Маңызды

ҚР ЖОҒАРҒЫ СОТЫНЫҢ ТӨРАҒАСЫ Ж. АСАНОВТЫҢ ҚАПЕРІНЕ!

Облыстық соттың төрағасы Талғат Баратбеков кейбір судьялардың сыбайлас жемқорлық істеріне неге көз жұма қарайды?

«С-информ» газетіндегі «ЕТ САСЫСА ТҮЗ СЕБЕСІҢ, ТҰЗ САСЫСА НЕ СЕБЕСІҢ? немесе Түркістан облыстық сотының төрағасы Талғат Баратбековтің өзі коррупционер ме?» атты мақаласын оқи отырып санамызға осындай сауал сап ете қалды. Материалда төмендегідей деректер негіз етіп алынған.

Осыдан бірер жыл бұрын, дәлірегі 2016 жылдың қоңыр күзінде облыстық соттың судьясы Мұхтар Парменов құзырлы орган тарапынан тергеп, тексерілген бір іс бойынша екі шешім шығарған. «Бір іс бойынша қатарынан екі бірдей сот актісін шығару заң талаптарына қайшы» дейді мақала авторы Амангелді Батырбеков.
Бұдан бөлек облыстық соттың апелляциялық алқасындағы Нұрмахан Жұматаев, Айман Құлшықова, Альбина Чокморова есімді судьялары жауапкер әйелдің заңсыз сенімхатпен қатарынан төрт сот отырысына қатысқанын, соған қарамастан ол сот отырыстарының барлығы заңды күшін жоймаған. Тіпті келесі сот отырысы кезінде судья әлгі жауапкер әйелдің датасы мен шығыс нөмірі көрсетілмеген сенімхатын іс материалдарына заңды құжат ретінде тіркеп, орын алған дау бойынша сол тараптың пайдасына шешім шығарып берген.
Қоғам белсендісі Амангелді Батырбеков өзі куә болған осы жәйттерге байланысты дәлел-дәйектерін алып, Түркістан облыстық сотының төрағасы Талғат Баратбековтың қабылдауында болған. Алайда одан ешқандай нәтиже болмаған. Облыстық соттың төрағалығын тізгіндегеніне екі жылдан сәл асқан Талғат Баратбеков мырза А. Батырбековтың базынасын тыңдап, бас шайқағаннан басқа әріге бармаған.
Амангелді Батырбековтың базынасына төраға Талғат Баратбековтың басын шайқауы, ондағы деректердің шындықтың ауылынан алыс еместігін аңғартпай ма? Ал егер жоғарыда «аттары аталып, түстері түстелген»
судьялардың шығарған шешімдері заң
аясында қабылданған болса, оны тәптіштеп түсіндіріп беретіні анық еді ғой. Қалай болғанда да төраға Талғат Баратбековтың жарық көргеніне жарты айдан асқан мақала бойынша ләм-мим деп уәж айтпауы әлігі судьялардың даулы істер бойынша шешім шығаруы кезінде кілтипанның көрініс табуына жол бергендігі туралы күмәнді қоюлата түсіп отыр.

Қ. ҚАЛИЕВ.

Кіндік қаның тамып, кір жуған жеріңнің
құлпырып, уақыт өткен сайын заман легіне
сай алға жылжып, дами түскенін кім құп
көрмейді десеңші.

