Маңызды

Қазақстан Республикасының Президенті Н. Назарбаевтың 2018 жылғы 10 қаңтардағы «Төртінші өнеркәсіптік революция жағдайындағы дамудың жаңа мүмкіндіктері» Қазақстан халқына Жолдауындағы «Жемқорлықпен күрес және заңның үстемдігі» жөніндегі тоғызыншы міндетінде көрсетілгендей жемқорлықпен күресу жалғасын таба береді, сол үшін мемлекеттік органдардағы процестерді, соның ішінде халық пен бизнестің қарым қатынасын цифрландыру маңызды болып саналады. Қарапайым халық өз үйінен шықпай-ақ электронды цифрлы қол таңба арқылы өз өтініштерін тиісті органдарға тастай отырып, оның орындалуы жөнінде бақылау жүргізе алады.
Бұған дейін де Елбасымыз «Жемқорлықтың – жай құқық бұзушылық емес. Ол мемлекеттің тиімділігіне деген сенімді сетінететін және ұлттық қауіпсіздікке төнген қауіп екендігін»,- атап көрсеткен болатын. Сыбайлас жемқорлық ұлтымыздың қауіпсіздігіне қауіп төндіретін, сонымен қатар еліміздің халықаралық беделіне де және азаматтардың конституциялық құқықтары мен бостандықтарына да елеулі нұқсан келтіретін аса қауіпті құбылыс екенін де айтқан. Ол орын алған жерінде біртіндеп әдетке айналып, қоғамда кеңінен қанат жайып кетуі мүмкін екенін мойындамасқа болмайды. Мұндай жағдай мемлекеттік аппараттың беделіне зор нұқсан келтіреді және оған сенімсіздік тудырады. Бұл үлкен материалдық та, моральдық та залал келтіретін жай екені айтпаса да түсінікті. Мемлекеттік билік құрылымдарында тез тарауға бейім тұратын мұндай зиянды жағдайларға жол беруге мүлде болмайды.
Президентіміздің өзі атап көрсеткеніндей әкімшілік реформа сыбайлас жемқорлықпен күресуге және азаматтардың құқықтары мен бостандықтарын қорғау жүйелерін күшейтуге бағытталып отыр. Сыбайлас жемқорлыққа қарсы нәтижелі тосқауыл қою үшін азаматтық қоғамымыздың барлық институттары болып бірге тізе біріктіруіміз қажет. Бүкіл халық болып оған қарсы бітіспес күрес жүргізуіміз қажет. Тек сонда ғана біз нәтижелі жетістіктерге қол жеткізетін боламыз. Елбасымыз Қазақстан халқына арнаған Жолдауында «Жемқорлықпен күрес және заңның үстемдігі» атты тоғызыншы міндетін қоғам арасында түсіндіру үшін Қазақстан Республикасы мемлекеттік қызмет істері және сыбайлас жемқорлыққа қарсы іс-қимыл Агенттігінің Түркістан облысы бойынша департаментінің ұйымдастыруымен барлық мақсатты топтар арасында осы уақытқа дейін бірнеше кездесулер өтті.
Соның айғағындай жұма күні арнайы мониторингтік топтың Созақ ауданындағы мүшелері Гүлсара Әлімбекова, Ролан Әлжанов, Мақсат Қарғабай алдын ала бекітілген кестеге сай Созақ ауылында орналасқан арнаулы оқу орындарының бірі №1 колледжде болды. Арнайы топ мүшелері колледж ге түсіп, студент атану үшін өздерінің құжаттарын тапсырып жатқан талапкер жастармен кездесті. Кездесуде колледж директоры Бақдәулет Қордашбеков, колледж ұстаздары, жас талапкерлер, ата-аналар комитетінің төрағалары қатысып отырды.
Іс-шара барысында алдымен олардың өздері қалаған мамандықтары бойынша кәсіп иелері атануларына тілектестік білдірілді. Одан кейін бекітілген іс-шаралар жоспары негізінде сыбайлас жемқорлыққа қарсы Ұлттық баяндаманы талқылап, оған ұсыныстар енгізу, аумақтық мемлекеттік және жергілікті атқарушы органдардың, квазимемлекеттік сектор субъектілерінің сыбайлас жемқорлыққа қарсы стратегиясын іске асыру мәселелері бойынша ақпараттарын тыңдау, қарау және жастардың білім саласына қатысты ұсыныстарын білді.
Сондай-ақ, жас талапкерлерге сыбайлас жемқорлық фактілерімен, мемлекеттік қызмет көрсету сапасының және мемлекеттік қызметшілермен Әдеп кодексі талаптарының сақтамауына куә болған жағдайда республикалық 1424 call-орталығына, Департаменттің 51-51-51 сенім телефоны мен 8775 8692121 WhatsApp нөміріне хабарласуға болатындығын жеткізді.
Шара соңында жастарға оң бағыт бере отырып, шараға қатысушылар тарапынан қойылған сұрақтарға тиісті жауаптар берілді.

