Маңызды

Былтыр Шымкентте жасспірімдердің қатысуымен
9 жол-көлік оқиғасы тіркелген.

«Хабар-24» арнасы таратқан дерекке сүйенсек биыл қаңтардан 25 мамырға дейінгі көрсеткіш бойынша үшінші мегаполисте жасөспірімдердің қатысуымен бірде бір апат орын алмаған. Мамандар бұл шаһардағы 142 білім беру орындарының әрбіріне ювеналды полиция инспекторының бекітіліп, оқушылардың сабаққа келіп кетуі қатаң бақылауға алынғандығының жарқын жемісі деп біледі.
Өз кезегінде инспекторлар күнделікті таңертеңнен қара кешке дейін мектептердің алдында орналасқан жаяу жүргіншілер жолағында оқушыларға қызмет көрсетіп тұрады. Шымкент қалалық полиция департаментінің өкілдері мұндай жоба әзірге тек үшінші мегаполисте ғана қолға алынғанын мәлімдеуде.
Десек те апатты алдын алу үшін қауіпсіздік шараларын тоқтатып қоймай, оны ары қарай жалғастыра түсу керек. Осы мақсатта «Shymkent» әлеуметтік-кәсіпкерлік корпорациясының бастамасымен 3D форматындағы алғашқы жаяу жүргінші жолы пайда болды.
Еліміз бойынша алғаш рет Шымкентте қолға алынған мұндай форматтағы жаяу жүргінші жолы көлік ағыны қалың әрі жаяу жүргіншілер легі көп Т. Айбергенов көшесіне орнатылды. Оның басты ерекшелігін «Shymkent» әлеуметтік-кәсіпкерлік корпорациясының Басқарма Төрағасы Рашид Аюпов «Шымкент — жол қозғалысы өте қарқынды дамыған қала. Бұл учаске жүргізушілер назарын өзіне аудартатын ерекше қосымша белгі болады деп үміттенемін. Мұндай тәжірибелер батыста қайғылы оқиғалар санын бірнеше рет қысқартуға мүмкіндік берген»,- деп атап өтеді.

Шымкентте нысана көздеуден Қазақстан Спартакиадасы өз мәресіне жетті. Құралайды көзге атқан мергендер жарысында Шымкенттің спортшылары бәрінен озып, топ жарды.

Үздіктер қатарынан көрінген үшінші мегаполистің спортшылары қоржынға 41 медаль салды. Олардың 18-і алтын, 13-і күміс,
10-ы қола жүлде.
Турнир кестесінің екінші орнына Алматы қаласының мақтаныштары тұрақтады. Олар қанжығаларына 12 алтын, 11 күміс, 8 қола медалін байлады. Үздік үштікті Нұр-Сұлтан қаласының ойыншылары түйіндеді. Елордадан келген команда екі алтын, бес күміс және жеті қола медальды еншіледі.

Алтай НҰРМАНОВ,
«Халықаралық бағдарламалар орталығы»
акционерлік қоғамының өкілі:

Шымкент политехникалық колледжіне ҚР Білім және ғылым министрлігі «Халықаралық бағдарламалар орталығы» акционерлік қоғамының өкілі Алтай Нұрманов келіп, журналистермен кездесті. Басты мақсат – білімді жастарды «Болашақ» бағдарламасы бойынша шетелде білім алуға шақыру және үкіметаралық гранттар бойынша өзге елдердің есебінен сапалы білім алу жөнінде ақпараттандыру. Өз кезегінде Алтай Нұрманұлы білімге құштар азаматтар үшін шетелде оқу тек «Болашақ» бағдарламасымен шектеліп қалмайтынын, одан өзге де мүмкіндіктер мол екенін жөнінде қызықты ақпараттармен бөлісті. Назарларыңызға баспасөз-брифингінде Алтай Нұрланұлының келтірген мәлімдемелерін қаз-қалпында ұсынамыз.

