Маңызды

Нұрлан Ермекбаев,
ҚР Қорғаныс министрі:

Өткен аптада еліміздің Қорғаныс министрі Нұрлан Ермекбаев Арыстағы
апатты табиғи нәрсеге теңегені былайғы жұрттың ашуын тудырған. «Арыстағы жағдай бойынша халықтан кешірім сұрайсыз ба?» деген журналистің сұрағына ведомство басшысы «ол табиғи нәрсе. Әрбір арсеналдың қауіптері бар. Мен халықтан кешірім сұрайтын себебін көріп тұрғаным жоқ» деп кесіп айтқан болатын.

Оның бұл сөзі былайғы жұрттың ашуын тудырды. Оған қарата жан жақтан сындар айтылды.
Таяуда Нұр-Сұлтан қаласында Арыста орын алған апаттың зардабын жою мақсатында атқарылып жатқан жұмыстарға шолу жасау мақсатында ұйымдастырылған брифингте Нұрлан Ермекбаев бұл тұрғыдағы ойын былай деп құбылтты.
«Ашығын айтсам, арыстықтармен кездесуде халықтан өзім кешірім сұрағанмын. Жапа шеккендер және эвакуацияланғандармен бірнеше рет кездестім. Жапа шеккендерден әрқашан кешірім сұраймын. Алдағы уақытта да камера алдында емес, көзбе-көз болған оқиға үшін кешірім сұрайтын боламын. Бірақ әскери адам популизммен емес, нақты іспен шұғылдануы керек. Болған істі түзетумен айналысу керек».
Осылай деген Нұрлан Ермекбаев «Мынандай жағдайды елестетіп көріңізші, сіз өз жауапкершілігіңізді білесіз. Көшемен келе жатқанда танымайтын бір жас жігіт келеді де, амандық-саулық жоқ, аты-жөніңізді де атамай, сізді экономикаға үлкен шығын келтірді деп айыптайды. Сосын камераға кешірім сұрауды талап етеді. Меніңше, әр адам ондайға әрқалай жауап беретін еді» деп әу-баста Арыстағы жағдайды «табиғи нәрсе» деп айтып «жаңылуын» журналистің төтеннен тап бергендігімен түсіндіргендей болады.

Ә. АЙТЖАРИ.

Аптаның сәрсенбісі экс-шенеунік Эльмира Суханбердива үшін сәтті өткендей. Бұрынғы Білім және ғылым вице-министрі болған ол 6-маусымда пара алды деген күдікпен тергеу изоляторына қамалып, ізінше қызметін асыра пайдаланды, заңсыз кәсіпкерлікпен айналысты деген айыптар бойынша үстінен қылмыстық іс қозғалған.
Тамыздың 2-не дейін қамауға алынған экс-шенеунік осы аптада сот залынан босап шықты.
Бұған дейін Ұлттық бюро экс-вице-министрдің үстінен жемқорлыққа қатысты қылмыстық іс қозғалғандығын мәлімдегенмен, іс сотқа жеткенде «пара алу» дерегі алынып тасталған. Ал қалған айыптар бойынша ол кінәсін толық мойындап, тергеумен процессуалды келісімге келген. Ол түрмеге тоғытылмағанмен 15 күннің ішінде бюджетке 2500 АЕК айыппұл төлейтін болды.
Өз кезегінде ол бизнесмендерге 41 планшет пен 2 «iPhone X» алғызып, оны алдын ала белгіленген жоспар бойынша марапатталатын балаларға үлестірмекші болған екен. Бірақ ол бұл әрекетінен ешқандай сөкеттік сезбеген. Керісінше мұны қайырымдылыққа балаған. Экс-вице-министрге қызмет бабын асыра пайдаланды деген айыптың себебі осы болса, Нұр-Сұлтандағы мектеп директорымен бірігіп, ақылы мектеп ашпақ болған ниеті «заңсыз бизнеспен айналысу» бабымен сотта қаралған. Нәтижесінде Елордадағы Есіл аудандық №2 соты Эльмира Суханбердиеваға 2500 АЕК көлемінде айыппұл салып, өмір бойына мемлекеттік қызметте жұмыс істеу құқығынан айыру туралы үкім кескен. Президент өңіріне таққан наградасынан да айрылған Эльмира Суханбердиева сот залынан босап шыққан соң журналистерге қапаста құр отырмай «Түрме вице-министрдің көзімен» атты кітап жазып, онысын кейбір баспаханалар басып шығаруға сұранып отырғанын сүйіншілей жеткізген.
Ең бастысы ол өзінің кінәлі екенін толық мойындағанмен, Жоғары сотқа апелляциялық шағым түсіруге оқталып отыр. Судан құрғақ шыққан Суханбердиеваның бұл қадамының нәтижесі қалай болары уақыттың еншісінде.