Мақсат Жеңісұлы

Осы бір жаны жайсаң, жүрегі жомарт, ашық қолды азаматпен бір ауылда бірге өстік. Ол кішкентай кезінен өте алғыр болып, қатарластарынан озық тұрды. Атасы Омар бауырына басып, бала Атымтайды мықты тәрбиеледі. Алты жасынан бастап аттың жалынан тартып мінгізді. Ауылдағы Омар, Балықбай, Шәмші қариялар немерелерін, балаларын атқа мінгізіп, көрші Сарысу ауылының Байқадамына алып баратын. Сол кезде ол ауылда ат бәйге, құнан бәйге, аламан бәйге, көкпар көп өтетін. Тайларының жалын, құйрығын күзеп, әлгі ата аталған ақсақалдар ұлдарын тайға мінгізіп Сарысуға қарай кетіп бара жататын. Біз де бала көңілмен қызыға қарап тұратынбыз. Қатарларын түзеп олар ауылдан ұзай беретін. Кейде бәйгеден жүлде, кейде алмай келетін. Сосын Атымтайлар ауылдың барлық балаларын жандарына ертіп, сеңгірге шығатын. Тайларын біраз жүйткітіп алады да, біздерге бәйгеге барған кездегі қызықтарын айтатын. Ауылдың қара домалақтары біз де тайға мініп қашан шабар екенбіз деп армандап тұратынбыз. Атымтай шаруаға өте бейім болды. Кешке мал өрістен қайтарда тайына мініп алдынан шығатын. Оның бізден екі жас үлкендігі бар. Мектепке бізден бұрын барды. Екі жылдан кейін біз де мектеп табалдырығын аттадық. Бірінші сыныптан бастап Атымтай сабақты үздік оқыды. Жоғарғы сыныптарға барғанда ол қоғамдық жұмыстарға белсене қатысты. Түрлі мектеп ішілік шараларды ұйымдастырып жүретін. Жас туристер жарысы, спорттық шараларға қатысып, ауданда мектептің намысын қорғайтын.
Бір қызығы бастауыш сыныптарда Омар қария Атымтайды көк есегінің алдына мінгізіп, алып келіп, алып қайтатын. Атасы мен немересінің мынау ісіне біздер қызыға қарап тұратынбыз. Ұстазы марқұм Алпысбай Баубеков ағамыз Атымтай кейін бүкіл қазақ еліне танымал азамат болады дейтін. Сол болжамы ақыры шындыққа айналды.
Атымай Омаров Қызылкөл ауылындағы Мұхтар Әуезов атындағы орта мектепті бітіргенен кейін 1976 жылы Алматы халық шаруашылығы институтына оқуға түсті. Аталған оқу орнында студенттердің алды болды. Қоғамдық жұмыстарға белсене араласты. Оқытушылардың зор беделін иеленді. Талай білім бәсекелеріне қатысып озып шықты. Институтты бітірген кезде ұстаздары сол оқу орнында қалуға ұсыныс жасады. Бірақ Атымтай ауылды, атасын сағынды. Оқу орнын үздік бітіріп, туған жерге қарай тартып отырды. Бір мың тоғыз жүз сексенінші жылы өзі туып өскен Құмкент ауылына келіп ұжымшарға кіші есепші болып орналасты. Алғыр азамат бұл қызметті дөңгелетіп әкетті. Ұжымшардың басшыларымен тез тіл табысып, өзінің мықты маман екендігін таныта білді. Жастарды ізінен ертіп көптеген игілікті істер жасады. Оқу орнында алған білімін шыңдай түсті. Іргелі шаруашылықтың экономикасын көтеруге мол үлес қосты. Содан кейін аудан орталығынан шалғайда орналасқан Шу кеңшарына қызмет ауыстырды. Бұл ұжымға да тез сіңіп кетті. Мал шаруашылығын дамытуға мол үлес қосты. Жергілікті халықпен етене еңбек етті. Күні бүгінге дейін Атымтайдың іскерлігін Шу ауылының тұрғындары жыр етіп айтады.
Тәуелсіздік алған жылдары А.Омаров кәсіпкерлік саласына ауысты. Бұл салағада өзіндік із қалдырды. Тапқан табысын елмен бірге бөлісті. Қиын кездерде Қызылкөл ауылының тұрғындарын материалдық жағынан демеді. Ауылдағы әлеуметтік жағынан аз қамтамасыз етілген отбасына үнемі көмек қолын созды. Мектепке баратын балаларын киім-кешекпен оқу-құрал жабдықтарымен қамтамасыз етті. Құрбанайт мерекесінде елге еттен көмек берді. Ірі қара сойып, оны елді мекен тұрғындарына таратты. Ауылдағы өзі оқып білім алған білім ұясына материалдық көмек берді.
Кәсіпкерлік саласындағы жұмысы жанданып, еліміздегі мықты кәсіпкерлердің қатарына қосылды. Қызыкөлдіктер Атымтайдың жетістіктеріне қуана, ризашылық сезімдерімен қарады. Мақтаныш тұтты.
«Біздің Атымтай нағыз жомарт азамат» деген мінездеме берді.
А.Омаров елдің мәдени өміріне, тарихи тұлғаларды дәріптеуге белсене жұмыс жасады. Бәйдібек ауданындағы Домалақ ананың кесенесін жаңартуға демеушілік жасады. Бұл игілікті ісі бүкіл исі мұсылманға машһүр болды. Кесене жұмысы біткеннен кейін ас берілді. Осы шарада Атамтайдың есімі құрметпен аталды. Бабата елді мекеніндегі Ысқақ бап кесенесіне кіре берістегі қақпаны да Атекең өз қаражатымен жасатты. Өнер өлкесінде жүрген таланатты жастардың қанаттарын қатайтуға мол үлес қосып, демеушілік жасады. Атекеңнің демеушілігімен Мұхтар Әуезов мектебіндегі Омар ата сыныбын жабдықтады. Қазір жыл сайын жаңа оқу жылында сынып кабинетін көрнекіліктермен қамтамасыз етеді.