«Болашаққа» құжаттар қабылдау жүріп жатыр
«Халықаралық бағдарламалар орталығы» АҚ магистратура, докторантура, резидентура және тағылымдама бағдарламалары бойынша «Болашақ» халықаралық стипендиясын тағайындауға арналған жыл сайын өтетін конкурстың басталғаны туралы хабарлайды. Құжаттарды республикамыздың кез келген аймағынан ХҚКО арқылы, сондай-ақ egov.kz порталында онлайн тапсыруға болады. Құжаттарды қабылдау 2019 жылғы 25-ақпаннан басталған. Және ол 31-тамызға дейін жүргізіледі.
Қазақстан ең дамыған отыз елдің қатарына қосылуды мақсат еткен. Осы ретте адами капиталды дамытудың маңызы зор. Бәсекеге қабілетті маман даярлау – ең негізгі міндеттің бірі. Бұл ретте «Халықаралық бағдарламалар орталығының» өзіндік үлесі зор.
Біз білім министрлігіне қараймыз. Ең басты бағытымыз құрылғанына 25 жылдан астам уақыт толған «Болашақ» бағдарламасының жұмысын жүргізу.
Білімге құштар жастардың шетелде білім алуына зор мүмкіндік берген «Болашақ» бағдарламасы қолға алынғаннан бастап 13 мыңнан астам азаматқа мемлекет есебінен стипендия тағайындалған. Мұхит асып білім алуға аттанған солардың 10 мыңнан астамы бүгінде оқуларын бітіріп, елге оралып, өз салалары бойынша еңбек етіп жүр.
Елбасы, Тұңғыш Президентіміз Нұрсұлтан Назарбаевтың бастамасымен құрылған «Болашақтың» басты мақсаты – білікті мамандарды даярлау. Осы мақсатта мемлекетіміз биыл 555 стипендия бөліп отыр. Өткен жылы да осыншама стипендия бөлінген. Және олардың барлығы қамтылған.
Жалпы «Болашақ» бағдарламасы бойынша оқуға түсудің тәртібі туралы барлық ақпаратты bolashak.gov.kz ресми сайтында толықтай алуға болады.
«Болашақ» стипендиясына үміткер адам тиісті құжаттарын тапсырған соң, конкурстық іріктеу 6 турдан тұрады. Сол турлардың барлығынан мүдірмеген азамат шетелде оқуға жолдама алады. «Болашақ» стипендиясының иегері атанған маманның шетелде қанша жыл оқитыны барған мемлекетіне байланысты болады. Мысалы, АҚШ-та магистратурадан өтуге екі жыл жұмсалады. Ал Британияда шамамен бір жыл. Ресейде екі жыл. Ал докторантура үш немесе төрт жылға созылады.
Қазіргі таңда «Болашақ» стипендиясының иегері атанғандардың көпшілігі мемлекеттік саясат, саясаттану, заңгер, бухгалтерлік есеп, қаржы және экономика, құқық, халықаралық құқық сынды мамандықтарды таңдайды, Стипендианттардың басым көпшілігінің таңдауы Британия және АҚШ еліне түседі.
Жыл сайын «Болашақ» стипендиясының иегері атану үшін мың, екі мыңнан астам адам құжат тапсырады. Құжат тапсыратын адамдардың басым көпшілігі Нұр-Сұлтан, Алматы, Шымкент қаласынан келгендер. Қазақ жастарына қанат бітіретін бұл бағдарлама бойынша шетелде білім алу мүмкіндігіне нақ осы үш қаланың жастары көптеп ие болып жатады. Және де «Болашақ» бағдарламасымен білім алып, елге оралған мамандарымыздың басым көпшілігі тағы да осы үш мегаполисте еңбек етіп жүр.
«Болашақ» степендиясына ие болғандар көптеген квоталық категория бойынша мемлекеттік қызметкер болсын, педагогикалық қызметкер болсын жұмыс орны сақталады. Ал жұмыс өтілінсіз кеткен азаматтарға елге келген соң түрлі мекемелерден келген вакансиялар бойынша жұмыс ұсынылады. «Болашақ» стипендиясының иегерлерінің 70 пайызын 25-35 жас аралығындағы жастар құрайды.

