Маңызды

Сәрсенбі күні түс ауа жергілікті билік жарылыс болып, жұрты күнгейдегі аудан, қалаларда құрылған эвакуациялық пункттерге жайғастырылған Арыс тұрғындарына қаладағы қауіптің сейілгенін, енді олар апта соңында өз үйлеріне оралатыны туралы ақпаратты сүйіншілей жеткізді. Бірақ…
Келесі күні, дәлірегі, 27-маусымда күндізгі сағат 11-лер шамасында «Ақмешіт» мешітінің алды мен «Бекжан» базары аумағындағы Темірлан тас жолын арыстық тұрғындар жауып, қаладағы көлік қозғалысына кедергі келтірді. Азат шеруге шыққан ағайындардың айтар уәжі – оқ пен оттың ортасында қалдырған Арысқа кері қайтпау болды. Арыс десе сол күнгі оқ-дәрі сақтайтын қоймалардағы жойқын жарылыс көз алдарына келіп, ат тепкендей күйге кенелетін тұрғындар әкімнен күнгейдің өзге қала, аудандарынан, қала берді Шымкенттен үй беріп, жер бөлуін талап етті. Олар Шымкент әкімін шақырып, халықпен бетпе-бет сөйлесуін сұрады.
Біраздан соң жарылыстан әбден шошынып, шу шығарып жатқан халыққа Шымкент әкімі Ғабидолла Әбдірахымовта жетті. Ол халықпен әуелі «Ақмешіт» мешітінде, кейіннен сыртта сөйлесті. «Оттың ортасына қалай барамыз. Басқа жерден үй салып берсін» деп базынасын жарыса айтқан тұрғындарға қала әкімі Арыстың әлі әдемі қала болып кететінін айтып, оларды сабырға шақыруға тырысқанмен жұрт даурығуын тоқтатпады. Содан соң сөзге қонақ бермеген арыстықтарға «Шымкентте үй кезегінде 130 мың адам тұр. Қалада сіздерге берілетін үй жоқ» деп кесіп айтты. Одан соң тысқа шыққан оны сырттағы халық қаумалап, туған үйлеріне оралмайтындарын жабыла айтып жатты. Тап осы сәтте мегаполис мэрі алқымынан алған жұртқа «Біз де ойнап жүрген жоқпыз. Қолдан келгенді жасап жатырмыз. Егер Құдай болсам, бір күн ішінде бәрін шешіп тастайтын едім, Біз де адамбыз, біз де пендеміз. Күні-түні жұмыс істеп жатырмыз. Еркектерге ренжіп отырмын. Әйелдер айқайлап, сөйлей берсін. Еркектерге не жоқ?! Өз әйелдеріңе ие болыңдар бірінші. Одан кейін ел туралы айтыңдар» деп батырып сөйледі. Әкімнің бұлайша эмоциясын көрсетуі қаншалықты дұрыс не бұрыс болғандығы жөнінде біз баға бере алмаймыз. Бірақ сол сәтте ондағы азаматтардың бірқатары оның сөзін құптап «дұрыс, дұрыс» деп бастарын изеді.