Ауданның мерейлі тойында айтыс өнерінің майталмандарына арнап өз қаражаты есебінен жеңіл автокөлікті бәйгеге тікті.
А.Омаровтың ел дегенде жүрегі елжіреп тұрады. Кәсіпкер туған жер түлектерінің аудандағы бас қосуларында үнемі игі істерге мұрындық болып жүреді.
Қазақтың Атымтай жомартына лайықты азамат талай азаматтарға қиын кездерде қол ұшын беруден тайынған емес.
Ауылдасы , замандасы Нұрәділ Әшірбеков айтады:- Атымтайдың жомарт қолды азамат екенін көптен бері білемін. Студент кезінің өзінде қатар жүрген біздерге үнемі қамқор болып жүретін. Сол кезде қаражаттын қысылсақ інімізге баратынбыз. Ол институтты үздік оқыды. Шәкіртақыны да мол алатын. Қысылған кезімізде ол бізге қаражат беріп тұратын. Ол мұны міндетсінбейтін және қайтарып бер деп сұрамайтын.
Кейін бір туыстарым қатты ауырып Алматыға бардым. Ауруханада Атымтайға жолығып қалдым. Ол:-Нұреке, мұнда не істеп жүрсіз,-деді. Мен мән-жайды айттым. Дереу автокөлігіне отырғызып алып, Алматыға ең таңдаулы мейрамханаға алып барды. Ал, Нұреке, не қалайсыз,-деді. Тамақтанып болғаннан кейін:- енді үйге жүріп қонақ болыңыз,-деді. Мен ауруханаға бару керек екендігін айттым. Ол қалтасынан қомақты қаржы алды да маған ұсынды.-Нұреке, керек болып қалады, алыңыз,- деді. Менімен жылы қоштасып ол жұмысына кетті. Міне, Атымтайдың жомарттығы осындай деді.
Атымтай Омаровтың мұндай демеушілік істері жайлы көп кісіден естіп жүрмін. Азаматтығына ризашылығын айтқан жандар арамызда аз емес. Бұл бір парасы ғана.
Атымтай Омаров сонау 1993 жылдан бері халық шаруашылығының түрлі салаларында қызмет атқарып келеді. Жеке кәсіпорындар құрылтайшысы. Алматы облысы кәсіпкерлік және өнеркәсіп департаментінің басшысы қызметін абыройымен атқарып келеді. «Атамекен» ұлттық кәсіпкерлер палатасының Алматы облыстық филиалының басшысы қызметін қоса атқаруда. Облыстық өндіріске инновациялар енгізу қорының да басшысы. Созақ, Бәйдібек аудандарының «Құрметті азаматы» «Болатын бала басынан» деген тәмсілді атамыз бекер айтпаса керек. Сонау бала кезінде Атекеңнің бойына сіңген адамгершілік, инабаттылық қасиеттері әлі күнге дейін бойында сақталған. Сондай-ақ, бұл азамат кішімен кіші болып, үлкенмен үлкен болып сөйлесе біледі. Жаны жайсаң, көңілі жомарт. Кез-келген кезде қасындағы досын да, жолдастарын қиындықтан алып шығады. Кейде көңілге керемет ойлар келеді. Атекеңнің осындай елге танымал азамат болуына қасиетті Баба Түкті шашты Әзіз бабаның, атасы Омардың ықпалы болды ғой деген. «Ата көрген- оқ жонар» деген дәл осындай азаматқа арналып айтылса керек. Омар атамыз да өмірдің талай белестерінен өткен жан. Сонау колхоздастыру дәуірін бастан өткерген. Колхоз төрағасы болған. Өзінің ұйымдастырушылық қабілетімен колхозды гүлдендірген. Елді ынтымақ пен бірлікке жұмылдырған. Қиын күндері халықтың жағдайын жақсартуға үлес қосқан.
Елбасымыздың «Рухани жаңғыру: Болашаққа бағдар» бағдарламалық мақаласының «Туған жер» бөлімінде өсіп-өнген туған өлке түлектерінің перзенттік құрмет көрсету жайы баса айтылады. Ұлт көшбасшысының аса мән бере айтылған сөзіне А.Омаровта үн қосып, үнемі туған жерге жиі ат басын бұрып қолынан келгенінше перзентік парызын өтеп жүр десек артық айтқандық болмас. Ауылға әр келген сапарында туған жерге тарту-таралғысыз келген емес. Оны ол міндетсінген де абырой санағанға да жаны қарсы. Елім, жерім гүлденсе деген мақсат-оны алға қарай жетелейді де отырады. Өзі білім нәрімен суысндаған мектебіне ат шалдырмай кетпейді. Ұстаздарының көзін көрген қариялармен сұхбаттасып, олар жайлы естеліктерді тыңдайды. Жасы кіші болса да қазір еңбек етіп жүрген мұғалімдерге сәлем береді. Өзі қамқорлығына алған сынып кабинетіне көрнекіліктер алып келіп, ілуді де ұмытпайды. Қасиетті Қызылкөлдің ауасын жұтып, мөлдір суына шомылады. Балалық кездерін еске алып, құмына табанын тигізеді.