Шетелде оқу тек «Болашақпен» шектелмейді
Біздің басты бағытымыз «Болашақ» стипендиясының жұмысын жүргізу екенін айтып өттік. Екінші бағытымыз – үкіметаралық келісімшарт негізінде шетелде білім алуға студенттер жіберу. Үкіметаралық гранттар дегеніміз не? Бұл басқа мемлекеттер мен Қазақстан арасында студент алмасу, біздің өрендерге арналған шетелдік гранттар. Үкіметаралық гранттар бакалавриат, магистратура және PhD дәрежелерін қамтиды. Бұл жоба республикалық бюджетке еш салмақ салмайды. Мәселен, үкіметаралық грантта екі елдің Білім және ғылым министрліктері келісімге келу арқылы білім гранттарын ұсынады. Мәселен, Қазақстан мен Ресей мемлекеттері келіссе, біз оларға жүз грант олар бізге жүз грант береді. Грантқа ие болған адамның міндетті түрде оқу ақысы төленеді. Шәкіртақысы беріледі. Жататын орны қамтылады. Бұл шығындардың барлығы сол елдің есебінен жүргізіледі. Тіпті оқуын бітірген соң сол елде қалып жұмыс істеп немесе білімін жалғастырса болады. Ал «Болашақ» бағдарламасы бойынша шетелде білім алған адам оқуын бітірген соң міндетті түрде елге оралып, өз жерінде еңбек етуі қатаң қадағаланады. Еңбек ету мерзімі Нұр-Сұлтан, Алматы қаласында бес жыл. Бұл тізімге жуырда Шымкент қаласы да қосылады. Ал қалған өңірлерде үш жыл өтелуі тиіс.
Үкіметаралық грант пен «Болашақтың» басты айырмашылығы осы.
Үкіметаралық грантқа құжат жыл басынан бастап қабылдана береді. Мысалы, қаңтар айында біз Венгрия елінде білім алу туралы гранттар ұсындық. Венгрияға білім алуға жастарды жіберу аяқталған соң, ақпан айында Қытай, сосын Украинада білім алуға гранттар ұсындық. Гранттар бойынша ашық ақпараттар bolashak.gov.kz сайтында хабарланып тұрады.

Басты талап – тіл білу
Шетелде оқудың тағы бір тетігі ол ЖОО серіктестігі бағыты. Бұл бағыт бойынша Чехия, Испания, Германия және тағы басқа көптеген елдердің оқу орындары бізге гранттар береді. Бұл мүмкіндік өзінің лайықты иесін табу үшін біз ресми сайтқа толыққанды ақпарат саламыз. Осыған орай ресми сайт арқылы үміткер үйде отырып-ақ құжаттарын сканерлеп онлайн түрде көрсетілген мекенжайға жолдап, грант иегері атана алады. Ол сол университеттің есібінен төленеді. Жалпы олар қазақстандық студенттердің өз білім ордаларында оқығанын зор құрметпен қабылдайды. Неге? Себебі, шетелдік кейбір университтерге «Шетелдің азаматтары міндетті түрде оқуы керек» деген талап қойылады. Және оның өзінің белгіленген пайыздық көрсеткіші бекітіледі. Міне сондай талаптардан сүрінбес үшін олар өзге елдің өрендерін білім алуға шақырады. Бұл жерде басты талап шетел тілін меңгеру.

Білім көрмесінің берері көп
Қазақстандық жастардың шетелде білім алу мүмкіндігін мүлт жібірмеуін жолға қою біздің орталықтың басты мақсаты. Осы мақсатта алдағы 5-16 қазан аралығында халықаралық білім көрмесін өткіземіз. Ол Қазақстанның 6 қаласында атап айтқанда, Нұр-Сұлтан, Алматы, Шымкент, Ақтөбе, Орал және Атырау қалаларында өтеді. Көрмеге келемін деген кез келген адамға есігіміз ашық. Кіру тегін. Ешқандай тіркеу жоқ. Онда шамамен 300-ден астам ЖОО қатысады деп күтілуде. Ол жерде де іргелі университтердің өкілдері келеді. Қолдарындағы гранттарын ұсынады. Сол жерде оқу орындарының өкілдері болсын, Қазақстан азаматы болсын өздері меморандумға отырады. Бұл өзге елде білім нәрімен сусындалып, қабілет қарымын ары қарай шыңдаймын деген кез келген жас үшін үлкен мүмкіндік. «Халықаралық бағдарламалар орталығы» мұндай шараны осымен үшінші рет өткізгелі жатыр.

Шетелде білім алатын күнгейлік жастар жыл сайын көбеюде
Бұдан бөлек осы қыркүйек айында біз Қазақстан қалаларында баспасөз-брифингін өткізгелі отырмыз. Мұнда әр өңірдің білім басқармаларының ұйымдастырумен біз мектеп оқушыларымен кездесіп, шетелде білім алу бойынша бізге ұсынылған гранттар жөнінде оларды ақпараттандырамыз. Бұл тұста біз Шымкент қаласының өрендерімен міндетті түрде кездесу өткіземіз. Себебі, Түркістан облысы мен Шымкент қаласынан білім алу үшін шетелге аттанатын жастар легі жыл сайын артуда.

