Маңызды

Мамырдың алғашқы күнінен бастап Мақтаарал тұрғындарынан маза кетті. 1-мамырда таңғы сағат 06:00-дер шамасында көрші Өзбекстан Республикасындағы «Сардоба» су қоймасы бөгетінің бұзылуы туралы ақпарат аудан тұрғындарының дегбірін қашырды. Себебі, жарылған бөгеттен тасыған су ауыздықтылмаса ол әп-сәтте шекараға жақын ауылдарға лап беріп, адамдарды әбігерге салатыны анық еді. Халықтың толқығанын байқап, білген жергілікті билік «Сардобадан» аққан су сел тудырмайды деп сендіріп, халықты сабырға шақырып бақты. Бірақ…

 

2-мамырға қараған түні секундына 180 текше метр салмақпен аққан «Сардоба» суына лық толған аудандағы «ЦГК» каналы арнасынан асқан. Жағаға қарай жылжыған су алдымен Жеңіс пен Жаңатұрмыс елді мекендеріне қарай жақындай түскен. Келісі күндері қызыл су Өргебас, Фирдауси, Достық ауылдарына қарай жылжыған. Төтенше жағдайға байланысты ауданда шұғыл түрде дабыл қағылған. Шырт ұйқыда жатқан жұрт оянып, үй жайын тастап, қаша жөнелген. Осылайша ауданда жергілікті ауқымдағы техногендік сипаттағы төтенше жағдай жарияланып, жедел штаб құрылған.

Көп ұзамай Жаңатұрмыс, Жеңіс, Фирдауси, Өргебас елдімекендері су астында қалған. Қауіпті аймақ саналған бұл елдімекендердің қатарына көп ұзамай Достық елді мекені де қосылады. Абырой болғанда аталған ауылдағы 6 мыңнан астам тұрғын бір күнде қауіпсіз жерге көшіріледі. Бірақ ондағы жүздеген үйлер су астында қалады. Жалпы 2-4 мамыр аралығында Мақтарал ауданында су астында қалған және су басу қаупі бар елді мекендердегі 31-мыңнан астам адам уақытша қауіпсіз жерге орналастырылады. Кейіннен бірқатар ауылдар су басу қаупінен шығарылған соң, ондағы тұрғындар үйлеріне кері қайтарылады. Қазіргі таңда Мақтаарал және Жетісай аудандарында 10 эвакуациялық бекет жұмыс істеп тұр. Мұнда 3700-ден астам адам орналасқан. Бұдан бөлек Тасқын судың салдарынан үйіне кіре алмай қалған біраз жұрт жақын-жуығының үйін паналап отырғаны жайы бар.

«Сардобадан» келген қызыл су кесірінен Мақтааралдағы 845 тұрғын үй, 3 мектеп, 5 балабақша, 4 медицина нысаны, 1 мәдениет үйі, 10 дүкен су астында қалған. Сондай-ақ, Жеңіс ауылындағы көпір және республикалық, облыстық, аудандық маңызы бар 54,7 шақырым автомобиль жолын да су шайған. Барлығы 8 мың гектарға жуық егістік алқап бүлінген. Жалпы ауданда 11 елді мекеннің егістігі зақымданған. Кеше облыстық ауыл шаруашылығы басқармасының басшысы Нұрбек Бадырақов егін шаруашылығымен күн көріп отырған кәсіпкерлердің жалпы шығыны 3 млрд. теңгеге жуықтайтынын хабарлады. Сонымен қатар ол өткен аптада мал шығыны 32 млн. теңге болып есептелгенін айтқан. Өтемақы төлеу мәселесі үкіметтік комиссияға ұсынылатын болады.

Мемлекет апаттан бүлінген нысандар мен одан зардап шеккен тұрғындарға тиісті көмектер мен өтемақының барлығы жасалатынын хабардар еткен. Осыған орай атқарылып жатқан жұмыстар топтамасы туралы толық ақпаратты назарларыңызға ұсынамыз.

 

Тасқын су техниканың жетіспейтінін көрсетті

Жалпы «Сардоба» су қоймасының бөгеті бұзылған кезде Мақтааралға қарай аққан су көлемі 300 млн. текше метрді құраған. Аталған су қоймасының сыйымдылығы 922 млн. текше метрге лайықталғанын ескерсек, ауданға алапат қарқынмен келген қызыл судың қаупі жоғары болғанын бағамдау қиын емес.

Апат болған алғашқы күні облыс әкімі Өмірзақ Шөкеев ауданға бет алып, болған жағдайды бақылады. Сол күні облыс әкімінің тапсырмасымен арнайы штаб құрылды. Штабтың алғашқы отырысын өткізіп, ол жерде тиісті сала басшыларына нақты тапсырма берді. Эвакуациялық орталыққа жеткізілген тұрғындарға тиісті жағдайлар мен медициналық көмектер көрсетілді. Коронавирусқа байланысты сақтық шаралары да қаперден шықпады. Су басқан ауылдардың кіре берісіне блок-бекеттер қойылып, жосып кеткен жұрттың дүние-мүлкілерін тәртіп сақшыларының күзетуі ұйымдастырылды. Алғашқы күндері авариялық-құтқару жұмыстарын жүргізу үшін 986 адам, 10 дана жүзу құрылғысы, 180 дана техника жұмылдырылды.

Кейіннен апаттық-құтқару және кезек күттірмейтін жұмыстарға жұмылған адамдардың саны 1300-ден асты. Осы мақсаттағы жұмыстарға 220 бірлік техника тартылды. Оның ішінде Өзбекстаннан 200-ден астам маман мен 100-ге жуық өрт сөндіру машиналары, экскаваторлар, тракторлар, су сорғыштар және басқа да техникалық құралдар жұмылдырылғанын айта кетейік.

Сонымен қатар, Қызылорда, Жамбыл облыстары мен Шымкент қаласынан арнайы техникалар тартылды.

Бұдан бөлек, апаттық-құтқару жұмыстарына Қазақстан Республикасы Ұлттық Ұланының әскери бөлімі мен құтқару батальонының қызметкерлері қатысып, техникалары қолданылуда. Осылайша орын алған тасқын су ауданда тиісті техниканың жетіспеушілігін көрсетті.

Шығын көлемі шын есептеле ме?

3-мамырда төтенше жағдай жөніндегі облыстық штабтың кезекті отырысында аймақ басшысы Өмірзақ Естайұлы апаттың зардабын тартып отырған адамдарға ауқымды көмек көрсетілетінін айтты. Ол ең алдымен эвакуациялық пункттерге орналасқан халыққа әлеуметтік көмек көрсету және өтемақы төлеу үшін олардың мал саны, жылжымайтын мүлік, жеке бас құжаттарының мәліметтерін жинақтауды тапсырды. Тұрғын үйлер мен кәсіпкерлік нысандарға келтірілген залал көлемін шоттың тасына салуды міндеттеді. Сонымен қатар егістік алқаптарын баптау үшін диқандар жұмсаған қаражат пен үй жануарларына келтірілген зиян көлемін есептеуді жүктеді. Бұл жаңалықтың барлығы айтып келмеген апат салдарынан алдағы күндеріне алаңдап отырған тұрғындар көңілін орнына түсірді.