Бұдан соң тоғыз жолдың торабындағы тұрғындар «мәселемізді Ғабидолла емес, Шөкеев шешеді. Сол кісі халықтың алдына келсін» деп тағы да айғайға салды. «Жаман хабардың жерде жатпайтыны» сынды, аймақ басшысы Өмірзақ Естайұлы да көп ұзамай жетіп, олармен сөйлесу үшін Шымкенттегі «Ақмешіт» мешітіне қарай бет алғаны сол еді «ішке кірмейміз. Сыртта сөйлесеміз» деп жүздеген адам оның алдын кес-кестеді. Дегенмен де диалог мешіт ішінде болды. Өз кезегінде Өмірзақ Естайұлы да халықты сабырға шақырып, «Айналайын, арыстықтар! Бұл төтенше жағдай, өздеріңіз білесіздер. Бәріміз сіздермен біргеміз! Бүкіл Қазақстан сіздермен бірге. Тыңдаңыздар менің сөзімді. Біз ойнап жүрген жоқпыз. Ол жерде әскерилер де, бәрі де күндіз-түні жұмыс істеп жатыр. Тазалап жатыр қаланы. Неге соны түсінбейсіздер? Сіздерге барлық жағдайды жасап жатырмыз. 60-тан астам осындай пункт бар. Араларыңда арандатушылар бар. Тыңдамаңдар» деп арандатушылардың жалған ақпармен айдап салуына жол бермеуін шегелеп жеткізді. Бірақ биліктің халық алдындағы бұл диалогы арыстықтардың аптығын баспады. Керісінше тоғыз жолдың торабындағы жойқын жарылыстан қатты үрейленіп қалған тұрғындар түс ауа қаланың орталығына қарай ағылды. Олар Темірлан тас жолы бойымен жүріп келіп, Әл-Фараби алаңына аялдады. Сол жерде арыстықтар алаңның жан-жағына қарай шашырай орналасып, әр жақтан билікке жоғарыдағыдай талаптарын айтып жатты.
Төзімдерінің әбден таусылғанын айтып, тауы шағылған тұрғындарды сабырға шақыру үшін облыс әкімінің кеңесшісі Ұласбек Сәдібеков, облыстық мәслихаттың депутаты Әбдіхалық Қасымбай, бірнеше имамдар болды. Бірақ азат шеруге шыққандар олардың ешбірінің сөзіне құлақ аспады.
Алаңдағы адамдардың арасында эвакуациялық пункттерде билік тарапынан ешқандай көмек көрсетіліп жатпағанын, барлық жәрдем қарапайым халықтардың қол созуымен ғана жүзеге асып жатқандары да кездесті. Олар Арыстан зардап шеккендердің мұқтаждықтары үшін құрылған қорға миллиондап түскен ақшалар қайда кетіп жатыр деген сұрақтарды да көлденең тартты. Кейбірі мемлекет басшысы Қасым-Жомарт
Тоқаевтың халықпен диалог орнатуын сұрап жатты.
Жан-жақтан айтылған жұбату сөзге табан тіреуді кұп көрді ме әлде бірнеше шақырым жаяу жүріп шаршағаннан ба белгісіз, сол күні кешкісін сағат 20:00-21:00-дер ортасында алаңдағы арыстық ағайындар тәубесіне келіп «туған жерге деген махаббатымызды жоғалтпайық. Ертең Арысқа оралайық. Шымкенттік тұрғындарға рахмет» деп бейбіт түрде тарқасты.
Айтпақшы, бұл күнгі оқиғаны полиция қызметкерлері бақылап жүрді.
Жоғарыда таңертең стихиялы түрде басталып, бірнеше сағатқа созылған бейбіт шеруде арыстықтар арандатушылыққа бой алдырмады.