Елбасы өзінің Жолдауында адами капиталды жақсартуға басымдық беретіні белгілі. Ал «Болашаққа бағдар: рухани жаңғыру» атты бағдарламалық мақаласында «Ұлттық салт-дәстүрлеріміз, тіліміз бен музыкамыз, әдебиетіміз, жоралғыларымыз, бір сөзбен айтқанда ұлттық рухымыз бойымызда мәңгі қалуға тиіс.

Абайдың даналығы, Әуезовтың ғұламалығы, Жамбылдың жырлары мен Құрманғазының күйлері, ғасырлар қойнауынан жеткен бабалар үні – бұлар біздің рухани мәдениетіміздің бір парасы ғана» деп адами капиталдың жаңғыруы төл өнеріміздің діңгігінде жатқанын айқындаған болатын.
Соның негізінде өткен жылы Елбасы Нұрсұлтан Назарбаев шілденің бірінші жексенбісін Ұлттық домбыра күні мерекесі деп атау туралы Жарлыққа қол қойған болатын. Мақсат – сан ғасырдың тарихын күмбірлеген үнімен сипаттайтын қазақтың қасиетті домбырасын ұлықтау, ата-бабадан мұра болып келе жатқан асыл өнердің ұрпақтан ұрпаққа сабақтасуын жолға қою болып табылады.
Биыл Ұлттық домбыра күніне орай Қазақстан халқы Ассамблеясының Шымкент филиалының өкілдері қаладағы перинаталдық орталықтарда «Қасиетті Домбыра» акциясын өткізді. Іс-шара аясында ассамблея мүшелері осы айдың алғашқы жексенбісінде яғни, 7-шілдеде жарық дүние есігін бірінші болып ашқан ұл мен қызды дүниеге әкелген аналарға ізгі тілектер төгіліп жазылған хаттар тапсырып, домбыра мен сыйлықтар тарту етті. Тіпті екі ішекті, көп пернелі домбыраның бұрауын келтіріп, баласын бауырына басқан бақытты аналарға күмбірлете күй тартып берді.
Ұйымдастырушылар қазақтың қасиетті қара домбырасын осылай ұлықтау ата-аналардың ұрпақ тәрбиесі кезінде балаларын төл өнерімізге баулуына, сол арқылы ұлттық мәдениетіміздің ұмыт қалмауына зор ықпалын тигізетінін алға тартуда.
Өз кезегінде әйелдер қауымы ел арасындағы ынтымақты ұйыстырып, бірлікті жарастырып жүрген Ассамблея мүшелерінің бұл шаралары олар үшін зор тосын сый болғанын айтып, рахметін жаудырды. Балаларына арналып тарту етілген домбыраны олар «келешекте ұл-қыздарымыз төл өнерімізді төрге шығаратын, өнерлі азамат болатынының белгісі болса керек» деген жақсы ырымға жорыды.