Ен байлыққа толы Қазақстан жерінің кез келген ауыл аймағы өркениеттің көшінен қалмай, ілгерілей түсуіне әбден лайықты. Бұл жолда жоба-жоспардың болуы аздық етеді. Оны орнымен орындауда, қолынан іс келетін азаматтың болуы маңызды. Яғни, туған өлкенің түлей түсуі көп жағдайда сол жердің әкіміне тікелей байланысты. Қазақта «басшысын таппаған ел азады» деген сөз бар. Расымен өлкені өрге бастырады деген басшың іскерлік қасиеттен ада болса, ондағы халықтың да ахуалы әп-сәтте алаңдарлық жағдайға түсері анық қой. Сондықтан да ынтымағы ұйысқан, бірлігі жарасқан жерде ауылдағы ағайынға сөзін жүргізе алатын, айтары бар азаматтары мен ақсақалдары туған жерлеріне тағайындалған әкімдердің әр қадамына баға беріп, қажет болса кеңесін айтып, жөн сілтеп жүруді жөн көреді. Себебі «жалғыздың үні шықпайтынын» ол кісілер жақсы түсінеді. «Көп түкірсе – көл» болатынын анық біледі.
Кезінде Мырғалымсай, Ащысайымен атағы алысқа жеткен, қайнаған еңбектің ордасы болған Кентау қаласының халқы да әкімнің әр жұмысына баға беріп, пікір білдіруді сол арқылы болған іске ризалық айтып, толмаған тірлікке базынасын жеткізе жүруді азаматтық міндеті деп санайды.
Мәселен, осы жылдың сәуір айында қаламыздың әкімі жаңарғаны баршаға аян. Кентау жұрты жаңадан келген кадрдың Кентау жерінің тумасы екенін біліп, бірден іші жылы тартқанын жасырмаймыз. «Жас келсе іске» демекші, Кентау қаласының әкімі болған Дәурен Мақажанов нағыз жұмыс істейтін дер шағындағы жаста екен. Түркістан облысының әкімі Өмірзақ Шөкеевтің Кентау қаласын басқаруда бұл кадрға таңдау жасауы жай қабылдана салған шешім емес, әбден електен өтіп, екшелген қадам болғанына көңіліміз сенді. «Өз балаң өзекке тепсе де кетпейді» демекші, ешкімге де, ешжерге де алаңдамай туған жерді түлету үшін бұл азамат білегін сыбанып, барын салып еңбек етер деп зор үміт арттық. Тағайындалғанына үш айдан енді асқан әкімнің сол үмітті ақтарына біз зор сенімдеміз. Көңілімде сондай сенімнің орнауына Дәурен мырза сөзбен емес, нақты іспен ықпал ете алды. Жуырда өзім
бетпе-бет келген мына жағдай осындай ойларымды ортаға салуыма арқау болды.
Әдеттегі жұмыс күні болатын. Жазғы демалыс болғандықтан қазір балабақшамызда жұмысына асығып-аптыққан ата-аналардың сапырылысы жоқ. Байыпты жұмыстар жүріп жатқан кәдуілгі күннің бірінде бақшамызға Кентаудың әкімі болғанына көп бола қоймаған Дәурен Мақажанов сау етіп кіріп келмесі бар ма?
Жөпелдемеде не дерімізді білмей қалдық. Әдетте әкімдер қандай да бір мекемелерге баратын болса, бұл жоспарын біраз уақыт алдын қарамағындағыларға хабарлап, сауын айтатыны жасырын емес қой. Одан соң онысын қол астындағылары сол мекемедегілерге жеткізіп, ол жақ әбігерге түсіп, дайындалып, «жақсы жақтарын асырып, кемшіліктерін жасырып» жататыны құпия емес шығар. Қаламыздың әкімі мұндай «дайындықты» суқаны сүймейтіндердің қатарынан екенін көрсетіп, жанына ешкімді де ертпей, жалғыз-жарым мекемелер мен нысандарды аралауға кіріскен екен.
Біз алғашында әлденені бүлдіргіндей бәйек болып қалдық. Бірақ «бүлінген дәнеңе жоқ», артық кетіп, кем соққан тұсымыз жоқ, неге тыпырлаймыз?» деп, бірден бойымды жиып, оған бақшаны аралатып, таныстырдым. Балаларға жасалған жағдайларды, ол үшін алынған жабдықтарды көрсеттім. «Ауру астан» екені әлімсақтан белгілі ғой. Осыған назар салған Дәурен Мақажанов асханадағы жағдайды көзбен көріп, ондағы тағамдардың құнарлы болуын, санитарлық талаптардың әрдайым сақталуын назардан шығармауды шегелеп тапсырды. Сонымен қатар ол, кабинетте отырып, қызметкерлердің айтқан ақпары мен берген есебімен қаланың жай-күйімен танысу аздық ететінін, мұндағы тіршілікті боямасыз көру үшін жанына ешкімді ала жүрмей, осылай жалғыз өзі «жорыққа» шыққанын айтып ұжымды бір күлдіртіп алды.
Жас болса да өмір мектебінде талай жауапкершілігі зор жұмыстарды атқарған оның бұл ісі «Ақылды адам жай-жай келеді, жан-жағын байқай келеді» дегенді еске түсірді.
Сөз басында «басшысын таппаған ел азады» деген сөзді айта өттік. Егер әкімдеріміз осылай халықтан қашпай, керісінше көптің ортасынан табылып, қолынан келер ісін аямаса жұрт мұндай қасіреттен ада болары анық. Бойында осындай қасиеттің барын анық байқатқан Дәурендей азаматтың алдағы жұмысына тек сәттілік тілейміз.