Қ. ҚАЛИЕВ.

Осы аптада елді елең еткізген ең жағымды жаңалық мемлекеттің қазақстандықтардың тұтынушылық кредиттерінің 300 мың теңгеге дейінгі сомасын жауып, осыншама көлемдегі қарызының толық кешірілетіні болды.
Бұл туралы мемлекет басшысы Қасым-Жомарт Тоқаев «БАҚ қызметкерлері күніне» арналған Ақордадағы салтанатты рәсім кезінде жария етті.
Бірақ бұл барлық азаматтарға көрсетілмейді. Жеңілдік тек аз қамтылған, жалғыз қамқоршысынан айырылған, көпбалалы және мүгедек ұл-қыз асырап отырған отбасыларға жасалады. Президент Қасым-Жомарт Кемелұлының Қазақстанда бұрын-соңды болмаған теңдессіз әлеуметтік көмек көрсету туралы мұндай шешімді шығаруына әлеуметтік тұрмысы төмен азаматтардың кепілсіз алынған тұтынушылық несиелерін төлеуге көмектесулері туралы өтініштері себеп болғанын баса айтты.
Президент 26-маусым күні осыған байлансты тиісті жарлыққа қол қойды.
Сол жарлық негізінде көпбалалы отбасылар, мүгедек балалары бар отбасылар, жалғыз асыраушысынан айрылған отбасылар, атаулы әлеуметтік көмек алатындар, жетім балалардың өз аттарына алған банк алдындағы 300 мың теңгеге дейінгі берешектері кешірілетін болады. Оның барлығын мемлекет өзі өтеп береді. Мұндай мүмкіндікке яғни, банктегі қарызының 300 мың теңгесі бюджет есебінен жабылатын кредиттің жалпы көлемі 2019 жылғы 1-маусымдағы жағдай бойынша 3 миллион теңгеден аспауы тиіс. Егер азаматтардың рәсімдеген несиелері одан көп болса, ол мемлекет өтейтін несиелер қатарынан автоматты түрде сызылып тасталады.
Мемлекет басшысы мұны бір реттік акция ретіндегі шара екенін алға тартуда. Мақсат – қиын жағдайға тап болған азаматтарға сөзбен емес, нақты іспен жәрдем беру, сол арқылы отбасыларының қаржылық ахуалын айтарлықтай жақсартуға мүмкіндік жасау.
Сонымен Президенттің пәрменімен мемлекет алдағы уақытта әлеуметтік тұрмысы төмен қанша отбасының банк алдындағы қарызын төлейді?
Жоғарыда бір реттік акция ретінде қолға алынып жатқан мұндай жеңілдікке 2019 жылдың 1-маусымындағы жағдай бойынша қарызы 3 миллионнан аспайтын азаматтар ғана қол жеткізетінін айтып өттік. Мемлекет басшысы Қасым-Жомарт Тоқаев бұл жеңілдікке 500 мыңға жуық несие алушы ілігетінін, ал олардың 86 пайызының банкке берешегі 1 миллион теңгеден аспайтынын мәлімдеді. Ол бұл деректердің барлығы алдын ала екшеліп, талданғанын тілге тиек етті.
Қасым-Жомарт Кемелұлының айтуынша бір реттік акцияның шарапатын көретін 500 мың несие алғандардың 55%-ының, яғни 250 мың адамның негізгі несие мен сыйақыны қоса алғанда, барлық қарызы тұтастай жабылатын болады. Себебі, осыншама адамның банктер мен микроқаржылық ұйымдар алдындағы қарыздары үстемеақы-өсімпұлмен қосқанда 300 мыңнан аспайды.
Ал қарыздары үстемеақы-өсімпұлмен қосқанда 300 мыңнан көп, бірақ 3 миллион теңгеден аспайтын азаматтардың қарыздары тек 300 мың теңге мөлшерінде өтелмек. Үкімет бұл ретте азаматтардың қарыздары толықтай жабылмаса да белгілі бір бөлігінің мемлекет тарапынан төленуі олардың төлеу қабілеттілігінің қалпына келіп, қарыз жүктемесінің айтарлықтай төмендеуіне септігін тигізетінін айтуда.
Күнделікті күйбең тіршіліктің қамын бір, банктегі қарызын бір ойлап арқаны кеңге сала алмай жүрген тұрмысы қиын қаншама отбасының мойнындағы жүгін жеңілдеткен бұл жарлық аясында атқарылатын жұмыстарды Ұлттық банк Үкіметпен бірлесе атқарады.
Дегенмен де, мемлекет басшысы Қасым-Жомарт Тоқаев осы тұста таяқтың екі ұшы болатынын да қаперіне алды. Ол мұндай қайырымдылық халық арасында масылдық көзқарас тудырмауын, яғни, жеңілдікке ие болған санаттағы кейбір азаматтар «мемлекет өтеп береді» деген дәмемен тағы да кепілсіз тұтынушылық несие алмауы үшін қоғамдағы күнкөріс көлемі 27 мың теңгеге жетпейтін жандарға қарыз беру шектелетінін жеткізді.
Өз кезегінде ҚР Премьер-Министрінің бірінші орынбасары, қаржы министрі Әлихан Смайылов кредит бойынша әлеуметтік осал топтағы азаматтардың борышын өтеу жұмысы 10 шілдеден кейін басталуы мүмкін екенін мәлімдеді.

А. САТЫБАЛДЫ.

Кеше таңертеңгі сағат 08.00-ден бастап Арыс қаласына тұрғындар кіргізіле бастады. 24-маусымда толықтай эвакуацияланып, қатарынан төрт күн Шымкент пен облыстың өзге, аудан қалаларын уақытша паналаған тұрғындарды жергілікті билік алдын ала ұйымдастырылған түрде автобус колонналарымен туған жерге жеткізді.
Арысқа оралған тұрғындарды үйлеріне жайғастыру кезінде арнайы бекітілген қызметкерлер фото-видеофиксация жасады. Бұл шығындарды есептеуге көмек бермек. Сонымен қатар тұрғындарды жайғастыру барысында облыстық полиция қызметкерлері мен дәрігерлер, төтенше жағдай департаменті мен құзырлы мекемелер халыққа үздіксіз қызмет көрсететін болады.

