сондай-ақ, Хайролла Қожабаев, кәсіпорынды жаңа техникамен жарақтандыру және жаңа өнім шығару жұмыстары да басты назарда екенін алға тартады.

Кәсіпорын былтыр Түркістан облысы бойынша «Өндірістік мақсаттағы үздік тауарлар» номинациясына ие болған.

 

Соңғы жылдары Түркістан қаласын көк түтін тұмшалайтыны туралы мәселе көп көтеріліп келеді. Тұрғындардың қолқасын қауып, көзін ашытатын мұндай жағымсыз құбылыс қоршаған орта үшін де, жергілікті халықтың денсаулығы үшін де кері әсер беретіні сөзсіз. Жергілікті билік күн суығаннан бастап киелі кентті көк түтіннің басуын қаладағы жеке тұрғын үйлер мен кәсіпкерлік нысандардың көмір жағатынымен түсіндіреді. Ондағы «Жылу» МКК мекемесінің көпқабатты тұрғын үйлерге жылуды көмір жағу арқылы жеткізетіні «жығылғанға жұдырық» болуда. Осыған орай қала әкімі Рашид Аюпов осыдан біраз уақыт бұрын қаланы жаппай газдандыру арқылы оның көк түтінге орануына жол бермейміз деп бек сендірген еді.

Бұл бағытта қандай жұмыстар атқарылып жатыр?

 

Осы аптада қала әкімі Рашид Аюпов «Жылу» мекемесіне арнайы барды. Аталған мекеме алдағы жылу беру маусымынан бастап көгілдір отынға көшетін болады. Осы бағыттағы тиісті жұмыстар қолға алынған. Қазірдің өзінде қажетті құралдар алынып қондырғыларды қондыру жұмыстары басталып кеткен.

Енді «Жылу» мекемесі жергілікті нысандарды жылытуды көмір жағып емес, алаулаған көгілдір отын арқылы жүргізетін болады. Бұл бағыттағы жұмыстардың барлығы 1-қазанға дейін аяқталуы тиіс. Нәтижесінде көпқабатты тұрғын үйдегі тұрғындарға жаңа жүйемен жылу берілетін болады.

Жалпы Түркістан қаласындағы жұмысы жауапты «Жылу» мекемесі жергілікті биліктің талабын орындауда талап үдесінен шығуға барын салып келеді. Естеріңізде болса осы жылдың 8-сәуірінде күнгейде күн күрт суып, біраз тұрғындар дірдек қаққан болатын. Ауа температурасының төмендеуі Түркістан қаласында да байқалған. Соған байланысты орталық жылу қазандығы арқылы жылынатын көпқабатты үй тұрғындары жаурай бастаған еді. Себебі сол уақытта жылу беру маусымы тоқтаған-тын. Бірақ қала әкімі соған қарамастан жауапты мамандарға көпқабатты үйлердің жылуын қайта қосуды тапсырған еді. Сол кезде Шымкенттің бірқатар белсенді тұрғындары Рашид Абатұлының бұл ісінен Шымкент әкімі Әйтенов үлгі алу қажеттігін айтып, жылуды қайта қоспаған әкімдікке ренішін жеткізген еді. Бірақ одан түк нәтиже болмаған. Бұл өз алдына бөлек тақырып.

Бұдан бөлек Рашид Аюпов сәуір айындағы суық күндерге байланысты жағылған бірер күнге жеткізілген жылу үшін жұрт ақы төлемейтінін, оның барлығы демеушілер есебінен болатынын айтып, тұрғындарды тағы қуантқан еді. Қала әкімі мұны төтенше жағдай кезінде онсыз да қиналып отырған тұрғындар үшін жасалған жеңілдік деп түсіндірген.

Сонымен қатар қала әкімі Рашид Аюпов «Жылу» мекемесінің басшылығына нысан аумағын абаттандыру, күтіп ұстау тапсырмасын берген. Соның негізінде қазіргі таңда орталық жылу қазандығы мекемесі маңайына 500 түп ағаш көшеттері отырғызылған. Сонымен қатар оның айналасын көзге қораш көрінетін шөптерден жүйеле түрде тазалау жұмыстары да бірізге түскен.

Республика бойынша 185 мың ауыл шаруашылығы техникасы бар. Өкінішке орай олардың 76%-ы ескірген. Ал Түркістан облысы бойынша 19 мың ауыл шаруашылығы техникаларының 83%-ның тозығы жеткен. Бұл мәселені реттеу үшін енді облыста ауыл шаруашылығы техникалары құрастырылатын болады.

Игі бастама Түркістан облысының әкімдігі мен Өзбекстан Ресупбликасының «Узагротехсаноатхолдинг» АҚ және қазақстандық «Orbis Kazakhstan» компаниялары арасында жасалған үшжақты инвестициялық келісім негізінде жүзеге асады. Үшжақты бірлескен жоба «Turkistan» индустриалды аймағындағы «Brownfield» өндірістік алаңында жүзеге асырылады.