Дей тұрғанмен тұрғындарды «шығын көлемі шын есептеле ме?» деген сұрақ біразға дейін толғандыратыны жасырын емес.

 

Сақтанғанды, сақтайды

Аталған штаб отырысы кезінде аймақ әкімі су басу қаупі бар елді мекендерді тасқын судан қорғау мақсатында бөгет жасау жұмыстарына кірісуді тапсырды. Соған сәйкес, жергілікті тұрғындардың қатысуымен аудандағы бірқатар елді мекендерде бөгеттер қойылды.

Атап айтқанда Нұрлы жол, Өргебас, Ырысты, Жантақсай елді мекенінде бөгет соғылды. Сонымен қатар, көрші Жетісай ауданындағы Қоғалы ауылының автомобиль жолының бойында ұзындығы 500 метрден асатын бөгет орнатылып, қауіпсіздікті нығайту жұмыстары жүргізілді.

 

Көмек керуені көңіл тоғайтады

Былтыр әскери қоймада орын алған жарылыстан жапа шеккен Арыс тұрғындарына республиканың барлық өңірі көмек қолын созған болатын. Мақтааралда болған тасқын судан кейін де қазақстандықтар «Қайғыны ел көтереді» деген тәмсілді бетке ұстаған халық екенін көрсетіп, гуманитарлық көмектер жолдауды бастап кетті.

Ауданға ең алғашқы гуманитарлық көмекті 4-мамырда Жамбыл облысы жолдады. Әулиеата өңірі әкімдігінің ұйымдастыруымен Мақтааралға 30 тоннадан аса азық-түлік тиелген керуен келді. Онда 10 тонна ұн, 10 тонна күріш, 5 тонна қант, 1 тонна қарақұмық, 2 тонна сұйық май, 2 тонна макарон өнімдері мен 5 тонна гигиеналық заттар бар. Жалпы құны 10 миллион теңгені құрайтын гуманитарлық көмек демеушілер есебінен жүзеге асқан.

Көп ұзамай Алматы қаласы мәслихатының депутаты Қайрат Құдайберген ауданға 20 тонна азық-түлік жеткізді.

Қызыл судың кесірін көрген ауданға Түркістан облыстық мәслихатының және барлық аудандық, қалалық мәслихаттардың депутаттары 30 тонна азық-түлік жөнелтті. Олардың барлығы Атакент кентінде орналасқан арнайы қоймаға орналастырылды.

Сонымен қатар, «Халық банкінің» «Халық» қоры 50 тонна, «Nur-Otan» партиясы 40 тонна азық-түлік жеткізді. Бұдан бөлек, Бәйдібек, Төлеби, Қазығұрт, Сарыағаш, Шардара, Келес, Отырар, Сайрам аудандары мен Арыс, Түркістан қалаларын азық-түлік жеткізілді. Әр аумақтан жолданған көмек керуенінде азық-түлік 5-10 тонна аралығындағы көлемде болды.

Күнгейдің жүрегі саналатын Мақтааралдағы күрделі жағдайды еңсеру үшін өзге де облыстардан гуманитарлық көмектер келді.

Кешегі жағдай бойынша Түркістан облысы Мақтаарал ауданындағы азық-түлік қоймасына 600 тоннадан астам азық-түлік жиналған.

Олардың ішінде ұн, ет, дәнді-дақыл, көкөніс, консервілік өнімдер, сұйық май, арнайы дайындалған азық-түлік себеттері, киім-кешектер мен гигиеналық заттар бар. Соның бүгінде 150 тоннаға жуығы Мақтаарал ауданындағы 11 эвакуациялық орталыққа жайғастырылған тұрғындарға үлестіріліп берілген. Сондай-ақ, туған- туыстарының үйін уақытша паналап жүрген азаматтарға Атакенттегі №9 және №7 жалпы орта мектептерінен ашылған қоймалардан азық-түліктер жүйеленген тәртіппен таратылуда.

Азық-түліктің ысырапсыз таралуы мен себепсіз үлестіруін болдырмау үшін облыстық орталықтандырылған қоймаға бейнебақылау қондырғылары орнатылған.

 

Балалар бақылауда

Селден болған апатқа қарамастан оқушылардың барлығы білім алуы тиіс. Осыған байланысты уақытша паналау орталығындағы оқушылардың қашықтықтан білім алуларына тиісті жағдайлар жасалған. Олардың «Балапан», «Еларна» телеарналары арқылы оқуларын жалғастыру мақсатында эвакуациялық пункттерге телевизорлар орнатылған. Оқушылар қажетті кеңсе заттары, оқу құралдарымен қамтамасыз етілген. Балалар бос уақыттарында танымдық, спорттық ойындар ойнап, кітап оқумен айналысуда.

 

Құжат рәсімдеуде қиындық

тумайды

6-мамыр күні Мақтаарал ауданындағы тасқын судың зардабынан эвакуацияланған тұрғындарға құжаттарын қалпына келтіріп, көмек көрсету үшін арнайы жасақталған 5 мобильді халыққа қызмет көрсету тобы апат аймағына жіберілді.

Мемлекеттік корпорацияның барлық қажетті құралдармен жабдықталған мобильді халыққа қызмет көрсету тобы аудан бойынша орналасқан эвакуациялау пункттерін кезекпен аралайды. Мамандар қызыл судың зардабын көріп отырған жергілікті тұрғындарға мемлекеттік қызметтер бойынша құқықтық кеңес беріп, құжаттарын қалпына келтіру үшін өтініш қабылдайды. Бұл ретте тұрғындарды құжаттандыру бойынша миграциялық қызмет басқармасымен және басқа да атқарушы органдармен жедел түрде ықпалдасу ұйымдастырылған. Мобильді топ бірінші жұмыс күні 150-ден аса адамға мемлекеттік қызметтер бойынша кеңес беріп үлгерген. Бүгінде эвакуациялау пункттерінде мамандар мақтааралдықтардың жоғалған құжаттарын қайта рәсімдеуге тиісті өтініштер қабылдауда.

Елу жылда – ел жаңа

Мақтааралда орын алған апаттан соң, су астында қалған үйлердің ендігі халі қандай болады? Егіннен нәпақа табамыз деп отырған диқанның еселі еңбегі қалай өтеледі?