Атымтай ауылға келсе, еңейген қариясынан, еңбектеген баласына дейін қуанып қалады. Кәсіпкер азаматтың қарапайымдылығына тәнті болады. Қариялар әңгімесін тыңдайды. Жастар келіп сәлемін береді.
Кәсіпкерлік саласының майталманы үш ұл тәрбиелеп өсірген. Олардан немерелер сүйіп отыр. Отағасы жұбайы Алипова Гүлнар екеуі тату-тәтті жанұяда ғұмыр кешіп келеді.
Атымтайдың достары өте көп. Барлығымен хабарласып жағдайларын сұрап тұрады. Қызылкөлде жастық шақтары бірге өткен сыныптастары да Атекеңді үнемі мақтаныш тұтады. Жиі кездесіп, тойларында бірге болады. Өмірдің қызықты сәттерін бір-бірімен бөліседі.
Уақыт дегеніңіз қамшының сабындай қысқа сырғып өтіп жатыр. Елге қадірі мол азамат әр күнін бос өткізбейді. Барлық уақытын игілікті іске жұмсайды. Әр күнін адамдарға жақсылық жасауға арнайды. Алпыс жасқа қарай атбасын бұрған асыл азамат елдің ынтымағы мен бірлігіне үнемі жұмыс жасайды. Жастар болашағы туралы да кеңінен толғанады.
Ауданымыздың 90 жылдық мерей тойына өзіндік үлес қосу да көңілінде жүр. Жүрегі жомарт жанға әрқашан халықтың құрметіне бөлене беріңіз дейміз.
Сәрсенбек ТЕҢІЗБАЕВ.

Қаратау ортақ, нар ортақ, қараша үшін бәрі ортақ. Осы арыстан жалды, алып тұлғалы, жалаңаш қара тасты, қара тау қазақтың алтын қазығы. Қаратау сенің жон арқалы жотаң болмаса күнгей мен теріскей атанып, екі ел болып қатар жараса жатар ма едік!?
Түркістан мен Созақ жаратқанның егіз етіп жарата салған жаратылысындай бірінсіз бірі аталмай қалмайды. Ысқақ баб әулие мен Қожа Ахмет Иассауи бабалар арасындағы сан жылдық тылсым байланыс мәңгіліктің үзілмес жібек секілді. Кешегі Ұлы Отан соғысы жылдары да қаншама Созақтың тас түлектері Қаратау арқылы асып Түркістан арқылы майдан даласына аттанды. Соншамасы Созағына жете алмай сонда қалса, біршамасы Түркістан арқылы түпкі мекен Теріскейіне оралады.
Рахманқұл атамыздың бабаларының да Созақта туылуы, өзінің мәңгілік Түркістанда тыныстауы да құпия дүниенің кілті іспетті. Бүгінде Теріскей мен Күнгейдің төл перзенті саналатын ардақты азаматтың есімі Қаратаудың құзар басын иеленді. «Рахманқұл шыңы» байыпты көзбен байтақ далаға көз салғандай болады. Кешегі алты алаштың ардағы, Қандөздің қара баласы, кеңес өкіметінің шегеленген терезесін шығыс әлеміне аша білген, сәулесін елге шаша білген Алланың адал құлы, қазақтың қайратты ұлы Нәзір Төреқұлов ар- рухты Түркістанның атын түркі әлеміне шығарған қоғам қайраткері. Кеңес өкіметі құрылған жылдарда бүкіл дүние жүзіне дипломатиялық үрдістің қазақы мәдениетін өзінің түр тұлғасымен, терең білімімен, қазақ ұлтына тән тектілігімен, бекзаттылығымен, өзге ұлттардан қазақ ұлтының таза қанды, талғампаз, талантты халық екенін өз бейнесі арқылы паш еткен Нәзір Төреқұловтың сүрлеулі соқпағымен келе жатқан, ісі мен еңбегін жалғастырушы, Егемен елдің сыртқы саясаттағы өрісті дамуына зор үлесін қосып жүрген жерлесіміз Бағдад Құлтайұлы Әміреев болатын.