Ербол ҚАРНАҚБАЕВ,
«Армантай» балабақшасының
құрылтайшысы.

Қазақстанда ағымдағы жылдың алты айында сотталғандардың саны 13 622-ні құраған. Бірақ олардың төрттен бір бөлігіне ғана дәлірегі 3 289-на сот бас бостандығынан айыру туралы үкім кескен. Қылмыстық заңнаманы гуманизациялау елдегі криминогендік ахуалды нашарлатпаған. Есепті кезеңде қылмыс деңгейінің 12 пайызға төмендеуі соған дәлел.
Бұл туралы Бас прокуратураның баспасөз қызметі мәлімдеді.
Сонымен қатар, Бас прокуратураның баспасөз қызметі жыл басынан бері қадағалаушы органның көмегімен 2 800 жұмыскердің құқықтары қорғалғанын мәлімдеген. Нәтижесінде жұмыс берушілер оларға 800 миллион теңге көлеміндегі берешектерін толық төлеген. Монополист компаниялардың да жұмыстарына сүзгі жүргізіліп, жарық және жылу тарифтері төмендетіліп, тұтынушылардың 30 миллиард теңге қаражатының орны толтырылған.
Күрек тимеген 11 мың жер телімі мемлекетке қайтарылған. Прокурорлардың ықпалымен 50-ден астам азаматтың негізсіз қудалауға ұшырауына тойтарыс берілген. Заңсыз құрықта болған 400-ден астам азамат қызметтік жайлар мен тергеу изоляторынан босатылып, бостандыққа жіберілген.

Бүгінгі әңгімеміздің арқауы Отырардың төл перзенті, Алматы
қаласының тұрғыны көңілі ашық, көкірегі ояу, зиялы құрдас
Құрманхан Әбілқасымұлы НҰРЫМБЕТОВ.

Сонау, 1978 жылы КазГУ-дың табалдырығын бірге аттағанда журналистика факультетіне қарасты №5-ші жатақханасының 213-ші бөлмесінен бір табылдық. Арамыздағы ересегіміз Құрманхан. Одан өзге аты оқырмандарға етене таныс сатирик ақын Мұратбек Дүйсенбеков, жазушы — суретші Сейсенхан Маханбетов, журналист Талғар Сейталиев және мен Орманов Талғат бес жыл бірге өмір сүрдік. Мұратбек пен Талғардың өмірден бақи озғаны болмаса, қалғаны баз-баяғыша…
Бүгін асқаралы алпыстың асқарына шыққан Құрекеңнен көп нарсе үйрендік. Ол өмірдің бітіспес майдан екенін бізге ертерек сездіріп, тезірек ес жиғызды. Оның басты принципі: Ешуақытта біреуге өз кінәңді артпа, біреуге сенбе, алға қойған мақсатыңа өзің талпын да ұмтыл, бар қажыр-қайрат жігеріңді соған сал да арманыңа жет!
Ол жалынды журналист те, қырағы милиция, бүгінгі сергек полиция да бола білді. Оның жеткен лауазымдары кейіңгі толқын армандайтын, өз өмірлеріне үлгі-өнеге алатын, тәлім-тәрбие көретін үлкен мектеп.
Күні кеше, журналист-жазушы, «Қазақстанның Құрметті журналисі» Қайырғали Медеттің зейнеткерлікке шыққан тойын тойладық. Алматыдан Алтынбай мен Катя, Құрманхан мен Үрзада бастап, Нұр-Сұлтаннан Қанапия мен Фарида, Қарағандыдан Рымбек пен Руслан қостап, Оңтүстік өңірдегі Базаркүл Қалбырова, Серікқали Жексенбай, Нұрлан Кенжеғұлов сынды марқасқа журналистер-курстастар ортаның шырайын кіргізді. Енді міне, кезек алпыстың асқарына шыққан Құрекеңде. Өйткені, бәріміз Алматыдағы мерей тойына шақырту алдық…
Журналистика сынды нәзік кәсіпті де, полиция сынды қаталдау мамандықтың үдебарасынан соны соқпақ тауып, мемлекеттік наградалар мен марапатқа ие болған полиция полковнигінің құдай қосқан қосағына, сыныптас-курстас қыздарға, сондай-ақ алып ұшқан өз көңілі жайлы жазған өлеңдерін оқырмандардың назарына ұсына отырып, Құрекеңнің бітім-болмысы тұнып тұрған лирика екенін тағы да бір паш етсек, артық болмас, ағайын!