Ағымдағы жылдың 6-мамырында облыс әкімі Өмірзақ Шөкеев ауданға келген Үкімет басшысының орынбасары Роман Склярмен бірге тұрғындармен кездесті. Онда су басқан ауылдардың әрбір тұрғынына 100 мың теңге өтемақы төленетіні айтылды. Аймақ басшысы су астында қалған Жеңіс, Жаңатұрмыс, Достық ауылдары Мырзакент елді мекенінің шетінен бой көтеретін жаңа ықшам ауданға көшірілетінін жеткізді. Бұл мақсатта 50 гектар жер белгіленіп, 500 үй салу жұмыстары қолға алынатынын айтты. Жуырда Қазақстан мен Өзбекстан Премьер-Министрлері Асқар Мамин мен Абдулла Арипов Түркістан облысының Мырзакент ауылында бой көтеретін жаңа тұрғын үйлердің іргетасын қалау рәсіміне қатысты. Премьер-Министр Асқар Мамин мемлекет басшысының тапсырмасы бойынша су тасқынынан зардап шеккен Түркістан облысы Мақтаарал ауданының тұрғындары жаңа немесе жөнделген баспанамен толық қамтамасыз етілетінін атап өтті.

Құрылыс жұмыстарына жергілікті тұрғындар тартылады. Оларға жалақы төленеді. Ал су астында қалған тағы Фирдоуси және Өргебас ауылдарының азаматтары үшін билік тарапынан бірнеше ұсыныс беріліп отыр. Атап айтқанда, өзге елді мекеннен жаңа мөлтек аудан соғып, халықты сол жерге көшіру, суға кеткен ауылдағы үйлерін қалпына келтіру, азаматтар бүлінген тұрғын үйлерін өзі салуға ниет білдірсе, оған өтемақы төлеу. Сонымен қатар Үкімет ауыл шаруашылығы тауар өндірушілерінің шығынын төлеп бермек. Ал шаруалардың алған несиесін төлеу уақыты кейінге шегеріліп отыр.

 

Көмектің үлкен-кішісі жоқ

Сарқын судан зардап шеккен тұрғындарға қол ұшын созу мақсатында 3-мамырда «Түркістан» корпоративтік әлеуметтік даму қоры құрылды. Аталған қорға алғашқылардың бірі болып Алматы қаласы мәслихатының депутаты Қайрат Құдайберген 200 млн. теңге қаржы аударды.

Ағымдағы жылдың 8-мамырында Түркістан Өңірлік коммуникациялар қызметі алаңында өткен кезекті брифингте облыс әкімінің орынбасары Сәкен Қалқаманов «қорға отандық кәсіпкерлер мен азаматтардан 160 млн. теңгеге жуық қаржы түсті. Жиналған қаржы Мақтаарал ауданындағы тұрғын үй салу, егін мен мал шығындарын өтеу бағытындағы жұмыстарға бағытталады»,-деді.

Сонымен қатар апаттан кейінгі Мақтааралды қалпына келтіруге Болат Өтемұратов Қоры 6 млн АҚШ долларын (2,5 млрд. теңге) бөліп отыр. Түркістан облысы әкімдігі бұл қаржыға 150 тұрғын үй салынатынын хабарлады. Осы аптада «Нұр Отан» партиясы Төрағасының бірінші орынбасары Бауыржан Байбек Мақтааралға келді. Апаттың ауыр жүгін тартып отырған тұрғындармен тілдескен ол партия атынан Мақтааралда 20 үй соғылатынын айтты. Бұл үшін Тұңғыш Президент қоры мен «Нұр Отан» партиясы құрған «Біргеміз» қорынан 340 млн. теңге бағытталып отыр.

Қайткен күнде де көмектің үлкен-кішісі жоқ.

 

Татулықты сақтағанның ұпайы кемімейді…

Мақтааралдағы бірқатар ауылдардың су астында қалуы күтпеген жағдай болды. Апаттың себебі анық. Өзбекстан Республикасындағы «Сардоба»су қоймасы бөгетінің бұзылуы. Бірақ апат себебі хабарланғанмен оның орын алуына кімнің кінәлі екені туралы кесімді сөз әлі айтылған жоқ. Бірқатар сарапшылар «2010 жылы құрылысы басталып, 2017 жылы пайдалануға берілген «Сардоба» сапасыз салынған» дегенді алға тартады. Бұл туралы кезінде мамандар бірнеше рет дабыл қаққаны туралы ақпараттар да жоқ емес. Бірақ, су қоймасы бөгетінің жарылуы сол ескертуден нақты нәтиже шықпағанын анық көрсетіп тұрған сыңайлы. Осы жағдайларды қаперге алған көп жұрт Мақтааралдағы бүтіндей бес ауылдың су астында қалуына табиғи жағдай емес, адами фактор әсер етуі мүмкін деген болжамға табан тірейді. Сонымен қатар орын алған апат Өзбекстанда болған жағдайдың әсерінен туындаған соң, барлық шығындарды көрші ел көтеруі керек деп есептейтіндер де жоқ емес. Бұған билік те келісетін сыңайлы. Оған себеп апат орын алғашқы күні Қазақстан Өзбекстанға нота жолдайтыны айтылған. Кейіннен еліміздің Сыртқы істер министрлігі бұл мәліметті жоққа шығарды. Ведомства өкілі А. Смадияров мұндай шешім су басу салдарын бірлесіп жою бойынша үкімет пен шекаралас өңір басшыларының тығыз өзара іс-қимылын назарға ала отырып, өзбек тарапына ҚР Сыртқы істер министрлігінің нотасын жолдау мәселесі қарастырылмайтынын алға тартқан.

Осыған орай Өзбекстан Республикасының президенті Ш. Мирзиёевтің тапсырмасымен көрші елден Мақтаарал ауданына 100-ге жуық арнайы техника мен 200-ден астам маман келген.

Көрші елден келген жасақ жайылған суды сору, арналарды бұру, бөгет салу жұмыстарын жүргізуде. Олардың су астында қалып, зақымданған тұрғын үйлердің құрылысына да атсалысатыны да айтылуда. Көмекші топ алдағы уақытта Өзбекстан елінен тағы да жұмыс күші мен құрылыс материалдары келетінін жеткізді.

Бүгінге дейін Өзбекстаннан келетін көмектің көп бөлігін сол елден шыққан ресейлік кәсіпкер Әлішер Усманов көтеріп отыр. Меценат Әлішер Усманов су тасқынынан зардап шеккен Мақтаарал ауданының эвакуацияланған 30 420 тұрғыны үшін «Түркістан» әлеуметтік даму корпоративтік қорына 5 млн 2020 мың АҚШ долларын аударды. Бұл қаражат эвакуацияланған 5202 отбасының жеке шотына түседі.

Көлдей көмек көрсетіп отырған Әлішер Усманов 1953 жылы 9-қыркүйекте Өзбекстанда дүниеге келген. 1990-жылдары Ресей азаматтығын алған. 2020 жылдың 7-сәуіріндегі дерек бойынша, оның байлығы 13,4 млрд долларға бағаланып отыр.

Бұдан, «ағайын-ырысың, көршің -тынысың» екенін, сондықтан да көршіңе кінә тартпай, әліптің артын бағып, татулықты сақтағаннан ұпайымыз кеміп қалмайтынын түсіну қиын емес сияқты.