Облыс әкімі Өмірзақ Шөкеев ауылына оралған тұрғындардың жағдайымен жеке танысып, барлық сақтық шараларын, атап айтқанда, үйде қалып кеткен тамақтарды тұтынбау, шатырларды, баспанадағы бөлмелерді жіті тексеру, қандай да бір оқ-дәрілердің фрагменттерін байқаса қолмен ұстамау және тағы басқа сақтық шараларына қырағы болуды түсіндірді. Арысқа оралған адамдардың барлығына осы және өзге де сақтық шаралары жазылған жадынамалар таратылды. Бұдан бөлек аймақ басшысы бүлінген ғимарат, қираған үйлердің барлығы қалпына келетініне уәде беріп, тек тұрғындарды сабырлы болуға шақырды.
Апаттан зардап шеккен халыққа Қазақстанның өзге облыстарынан қажетті 150 тонна зат жиналған. Шымкент пен Түркістандағы өзге де аудан, қалаларда қоймалардағы сол гуманитарлық көмектер 27-маусымнан бастап Арыс қаласына тасымалданып жатқанын айта кетейік.
Ресми дерек көздерінде Арыс қаласы мен әскери қоймада оқ-дәрілерді тазалау және қаланы дезинфекциялау шаралары аяқталғаны айтылуда. Аймақ басшысы тұрғындар өміріне еш қауіп жоқтығын айтуда. Сондай-ақ, кеше ҚР Экология, геология және табиғи ресурстар министрі Мағзұм Мырзағалиев Арыстағы атмосфералық ауаның таза, су және топырақтың ластанбағанын, радиацияның жоқтығын хабарлады.
Айта кетейік, тұрғындарды кіргізу үшін Арыс қаласы 17 секторға бөлінген. Бұл секторларға облысымыздың аудан, қала әкімдіктерінен 640 жауапты (1 аудан — 40 адам) азамат бекітілді. Әрбір 10 үйге 1 қызметкерден жауапты. Тұрғындарды жайғастыру кезінде осы азаматтарға қаладағы көше, аулалардың белсенділері көмек беретін болады.
Өмірзақ Шөкеев журналистерге Арыста бір ай тұратынын, қала қалпына келтірілгенше аймақты сол жерде басқаратынын айтты.

Шымкенте жол-көлік оқиғалары мен жолда жүру ережесін бұзу өткен жылдың сәйкес мерзімімен салыстырғанда 16%-ға төмендеген. Бұған «Цифрлық Қазақстан» бағдарламасы аясында қолға алынған «Сергек» интелектуалды бейнебақылау жүйесі оң әсерін тигізген.
Бүгінгі таңда «Сергек» интелектуалды бейнебақылау жүйесі бойынша қала аумағындағы 29 нысанда камера іске қосылған.
Бұл туралы Шымкенттегі ақпараттық-коммуникациялық орталықта өткен брифингте қалалық цифрландыру басқармасының басшысы Айнұр Юсупова мәлімдеді.
Сонымен қатар ол, Шымкентте 2049 көпқабатты тұрғын үйдің 997-нің цифрлы паспорты жасалғанын айтты. Басқарма басшысы жолаушыларды қала ішінде тасымалдайтын 1102 қоғамдық көлікке GPS орнатылғанын хабарлады.
Қазіргі таңда «Цифрлы Қазақстан» мемлекеттік бағдарламасы аясында «Ақылды қала» жобасы бес негізгі бағыт бойынша іске асуда. Олар денсаулық сақтау саласы, білім беру, тұрғын үй-коммуналдық шаруашылық, көлік, қауіпсіздікті қамтамасыз бағыттары болып табылады. Өз сөзінде Айнұр Юсупова Шымкенттегі 36 медициналық мекеменің барлығы электронды жүйеге қосылғанын, 100% интернетпен қамтамасыз етілгенін тілге тиек етті. Сондай-ақ ол, қала тұрғындары үшін көрсетілетін 195 мемлекеттік қызметтің 123-і электронды түрде жүргізілетінін жеткізді.