Елбасы Нұрсұлтан Назарбаев өзінің жыл сайынғы халыққа арнаған Жолдауларында елге инвестор тарту өңірлерде тұрақты жұмыс орнын ашудың ең тиімді жолдарының бірі екендігін алға тартып, атқарушы органның осы бағытта ұтымды шараларды қолға алуын тапсырып келгені белгілі. Тұңғыш Президент Ұлт жоспарының 57-қадамында да туристік кластерлер құруда үздік тәжірибесі бар стратегиялық инвесторлар тартуды атап өтеді.
Осы мақсатта Шымкент әкімдігі бірнеше тың бастамаларды қолға алған-тын. Естеріңізде болса былтыр қараша айында Нұр-Сұлтан қаласындағы Орталық коммуникациялар қызметінде өткен брифингте Шымкент қаласының әкімі Ғабидолла Әбдірахымов «Шымкентте Disneyland пен үлкен аквапарк салынады. Менің ойымша, тек Шымкентте ғана осындай үлкен аквапарк салуға болады. Бізде Disneyland-те хоббиттерге арналған үй тәрізді қонақүй болады. Сыртында кішкентай есік, ішінде үлкен ғимарат болады. Бұл балаларға қызық» деп, креативті бастамасымен бөліскен еді.
Осы аптада ол Нұр-Сұлтан қаласындағы Үкімет отырысынан кейін аталған бастама бойынша қандай жұмыстардың атқарылып жатқаны жөнінде өзіне бағытталған сұраққа төмендегідей жауап берді.
– Егер де аквапаркке тоқталсақ, бұл жоба бойынша жұмыстар басталды. Инвесторларды іздестіру кезінде Шымкентке Непалдан миллиардер келді. Ол біздегі осы жобаға қызығушылық танытты. Қазіргі кезде оның компаниясы Дубайдағы аквапарктің жобалаушыларымен келліссөздер жүргізіп жатыр. Олар өздерінің командасымен 13-шілде күні Шымкентке келіп, үш күн бойы жобаны пысықтайды».
Осылай деп жауап берген Ғабидолла Әбдірахымов аквапаркты салатын аумақтың дайын екенін, ол үшін арнайы 100 гектар жердің бөлінгенін және онда тиісті инженерлік жүйелердің тартылғанын мәлімдеді.
Бұдан бөлек Ғабидолла Рахметоллаұлы аквапаркті іске қосуға екі жыл уақыт керек екенін, ал жобаның жалпы құны 100 млн. долларды құрайтынын атап өтті.

«Қазақстандықтардың әл-ауқатының өсуі: табыс пен тұрмыс сапасын арттыру» атты Елбасы Жолдауында «мүмкіндігі шектеулі тұлғаларға арналған «кедергісіз орта» қалыптастыруға зор мән берілуге тиіс» делінген. Осы мақсатта Шымкентте аутизм дертіне шалдыққан балаларды оңалтатын орталық ашылды.
Болат Өтемұратов қорының «Асыл мирас» аутизм орталығының ашылуына Шымкент қаласының әкімі Ғабидолла Әбдірахымов қатысты.
Өз кезегінде ол орталықтағы балаларды дамыту және түйсігін түзетуге арналған құрал жабдықтармен жарақтандырылған бөлмелерді аралап көрді. Одан соң аутизм дертіне шалдыққан балалардың ата-аналарымен тілдесті. Олармен диалог барысында Ғабидолла Әбдірахымов «көптеген ата-ана осындай орталықтың қажеттігін айтқан болатын. Сол өтініштерді негізге ала отырып, оны қаланың орталығынан ашуды дұрыс санадық» деді. Сонымен қатар қала басшысы, аталған орталықтың директоры Марат Айтмағамбетовке дертке шалдыққан балалардың ата-анасына да психологиялық қолдаудың қажеттігін атап өтті.
Жалпы ерекше балаларға арналған мұндай орталық еліміз бойынша жетінші қалада ашылып отыр. 2015 жылдан бері дәл осындай мекемелерде 8 мыңнан астам аутизм балалар оңалтудан өткен. Олардың 2 мыңнан астамы орталықтағы тиімді бағдарламалар бойынша үйретілген тәсілдерді игерген. Және де көрсетілген ем-домдар бойларына дарыған. Бүгінде жеті мыңнан астам аутизм балалар осындай орталықтарға қаралу кезегінде тұр.
Бүгінде Шымкентте 4000-ға жуық балаға аутизм диагнозы қойылған.