 

РЕДАКЦИЯДАН:

«Сардоба» бөгетінің жарылуы көрші елге де қатты соққы болды. Онда 10 елді мекен су астына қалып, 70 мың тұрғын көшірілген. Айтпақшы, күні кеше Мақтааралда судан тазартылған ауылдарда мыңға жуық мал өлекселерінің шығарылып, олардың арнайы пеште өртелгені хабарланды. Мал өлекселерінің көпшілігі Өзбекстанға тиесілі. Қазіргі таңда су басқан ауылдарда жағымсыз иіс белең алған. Соған байланысты залалсыздандыру жұмыстары да жүріп жатыр. Ветеринарлар көрші елден сумен бірге келген мал өлекселеріне кезінде қауіпті аурулар бойынша екпе салынған немесе салынбағанынан хабарсыз. Мұның барлығы былайғы жұрт үшін айтуға оңай жәйт болғанмен, ондағы үйі бүлініп, егісі суға көміліп отырған ағайын үшін ауыр тиіп отырған ахуал. Соған қарамастан олар яғни, мақтааралдықтар барынша сабыр сақтап, бастарына түскен қиындыққа мойымай, келер күннен игілік күтіп, артық уайымға салынбай отыр. Ендеше «сабыр түбі – сары алтын» деген сөз салтанат құрсын деп тілейік.

 

Салтанат ИБРАГИМОВА.

 

Түркістан облысы, Мақтаарал ауданындағы су астында  қалған бес ауыл тұрғындары  10 эвакуациялық бекетке жайғастырылғаны белгілі. Қазіргі таңда Мақтаарал мен Жетісай аудандарындағы уақытша паналау орталықтарында 3700-ден астам адам орналасқан.

 Апаттан зардап шеккен азаматтарға қолдау көрсету мақсатында республиканың көптеген өңірлерінен гуманитарлық көмектер жетуде. Қайырымдылық керуенінің ішінде әлеуметтік маңыздағы азық-түліктер мен гигиеналық заттар, киімдер, төсек жиынтықтары және т.б тұрмысқа аса қажетті тауарлар бар. Олардың барлығы Атакенттегі орталық қоймада қабылдануда.

Түркістан облыстық ардагерлер кеңесі төрағасының бірінші орынбасары Кенжехан Төлебаев аталған қоймаға жауапты болып бекітілген. Қолдағы есептерге сүйенсек, қоймада қазіргі таңда 600 тоннадан астам азық-түлік бар. 150-тоннаға жуық ас-ауқат эвакуациялық пункттегі тұрғындарға үлестірілген. Осы жерде қоймадағы өнімдер уақытша паналау орталығына жайғасқан тұрғындармен қатар, үйлері су астында қалғандықтан туыстарының үйін паналап жатқан азаматтарға да берілетінін айта кетейік. Бұл үшін қосымша қоймалар ашылған.

Кенжехан Төлебаев қоймаға жиналған гуманитарлық көмектер екі-үші айға жетуі тиіс екенін айтуда. Осыны алға тарта отырып ол, ендігі кезекте асханаға қажетті ыдыс-аяқ, үй жиһаздары, теледидар мен тоңазытқыштар, газ плитасы  секілді тұрмыстық заттарға қажеттілік туындауы мүмкін екенін айта келе, қайырымдылық жасаушы азаматтар мен компаниялар осы жағын ескерсе деген ұсыныс білдіруде.  Ол тұрмыстық заттар көп ұзамай жаңа үйге көшетін тұрғындар үшін аса қажет болары анық деп есептейді.  Жергілікті билік өкілдері де тұрмыстық техникалар көмек ретінде жеткізілсе, кейіннен ол әрбір үйге бөлініп берілетінін мәлімдейді.

Облыстық ардагерлер кеңесі төрағасының орынбасары орнықты ой айтып отыр. Бұған қайырымдылық жасайтын көптеген азаматтар келісіп, айтқан ұсынысқа құлақ түретініне күмәніміз де жоқ. Тек бір секем алатын жәйт – саудагерлердің сұраныстың көбейгенін байқап, тұрмыстық техникалық заттардың бағасын  әдеттегіден асырып сатуы әбден мүмкін екені болып отыр.

А. САТЫБАЛДЫ.

 

Төлебидегі төтенше жағдайға кім кінәлі?

 

Осы аптада Түркістан облысы, Төлеби ауданында толассыз жауған жауын салдарынан Қасқасу өзені толып, арнасынан асқан. Жағаға қарай аққан су Қасқасу ауылындағы 4 көпірді шайып өткен. Асыға аққан су Екпінді ауылындағы 15 үйдің ауласын басқан. 4 үйге су кірген. Содан соң тасқын су Киелітас ауылдық округі, Сұлтан-Рабат ауылы, Сауран көшесінде және Достық елдімекені Жылқыбаев көшесінде орын тепкен жүздеген үйдің ауласына ентелей енген.

14-мамырға қараған түні Төлеби ауданының әкімі нөсер жауыннан жиналған су ағыны тоқтап, қауіптің беті қайтқанын мәлімдеді. Алайда таңертең ауданда төтенше жағдай жарияланды.

Өзеннен аққан су Төлеби ауданының іргесінде орын тепкен Шымкенттегі Елтай ауылындағы 60-қа жуық үйдің ауласын басты.

Нөсер жауын облыстағы Қазығұрт ауданындағы бірқатар ауыл тұрғындарын да әбігерге түсірді. Толассыз жауын аудандағы 151,0 мың текше метрге лайықталған Көкібел су қоймасын толтырған. Бұл жағдайдан соң Көкібел елді мекеніндегі 27 отбасы уақытша паналау орталығына көшірілген. Сонымен қатар аудандағы Қаржан, Қызылата елді мекендеріндегі бірнеше үйлердің ауласына су кірген. Жігерген ауылындағы 30 үйдің ауласын су басқан.

Жауын шашын Бәйдібек ауданы тұрғындарын да әбігерге түсірді. Қатты жауған жауыннан Тұрақты елді мекеніндегі Тұтарық каналы суға лық толып, 4 жерінен бұзылғандықтан ауылды су басқан. Аудандық төтенше жағдайлар бөлімі қызметкерлері барып, ауылға кірген суды өзен арнасына бұрған. Аудан әкімдігі ауласына су кірген үйлердің санын нақтылауда. Бұдан бөлек Бәйдібекте қырдағы сай-салалардан ағып келген су Боралдай ауылдық округіндегі Қаратас ауылының 6 үйіне, Боралдай ауылындағы Ә.Жұмаділұлы көшесіндегі 6 үйдің ауласын басқан.

Сәрсенбіде жауған толассыз жауын салдарынан Сайрам ауданындағы Ақсукент, Қарасу, Қарабұлақ, Манкент ауылдарындағы бірнеше үйлердің аулаларына су жиналған.