Экономикасы нарықтық бағытқа бет алған Қазақстан үшін кәсіпкерлікті даму мәселесі – өзекті мәселелердің бірі болып табылады. Өйткені, нарықтық экономиканың өзі – кәсіпкерлік экономика. Кәсіпкерлікті дамыту – нарықтық дамытудың кепілі.
Сондықтан да, кәсіпкерлік төңірегіндегі көптеген мәселелердің көтеріліп жатуы да оның экономикадағы рөлінің өте маңыздылығын дәлелдейді. Қазақстан Республикасы Конституциясында былай деп жазылған: «Әркімнің кәсіпкерлік қызмет еркіндігіне, өз мүлкін кез келген заңды кәсіпкерлік қызмет үшін еркін пайдалануға құқығы бар». Бәрімізге мәлім, өндірістің негізгі факторлары табиғи, еңбек, өндірістік ресурстар болып табылады. Нарықтық экономика кезінде осы факторлардың жұмыс істеп, қозғалысқа түсуіне әсер ететін нақты күш бар. Олар: іскерлік, басқару және өз мүмкіндіктерін белгілі бір мақсатта жетістікке қол жеткізуге пайдалана білу икемділігі.
Сол себепті әрбір азамат өз мүмкіндіктерін пайдаланып бизнес, кәсіп игеру саласында өзін өзі сынап көруі керек. «Қолымнан келмейді» деген сөз болмауы керек. Сонда ғана белгілі бір биіктікке, жетістіктер мен жеңістерге қол жеткізуге болады. Біздің ауданда да кәсіпкерлік нысандары көбейіп, кәсіпкерлік ғимараттар бірінен соң бірі жарыса бой көтеріп, ел игілігіне жұмыс жасап жатыр.
Шолаққорған кентінің сәулетіне ерекше әсемдік рең беріп тұрған «Техно-әлем» сауда кешені бір-екі жылдан бері аудан халқына сапалы қызмет етуде. Орталық стадионға қарама қарсы бетте аудандағы кәсіпкерлер палатасы филиалы іргесінде орналасқан бұл сауда үйі екі қабаттан тұрады. Аудан жұртшылығының қажетін өтеп, сұраныстарын қанағаттандырып, іздегенін тауып, айтқан заттарын алдырып беріп ел алғысына бөленуді мақсат тұтқан сауда үйіне кірдік. Төменгі қабатында несие беру орталығы, несиеге берілетін және нақты ақшаға сатылатын тауарлар дүкендерінде не керектің бәрі тұр. Құжаттарыңды өткізде қалаған жиһазыңды ала бер. Жоғарғы қабатта сан алуан жиһаздар диваннан бастап, шкаф, киім салатын, асхана жабдықтары көздің жауын алып өзіне шақырды.
Сауда үйі аудан орталығында тұратын 10 жұмыссыз жастарды жұмыспен қамтып отыр.
— Біздің ең басты мақсатымыз сатып алушы, тұтынушы азаматтарға мәдениетті қызмет көрсету, сыпайы, сабырлы, әдептілік шеңберінде елдің игілігіне жұмыс жасау. Келген азаматтардың сауалдары мен сұраныстарына мәдениетті түрде қызмет етуді бірінші кезекке қоямыз. Қазіргі таңда екі айлық акция жүріп жатыр. Онда ұтыс купондары, лотерея ойындары бар. Кез-келген тұтынушы купон арқылы тегін тауарларға ие бола алады, — дейді сауда үйінің жауапты қызметкері Мекемтас Әшірханұлы.

Мақсат Қарғабай.

Шымкентке кәсіпкерлік ісі өрге басқан бір топ кәріс бизнесмендері ат шалдырды. Олар жергілікті билік өкілдерімен бірге Шымкентте фармацевтика және сұлулық индустрияларын дамыту мәселерін алға тартып, осы бағыттағы жоба-жоспарларын талқылаған.
Бұл туралы Шымкент қаласы әкімінің орынбарасы Данат Жумин өзінің инстаграм парақшасында мәлімдеген. Сонымен қатар ол, бұл жүздесу осыдан біршама уақыт бұрын Кореяда болған сапары кезінде сол жердегі кәсіпкерлермен бейресми түрде кездесіп, оларды Шымкентке шақырудан соң болып жатқанын айтқан.
Істің көзін тауып, жұмысты іліп әкетіп, ілгерілететін кореялық бизнесмендердің бастамасы Шымкент әкімдігі тарапынан қолдау тауып жатса, үшінші мегаполисте кәсіпкерлік өрлей түсетіні сөзсіз.
Жалпы кореялықтар үшін Шымкент қаласының инвестициялық тартымды аймақ ретінде назарға іліккені тек осы дерекпен шектеліп қалмайды. Мәселен, былтыр кореялық «Highvill» компаниясы «Shymkent Сity» жобасы бойынша жаңадан бой көтеретін қалашықта тұрғын үйлер салуға ниетті екенін алға тартқан. Нәтижесінде олар қалалық әкімдікпен аталған жобаға 130 млрд. теңге салу жөніндегі меморандумға қол қойған. Сол кезде аталған компанияның 60 гектарға тұрғын үй, саябақ салатынын, құрылысты осы жылы бастайтынын мәлімдеген болатын.