Аптаның бейсенбісінде Шымкентке Үкімет басшысы Асқар Мамин жұмыс сапарымен келіп, индустриалды-инновациялық даму бағдарламасы аясында металлургия, фармацевтика, тамақ өнеркәсібі, көлік инфрақұрылымын дамыту салаларындағы қолға алынған инвестициялық жобалармен танысты.
Өз кезегінде қала әкімі Ғабидолла Әбдірахымов Асқар Маминге үшінші мегаполисте көлік инфрақұрылымын дамыту бойынша қолға алынған әуежайдың жаңа терминалының жобасын көрсетті. Жаңа терминалдың құрылысы осы айда басталған. Оның аяқталу мерзімі келер жылдың мамыр айына межеленген. Сыйымдылығы сағатына 400 жолаушыны құрайтын әуежай іске қосылғанда жолаушылар ағымы 10 есеге артады деп күтілуде.
2020 жылы пайдалануға берілетін жаңа әуежайдың әлеуетімен танысқаннан соң Премьер-министр Асқар Ұзақбайұлы «Химфарм» акционерлік қоғамына барып, отандық фармацевтикалық индустрияның даму қарқынымен танысты. Еліміздегі бұл жетекші кәсіпорында дәрі-дәрмектердің 71 түрі өндіріледі. Қазақстандағы кепілдендірілген тегін медициналық көмек көлемінің үштен бір бөлігі дәл осы зауытта шығарылады. Үкімет басшысы аталған өндіріс орнында инъекциялық препараттар мен инфузиялық ерітінділерді өндіру бойынша цехтың жарақтандырылуын көріп, «Модельдік цифрлық фабрикалар» жобасының аясында іске қосылған цифрлық инженерлік және білім беру орталығының жұмысын оң бағалады.
Министрлер кабинетінің басшысы Асқар Ұазқбайұлының аталған кәсіпорынға аялдауы тегін емес. Себебі халықаралық стандарттарға сәйкес жұмыс істеп тұрған бұл зауытта фармацевтикалық өндірістерді жаңғырту бойынша 108 млн АҚШ доллары болатын кең ауқымды инвестициялық жоба жүзеге асырылуда.
Елбасы Нұрсұлтан Назарбаев өзінің «Қазақстанның үшінші жаңғыруы: жаһандық бәсекеге қабілеттілік» атты Жолдауында «басымдығы бар салалардағы бәсекеге қабілетті экспорттық өндірісті дамытуды көздейтін индустрияландыруды жалғастыру керек» дегенді алға тартқан.
Осы бағытта өткен жылы ашылған өнімдері экспортқа бағытталған «Shymkent Temir» ЖШС зауытына да Премьер-министр ат басын бұрды. Аталған зауыттың жобалық қуаттылығы жылына 250 мың тонна болат дайындау болып табылады. Бүгінде ол жерде 500-ге жуық адам жұмыс істейді. Олардың 80 пайызы жергілікті тұрғындар. «Shymkent Temir» ЖШС Қазақстан Республикасын индустриалды-инновациялық дамытудың 2015-2019 жылдардағы екінші сатысына сай ашылған болатын. Жобаға жалпы құны 5,94 млрд теңге инвестиция тартылған.
Одан соң Премьер-министр «Рахат-Шымкент» ЖШС-не барып, тамақ өнімдерінің өндіріс процесін бақылады. Бүгінде заманауи жабдықтармен жарақталған фабрика жылына 24 мың тоннаға дейін 30 аталымдағы 4 түрлі кондитерлік өнім шығарады. Серіктестікте 2020 жылы мармелад пен қантты печенье шығаратын жаңа желіні іске қосу бойынша инвестициялық жоба жүзеге асырылмақ.
Өз кезегінде Асқар Мамин инвестициялық жобалар бойынша ел игілігі үшін жұмыс істеп жатқан өндіріс орындарын аралап болған соң, Ғабидолла Әбдірахымовқа Шымкент қаласын дамытудың 2023 жылға дейінгі кешенді жоспарын тиімді орындауды қамтамасыз ету бойынша барлық қажетті шараларды қабылдауды, инвестициялық жобаларды іске асыру, шығарылатын өнім номенклатурасын кеңейту және өндіріс көлемін ұлғайту бойынша бизнес-қауымдастықпен жұмысты жандандыруды тапсырып, сапарын түйіндеді.