Талантты жастарды назарда ұстаймыз
Жалпы мені Шымкент жастарының әрдайым ерекшеленіп жүретіні қуантады. Мәселен, «Болашақ» стипендиясы иегерлері атанғандардың арасында да, үкіметаралық келісімшарт негізінде шетелде білім алу грантына ие болғандардың қатарында да Шымкент жастарының қатары көп. Мұның бірнеше себебі бар. Біріншіден, бұл жерде жастар көп. Миллионды қаланың әрбір үшінші тұрғыны жастар. Екіншіден, сол жастардың ішінде таланттылары жетерлік. Біз арнайы талдау, сараптау жүргіземіз. Сол кезде үшінші мегаполистегі оқушылардың белсенді екені айқын аңғарылады. Талдау, сараптау кезінде білім деңгейіне көп мән беріледі.
Шымкент қалалық жастар ресурстық орталығымен меморандум түзгенбіз. Соның негізінде біз осы жердегі оқушылармен әр тоқсанда бір рет кездесу ұйымдастырамыз. Сол кезде де талай жастардың білімге деген беталысы, оқуға, ізденуге деген құштарлығының күштілігі жүздерінен, сөздерінен анық сезіліп тұрады. Қазақта «болар баланың бетін қақпа, белін бу» деген сөз бар. Өз кезегінде орталық өкілдері мұндай өрендердің тізімін түзіп, оларды қажетті ақпараттармен қамтып, дұрыс таңдау жасауына жағдай жасайды.

«Болашақпен» тек білімділер оқиды
Енді сөзімізді түйіндей келе «Болашақ» бағдарламасы бойынша тағы бірер сөз айта кеткенді жөн санаймын. Жастар санасында «Болашақпен» тек байдың балалары оқиды» деген түсінік қалыптасқан. Бұл жүз пайыз қате әрі жаңсақ пікір.
«Болашақпен» тек білімді адам ғана шетелде оқиды. Ол сенің түріңе, біліміңе, бойыңа не сымбатыңа қарамайды. «Болашақпен» шетелде білім алу мүмкіндігіне тек біліммен ғана қол жеткізіледі. Дипломы бар, өз саласының білгірі, әрі ағылшын тілін жақсы білген кез келген адам «Болашақпен» білім алуға әбден болады. Тек іріктеу кезінде бағы мен бабы қатар шапса болғаны.

Көп ізден. Көркем әдебиет оқы. Тілді меңгер.
«Болашақ» стипендиясының иегері болу үшін, немесе үкіметаралық гранттар бойынша шетелде білім алуға талпынған өскелең ұрпаққа айтар менің кеңесім осындай. Көптеген әдебиеттерді оқу керек. Әрине «Абай жолынан» бастаған. дұрыс сияқты. Және жатпай-тұрмай ізденген дұрыс. Артық ақпарат ешқашан артық болмайтынын қаперде ұстанған абзал.

Дайындаған: С. ИБРАГИМОВА.

Шолаққорған ауылындағы Ыбырай Алтынсарин атындағы жалпы орта мектебінде биылғы оқу жылында мектептің 9 сынып, 11 сынып оқушыларының мектеп бітіргендігі мен оқу үлгерімі туралы мемлекеттік аттестаттарын салтанатты тапсыру шарасы өтті.
Биылғы жылы мектепті алтын белгімен үздік бітірген жеті оқушының кеуделеріне мектеп директоры Серғали Мәлікайдаров «Алтын белгі» төсбелгілерін жарқырата тақты. Олар Әшімхан Жанель Бағланқызы, Берікқызы Аяулым, Бөрібек Арайлым Лесбекқызы, Жақып Асылзат Қуанышбекқызы, Қасымбек Адина Нұрболқызы, Қайратқызы Рано, ал «Үздік» аттестат иегері Төлеген Гүлназ Дәуіржанқызы, НОБ туралы «Үздік» аттестат иегері Сұлтанбек Жұлдыз Асқатқызы, Аманалиева Нұрсауле, Мақсатұлы Мұрат, Сейілханұлы Рахымжан, Шәкір Ерғали, Ізбасар Аяулым, Нәлібай Динара еді. «Алтын белгі» иегерлері арасында Жанель Бағланқызына Ахмет Жұбанов атындағғы балалар саз мектебінің хореграфия бөлімін жеті жыл үздік оқып бітіргендігі туралы мемлекеттік куәлігі қоса тапырылды. Салтанатты шарада аудандық білім бөлімі жанындағы ата-аналар комитетінің төрағасы Мақсат Қарғабай, мектептің ата-аналар комитетінің төрағасы Берікбай Онбаев, мектеп ұстаздары бітіруші түлектердің жетекшілері Үрзада Қожабекова мен Нұргүл Кенжеқараева бітіруші түлектерге ақ тілектерін жолдады. Аталмыш шараны қорытындылаған мектеп басшысы жас түлектерге сәтті сапар, арайлы ақ жолдар тіледі.
Осы күн ауданның барлық мектептерінде түлектердің түлеп ұшқан ұяларымен қоштасу, аттестаттарын қолдарына алған айрықша есте қалар күні болды.