Үйлерін су алған тұрындардың барлығы аудандардағы шұғыл түрде әзірленген эвакуациялық пункттерге жайғастырылған. Әкімдік қызметкерлері аудандық полиция аулаларын су басқан үйлерді күзету жұмыстарын ұйымдастырғанын айтуда.

Сонымен қатар аталған ауылдарда арнайы техника көмегімен аулалардағы суларды айдау жұмыстары жүруде.

Толассыз жауған жаңбырдың салдарынан өзені тасыған Төлеби ауданына облыс әкімі арнайы барды. Ол тасқын судың зардабын тартып отырған ауыл тұрғындарына бүлінген үйлер қалпына келтіріліп, қираған жайлар қайта салынатынын жеткізді. Өз кезегінде Төлеби ауылының бір тұрғыны «мұның барлығына халықтың өзі кінәлі. Арық-атыздарды жауып тастаған. Содан кейін аққан су қайда барады? Оны айтсаң ешкім құлақ аспайды»,- дейді.

Ал облыс басшысы болса, 13-мамырда Төлебиде небары 40 минуттың ішінде төпелеген жаңбыр 1 ай көлеміндегі жауын мөлшерімен тең болғанын айтуда.

 

Шымкентте демографиялық көрсеткіштің өсуіне байланысты бірнеше жылдан бері оқушылар үшін мектептердегі орын санының жетімсіздігі байқалып келеді. Мәселен былтырғы оқу жылында 11-сыныпты аяқтаған оқушылар саны 8000-ды құраса, 25 мыңға жуық өрен мектеп табалдырығын аттаған. Өткен сәуір айында қалалық білім басқармасының басшысы Жанат Тәжиева үш ауысымды мектептер үшін 2020 жылдың қыркүйек айында 7 жаңа білім ордасы пайдалануға берілгелі жатқанын мәлімдеген болатын. Осы бағытта мегаполисте бірқатар құрылыс жұмыстары қолға алынған.

Қазіргі таңда қалада бюджет қаржысы есебінен 7020 орындық 13 мектептің құрылысы жүруде. Оның ішінде 9 нысан биыл пайдалануға беріледі. Келер жылы 7 мектептің құрылысы басталады. Бүгінде ол нысандардың жобалық- сметалық құжаттары әзірленуде. Мектеп тапшылығы мәселесін біржола шешу үшін жан басына қаржыландыру шеңбері аясында инвесторлар «Шымкент ӘКК» АҚ бірлесе 10 мектеп салатын болады. Бүгінгі таңда 5100 орындық 6 мектептің құрылысына келісім шарт түзу жұмыстары жүруде.

Бұл туралы Шымкенттегі ақпараттық-коммуникациялық орталық алаңында қала әкімінің орынбасары Бауыржан Мамыталиев мәлімдеді.

Бұдан бөлек, бүгінде Шымкентте бірқатар білім беру нысандарында күрделі жөндеу жұмыстары жүргізілуде.

Биыл қалада 6 балабақша мен 7 мектептің күрделі жұмыстарын жүргізу үшін бюджеттен қаржы қаралған.

Бұдан бөлек Шымкентте 24 білім ошағы күрделі жөндеу жұмыстарын қажет етуде. Қала әкімі Мұрат Дүйсенбекұлы оның 7-не келер жылы жөндеу жұмыстары жүргізілетінін мәлімдеді.

 

2018 жылы Шымкент облыстан бөлініп, дербес қала атанғаны белгілі. Ал Оңтүстік Қазақстан облысы Түркістан облысы болып қайта құрылып, орталығы Түркістан қаласы болып белгіленген. Міне сол кезде үшінші мегаполиске әкім болып тағайындалған Ғабидолла Әбдірахымов «Шымкент қаласы мен Түркістан облысы арасында әкімшілік шекара бар шығар, бірақ, біз әрқашан біргеміз»,-дегені ел есінде.

Күнгейде орын тепкен екі аймақ әрдайым татулығымен, бірлігімен, бір біріне қамқорлық таныта білуімен дараланып келеді. Және солай болуы керек те. Былтыр Арыста орын алған жарылыс кезінде мыңдаған жұрттың Шымкенттегі эвакуациялық орталыққа орналастырылғаны соның жарқын мысалы.

Осы айда Мақтааралда орын алған тасқын судың зардабын жою кезінде де ауданға алғаш болып көмек қолын созған аймақтың бірі Шымкент болды.

Апат болған алғашқы күні Мақтаарал ауданында авариялық-құтқару жұмыстарын жүргізу үшін Шымкент қаласы төтенше жағдай департаментінің «Өрт сөндіру және авариялық-құтқару жұмыстары қызметі» мемлекеттің мекемесінің жеке құрамынан 20-ға жуық қызметкер мен 10 арнайы техника тез арада көмекке аттанған болатын.

Келесі тәулікте Шымкент қаласынан Мақтаарал ауданындағы су басқан елді мекендерге авариялық-құтқару қызметі үшін 30 арнайы техника жіберілді. Құтқарушылар су басқан ауылдарды аралады. Яғни, олар Жеңіс ауылындағы ірі және ұсақ малдарды құтқару жұмыстарына атсалысты. 200-ден астам үй орналасқан Өргебас ауылында қайықпен тексеру жүргізіп, су астында қалған үйлерінен бағалы заттары мен құжаттарын алуға барған тұрғындарға көмек берді. Ауылды су ағысынан қорғау үшін құм толтырылған қапшықтан бөгеттер тұрғызу жұмыстарына қатысты. Сондай-ақ, су деңгейіне мониторинг жүргізді.

5-мамырда Шымкент қаласының Төтенше жағдайлар департаментінің тарапынан Түркістан облысы Мақтаарал ауданына авариялық-құтқару жұмыстарын жүргізуге 21 жеке құрам мен 10 дана арнайы техникалар жіберілді.

Бұдан бөлек, «Мақтаарал біз біргеміз», «Жүрек жылуы» қайырымдылық шарасы барысында Шымкент қаласы орталық мешітінің ұйымдаструымен 500 отбасыға ыстық тамақ, 2000 дана медициналық бетперде және 8 тонна азық-түлік, бақша өнімдері таратылды. Осы ретте аталмыш өңірге қол ұшын созып, көмек берушілер үшін Шымкент орталық мешітінде қайырымдылық заттарды қабылдау, жинау орталығы ашылғанын айта кетейік.

Өткен жексенбіде тасқын болған ауданға шымкенттік кәсіпкерлер бет алды. Олардың бұл сапары Жеңіс күнімен тұспа тұс келгендіктен кәсіпкерлер Өргебас ауылындағы ақсақалдарды мерекемен құттықтады. Өз кезегінде мегаполис кәсіпкерлері тұрғындарға қаржылай және гуманитарлық көмек көрсетті. Айталық, «Отау Групп» ЖШС президенті Қайрат Молдасейітов Өргебас ауылының тұрғындарын қолдауға 12 миллион теңге бөлді. «Бал Текстиль» ЖШС-нің директоры Талғат Исхақов 6 миллион теңгеге 400 дана кілем жеткізді. «AGF Group» тоқыма фабрикасының басшысы Гаухар Насырова 40 жинақ төсек-орын жинағын сыйласа, «VIZiT» зауытының директоры Вилким Злавдинов 500 мың теңгеге есептелген сусындар жеткізді. Іскер әйелдер кеңесінің төрағасы Алма Архабаева бастаған іскер әйелдер азық-түлік, киім-кешек, гигиена құралдары мен қажетті заттар, соның ішінде балаларға арналған гуманитарлық көмек жөнелтті.