Silkway
халықаралық университетін 3000 түлек бітірді

Таяуда Шымкенттегі Шәмші Қалдаяқов атындағы аллеяда Silkway халықаралық университетін бітіріп, жас маман атанғандарға диплом табыстау рәсімі өтті. Дипломдарын қолдарына алып, еліне еңбек етуге бел буып отырған бітірушілерге оқу орнының президенті Мадияр Юнусов ақжол тілеп, айтулы күндерімен құттықтады. Ол:

– Биыл халықаралық талаптарға сай білім беретін біздің оқу орнымыздан 3000 түлек үлкен өмірге қанат қаққалы отыр. Олардың 80-і қызыл диплом иегері. Бүгін Сіздер төрт жыл бойы оқып, ізденіп, білім алған студенттік жылдарыңызды аяқтап, ортамыздан кеткелі тұрсыздар. Бұл үшін көңілімде сәл-пәл қимастық бар екенін жасырмаймын. Дегенмен де, Сіздердің маман атанып, өздеріңіз таңдаған кәсіптеріңіз бойынша жемісті еңбек етер жылдарыңызға сәттілік тілеймін. Дипломдарыңыз сандық түбінде жатпай, әрдайым еңбек етулеріңізге жарай берсін дегім келеді. Жемісін көріп, жетістікке жетіңіздер. Баршаларыңызға сәттілік тілеймін,-деді.
Одан соң ол оқу орнының шәкірттеріне салтанатты жағдайда диплом табыстады. Көптеген қатарластарынан озат оқитындығымен көзге түскен Әсел Мадиярова оқу орны басшылығының студенттерді дәл осындай құрмет, қошеметпен шығарып салғанына зор алғысын білдірді. Қызыл диплом иегері атанған Әсел «Осыдан төрт жыл бұрын дәл осы оқу орнында оқуға құжат тапсырғаныма бір сәт болса да өкінбегенмін. Себебі мұнда «оқимын», «үйренемін» деген жас үшін барлық жағдай жасалған. Көз аямызды кеңейтіп, санамызға сәуле шаша білген ұстаздарымның орны мен үшін әрдайым бөлек. Менің университетті үздік бітіруіме осы ұстаздарымның еңбегі орасан зор» деп ағынан жарылды.
Қазақта «бесіктен бейітке дейін білім үйрен» деген. Осы қағиданы қаперіне алғандардың қатарынан табылған Абзал Дүйсенбиев те дәл сол күні дефектология мамандығы бойынша магистр дипломын алды. 58 жастағы білікті маман осыдан екі жыл бұрын аталған оқу орнында өз мамандығы яғни, дефектология бойынша магистратура түлектері дайындалатынын біле сала, көп ойланбастан құжат тапсырғанын, енді бүгін диплом алып жатқанын қуана жеткізді. Ол білім алудың ерте кеші жоқ екенін айтып, барлық түлектердің алдағы өміріне сәттілік тіледі.
Салтанатты шараға құрметті қонақ ретінде шақыртылған Шымкент қаласының Отбасы, балалар және жастар істері жөніндегі басқарма басшысы Жандос Қалтаев, Түркістан облысының Білім сапасын бақылау департаментінің басшысы Жанат Тәжиева, «EL TIREGI» Қазақстандық шағын және орта бизнес қауымдастығы басқармасының төрағасы Аскар Абубакиров, Б.Момышұлы атындағы оқу орталығының басшысы Талғат Мендыбаевтар да түлектерді қуанышты күндерімен құттықтады. Алдағы өмірлеріне тек ақжол тілеп, ізгі лебіздерін арнады. Ұл-қыздарының диплом алғандарына қуанған ата-аналар да университеттің оқытушы-профессорлар құрамына зор алғыстарын айтып, оларға разы екендіктерін жеткізді.
Кеш соңы еліміздің эстрада жұлдызы Ғазизхан Шекербековтың концерттік бағдарламасымен ұласты.
Бүгінде 27 жылдық тарихы бар Silkway халықаралық университеті түрлі пәндердің болашақ мұғалімдерімен қатар, бухгалтерлік есеп және аудит, экономика және қаржы, құқық, ақпараттық технологиялар және бағдарламалау, компьютерлік және ақпараттық жүйе салалары бойынша мамандар даярлайды. Ал магистранттар мен докторанттарды педагогикалық, өнер және гуманитарлық ғылымдар, бизнес, басқару ісі және құқық бойынша оқытып шығарады.

«Төрт мыңнан астам
жеке тұрғын үй пайдалануға қабылданды»

Қаншама жылдан бері Шымкент территориясына топографиялық түсірілім жасау мәселесі күн тәртібінен түспей келген.