1986 жылыАлматы қаласына аяқ артып, арман қанатына мініп оқуға аттандым. Сол уақытта бергі нағашыларым деп Жәмила апамның үйінде еркін жатып емтиханыма дайындалып жүрдім. Жәмила апамыз көпті көрген, көп нәрсені көкірегіне түйген, көзі ашық, санасы ояу, келісті де келбетті жан болатын. Сол жылдары алпыстың ол жақ бұл жағында болса да ажарын бермеген, ай келбетті ашаң жүзді, тартымды кісі еді. Қазақта «мінезіне көркі сай» дейтін теңеудің өзі Жәмила апама арнап айтылғандай еді. Жәмила апам ылғи ұл-қыздарынның немерелернің тілеуін бір Алладан тілеп отыратын. Бағдад ағамыздың шет ел елдерде жүріп түскен суреттерін, видео түсірілімдерін көріп, ағамыз сияқты елдің азаматы болуды арман тұттық. Қарапайым ғана ұстаздар отбасынан шығып қараша қазағын бүткіл дүние төріне таныстырған, Елбасымыздың қасында жүріп егемен еліміздің жарқын болашағы жолында тарихи мәселелерді шешуге ат салысып жүрген айбарлы да ардақты азаматымызбен мақтанамыз, мақтаныш тұтамыз. Қаншама елдердің төріне шығып, келелі кеңестерде, алқалы бас қосуларда ұлттың кемел келешегі жолына өз үлесін қосты. Шолаққорғанда туылып Ыбырай Алтынсарин мектебінде білікті ұстаздардан білім, ауылдастары мен ағайындары ортасында қазақы тәрбие, ата-анасынан ақ бата алған азаматтың өнегелі өмір жолынан созақтық жерлестері хабардар болғаны да жөн. Бағдад Әміреев 1959 жылы 1 наурызда Шолаққорған ауылында туылған. Ол 1982 жылы Душанбедегі Тәжік мемлекеттік университетінің шығыстану факультетін бітірген. Студент кезінде, яғни, 1980-1981 жылдары Иемен Халық Демократиялық Республикасында араб тілінің аудармашысы, оқуын бітірген соң 1982-85 жылдары Дамаскідегі КСРО елшілігінде,1985-88 жылдары Әль Фараби атындағы Қазақ Мемлекеттік университетінде араб тілі мен әдебиетінің ұстазы, 1988-91 жылдары Бағдадтағы КСРО елшілігінде, 1992-1994 жылдары ҚР Сыртқы Істер Министрлігінің Таяу Шығыс (Араб мемлекеттері және Израиль) мемлекеттері басқармасының басшысы, 1995-96 жылдары ҚР Сыртқы Істер Министрлігінің Таяу Шығыс (Араб мемлекеттері және Израиль), Орта Шығыс (Түркия, Иран, Ауғанстан) және Африка мемлекеттері басқармасының басшысы, 1996-2002 жылдары ҚР Сауд Арабия Корольдігіндегі Төтенше және Өкілетті елшісі, одан Кувейт мемлекетіндегі, Бахрейн корольдігіндегі, Оман Сұлтанатындағы, Біріккен Араб Әмірліктеріндегі Төтенше және өкілетті елшісі, Қазақстан Республикасының ИКҰ-дағы тұрақты өкілі қызметтерін атқарды. Бағдад Құлтайұлы Қазақстан Республикасының Мысыр Араб Республикасындағы Төтенше және өкілетті елшісі, одан Иордания Хашимиттік корольдігіндегі, Ливан Республикасындағы, Марокко корольдігіндегі, Социалистік Халықтық Ливия Араб Джамахириясындағы , Африка мемлекеттеріндегі елшісі қызметтерін абыройлы атқарып, Елбасы сенім артқан биіктерден көріне білген қайраткер. Бағдад Әміреев Ислам ұйымындағы білім, ғылым, мәдениет мәселелері бойынша тұрақты өкілі болды. 2008-2011 жылдары біздің елдің Түркия Республикасындағы, кейін Албаниядағы Төтенше және өкілетті елшісі болып жұмыстар атқарды. 2011 жылдан Қазақстан Республикасының Иран Ислам Республикасындағы Төтенше және өкілетті елшісі ҚР Премьер –Министрдің кеңесшісі. Сонымен қатар, осы жылдар ауқымында негізгі елшілік қызметіне қосымша дипломатиялық өкілдіктерде біршама қызметтерді де қоса атқарып жүрді. Атап айтар болсақ, Әлемдік және дәстүрлі діндер лидерлері сьезінің концепциясы мен құжаттарын дайындау жұмыс тобының төрағасы, ҚР-ның Ислам конференция ұйымы арнайы тұрақты өкілі, ҚР Премьер-Министрінің кеңесшісі ретінде әлемдік сауда ұйымындағы арнайы өкілі, ҚР Халықаралық энергетикалық форумымен жұмыс атқару мәселелері бойынша арнайы өкілі, Астана кандидатурасын ЭКСПО-2017 көрмесіне жылжыту мәселелері бойынша арнайы өкілі, ҚР Таяу Шығыстағы және Африка мемлекеттеріндегі арнайы өкілі сияқты бірқыдырым халықаралық шаралардың басында жүрді. Сонымен қатар, осы қызмет еткен жылдары ішінде 1999 жылы Буркино-Фасода , 2000 жылы Малайзияда, 2001 жылы Малиде ұйымдастырылған Ислам Конференциясы ұйымының министрлік конференциясында ҚР атынан қатысқан делегациялардың басшысы, 2007 жылы Иракпен тіл табысу конференциясында ҚР атынан қатысқан делегациялардың басшысы міндетін бедел биігінен көріне атқара білген саясаткер азамат.
Бағдад Әміреев сондай-ақ қазақ тілін қоса алғанда орыс, араб, ағылшын, түрік, және парсы тілдерін жетік меңгерген, «Казахстан и Саудовская Аравия», «Монархий Персидского залива», «Восток и Запад: Вызовы глобализаций», «Современный отношения Казахстана и Турция и Тюркский мир», түрік тіліндегі «Восток и Запад» кітаптарының авторы.