«Үй болған соң ыдыс аяқ сылдырламай тұрмайды» деген. Бұл қазақ халқының санасына сіңіп қалған тәмсіл. Қазіргі таңда көптеген әйелдер осы нақылға сүйеніп, жолдасының кейігеніне көніп, намысын таптағанына төзіп, жуан жұдырығын ала жүгіргеніне көз жұмып жүре беретіні жасырын емес.
Дәл сондай тұрмыстағы кикілжіңнен әбден қажып, шыдамдары шегіне жеткен біраз келіншектер, жұрттан араша сұрайын десе де «ерлі зайыптының арасындағы ерегісті айтып, күлкіге қалмаймын» деп, дымын ішіне жасырып жүре беретіні шындық.
Ағайын-туыстан ұят деп, өзін бұлай құрбан ету үлкен қателік. Осындай келеңсіздіктен шығар жол табу үшін Шымкенттегі Қаратау ауданында «Отбасындағы зорлық-зомбылыққа жол жоқ!» атты республикациялық акциясы өткізілді. Шараның басты мақсаты – отбасында әйелдер мен балаларға қатысты зорлық-зомбылықтың орын алуына жол бермеу, қоғамда отбасының рөлін нығайту болып табылады.
Акция аясында Шымкент қаласы, Қаратау АПБ қызметкерлері, аудан прокуратурасының аға прокуроры Б. Тұяқбаев, қала әкімінің жанындағы тұрмыстық зорлық-зомбылық құрбандарына арналған «Самғау-сенім» коммуналдық мемлекеттік мекемесінің маманы А. Сарыбаева, қаланың салауатты өмір салтын қалыптастыру орталығының психологы Г. Мамбетова, «Сана сезім» үкіметтік емес ұйымының маманы С. Сағынбектер және тағы басқа мамандар көпшілік шоғырланған орталарға барып зорлық-зомбылық жасауға бейім азаматтармен жеке профилактикалық жұмыстар жүргізді. Отбасын сақтау және оның құндылықтарын арттыру жөнінде келелі кеңестер айтты. Халықтың отбасылық мәдениетін көтеріп, құқықтық сауатын көтеру бағытындағы тұжырымдармен бөлісті.
Сонымен қатар олар, отбасында орын алатын жанжалдардың ушығып, оның әрі қарай келеңсіз жағдайларға жалғасып кетпеуін алдын алу үшін тәулік бойына өңірлерде сенім телефондары мен қауырт желі жұмыс істейтінін құлағдар етті. Түрлі жағдайлармен жалғыз-жарым қалғандар үшін дағдарыс орталықтарының жұмыс істейтіндігі де мәлім етілді. Зорлық-зомбылыққа тап болған жағдайда кімге және қайда хабарласу керектігі төңірегінде тарқатылған мәліметтер жазылған парақшалар ұсынды.

Шымкенттегі көп балалы аналар отбасында ер көңілін баптап, балаларының жағдайын жасап, үйде жайлылық орнатып қана қоймай, өздерін белгілі бір кәсіптің құлағынан ұстап, жемісті жұмыс істеуге де қызығушылық танытып келеді.
Бұл тұрғыда оларға дұрыс бағыт-бағдар берудің маңызы зор. Осы мақсатта Шымкенттегі «RECOMP» оқу орталығында кәсіби визажист Аида Әбдірайымов мен үздік әйелдер шаш сәнгері Ерлік Куванов көп балалы аналарға шеберлік кластарын өткізіп, өз тәжірибелерімен бөлісті. Негізгі мақсат – сұлулық салонын ашып, өз бизнесін жүргізгісі келетін көп балалы аналарға жөн сілтеу.
«RECOMP» оқыту орталығының директоры Гүлбахира Тәжібаева бұл шара қала күніне орай ұйымдастырылып отырғанын, аталған орталықта 100-ден аса қыз- келіншектер жұмыс істейтінін алға тартып, мұндай шара олардың үлкен мүмкіндіктерге қол жеткізуіне жол ашатынын алға тартты.
Сонымен қатар ол, үйде отырған қыз-келіншектер осы орталықта мемлекеттік бағдарлама аясында оқып, тәжірибе жинақтап алуларына әбден болатынын, ол үшін қалалық жұмыспен қамту орталықтарына барып тіркеліп, бізге «Атамекен» бағдарламасы бойынша оқуға жолдама алуға болатынын айтып өтті.
Көп балалы аналар үшін қаржы табудың таптырмас мүмкіндігін сыйлайтын бұл орталықта арнайы курстан өту үш айға жалғасатынын айта кетейік.
Шара соңында орталық мамандары визажист әрі шаштараз болуды мақсат еткен көп балалы аналарға сәттілік тіледі.
Әйелдерді кәсіби маман әрі келбетті етіп жүруге бейімдейтін Шымкенттегі бұл орталық бір жылдан бері жұмыс істеп келеді.