Барлығы 12 миллион АҚШ доллары бағытталған ауқымды жобаның жүзеге асуы үш кезеңнен тұрады. Жоба жүзеге асқан кезде 100 адам тұрақты жұмыспен қамтылады.

Жобаны жүзеге асыру кезінде инвесторлар әмбебап жер айдау тракторы, мақта шаруашалығына арналған агрегаттар, түрлі тіркемелер мен роторлы орақтар, су бүрку желдеткіштері мен соқа сынды агроөнеркәсіптік кешен бағытында көп сұранысқа ие техникаларды құрастыруға басымдық беретін болады.

Жоба аясында өзбекстандық «Узагротехсаноатхолдинг» компаниясы қазақстандық мамандарды оқыту мен біліктіліктерін арттыруды, техникалық персонал үшін тәжірибелік тренингтер жүргізуді де жүзеге асырады. Ал, отандық «Orbis Kazakhstan» компаниясы Қазақстан Республикасының аумағында ауыл шаруашылығы техникаларын сату үшін дилерлік және сервистік желіні дамытуға мән береді.

Қазіргі таңда «Turkistan Invest» тарапынан инвестормен жобаны одан әрі іске асыру үшін қажетті ақпарат алмасу бойынша қарқынды жұмыстар жүргізілуде.

Өз кезегінде Түркістан облысының әкімі Өмірзақ Шөкеев мұндай жобалардың екі ел үшін де маңыздылығы зор екенін атап өтті. Ал «Узагротехсаноатхолдинг» АҚ-ның басқарма төрағасы Н. Отажонов біздің өңірдің инвестициялық ахуалына жоғары баға берді.

Жобаға қызығушылық танытқан өзбекстандық компанияның басшылығы 49/51% шарты негізінде, акциялардың негізгі пакеті «Orbis Kazakhstan» қазақстандық серіктес компаниясында болуды жөн көрді.

«Orbis Kazakhstan» компаниялар тобы – экономиканың түрлі салаларында жұмыс істейтін, ондаған кәсіпорындар мен ұйымдарды біріктірген көп бейінді отандық компания. Компаниялар тобы мұнай сервисі, мұнай химиясы, агробизнес, құрылыс, көлік, тасымалдау және қоғамдық тамақтану бойынша қызметтердің кең түрін жүзеге асырып келеді.

 

Шымкент қаласының әкімі Мұрат Әйтенов қаладағы тұрғын үйлердің құрылыс барысымен танысты. Әкім назары «Асар-2» шағын ауданындағы 10 тұрғын үйдің және «Тұран» шағын ауданындағы екі көп қабатты тұрғын үй құрылысына түсті. Аталған үйлер «7-20-25» бағдарламасы аясында «Shymkent» ӘКК» АҚ қаржыландыруымен бой көтеруде.

Содан соң, Мұрат Дүйсенбекұлы «Шымкент Сити» мен «Тұран» шағын аудандарында мемлекеттік бюджет есебінен салынып жатқан үйлердің құрылысын көрді.

Шаһар басшысы құрылыс жұмыстарының қандай сапада жүргізіліп жатқанын бақылап, мердігерлерге жұмысты жандандыруды және отандық материалдарды пайдалануды міндеттеді. Сондай-ақ, жауапты сала басшыларына инфрақұрылым мәселесін бекітілген кестеден кешіктірмей реттеуді тапсырды.

Биыл үшінші мегаполисте барлық қаржы көздері есебінен 13 636 пәтерлі 252 көпқабатты тұрғын үйдің құрылысы жүргізілуде. Олардың жалпы ауданы бір миллион шаршы метрден асады. Оның ішінде, 78 тұрғын үй бюджет есебінен, 48 үй «Shymkent» ӘКК» АҚ қаржыландыруымен және 126 үй жеке салушылар арқылы жүргізіліп отыр.

Ағымдағы жылы 136 көпқабатты тұрғын үй немесе 7561 пәтер пайдалануға беріледі деп күтілуде.

Бұған дейін Шымкенттегі ақпараттық- коммуникациялық орталық алаңында қала әкімінң орынбасары Бауыржан Мамыталиев қаладағы тұрғын үй құрылысының негізгі бөлігі «Шымкент Сити», «Әкімшілік іскерлік орталығы» мен «Тұран» шағынаудандарында жүргізіліп жатқанын мәдімдеген. Ол үшінші мегаполисте тұрғын үй құрылысының негізгі даму аумағы «Тұран» шағын ауданы болып белгіленгенін, алдағы уақытта ол жерде 384 тұрғын үйдің бой көтеруі жоспарланғанын жеткізген болатын.