-Бұл жарыққа шыққан кітаптар Қазақстан мен Сауд Арабиясының сыртқы саяси қарым-қатынасына арналған. Жалпы мұсылман халықтарының түпкі тамыры бір. Ел болғаннан кейін ел мен ел арасында саяси-экономикалық, достық байланыс болады. Тәуелсіздік жылдарынан кейін сол қарым қатынасымызды қайта жандандырдық. Сол жандандыру барысы қалай жалғасуда, өткен жылдар ішінде қандай маңызды қадамдар жасадық деген мәселелер сөз болады. Ал екінші кітапта Қазақстанның Парсы шығанағындағы елдермен қарым-қатынасының тарихы жайында айттық. Ең қиын соғыс жүріп жатқан аймақтың саяси ахуалын, глоболизацияның әсері, модернизацияның деңгейі қандай? Осындай мәселелер жөнінде толығырақ мәлімет беруге тырыстық» деген еді елші Бағдад Құлтайұлы республикалық басылымдарға берген бір сұқбатында. Елшілік қызмет дегеніміз өте жауапты, салиқалылықты, шапшаң шешім шығаруды, тығырықтан жылдам шығуды, шешендік, тапқырлық, тарихи тереңдік, көп тілді білу сияқты сан қырлылықты талап ететін сала екені анық. Сондай сан тарау кәсіби шеберлігімен егемен еліміздің тұрақтылығы мен ынтымағы, әлеуетінің артуы мен болашағы жолында еңбек етіп жүрген Бағдад Әміреевке ел тілегі көл көсір.
Халқымызда елдестірмек елшіден» деген ұлық тәмсіл бар. Сол себепті де жер жүзіндегі өзі елшілік еткен мемлекеттермен ынтымақ пен бірлікте, тіл табысушылық пен татулықта еткен сан жылдардағы ерен еңбегі үшін, өркениет диалогіне қосқан жемісті үлесі үшін «Бенедикт ХVІ Рим папасы» медалімен, Түрік кеңесінің ашылуына қосқан еңбегі ескеріліп «Тюрксой» медалімен және Қазақстан Республикасының «Құрмет», «Парасат» сияқты көптеген орден-медалдарымен марапатталған. Жеңгеміз Ардақ Қуантайқызы екеуі отбасында Мөлдір, Құдыс, Әміре есімді ұл-қыздарды тәрбиелеп, еңселі егеменді еліміздің нағыз отаншыл азаматтарын қатарымызға қосуда.
Мақсат Қарғабай

Теріскейдің төл перзенті, ішкі істер саласының ардагері, запастағы полковник Әділхан Берікқараевпен таныс-білістігіміз сонау кеңес өкіметі жылдарының алпысыншы жылдары, нақтырақ айтқанда 1965 жылы студенттік, бозбала жастық оты алаулаған жылдары басталған еді. Одан соң, араластығым жанұялы болып, өмірдің суығын, қызығын, қуанышты жазы мен күзін бірге өткерген кезіміз десек болады.
Әдекең Алматыдағы С.М.Киров атындағы қазақ мемлекеттік университетінің заң факультетін бітіріп, республикалық ішкі істер министрлігіне қарасты Алматы қалалық ішкі істер басқармасында отыз жылдай елге қызмет етті. Сол уақыттағы астанамыз Алматы қаласында қатардағы милиция кіші лейтенанты қызметкерінен полковник дәрежесіне дейін жеткен Әдекең ішкі істер саласының ыстығына күйіп, суығына тоңып дегендей, бірсыпыра қызметтерді абыроймен атқарды.
Әділхан Сызған ауылында ұстаздар отбасында дүниеге келді. Атасы Берікқара жұртының сөзін сөйлегені үшін «халық жауы» атанып, ұсталып сол кеткенен хабарсыз кетеді. Әкесі Нұрмахан өмірден өткенінше ұстаз болып, елдің балаларын оқытып тәрбиелеген жан. Әділхан жастайынан зерек, өмірге құштар, болашақтан үлкен үміті бар жеткіншек болып өсіпті. 1963 жылы Созақ ауданына қарасты Жуантөбе ауылындағы Сәкен Сейфуллин атындағы орта мектепті бітіріп, алғаш еңбек жолын «Сызған» совхозында екі жылдай қара жұмысшы болып бастайды. 1965 жылы Алматыға артына-тартына келіп КазГу-дің заң факультетінің кешкі бөліміне оқуға түсіп, Алматыда түрлі құрылыс алаңдарында құрылысшы, бетоншы, қалалық наубайханада жүкші сияқты түрлі жұмыстарды істей жүріп оқуын өз тәмамдайды. 1969 жылы Алматы қалалық ішкі істер басқармасына қарасты Фрунзе аудандық ішкі істер бөлімінде учаскелік инспектор қызметіне қабылданып, осы қалада әртүрлі басшы қызметтерді атқарып, 1999 жылы 53 жасында еңбек демалысына шықты.
Ішкі істер саласында жүргенде дивизион командирі, Алматы қалалық ішкі істер басқармасында бөлім басшысы, қаланың орталығы саналатын Совет ауданында (қазіргі Алмалы ауданы) ішкі істер басқармасы бастығының орынбасары, бірінші орынбасары болды. 1992 жылдан ішкі істер министрлігінің аппаратында, департаментінде, республикалық білім көтеру курсы орталығы директорының орынбасары қызметтерін атқарды. Ішкі істер органынан кейін «Алматықұрылыс» материалдар тресінің кірпіш зауытының вице-президенті, ішкі істер министрлігі қалалық ардагерлер кеңесінің төрағасы, «Жеке күзет» фирмасының президенті, директоры қызметтерін 15 жылдай абыроймен атқарған азамат. Қазір құрметті еңбек демалысында.