Талғат ОРМАНОВ,
ақын-сазгер, «Бас редакторлар Клубы» ҚБ-нің төрағасы,
Бәйдібек ауданының
Құрметті азаматы.

Іңкәр көңіл Үркентайыма арнадым

Кірпігіңнің әр талы,
Жүрекке жүк артады.
Мойыл қара көздерің,
Тұңғиыққа тартады.

Қиғаш қара қасың да,
Найзағай ма, жасын ба?
Аппақ әсем тістерің.
Маржан тас па, асыл ма?
Күлімдеген күндейсің,
Үлбіреген гүлдейсің.
Менің ғашық жанымды,
Білмейсің-ау, білмейсің.

Айдын шалқар көлдейсің,
От-сезімді тербейсің.
Менің іңкәр көңіліме,
Неге ғана сенбейсің?!

Өзім туралы

Ақ қағазға сырымды айтып сиямен,
Қиыстырып қиялымды қиямен.
Ой түбінде күні-түні тұншығам
Жынды болып кетпес пе екем сірә мен.

Қиял шіркін көкке мені сүйрейді,
Іңкәр көңіл сезімімді билейді,
Айта алмаған мұңдарым кеп кей-кейде
Жүрегімді аямастан түйрейді.

Өң мен түстің ортасында жүргенім,
Кімге керек мұнайғаным, күлгенім?
Толғанысым, тербелісім, келбетім
Ирек салым ақ қағазда жүр менің…

Сыныптастар мен курстас қыздарға наз

Сыры кетіп, сыны кетпей қалғандар,
Махаббатты аялаңдар, қорғаңдар.
Қыз қылығы қалып қойған бойында,
«Әжелер-ау» сендерде не арман бар?!.

«Әже» десе, кемпірмін деп қалмаңдар,
Немереңді «анаңмын» деп алдаңдар.
Жас күніңді ұмыта алмай қайғырып,
Ғашық болып, жүрген әлі шалдар бар.
Қас пен көзге бояу жағып қойғандар,
Әжім түссе опалаңдар, майлаңдар.
Тек сендерге жарасады сұлулық,
Сұлу етіп жаратқан ғой Пайғамбар…

Махаббатын таппай мұңлы болғандар,
Ғашық жүрек от боп лаулап жанғандар.
Аяқ асты Бекежанға тап болып,
Ойда жоқта, келін болып қалған бар.

Шаңырақта шуақ шашып, таң күліп,
Махаббатты шырқаңдаршы ән қылып,
Жүрекке әжім түспейді екен ешқашан,
Әдемі боп қалыңдаршы мәңгілік…

Құрманхан НҰРЫМБЕТОВ.

Осыдан төрт-бес жыл бұрын Шымкенттегі ең өзекті мәселелердің бірі жарықтың жетімсіздігі болатын. Тұрғындар күйбең тірлігінің құтын қашырған осы жәйт бойынша билікке талай рет бұйымтай айтқан.
Сол кезде жергілікті билік мәселеге нүкте қою үшін «Бозарық» шағынауданынан жаңа қосалқы станция салуды күн тәртібіне енгізген. Арада бірнеше уақыт өткеннен соң сол жерге салынған қосалқы станциясының арқасында бүгінде Шымкенттегі бірнеше шағын аудандарды сапалы электр энергиясымен қамтамасыз ету жұмыстары қызу қолға алынуда.
Шымкент қаласының энергетика және коммуналдық шаруашылық басқармасы таратқан деректерге сүйенсек, аталған қосалқы станция арқылы бүгінде «Құрсай» шағынауданындағы 1 816 тұтынушыны, «Тоғыс» тұрғын алабындағы 990 тұтынушыны сапалы электр эергиясымен қамту жұмыстары атқарылған.
Электр жүйелерін тарту «Бадам», «Самал-3», «Асар-2», «Тассай», «Достық», «Ақжар», «Қарабастау», «Бадам-1», «Қаратөбе», «Жыланбұзған», «Шапырашты», «Өтеміс» сынды шағынаудандар, тұрғын үй алаптары мен елді мекендерде жалғасын табатын болады.
Сала мамандары «Бозарық» шағынауданынан жаңадан салынған қосалқы станциясы 2 миллионға дейінгі тұтынушыны сапалы электрмен қамтуға қауқарлы екенін алға тартуда.
Тұтынушыларға электр желісін тарту жұмыстары «Қуат Құрылыс», «Омега Строй» жауапкершілігі шектеулі серіктестері және «Электромонтаж» акционерлік қоғамы сынды мердігер мекемелеріне сеніп тапсырылған.