Бүгінге дейін тиісті мамандардың қолдағы бар картасы 1986 жылдары жасалған құжат болған. Ол картаның өзінде қаланың 8500 га аумағы ғана қамтылған. Содан бері қанша жыл өтті. Қала жыл санап емес, күн санап құлашын кеңге жайды. Қазіргі таңда алдымызға қойған ең негізгі мақсат үшінші мегаполистегі 117 мың гектар аумақта 1:500 масштабтағы топографиялық зерттеуді қамтамасыз ету. Осы мақсатта 2017 жылы сметалық құжаттар әзірленген. Биыл оны жүзеге асыру үшін жергілікті бюджеттен 500 млн теңге бөлініп, нәтижесінде қаланың игерілген 49500 гектар территориясының топографиялық картасы дайындалған. Жұмыс алдағы уақытта да жалғасын табады.
Құрылыс саласы бойынша белгіленген тәртіппен бекітілген Шымкенттің бас жоспарын іске асыру жөніндегі қызметтерді үйлестіретін сәулет және қала құрылысы басқармасының басшысы Жеңіс Байымбетов алты айда атқарған жұмыстарын қорытындылау мақсатында өткізілген баспасөз брифингінде осылай деді.
Сонымен қатар ол, есепті кезеңде басқарма тарапынан жеке және заңды тұлғаларға барлығы 19 мыңнан астам мемлекеттік қызмет түрі көрсетілгенін, олардың басым көпшілігі жылжымайтын мүлік нысандарының мекен жайын айқындау бойынша анықтама беру (18165) болғанын алға тартты.
Бұдан бөлек ол, басқарма мамандарының тікелей араласуымен Шымкенттегі төрт ауданда рұқсатсыз орналасқан 265 жарнамалық қалқанның орнынан алынғанын хабарлады. Және де заңсыз немесе заңның кейбір талаптары сақталмаған құрылыстар бойынша мониторинг жүргізіліп, анықталған 104 нысан бойынша материалдар құзырлы мекеме қарауына жолданғанын жеткізді.
Басқарма басшысы Жеңіс Байымбетов ағымдағы жылдың алты айында құрылысы аяқталған 4282 жеке тұрғын үй, 315 коммерциялық нысан, 21 мемлекеттік нысандар бойынша қабылдау актілері түзілгенін мәлімдеді. Қаланың ажарын ашып, сәулетін арттыру бойынша көптеген нысандардың эскиздік жобалары әзірленгенін жеткізді. Атап айтқанда, қаладағы көшелердің қасбеттерін абаттандыру, ескі аялдамаларды жаңарту, Қошқар-ата өзенінің аумағын (30м) ретке келтіру, Қабанбай батыр көшесі бойындағы көп қабатты тұрғын үйлердің қасбеттерін қалпына келтіру, ескі қалашық аумағын қайта құрылымдау және абаттандыру, ескі қала аумағындағы тозығы жеткен 29 га аз қабатты үйлердің орнын көп қабатты жаңа тұрғын үйге айналдыру, темір жол вокзалының алдындағы дүңгіршіктерді орнында қалдыру, әуежайды қайта құрылымдау мен «Шымкент-Сити» қалашығында 420 га аумаққа 9-12 қабатты тұрғын үйлер, әлеуметтік нысандар және 47 га аумақты алатын саябақ бойынша эскиздік жобалар ұсынылған.
Жиында басқарма басшысы «Электронды архитектура» жүйесі бойынша мекемедегі мемлекеттік қызмет түрлерін цифрландыру бағытында да оң көрсеткіштер бар екенін тілге тиек етті.

Елбасының Жолдауында айтылған «Сот жүйесін одан әрі жаңғырту» тапсырмасын жүзеге асыру мақсатында халықтың еш кедергісіз қызмет алуы үшін «Ақылды сот» жобасын жүзеге асыру шеңберінде аудандық сот ғимаратында жаңа фронт-кеңсенің салтанатты ашылу рәсімі өтті. Аталған игі шараға Түркістан облыстық сотының азаматтық істер жөніндегі сот алқасының төрағасы Т. Бекімбетов, аудандық соттың төрағасы Н. Шетенов, аудандық соттың судьясы
Б. Сағынтаев, аудан прокуроры