Әдекең — өмірде өте қарапайым, қызметіне таза азамат, жора-жолдас, ағайын-туыстарына бауырмашыл жан. Әдекеңнің Алматы қалалық полиция қызметінде жүрген кезіндегі жастарға, әсіресе студент жерлестеріне деген қамқорлығы айрықша еді. Жора-жолдастарына, жерлестеріне, таныстарына, жалпы көмек сұрап келген азаматтарға жасаған жақсылығын, қамқорлығын өз көзіммен көрдім. Үлкеннің де, кішінің де қөңіл кілтін тауып сөйлесуіне, қандай жоғары лаазымда жүрсе де өзін қарапайым ұстайтын кішіпейіл жүрісіне қатар жүрген жора-жолдасы ретінде қызығатынбыз. Ауданның милиция басшысының орынбасары бола жүріп көптеген азаматтарға, жастарға, әсіресе теріскейлік жерлестеріне, қол ұшын созып, олардың оқуға, жұмысқа орналасуына бәйек болып жүретін. Өмір болған соң, кездейсоқ милицияға түсіп қалатын, ауылдан келген жастар орысша тіл білуі кем, қаланың тәртібін, ой-шұқырын біле бермей қателікке ұрынып қалатын жайттар да болып қалады дегендей, әртүрлі жағдайлар болмай тұрмайды; міне осындай кездерде ол ағалық ақылын, көкелік кеңесін айтып көмек көрсетіп жүретін. Тікелей азаматтарды қалаға тіркеу (прописка), үй алу кезегіне тұру, жұмыссыз азаматтарды жұмысқа тұрғызу ол уақытта қиынның қиыны болса, сол мәселелерді қолынан келгенше, шешіп беруге жанын аямайтын, ауылшыл, қазақы мінезді азамат ретінде көріне білді.
1986 жылдары елімізде асыра сілтеушілік орын алғанда, Созақ жастарына көмек көрсетем деп, партиядан шығып, қызметінен босап қалуға дейін барып, басын бәйгеге тіккен кездерін білемін. Оған мысалдар да көп, сол кездегі жайдайды сол уақытта оқыған, Алматыда жүрген жерлестерінің барлығы біледі. Көбісі бас қосқан жиын-тойларда болсын, арнайы БАҚ беттерінде ризашылығы мен алғыстарын айтып жүрген азаматтар әлі арамызда жүр.
Біз қатарлы сыйлас, дәмдес, дастархандас достарымыздың ішінен бірініші болып 1970 жылы кішігірім баспана алып, қоныс тойын жасаған да Әділхан болатын. Құтты болсын айтып барып, кейін Әділханның үйінің бір бұрышын қатарластары болып иеленіп алғанымыз бар. 1976 жылы кеңдеу баспанаға ие болды. Ол заманда баспана алу қиынның қиыны еді. Құт қонған баспанасы елден келіп-кететін мейманнан, ағайын-туыстан бір күн де босамайтынына куә болып жүрдік. Әдекеңді арнайы елден іздеп келіп, оқуға түсіп, оқып, диплломын алып, бітіріп шыққан жерлестерін де көрдік. Әрине, мұның барлығы Әдекеңнің жұбайы ауыл Созақтың қызы Ырысалдының арқасы болатын. Ол үйге келген қонақтарының көңілін аулап, жағдайын жасап жақсы жеңге бола білді.
Әдекеңнің туған жерін өте жақсы көретіні сонша жылына бір рет ғана берілетін еңбек демалысында министрліктің берген жолдамасымен Совет Одағының түкпір-түкпіріндегі санаторий, курорттарға барып дем алуға мүмкіндігі бола тұра еш жаққа бармай, тіке қарт Қаратау-Теріскейіне тартып кететін. Отбасымен туған жері Қаратаудың қойнауындағы Қозмолдағына барып, жора-жолдас, ағайын-туыс, құда-жекжат, ата-анасының шаңырағына барып өткізуші еді. Ол мақтануды, мақтангершілікті, кісілікті, өзімді осындаймын деп көрсетуді ұнатпайды. Созақ ауданында біздің білуімізше, кеңес кезінде милиция полковнигі шенін алған осы Әдекең деп естиміз.
Ішкі істер саласында жүргенде, арагідік «Алматы ақшамы», «Социалистік Қазақстан» газеттеріне там-тұмдап мақала жазып тұрды. Кейін милиция органынан заңды демалысқа шыққасын атамекен, туған өлке, киелі жерлер тарихымен айналысып жүр. Оның үстіне жұбайы Ырысалды да кітапхананың сирек кітаптар бөлімінде қызмет атқаруы да қызығушылыған арттыра түскен болу керек. Қашан барсаң да көзәйнегін киіп алып шұқшиып әлденелерді жазып отырады.
«Болашаққа бағдар: рухани жаңғыру» бағытында туған өлке тарихын зерделеп республикалық «Айқын», «Оңтүстік Қазақстан», «Созақ үні» газеттеріне көлемді мақалалар жариялады. Биылғы жаз айында қасына тарихшы, этнограф ғалымдарды ертіп Созақ жеріндегі «Саңғыл би» кесенесіне зияраттап келіп қайтты. «Саңғыл би» кесенесін еліміздің киелі нысандар тізіміне енуіне де айтарлықтай еңбек сіңірдіҚазір осы кесенені
туристік маршруттар картасына енгізуге әрекет жасап, еңбектеніп жүр.