Ағымдағы аптада Созақ аудандық ардагерлер кеңесінің ұйымдастыруымен Ұлы Отан соғысының ардагері, ауданның Құрметті азаматы Жүсіпұлы Елбергенді еске алуға арналған суда жүзуден ардагерлер арасында жарыс өтті.
Аталған жарыс аудан орталығы Шолаққорғандағы «Шұғыла-Нұр» сауықтыру кешенінде болды. Аудан аумағынан 30 шақты ардагерлер, қариялар жиналып, бұл жарысқа біркісідей атсалысты.
Жарысқа аудандық мәслихаттың хатшысы Б. Байғараев, аудан әкімінің орынбасары А. Сатыбалды, аудандық ардагерлер кеңесінің төрағасы Қ. Еспенбетов, зейнеткер, ауданның Құрметті азаматы П. Сақтапбергенұлы, Жүсіпұлы Елберген ардагердің ұлы, аудандық мәслихаттың депутаты Ғабит Елбергенұлы, мекеме, бөлім басшылары, аудан тұрғындары, жергілікті БАҚ өкілдері қатысты.
Аталған іс-шарада ардагерлер 70 жасқа дейінгі және 70 жастан жоғары болып екі топқа бөлініп сайысты. 70 жастан асқан қариялар арасында жүлделі І-орынды Арынбеков Бүркіт, ІІ-орынды – Жандарбеков Төлеубай, ІІІ-орынды – Жұмаділдаев Шора, IV-орынды – Хайруллаев Төрехан қарияларымыз иемденсе, 70 жасқа дейінгі ардагерлер арасында ардагер ағамыз Сармантаев Жетілген оқ бойы озық шығып І-орыннан көрінді. ІІ-орынды – Жуаншалов Өрікбай, ІІІ-орынды – Қалдыбеков Әбдірахман, IV-орынды – Әйкенов Жеткерген қарияларымыз қанағат тұтты. Барша жеңімпаздар мен жарысқа қатысушыларға қаржылай сыйлықтар табысталды.
Аудандық ардагерлер кеңесі ұйымдастырған суда жүзу сайысына Ұлы Отан соғысының ардагері Жүсіпұлы Елберген қарияның ұрпақтары демеушілік жасады. Жарыс соңында «Нұр-Аман» дәмханасында ардагерді еске алуға арналған дастархан жайылып, қариялар құран бағыштады. Аудандық ардагерлер кеңесі қазіргі таңда тынымсыз еңбек етіп, осындай салауатты, салиқалы ұрпаққа берері мол шараларды жиі өткізуде. Сондай-ақ алдағы атқарар шаралары да молынан жоспарлануда.

Мақсат ҚАРҒАБАЙ.

Елорда күніне орай Түркістан облыстық ішкі істер органдары мен Ұлттық ұлан ардагерлер кеңесінің төрағасының орынбасары Бақытжан Бейсембаев осы ұйымның Түркістан қалалық кеңесінің төрағасы Батырхан Сансызбаев, қарт ардагер Айтбай Сейсенбеков пен фототілші Қазыбек Умиров, ішкі істер органының ардагері, ұзақ жылдар бойы Түркістан қалалық ішкі істер бөлімінде кәмелетке толмағандар ісі жөніндегі аға инспектор Оңалбаеав Талғат Шайхсламұлының отбасында болды. Қызмет істеген жылдарында, атқарған қызметіне сай Талғат Оңалбаев көптеген мақтау грамоталары мен ведомоствалық және қоғамдық ұйымдардың медальдарымен марапатталған.
Мереке құрметіне орай осы күні Талғат Оңалбаевқа «Қазақстан Республикасы ішкі істер органдары ардагері» және «Милициядағы қызметі үшін» естелік медальдарымен марапатталды. Марапатау соңынан сөз алған ардагер ішкі істер органдары мен Ұлттық ұлан ардагерлері ұйымының ұжымына өзінің және отбасы мүшелерінің атынан қызметтік табыс және өз ризашылықтарын білдірді.