Мақсат Қарғабай.

Жаймашуақ жаз да жетті. Жүректерге жылуын төгіп, жыл бойына тынбай еңбек еткен үлкендер мен тоғыз ай бойы білім алып, тәрбиеге сусындаған балалар да, бұл күндері мәз-мейрам. Шат-шадыман көңіл күйге бөленудің де түрлі себептері бар. Өйткені жаз – демалып, тынығатын, күш-қуат жинайтын мамыражай мезгіл.
№49 жалпы орта мектеп жанынан «Шұғыла» сауықтыру лагері ашылды. Бос уақыттарын тиімді пайдалану бала біліміне, тәрбиесіне жауапты маман иелеріне зор жауапкершілік жүктейді. Жазғы демалыс басталғаннан бастап білім мен тәрбие беру орындары оқушылардың демалыс уақытын қызықты әрі пайдалы өткізуді мақсат етіп, түрлі шараларды қолға алды. Жуырда 1 маусым – балаларды қорғау күні қарсаңында оқу орнының жанынан жазғы демалыс лагері өз жұмысын бастады. Осынау шараға қатысқан мектебіміздің директоры С. Утебаева шараны салттанаты түрде ашып, балаларға жазғы сауықтыру лагерінде мазмұнды әрі мәнді өткізуіне
тілектестігін білдіріп, тәрбиешілер лагердің әр күнін қызықты етіп ойластырып, жаз уақытында балаларлың тек қана демалып қана қоймай, жан-жақты дамып, денсаулықтарын нығайтып, білімдері мен біліктіліктерін де арттыруды көздеп, жұмыс жасайтындықтарын айтты.
Мұндағы оқушылар 1 маусым – балаларды қорғау күніне арналған салатанатты концерке қатысып, әр күнге ерекше бағыт алып, «Денсаулық күні», «Күлкі күні», «Шығармашылық күні» сияқты бағдарламалармен қамтылды. .

Г. Жұмағұлова,
№49 жалпы орта мектебінің
бастауыш сынып мұғалімі.
Шымкент қаласы.

Бердібек САПАРБАЕВ:

Жуырда Үкіметтің жанында көп балалы аналар митингіге шыққан болатын. Талабы – кезексіз, бастапқы жарнасыз баспана алу. Осыған орай мәжілістің кезекті отырысынан соң Бердібек Сапарбаев журналистерге берген сұхбатында былай деп мәлімдеме берді.

– Біз ол жердегі көп балалы аналармен бірнеше рет кездескенбіз. Бүгінде министрліктің жанынан арнайы жұмыс тобы құрылған. Оған сол аналар да тартылған. Сол жерде барлық мәселе қаралатын болады. Олар кезексіз баспана беруді талап етуде. Сосын бастапқы жарнасыз, кредитсіз берілгенін қалайды. Өкінішке орай ондай болмайды. Заң бәріне ортақ. Және барлығы заң бойынша жасалуы қажет. Баспана кезегінде қарапайым азаматтар да тұр. Оларды айналып, тізімге тұрмаған көпбалалы аналарға қалай береміз?», — деді.
Сонымен қатар ол, көп балалы аналардың арасында екі қолға бір күрек, яғни жұмыс сұрап келетіндері аз болатынына қынжылыс танытты. «Біз оларға жұмыс ұсынамыз. Тіпті мамандығы болмаса, қандай да бір кәсіпке тегін оқытуға дайынбыз. Соңынан жұмысқа орналастырамыз» деген министр, өкінішке орай осындай мүмкіндікті мүлт жібермейтіндері аз екенін алға тартты.
Қазіргі таңда Қазақстан бойынша баспана кезегінде тұрған көп балалы аналардың саны 31 мыңды құрайды.

Осы апта салмағы зор саяси оқиғаларға толы болды. Соның ең бастысы 9-маусым Президент сайлауы күні халықтың ең көп сеніміне ие болып жоғары лауазымға кенелген, Қасым-Жомарт Тоқаевтың ұлықтау рәсімі еді. Халық алдында қазақ тілінде ант берген Қасым-Жомарт Кемелұлы ұлықтаудан соң Қазақстан Республикасы Конституциясының 87-бабының 5-тармағына сәйкес Нұр-Сұлтан, Алматы, Шымкент қалалары мен облыс әкімдерінің өкілеттігін тоқтату туралы Қаулы шығарды.