Шымкенттің шынашақтай спортшы қызы абыройымызды асырып, мерейімізді тасытты.
Осы аптада көркем гимнастикадан Тайландта өткен жасөспірімдер арасындағы Азия чемпионатында Эльжана Таниева жеңіс тұғырынан көрінді. Үлкен спорттың барлық жанкүйерлерінің назарын өзіне аудартқан тартысты жарыста Эльжана 2 алтын, 1 қола медальді жеңіп алып, құрлықтық бәсекеде Әнұранымызды әуелетіп, Туымызды қалықтатты.
Осылайша шымкенттік гимнастшы қызымыз жасөспірімдер арасындағы жарыста Азия чемпионы атанып, небәрі 14 жасында халықаралық дәрежедегі спорт шебері нормативін сәтті орындады. Спортшы қыздың бойындағы бабын шыңдайтын жаттықтырушы Лола Әділбекова болып табылады.
Намысты қолдан бермеген Эльжана Таниева бұған дейін де болашағынан зор үміт күттіретін ойыншы екенін дәлелдеп үлгерген. Ол былтыр Азия Кубогының чемпионы және ел чемпионы атағын алған. Үш апта бұрын көркем гимнастикадан Әлия Юсупованың жүлдесі үшін болған жарыста FIG халықаралық турнирін жеңіп алған-тын.
Сөз соңында Эльжана Таниеваның еліміздегі ең жас спортшы екенін айта кетейік.

М. Әбдірайым.

Шымкентте «Пирелли» шина орталығы ашылды. Әлемдік брендтегі шина орталығы Қазақстан бойынша алғаш рет Шымкентте жұмыс істеуге кіріскен.
Енді жеңіл және жүк көліктерін тізгіндейтін тұрғындар темір тұлпарларына қысқы, жазғы сан алуан сапалы доңғалақтар мен дискілерді алыстан тапсырыспен алдыртпай-ақ, өз қаламызда тиімді бағада қол жеткізетін болады. Жаңа орталықтың ерекшелегі неде?
Бұл жерде италяндық дөңгелектер тұтынушыларға бір жылдық кепілдікпен босатылады. Сатып алушыларға шетелде арнайы оқудан өткен жұмысшылар әрдайым сапалы қызмет көрсетеді. Орталық сатып алынған шиналарға кепілдік аясында өз клиенттеріне жыл бойына техникалық қызмет көрсетеді. Яғни, шиналар тесіліп қалса, жүргізушілердің орталыққа келіп, тегін жаматып алу мүмкіндігі қарастырылған. Егер өнімдерді үйде қоятын жер табылмаса, орталықтағы сақтау орындарына әкеліп тапсыруға болады.
«Кама-Қазақстан» ЖШС-нің директоры Владислав Голоухов бұл орталықтың Шымкенттен ашылуына қаланың күн санап өркендеп жатқаны және осы жерде сапалы автокөліктердің көп тіркелгендігі себепкер болғанын айтуда.
Жалпы жыл сайын Шымкентте тіркелетін көлік саны көбеюде. Үшінші мегаполисте былтыр 2018 жылы 204 061 автокөлік тіркелген. Қазір солардың саны 215 470-ке жетті. Өткен жылдан бері тағы 11409 автокөлік қосылды.
Біз бұған дейін EnergyProm келтірген деректер бойынша ағымдағы жылдың қаңтар-сәуір айларында көліктерді сатып алу бойынша белсенді қалалар тізімінде Шымкент төртінші орында тұрғанын мәлімдеген болатынбыз.