Жоғарыда Шымкент орталық мешітінде қайырымдылық заттарды қабылдау, жинау орталығы ашылғанын айта кеткенбіз. Аптаның екінші күнінде Шымкент қаласының бас имамы Бақдәулет Абдрахманов пен қалалық «Зекет» қоры бастаған бір топ еріктілер Мақтаарал ауданындағы су тасқынынан зардап шеккен тұрғындарға жүк көлігі арқылы орталыққа жиналған гуманитарлық көмекті жөнелтті. Оның ішінде қажетті гигиеналық заттар, киім-кешек, көрпе-төсек, азық-түлік мен қаржылай көмек бар.

Пандемияға ұласқан коронавирустың жаппай таралуын барынша шектеу мақсатында елімізде ағымдағы жылдың 16-наурызынан бастап төтенше жағдай енгізілгені белгілі. Апта басында, дәлірегі 11-мамырда Қазақстанда төтенше жағдай режимі алынғанмен, өңірлерде карантин тәртібі әлі сақталып отыр.

Төтенше жағдай кезінде халықтың тұрмыс жағдайының әлсіреуін алдын алу мақсатында бірқатар қолдаулар көрсетіліп, табысынан айырылған азаматтарға әлеуметтік көмектер тағайындалған. Сонымен қатар өңірлерге дағдарысты алдын алып, экономиканы дамыту мақсатында да қаржы қаралған. Айталық, Шымкент қаласы бойынша жұмыспен қамтудың жол картасы аясында 224 жобаны қаржыландыру мақсатында 45 млрд. теңге қаржы бөлінген. Аталған жобалардың барлығы жүзеге асса, жиыны 8380 жаңа жүмыс орны құрылатын болады. Әзірге 223 жоба бойынша мемлекеттік сатып алу конкурстары жарияланған. Сондай-ақ, 67 жоба аясында 2 141 жұмыс орны ашылып, 532 азамат жұмыспен қамтылған.

Бұл деректерді Шымкенттегі ақпараттық-коммуникациялық орталықта өткен брифингте қала әкімінің орынбасары Ербол Садыр айтып берді.

Сонымен қатар ол, төтенше жағдай кезінде табысынан айырылған азаматтар үшін берілген 42500 теңге әлеуметтік көмек қаладағы 282 745 адамға тағайындалғанын айтты.

Бүгінге дейін Шымкенттегі 17 593 отбасыға 2 млрд 411 млн. теңге көлемінде атаулы әлеуметтік көмек төленген. Атаулы әлеуметтік көмек алған жанұядағы 27 986 мыңға жуық бала ай сайынғы азық-түлік пакетімен қамтылған. Өз кезегінде Ербол Садыр:

– Төтенше жағдай кезінде әлеуметтік топтамаларды алатын азаматтардың қатары ұлғайтылған. Атап айтқанда, 6 жастан 18-ге дейінгі 31 737 балаға 517 млн.теңге, 16 жастағы мүгедек балалар мен барлық жастағы І, ІІ, ІІІ топтағы 34 149 мүмкіндігі шектеулі азаматтарға 189,7 млн теңге қаржы төленген.

Мүгедек бала тәрбиелеп отырған 4 843 ата-анаға 26 млн 900 мың теңге, жұмыспен қамту шараларына тартылған 4 292 адамға 23млн. 800мың теңге қаржы бағытталған,-деді.

Шымкент қаласының әкімі Мұрат Әйтенов төтенше жағдай кезінде арнаулы шараларға қатысқан 100 әскери міндеттіге Алғыс хат табыстады.

Естеріңізге сала кетсек, коронавирусқа байланысты Қазақстан Республикасы аумағы 16-наурыздан бастап 11-мамырға дейін төтенше жағдай режимінде болғаны белгілі.

Бұл коронавирус инфекциясының таралуын болдырмау үшін қабылданған шара болатын. Вирустың таралуын барынша шектеу үшін өңірлерде қауіпсіздік шаралары күшейтіліп, санитарлық өңдеу жұмыстары қарқын алған. Сол кезде мемлекет басшысы Қасым-Жомарт Тоқаев мұндай арнаулы шараларға әскери міндеттілерді тарту туралы Жарлыққа қол қойғаны белгілі.

Соған сәйкес, Шымкент қаласының әкімі Мұрат Әйтеновтың тапсырмасымен 300-ге жуық еріктілердің ішінде әскер қатарына 100 азамат іріктеліп алынды. Іріктеліп алынған сарбаздар 13-сәуірден бастап аумақтық әскерлер қарулы күштеріне қабылданған. Өз кезегінде олар қаладағы 4 ауданға 25-тен бөлініп, 14-мамырға дейін залалсыздандыру жұмыстарының бел ортасында жүрген. Блок-бекеттердегі қауіпсіздік шараларына да қатысқан.

Шымкент қаласының әкімі Мұрат Әйтенов көзге көрінбейтін «жауларды» жоюда аянбай еңбек еткен 100 әскери міндеттіге тұрғындар атынан ризашылығын білдірді.

Мемлекет басшысы Қасым-Жомарт Тоқаевтың тапсырмасына сәйкес, коммуналдық шығындар үшін төленетін 15000 теңге өтемақыны беру ережесіне өзгерістер енгізілді.

 Бұған дейін коммуналдық шығындар үшін 15 мың теңге өтемақы бірінші, екінші, үшінші топ мүгедектері, ҰОС ардагерлері мен оған қатысқандарға теңестірілгендер, көпбалалы және мүгедек балаларды тәрбиелеп отырған отбасы, жалғызбасты, ең төменгі және одан төмен зейнетақы алатын зейнеткерлер санатындағы азаматтарға берілетіні айтылған. Аталған «төтенше» өтемақыны алатындардың тізіміне мемлекеттік немесе қоғамдық міндеттерді, әскери қызметті орындау кезінде, ғарыш кеңістігіне ұшуды дайындау немесе жүзеге асыру кезінде, адам өмірін құтқару кезінде, құқық тәртібін қорғау кезінде қаза тапқан адамдардың отбасылары мен атаулы әлеуметтік көмек алатын азаматтар да енгізілген.