А. Сабақбаев,
Ішкі істер органдарының ардагері.

Облыс әкімі Өмірзақ Шөкеев Арыс қаласын қалпына келтіру жұмыстары бойынша жиын өткізді. Жиынға ҚР Индустрия және инфрақұрылымды даму вице-министрі, ҚР Қорғаныс министрлігінің өкілі, қаладағы 17 секторға жауапты облыс, аудан өкілдері, облыстық басқарма басшылары қатысты.
Жиында қаладағы қарқынды құрылыс жұмыстарының барысы баяндалып, жұмысты жеделдету бойынша ұсыныстар айтылды. ҚР Индустрия және инфрақұрылымды даму вице-министрі Қайырбек Өскенбаев әрбір секторға жауапты облыстардың жұмысына тоқталып, жұмыс барысында туындаған мәселелердің шешіліп жатқандығын жеткізді. Облыс әкімінің кеңесшісі Ұласбек Сәдібеков халық арасында түсіндірме жұмыстарын жүргізуге тартылған белсенділердің тұрақты жұмыс атқарып жатқандығын баяндады. Облыс әкімі қала тұрғындарының талап-тілектерін назардан тыс қалдырмай, жұмысты одан әрі жүйелі түрде жүргізуді тапсырды. Түркістан облыстық полиция басқармасы басшысының орынбасары Әбдіғани Сейдуалиев қала тыныштығын қамтамасыз ету жұмыстарының күшейгенін, құқықбұзушылықтарды алдын алу жұмыстары ұдайы жүргізіліп жатқандығын айтты.
Жиын соңында Өмірзақ Естайұлы қала тұрғындарының хал-ахуалын үнемі бақылауда ұстап, мемлекет тарапынан көрсетіліп жатқан көмектерді алу барысын, құрылыс жұмыстарын жеделдетуді жүктеді.

Түркістан облысы әкімдігінің баспасөз қызметі.

Шымкенттік дәрігерлер тағы да жарады. Үшінші мегаполистің кардиохирургтары құрсағында шаранасы бар әйелдің жүрегінен эхинококк кистасын ашық түрде ота жасау арқылы алып тастады.
Әйел құрсақ көтерген кезде осылай операция төсегіне таңыламын деп үш ұйықтаса да түсіне кірмеген. Алаңсыз жүрген ол осыдан біршама уақыт бұрын жүктілігі бойынша скринингтен өтуге шақыртылады. Оның жүрек қуысындағы эхинококк кистасы дәл осы тексеру кезінде анықталады. Егер әйелге едел-жедел түрде ота жасалмаса, жүрек қуысындағы бұл артық ет ұлғайып, уақыт өте келе жарылып, салдарынан фатальді өлімге апаратыны анық еді. Ана мен бала өміріне төніп тұрған осындай қауіпті алдын алу үшін дәрігерлер келіншекке шұғыл түрде жүрек эхинококкоз эктомиясы отасын жасайды.
Операция екі жарым сағатқа жалғасып, сәтті аяқталған. Бұған дейін еліміздің ешбір жерінде дәрігерлердің осындай жағдайда тәуекелге бел буып, ота жасауы орын алмаған. Мұны алғаш болып шымкенттік ақ халаттылар жүзеге асырған.
Жүкті әйелге күрделі отаны Шымкент кардиологиялық орталықтың директоры Ермағанбет Қуатбаев, кардиохирург Бауыржан Сайлаубекұлы, реаниматолог Бекжан Перменов, дәрігер перфузиолог Жәнібек Абширов сынды білікті дәрігерлерден құралған команда жасаған. Күрделі отаны бастан өткерген келіншек ота жасалғаннан кейін келесі тәуліктен соң-ақ ешқанай асқынуларсыз кардиохирургия бөліміне ауыстырылған.
Дәрігерлер қазіргі таңда жүктіліктің 16-апталық кезеңінде жүрген әйелдің денсаулығына да оның іштегі шаранасына ешқандай қауіп төніп тұрмағанын алға тартуда.
Естеріңізге сала кетсек, мамыр айының басында Шымкенттегі №1 қалалық клиникалық ауруханасының бас дәрігері Абылай Донбай білікті әріптестерімен бірге ағзада бауыр ауыстыру отасын 5 сағат 48 минут ішінде жасап, Қазақстан бойынша рекордтық көрсеткішке қол жеткізген болатын. Әдетте мұндай ота шамамен 13-18 сағат аралығында жасалатынын айта кетейік.