Бұл туралы Ақорданың баспасөз қызметі хабарлады. Сондай-ақ, Президент Жарлығында қазіргі әкімдер жаңа әкім тағайындалғанға дейін өз міндеттерін атқара беретіні көрсетілген.
12-маусымда елге едел-жедел таратылған бұл ақпараттан соң, іле, анығырағы 13-маусымда мемлекет басшысы Ата Заңға сәйкес, Нұр-Сұлтан қаласының әкімі Бақыт Сұлтановты қызметінен босатып, бұл қызметке тиісті Жарлықпен Алтай Көлгіновты тағайындады. Алтай Көлгінов бұған дейін Батыс Қазақстан облысының әкімі болған. Одан алдын Орал қаласының басшысы, Батыс Қазақстан облысы әкімінің орынбасары қызметтерін атқарған.
Қазақстан президенті Қасым-Жомарт Тоқаев Ғали Есқалиевті Батыс Қазақстан облысының әкімі етіп тағайындады. 49 жастағы Ғали Есқалиев үшін жаңа қызметті ұршықша иіру аса қатты қиындық тудыра қоймайтыны анық. Себебі ол бұған дейін аталған облыста әкім орынбасары қызметін атқарған еді.
Дәл сол күні Маңғыстау облысы әкімі орынтағына да жаңа басшы келді. Қарт Каспидің бойындағы өңірге Серікбай
Трұмов әкім болды. Ол бұған дейін Маңғыстау облыстық мәслихатының хатшысы лауазымында жүрген.
Бұл жетіде қызметімен қош айтысқандар сапында тек әкімдер болған жоқ, Сонымен қатар Білім және ғылым министрі болған Күләш Шәмшидиновада қызметінен кетті. Сөйтіп, Қазақстан президенті Қасым-Жомарт Тоқаевтың Жарлығымен ҚР Білім және ғылым министрі болып Асхат Аймағамбетов тағайындалды. 17 жылға жуық еңбек өтілі бар Асхат Аймағамбетов бұған дейін Қарағанды облысы білім басқармасының басшысы, ҚР білім жəне ғылым вице-министрі, Қарағанды облысы әкімінің орынбасары сынды жауапты жұмыстарды орындаған.
Аймақтарға жаңа әкімдердің тағайындалуы мен министрлердің өз орнын босатуы осымен түгесіліп қалмайтыны анық. Айтпақшы, Қасым-Жомарт Тоқаевтың кадрларды қайта тағайындауы кезінде кейбір шенеуніктердің қызметтері сақталып қалғанын айта кетейік. Мәселен, Бақытжан Сағынтаев Қазақстан Республикасы Президент Әкімшілігінің Басшысы болып қайта тағайындалды. Сонымен қатар мемлекет басшысы Алик Шпекбаевты Қазақстан Республикасы Сыбайлас жемқорлыққа қарсы іс-қимыл агенттігінің (Сыбайлас жемқорлыққа қарсы қызмет) төрағасы қызметіне қайта тағайындау туралы арнайы қаулыға қол қойды.
Мемлекет басшысы Қасым-Жомарт Тоқаевтың пәрменімен алдағы уақытта кадрлардың біразы осылай қызметін сақтап қалады ма, әлде қалпақша ауыстырылады ма? Бұл сұрақтың жауабын уақыт еншісіне қалдырған жөн сияқты.

Қ. ҚАЛИЕВ.

Қасым-Жомарт Тоқаев,
Қазақстан Республикасының Президенті:

Бұл аптадағы ең басты айшықты оқиға – Қазақстанның жаңадан сайланған Президенті Қасым-Жомарт Тоқаевтың ұлықтау рәсімінің өтуі болды. 12-маусымда өткен бұл шара Тәуелсіздік сарайында саяси элиталардың қатысуымен өтті. Ұлықтау рәсімінде Қасым-Жомарт Тоқаев оң қолын Конституцияға қойып «Қазақстан халқына адал қызмет етуге, ҚР-ның заңдары мен конститутциясын қатаң сақтауға, азаматтардың құқықтары мен бостандықтарына кепілдік беруге, ҚР-ның президентінің өзіме жүктелген мәртебелі міндетін адал атқаруға салтанатты түрде ант етемін» деді. Салтанатты жағдайда ант берген соң ол көк туымызды сүйіп, ҚР Президенті куәлігін алды. Дәл осы сәттен бастап қызметіне ресми түрде кіріскен Қасым-Жомарт Тоқаев алдағы бес жыл ішінде қандай шаруалардың бабын тауып, нендей мәселелерге нүкте қоятынын айтты.
Сонымен отыз жылға жуық тәуелсіздік жылдарын артқа тастаған қазақстандықтарға Қасым-Жомарт Тоқаев не деп серт берді?
Еліміздің екінші президенті барлық азаматтардың мүддесін қорғап, азаматтық ұстанымдарына қарап, «ала қойды бөле қырыққандай» қадамға бармайтынын, өз жұмысын атқару кезінде саяси және қоғам қайраткерлерінен келіп түскен ұтымды ұсыныстарды, бастамаларды міндетті түрде ескеретінін қадап айтты. Мемлекет басшысы кәсіпкерлерді қорғайтын ең тиімді тетіктерді іске асыратынын, жергілікті биліктің адамдардың талап-тілегіне құлақ асып, мәселелерді созбалаңдыққа салмай-ақ дер шағында шешуге, тұрақты түрде есеп беріп тұруға міндеттейтінін мәлімдеді. Экономикалық даму жұмысын бағалауда құрғақ цифрлармен емес, халықтың нақты әл-ауқатын негізге алып, баға беретінін білдіре кетті.
Өз кезегінде президент Қасым-Жомарт Тоқаев ел ішінде орын алып жатқан олқы тұстарды, халықты не мазалайтынын жақсы білетінін де тілге тиек етті. Ол алдағы президенттік қызметін атқаруда төмендегідей он бағытқа аса мән беріп, жұмыс жүргізетінін алға тартты. Ол он бағыт қандай?
Бірінші бағытта әрбір азаматтың өз елінде алаңсыз өмір сүріп, сүйікті кәсібімен шұғылданып, ұрпақ өсіріп, елде болып жатқан жетістіктерді мақтан тұтуы керектігі айтылады. Ынтымақтың ыдырамауына басты тетік болатын мұндай ауанға қол жеткізу үшін елімізде экономикалық өсім орнауы тиіс. Бұл мақсатта алдағы уақытта Үкіметтің кеңейтілген отырысында нақты міндеттер айқындалмақ.
Екінші бағытта мемлекеттің дамуын тежейтін сыбайлас жемқорлықтың тамырына балта шабу көзделетінін, осы мақсатта 1-қыркүйекке дейін жемқорлықтың деңгейін мейлінше төмендетуге бағытталған реформалар топтамасы дайындалатынын мәлімдейді.
Үшінші бағытта судьялар мен осы қызметке үміткерлерді бағалау және іріктеу бойынша талап деңгейін көтеру арқылы олардың кәсіби және адамгершілік талаптарына сай болуын жолға қою, сол арқылы халықтың сеніміне ие болу жұмыстары атқарылатынын жеткізеді.
Қасым-Жомарт Тоқаевтың төртінші бағытында халықты лайықты еңбекақымен қамту және жаңа жұмыс орындарын ашу көзделгені айтылады.
Түрлі санаттағы азаматтардың қолжетімді баспанаға ие болуына айрықша мән беру. Бұл Қасым-Жомарт Тоқаевтың екпін түсірген бесінші бағыты болып табылады.
Президенттің алтыншы бағытында жаппай білім беру ісін ілгерілету, барлық тұрғынға сапалы медициналық қызметтің көрсетілуін қамтамасыз ету, дәрігерлер мен мұғалімдердің абыройын асырып, мәртебесін көтеретін заңдар қабылдау, материалдық жағдайын жақсарту бойынша тиісті тетіктерді қарастыру айтылады.
Жергілікті билік түйіткілдің түйінін тарқатуда мәселені Үкіметке қарай ысырмай, жергілікті жерлерде шешуі қажет. Яғни, жергілікті өзін-өзі басқару жүйесі нығайтылмақ. Бұл Қасым-Жомарт Тоқаевтың ұсынған жетінші бағыты.
Сегізінші бағытта жасампаздығымызды нығайтып, бәсекеге қабілетті ел болуға бастайтын «Рухани жаңғыру» құндылықтары бойынша тарихқа құрметпен қарау, Отанға адал болу сынды асыл қасиеттерімізді жетілдіру бағытындағы Елбасы бастамашыл болған жұмыстар қолға алынатынын жеткізіледі.
Қасым-Жомарт Тоқаев тоғызыншы бағытта сыртқы саясаттағы орнымыз күн тәртібінен түспейтінін тілге тиек етеді. Ал оныншы бағытта мемлекеттік қызметтің барлық деңгейіне жас талантты басқарушылар тартылатынын, бұл үшін «Президенттің кадрлық резерві» қалыптастырылатыны туралы мәлімдейді.
Өз кезегінде Қасым-Жомарт Тоқаев алдағы уақытқа жоспарланған он бағытын ұсыынбас бұрын, табыс көлемінің азаюы, теңгенің теңселуі, миллионнан астам азаматтың екінші деңгейлі банктерге берешек екені халықты толғандырып жүрген негізгі мәселелер деп таныды. Сонымен қатар ол, тұрғындарды толғандырар түйіткілдерге қоршаған ортаның экологиялық ахуалы, халықты сапалы ауыз сумен қамтудың күн тәртібінен түспеуі, жолдардың сапасының сын көтермеуі, табысы жоғары және төмен азаматтардың арасындағы алшақтығы, билік пен қоғам арасындағы диалогтың өз деңгейінде еместігін жатқызып, атап өткен он бағыт осы тығырықтардан алып шығады деп сендірді.
Алдағы уақытта халық алдындағы міндеттерін ашық әрі әділ түрде іске асыратынын нық сеніммен айтқан Қасым-Жомарт Тоқаев өзінің басты міндеті – еліміздің әр азаматының мүддесін қорғау деп қадап айтты. Және билік өзінің халық алдындағы уәдесін орындауға міндетті екенін айтты.
Қызметіне ресми кірісу кезінде сөйлеген сөзінде Қасым-Жомарт Кемелұлы дамыған отыз ел қатарынан өз орнын табуға ұмтылып келе жатқан Қазақстанның бүгінгі қол жеткізген жетістіктері ең алдымен Елбасы, Тұңғыш Президент Нұрсұлтан Назарбаевтың арқасы деп атап өтті.
Өткенге шолу жасасақ. Ағымдағы жылдың 9-маусымында Қазақстанда кезектен тыс президент сайлауы болып өтті. Сайлауға тіркелген 7 кандидаттың ішінде Қасым-Жомарт Тоқаев ең көп дауыс жинап, мемлекеттің екінші президенті атанды. Оның кандидатурасын сайлауға қатысқан азаматтардың 70 пайыздан астамы, дәлірегі 6,5 миллион адам қолдап, дауыс берген.
Жалпы 9-маусымдағы кезектен тыс президент сайлауына сайлаушы тізіміне енгізілген 12 миллионға жуық азаматтың 77 пайызы дауыс беруге қатысқан.