Ережеге сәйкес коммуналдық қызметтер үшін берілетін өтемақыға ілігу үшін түбіртекте көрсетілген дербес шот жоғарыда атап өткен санаттағы азаматтардың атына тіркелуі тиіс болатын. Осы аптада мемлекет басшысы Қасым-Жомарт Тоқаевтың тапсырмасына сәйкес, 15000 теңге өтемақыға ілігу тәртібіне өзгерістер енгізілді. Жаңа өзгеріске сәйкес жоғарыда көрсетілген санаттағы азаматтармен бірге тұратын отбасы мүшелері де коммуналдық шығындар үшін төленетін 15000 теңге өтемақыға өтінім беру мүмкіндігіне ие болды.

Естеріңізге сала кетсек, өткен айда Шымкент қаласы әкімінің орынбасары Нұрсадық Ергешбекұлы алдын ала қалыптасқан жоспарға сәйкес 15 мың теңге өтемақыға қала бойынша 100 мыңнан астам тұрғын қол жеткізуі мүмкін екенін, осы мақсатта коммуналдық қызметтерді көрсететін мекемелерге 3 млрд. теңгеге жуық қаржы бөлу көзделгенін мәлімдеген болатын. Оның айтқан бұл мәліметі қазіргі жағдайдағы көрсеткішпен қабыспайды.

Қолдағы мәліметке сүйенсек, 11-мамырдағы жағдай бойынша Шымкент қаласында коммуналдық шығындарға төленетін 15 мың теңге өтемақы үшін арнайы іске қосылған communal-komek.kz электронды порталына 26 825 өтінім түскен. Ақпарат құралдарында бұл бағытта Шымкент қаласына бюджеттен 1,5 млрд. теңге қаржы бағытталғанын алға тартады.

Жалпы төтенше жағдай кезінде азаматтардың коммуналдық шығындарын жабу үшін Үкімет ел қазынасынан 49 млрд. 342,8 млн. теңге қаржы бөліп отыр. Бұл қаржы сәуір, мамыр айлары бойынша жиынтығы 3 289 522 коммуналдық түбіртектегі 15 мың теңгеге дейінгі коммуналдық шығындарды жабуға бағытталған.

Дүние жүзін дүрліктірген коронавирус әлемдік экономиканың ағзасына да айтарлықтай нұқсан келтіруде. Пандемияның салдарынан өндіріс орындары, фабрикалар, ауылшаруашылығы құрылымдарының жұмысы саябырлады, миллиардтаған шығынға батуда. Бұл әсіресе азық-түлік нарығында анық байқалып отыр.

 БҰҰ-ның азық-түлік және ауыл шаруашылығы ұйымының бас экономисі Максимо Каллен өз мақаласында «Ұзаққа созылған пандемия фермер, ауыл шаруашылық мекемесі, өңдеуші, жеткізуші, сатушы сияқты түрлі салаларды қамтитын азық-түлік тасымалына жылдам қиындық келтіруі мүмкін» деп ескерткен болатын.

Міне бүгінгі таңда соның салдары анық байқалуда. Тұтынушылардың өмір салты өзгерді. Елдер арасында азық-түлік тасымалы бұзылды. Біздің елге де оның салқыны тиді.

Соның бірі, Қазақстанның оңтүстігіндегі аграршылар тап болған өзекті мәселенің бірі – өндірілген бақша, көкөніс өнімдерін оның ішінде қырыққабат өнімін өткізу.

Түркістан облысында 8,0 мың га-ға ерте пісетін қырыққабат егіліп, сәуір-мамыр айларында 300,0 мың тонна өнім жинау жоспарланып, еліміздің ішкі нарықтарына 50,0 мың тонна және Ресей Федерациясына 250,0 мың тонна қырыққабат өнімін сату көзделген.

Бүгінгі таңда 44,5 мың тонна қырыққабат сатылды. Оның ішінде:

—        еліміздің ішкі нарықтарына — 30,1 мың тонна сатылса;

—        Ресей Федерациясына — 14,4 мың тонна экспортталды.

Қазіргі таңда, агроқұрылымдарда шамамен 250,0 мың тонна қырыққабат пісіп дайын тұр.

Алайда әлемдік пандемияға байланысты қырыққабат өніміне сұраныс болмай, бағасы 15-20 теңгеден сатылуда.

1 кг қырыққабат өнімнің өзіндік құны 50 теңге (1 га шығыны орташа 1,75 млн.тг. орташа өнімділік 35 тонна) болып, агроқұрылымдар шығынға ұшырап отыр.

Осы қиындықтардың барлығы онсыз да тұралап отырған шаруалардың маңдай терін төге отырып өндірген өнімдерінің бұзылуына, егіс алқаптарында жарамсызданып қалуына себеп болды.

Былтыр базар нарығында килограмы 200-300 теңгеден сатылып жүрген қырыққабат, бүгінде 15-20 теңгеден өтпей отыр.

Қалыптасқан жағдай ерте көкөніс егумен айналысқан 2600-ге жуық шаруалар мен олардың отбасы мүшелерінің тұрмыс жағдайын қиындатып отыр.

Өз өнімдерін өткізе алмай, қыруар зиян шегіп жатқан Түркістан облысы фермерлерінің жанайқайын ескерген Түркістан облысының әкімі Өмірзақ Естайұлы Шөкеев шұғыл тиісті шаралар қабылдап, отандық ауылшаруашылығы тауар өндірушілерін қолдау тетіктерін қарастыруда.

Облыс әкімі қалыптасқан жағдайдың өте күрделі және уақыт күттірмейтіндігін ескере отырып, мәселелерді шұғыл түрде қарап, тиісті шешімдер қабылдай білді.

Мәселенің күрделілігін ескерген облыс әкімі өзекті мәселені Үкіметтің назарына жеткізіп, тиісті министрліктермен, еліміздің басқа облыс әкімдерімен бірлесіп тиісті шаралар атқаруда.

2020 жылдың 2 мамыр күні ҚР вице-премьері Роман Скляр Түркістан облысының ауыл шаруашылығы тауарларын өндірушілерді қолдау мәселесіне қатысты селекторлық жиын өткізді. Жиын қорытындысы бойынша үкімет резервінен зардап шеккен фермерлерге екінші көктемгі егіс жұмыстары үшін 1,6 млрд теңге несие бөлу туралы шешім қабылданды.

Агроқұрылымдарды қолдау мақсатында бірнеше бағытта жұмыстарды атқару көзделуде.

Біріншіден, шығынға ұшыраған агроқұрылымдарға екінші өнімін егу мақсатында төмендетілген пайызбен несие беру арқылы қаржыландыру.

Екіншіден, еліміздің барлық қалалары мен облыстары тұрақтандыру қорларынан қаржы бөлу арқылы халықтың 1 айға қажетті көлемін екі апта мерзім ішінде сатып алуды ұйымдастыру.

Осы бағытта қырыққабат өнімін өткізу мақсатында 9 облыс, қаламен (Алматы, Шымкент қалалары және Маңғыстау, Батыс Қазақстан, Қостанай, Қызылорда, Қарағанды, Павлодар, Жамбыл) Меморандум жасалып қол қойылды.