С. НҰРАЙ.

Жуырда Үкіметтің кеңейтілген отырысында Шымкент қаласын дамыту мен салудың 2023 жылға дейінгі кешенді жоспары мақұлданған болатын.
Аталған жоспарды жүзеге асыруда қалаға инвестицияны көптеп тартудың маңызы зор. Осы бағытта қалалық әкімдікке қарасты басқармалар өз саласының дамуына серпін беру жолында инвесторлармен келіссөздер жүргізуді қолға алған.
Таяуда қалалық ауыл шаруашылығы және ветеринария басқармасының басшысы Асқар Қаныбеков пен «Шымкент» әлеуметтік-кәсіпкерлік корпорациясы төрағасының орынбасары Р. Ерменбеков Сауд Арабиясынан келген кәсіпкерлермен жүздесті. Қонақтарға басқарма басшысы Асқар Қаныбеков Шымкентте ауыл шаруашылығын дамытудың мүмкіндіктерін жан-жақты баяндады. Сонымен қатар ол, Қазақстанда инвесторларды қолдау және тарту бағытында жүзеге асырылатын мемлекеттік қолдауларды тілге тиек етті. Қазіргі таңда қалада 136 гектар аумақты қамтитын агро-индустриялық аймақтың құрылысы жүргізілуде. Аталған кездесуде дәл осы агро-инудстриялық аймақтың жобалары таныстырылды. Жоспарлы мақсаттарды жүзеге асыру көзделген кездесу кезінде екінші тарап Шымкенттегі аграрлық-өнеркәсіптік кешен бойынша инвестиция тартуды бірлесіп жалғастыру туралы келісімге келді.
Дәл осындай мақсатта осыдан бір апта бұрын Шымкент қаласының әкімі Ғабидолла Әбдірахымов GG Group трансұлттық корпорациясының атқарушы директоры Варун Чаудхаримен кездесті. Бұл азамат Chaudhary Group компаниясының иегері, непалдық миллиардер Бинод Чаудхаридың ізін басар ұлы. Естеріңізде болса, осы кездесуден бірер күн алдын Ғабидолла Рахметолллаұлы аты әлемге мәшһүр бұл бай-бағланмен кездесетінін алдын ала хабарлаған болатын. Мақсат – мегаполисте салынатын заманауи аквапарк пен аттракциондар құрылысы жобасын талқылау еді.
Көптен күткен жүздесу сәтті өткендей. Бұл туралы мегаполис басшысы Ғ. Әбдірахымов өзінің инстаграм аккаунтында хабарлаған. Ол Варун Чаудхаримен болған іскерлік кездесуде құрылысын екі жылдың ішінде аяқтау межеленіп отырған аквапарк жобасын егжей-тегжейлі талқыланғанын, нысан бой көтеретін нақты жер учаскесінің анықталғанын, оны жедел орындау үшін арнайы жұмыс тобының құрылғанын жазған.
Қалаға инвестиция тарту ісі осымен түгесілмейді. Алдағы күндері жергілікті тұрғындарға сапалы медициналық қызмет көрсету мақсатында 100 медициналық жедел жәрдем көлігі алынатын болады. Шымкент жедел жәрдем медициналық станциясын жаңғырту мақсатында алынатын бұл техникаларға жергілікті билік мемлекеттік-жекеменшік серіктестік аясында түрік компаниясының өкілдерімен түзілген келісім негізінде қол жеткізіп отыр.

С. НҰРАЙ.