А. САТЫБАЛДЫ.

Еліміздің Тұңғыш Президенті Нұрсұлтан Назарбаев өзінің кезекті Жолдауында «Жастардың барлық санатын қолдауға арналған шараларды толық қамтитын әлеуметтік сатының ауқымды платформасын қалыптастыру керек.
Келесі жылды Жастар жылы деп жариялауды ұсынамын» деген-тін.
Осы бағытта Шымкент аумағында орналасқан бұрынғы Оңтүстік Қазақстан облыстық қуыршақ театры Шымкент қалалық қуыршақ және жасөспірімдер театры мәртебесін алған болатын. Мұның өзі дарыны мықты, өнерлі жастардың талант кемесінің қайырламай, дарынының әрі қарай дами түсуіне мүмкіндік берген игі бастама еді.
Жақын күндері аталған театр ұжымы өз тарихында алғаш рет ересектерге арналған шығыстың шайыры Низамидің «Ләйлі мен Мәжнүн» қойылымын сахналайтын болады.
Премьера ағымдағы жылдың 18,19,20-маусымда көрермен назарына сағат күндізге 11:00-де және кешкі 18:00-де ұсынылатын болады.

Жуырда Шымкент қаласы туризм басқармасының басшысы Тұрар Ахметов журналистерге берген мәлімдемесінде қалада қонақ үй бизнесі жақсы дамығанын айтқан еді.
Қалада тек қонақ үй нысандары ғана емес, демалыс аймақтары да арта түсуде.
Шымкенттегі Маятас елдімекенінде Бадам суқоймасы маңынан «Hawaii Shymkent» демалыс аймағы ашылды. Халықаралқ талаптарға сай ашылған демалыс орнында келушілер үшін барлық жағдай жасалған.
Жобаның құрылтайшысы – меценат Төкен Танаұлы. Халық игілігі үшін ашылған нысанда бір мезетте 1500-2000 адамның демалуына мүмкіндік жасалған. Демалыс аймағының аумағы – 5,7 гектарды құрайды. Жобаның жалпы құны – 1 млрд 250 млн. теңге деп бағаланып отыр.
«Hawaii Shymkent» демалыс аймағы жыл бойы үздіксіз жұмыс істейді.