Қырыққабат өнімінің негізгі бөлігі Ресей Федерациясына экспортталуы қажет.

Бұл ретте, Түркістан облысы әкімдігімен Экспорттаушы операторларды қолдау мақсатында 140,0 млн. теңге несие қаржы бөлу арқылы 1700 тонна қырыққабат өнімін Ресей Федерациясында ірі сауда желісімен келісім шартқа отырып, тікелей жеткізілетін болады.

Осыған орай, Үкімет тарапынан қырыққабат өнімін Ресей Федерациясына тасымалдау шығындарын субсидиялауды қамтамасыз ету, 250,0 мың тонна қырыққабат өнімін өткізу нүктелерін анықтап, ұйымдастыру жоспарлануда.

Сонымен қатар, «Қазақстан Темір жолы» АҚ-ы арқылы қырыққабат өнімін темір жол арқылы тасымалдау мүмкіндін қарастыру, қырыққабат өнімін тасымалдауға берілетін фитосанитарлық сертификаттармен сенбі, жексенбі күндері де қамтамасыз етуге және Кедендік бекеттерде кедергісіз тасымалдауды ұйымдастыру шаралары атқарылуда.

Сондай-ақ, оңтүстікте өндірілген өнімдерді Қазақстанның басқа да өңірлеріне жеткізудің логистикасын қалыптастыра отырып, Республика көлемінде білім, медицина, әлеуметтік сала мекемелерін, тұрғындардың аз қамтамасыз етілген бөлігін жаңа көкөніспен қамтамасыз ету мүмкіндіктері қарастырылуда.

Облыстар мен ірі қалалардағы ауруханаларға, интернаттарға, балалар мен қарттар үйлеріне, басқа да әлеуметтік мекемелерге көкөністерді сатып алу кезінде мемлекеттік сатып алудың жеңілдетілген шараларын қолдану, Қазақстан Республикасының Қорғаныс және Ішкі істер министрліктеріне қарасты әскери бөлімшелерге, жазаны өтеу мекемелеріне де, осындай тәртіппен ауылшаруашылығы өнімдерін сатып алуға мүмкіндік жасау шаралары атқарылуда.

Осы бағытта облыс әкімі Өмірзақ Естайұлы Шөкеевтің басшылығымен қыруар жұмыстар атқарылуда. Осындай төтенше жағдай кезінде бір ғана облыс әкімдігінің, атқарушы органдардың жұмысына қарап отырмай, баршамыз ел болып қолдау көрсетуіміз қажет.

Тұтастығымызды тағы бір рет дәлелдейтін күн туды.

Біздің бірлігіміз – қазіргі қиындықты еңсерудің кепілі.

Облысымыздың іскер азаматтары, демеушілер, кәсіпкерлер жер жыртып, мал өсіріп еліміздің азық-түлік қауіпсіздігін қамтамасыз етіп отырған шаруаларға осындай қысыл-таяң кезде барынша қолдау көрсетеді деген сенімдемін.

Бүгінгі қасиетті рамазан айында жаны жомарт жандарымыз бақша, көкөніс өнімдерін, соның ішінде қырыққабат өнімін сатып алып, аз қамтылған отбасыларға тегін таратуда.

Түркістан облыстық мәслихатының депутаттары да бұл шарадан тыс қалмай, өз үлестерін қосуда.

Атап айтқанда, облыстық мәслихат депутаты Нұралы Әбішов әріптесіміз 100 тонна қырыққабат өнімін сатып алып, аз қамтылған отбасыларға тегін таратуда. Бұл бағыттағы жұмыстар әлі де жалғасын табатын болады.

«Жау жағадан алғанда, бөрі етектен алады» деп дана халқымыз айтпақшы Өзбекстандағы су қоймасы бөгетінің жарылуы салдарынан Мақтаарал ауданындағы бірнеше елді мекен, егіс алқаптары су астында қалды. Селден 620 үй зақымданған. Зардап шеккен отбасыларға, шаруаларға мемлекет тарапынан тиісті көмек көрсетілетін болады. Жақынына жылуын жинап, көмекке асыққан еліміздің басқа облыстарынан да гуманитарлық көмектер келуде.

Қиындықта қол ұшын беру – игі дәстүр, халқымыздың қанында бар, бойымызға сіңген асыл қасиет.

Ерте ме, кеш пе, коронавирус бәсеңдеп, жүріс-тұрыс пен сауда-саттыққа қойылған шектеу алынады, сөйтіп азық-түлік тасымалының тізбегі бұрынғы қалпына қайта оралады. Мұндай уақытша қиындықтар кезінде сабырлық таныта білуіміз қажет.

Бүкіл халық, қалың ел болып жұмылудың жарқын үлгісін мен біз Арыс қаласын апаттан кейін жедел қалпына келтірген кезде көрсеткен едік. Бірлік барда алынбайтын асу жоқ.

Еліміз бұл қиындықты да еңсеріп, дамудың жаңа кезеңіне аяқ басады деп нық сенемін.

Біз біргеміз!

Қайрат Балабиев,

Түркістан облыстықмәслихатының хатшысы.

Ұлы Жеңістің 75 жылдық мерейтойын Созақ ауданынан майданға аттанған алты мыңнан астам ардагерден бүгінгі күні үш ардагер ғана қарсы алып отыр. Олар Жылысбай Мырзахметов, Тәжі Нұрқожаев, Шәміл Тағаев.

Соғыста қару алып отанын қорғаған ардагерлер, бейбіт өмірде еліміздің өсіп өркендеуі жолында жан аянбай еңбек етті. Бүгінде немере шөберелерінің ортасында абыз ақсақалға айналған ардагерлер мемлекетіміздің амандығын, бейбіт өмірдің мәңгілік болуын тілейді. Аудан  басшысы Салыхан Полатов, ауданымыздағы Ұлы Отан соғысының ардагерлерінің үйінде болып, мерекемен құттықтады. ҚР Президенті Қасым – Жомарт Тоқаевтың, Түркістан облысының әкімі Өмірзақ Шөкеевтің құттықтау хаттарын және көршілес Ресей мемлекеті Владимир Путиннің мерекелік медальін аманат ретінде салтанатты түрде тапсырып,  аудан әкімдігі тарапынан ақшалай сыйлық ұсынды.

Өз кезегінде, соғыс ардагерлері аудан басшылығына қашанда қолдау көрсетіп, көңіл бөліп үнемі назарда ұстайтын басшылыққа ризашылығын білдірді. Әлемді бейбітшілікке үндеп отырған, елімізде тыныштық болсын деген жүрекжарды лебізін білдірді.

Сондай-ақ, Ұлы Жеңістің 75 жылдық мерейтойы қарсаңында 355 тыл ардагерлеріне, 18 Ұлы Отан Соғысының жесірлеріне, 18 Ұлы Отан Соғысының мүгедегіне теңестірілгендер мен Чернобыль апатына қатысқан 6 азаматқа ақшалай сый сияпат берілді.

Мақсат Қарғабай.