А. Досаев, аудан әкімінің орынбасары А.Сатыбалды және басқа да мекеме басшылары және жергілікті БАҚ өкілдері қатысты. Жаңа фронт-кеңсенің лентасын Түгел Бекімбетов пен Ақәділ Болатұлы қиып, құттықтау лебіздерін білдірді. Аудандық соттың төрағасы Н.Шетенов фронт-кеңсенің жай-күйімен жиынға қатысушы қонақтарды толықтай таныстырып шықты.
Фронт-офис халыққа қызмет көрсетудің заманауи стандарттары ескеріле отырып жабдықталған аудандық сот ғимаратында жайғастырылған. Мұнда ақпараттық орталық, құжаттарды тапсыру және қабылдау кеңселері, өзін-өзі қызмет көрсету аймақтары бар. Кеңсе азаматтардың сот төрелігіне қолжетімділікті оңтайландырып, «бір терезе» қағидаты негізінде сапалы қызмет түрлерін алуға мүмкіндік береді. Халыққа қызмет көрсетудің заманауи стандарттары азаматтарға қызмет көрсетудің тосқауылсыз қағидатына көше отырып, фронт-кеңсе жайлы жиһазбен, ұйымдық техникамен, сот отырыстарының кестесі және талап арыздары және басқа да арыздардың үлгілері ілінген стендтермен жабдықталған. Мұнда ақпараттық орталық, өзіне-өзі қызмет көрсету аймағы, күту залы, медиатордың кабинеті орналасқан.
Фронт-кеңсе «бір терезе» қағидаты бойынша азаматтарға сапалы қызмет көрсетіп қана қоймай, тұрғындардың сотқа қолжетімділігін барынша жеңілдетеді.

Мақсат Қарғабай.

Шымкент қаласы, Еңбекші ауданының екі тұрғыны Әсия Ахметова мен Ақмарал Өтегенова «Чекті талап ет – жүлдені ұтып ал!» акциясының жүлдегері атанды. Аталған акция аясында олар дүкендерде сауда-саттық жасағанда немесе қандай да бір қызмет түрлері үшін төлемақы жасаған кезде сатушылардан бақылау-касса машинасының чегін талап еткен.
Көлеңкелі экономиканың кең өріс алуына осылай кедергі келтіру арқылы олар ортақ қазынаға түсетін салық көлемінің артуына өзіндік үлес қосқан. Халықтық бақылауды жолға қою мақсатында ұйымдастырылған осы акцияда белсенділік танытып, жүлдегер атанған сол тұрғындарды Шымкент қаласы бойынша мемлекеттік кірістер департаментінің басшысы Нұралхан Көшеров қабылдап, iPhone смартфонының жетінші моделін сыйға тартты. Ол қоғамдық сананы жаңғырту мақсатында ұйымдастырылған акцияда белсенділік танытқаны үшін оларға алғысын білдіріп, алдағы күндеріне сәттілік тіледі.
Естеріңзге сала кетсек, ағымдағы жылдың 1-мамырынан бастап елімізде «Чекті талап ет – жүлдені ұтып ал!» республикалық акциясы басталған болатын. 2019 жылдың 1-тамызына дейін жалғасатын бұл акция кезінде Қазақстанның әрбір тұрғыны кез келген затты сатып алғанда немесе ақылы қызмет түрлерін қолданғанда смартфон ұтып алу мүмкіндігіне ие болады. Ол үшін тауарлар, жұмыстар және қызмет түрлері үшін төлемақы жасалған сомаларға берілетін чектерді талап ету қажет. Содан соң телефоныңызға «Таңдау» мобилді қосымшасын жүктеп алып, ондағы жолдарға чектердегі кейбір деректерді енгізу қажет. Аталған акцияға тек деректерді тіркеу және беру қызметі бар бақылау-кассалық машиналардың фискальді чектері (онлайн БКМ) қатысады.
Тұңғыш Президент Нұрсұлтан Назарбаев 2018 жылдың 5-қазанында халыққа арнаған «Қазақстандықтардың әл-ауқатының өсуі: табыс пен тұрмыс сапасын арттыру» атты Жолдауында «Үкімет үш жыл ішінде экономикадағы көлеңкелі айналымды кем дегенде 40 пайызға қысқарту үшін нақты шаралар қабылдауға тиіс» деп тапсырма берген. «Чекті талап ет – жүлдені ұтып ал!» атты республикалық кең ауқымды акциясы сол бағытта қолға алынған шаралардың бір парасы болып табылатыны сөзсіз.