Ұлын ұяға, қызын қияға қондырған, жүрегі де, тілегі де ел деп тұратын азаматтың әлі де тұғыры биіктей береріне сенімдіміз.
Дандай ЫСҚАҚҰЛЫ,
ҚР Гуманитарлық Ғылымдар Академиясының және Халықаралық Айтматов Академиясының академигі.

Өңіріміздегі барлық аудан, қалаларда ҚР Мемлекеттік қызмет істері және сыбайлас жемқорлыққа қарсы іс-қимыл агенттігі Түркістан облысы бойынша департаментінің ұйымдастыруымен «Адал жол» марафоны бастау алған болатын.
Елімізде сыбайлас жемқорлыққа қарсы мәдениетті қалыптастыру мақсатында өтіп жатқан «Адал жол» эстафеталық марафонын Отырар ауданы Арыс қаласынан қабылдап алып, ауданымызда түрлі форматта іс-шаралар өткізілді. Елбасымыз Нұрсұлтан Назарбаевтың «100 нақты қадам» Ұлт Жоспары мен мемлекеттік саясатты насихаттау аясында өткен эстафета барысында флешмоб, автошеру, дөңгелек үстелдер мен семинарлар ұйымдастырылды. Мемлекеттің дамуын тежейтін сыбайлас жемқорлықпен күресудің жаңа тәсілін ұсынып отырған ҚР Мемлекеттік қызмет істері және сыбайлас жемқорлыққа қарсы іс-қимыл агенттігінің «Адал жол» эстафеталық марафоны қасиетті өлкеде кеңінен қолдау тауып, марафонға мыңға жуық адам қамтылды.
Бүгін «Адал жол» эстафеталық марафонының тізгіні имандылық пен тазалықтың ұясы болған Бабтардың бабы – Арыстанбаб пен қазақ өркениетінің алтын діңгегіне баланған киелі Отырар ауданынан қарт Қаратаудың етегіндегі кенді қала кентаулықтарға табысталды.
Аталған шараға аудан әкімі Ерлан Айтаханов пен ҚР Мемлекеттік қызмет істері және сыбайлас жемқорлыққа қарсы іс-қимыл агенттігінің Түркістан облысы бойынша департамент басшысы Ғалым Тұрсынбаев қатысып, құттықтау сөз сөйледі.
Аудан әкімі өзінің құттықтау сөзінде: «Жастардың бойында сыбайлас жемқорлыққа қарсы мәдениет қалыптасуы үшін жастарымыз сыбайлас жемқорлықты елдің дамуын тежейтін аса қауіпті қоғамдық дерт деп тануы тиіс. Сыбайлас жемқорлыққа қарсы мәдениет әр адамда құқықтық сауаттылығына да байланысты төмен немесе жоғары болуы мүмкін. Мемлекеттегі заңнамаларды жақсы білу әр адамның өз іс-әрекетіне деген сенімділігін күшейтеді. «Нұр Отан» партиясының сыбайлас жемқорлыққа қарсы іс-қимыл бағдарламасында: «Отбасы және білім беру саласы бұл үдеріске мүдделілік таныта отырып қатысуы керек. Бұл жұмысты мектепке дейінгі бала тәрбиесінен бастаған абзал» делінген. Бұл жерде жас ұрпақтың құқықтық санасы мен мәдениетін қалыптастыру, отансүйгіштік сезімін күшейту маңызды»-деп, аудан халқын ғасыр індеті саналған сыбайлас жемқорлықпен бірлесе күресуге шақырды.
Мұнан соң аудан әкімі Ерлан Айтаханов Кентау қаласы әкімінің орынбасары Самат Расул бастаған делегацияның жұмысына сәттілік тілей отырып, ұсыныс-тілектер жазылған «Адал жол» кітабын табыстады.
Шара барысында ауданымызда өткен «Адал жол» эстафеталық марафонында белсенділік танытып, атсалысқан бір топ мемлекеттік қызметкерлер ҚР Мемлекеттік қызмет істері және сыбайлас жемқорлыққа қарсы іс-қимыл агенттігі Түркістан облысы бойынша департаментінің арнайы Алғыс хаттарымен марапатталды.
Сондай-ақ шарада аудандық қоғамдық кеңесінің төрағасы Мырзахмет Темірбеков пен ауданның бас имамы Әлижан Бекбауов жемқорлықтың адамзат баласына тигізер зардабы жайында келелі ойларын айтса, аудандық экономика және қаржы бөлімінің бас маманы Мерей Әметбек аудан жастарын ата-бабамыз аманат еткен адалдық, тектілік жолынан адаспай, қандай істе болмасын адал болуға шақырды.
Одан әрі шара аудан өнерпаздарының концерттік бағдарламасымен жалғасып, ақындар жыр шумақтарымен көпшілікті бір серпілтіп алса, әншілердің сызылта салған патриоттық әндері шараға қатысушылардың көңілін көтеріп тастады.

1 қыркүйек Білім күні мерекесінде ауданымыздағы барлық мектептерде салтанатты жиындар өтіп, алғашқы қоңырау үні соғылды. Жалпы аудан бойынша 63 мектеп болса, 49 жалпы орта мектеп, 9 бастауыш, ал 5-еуі негізгі мектеп болып табылады. 2018-2019 жаңа оқу жылында 3206 бүлдіршін мектеп табалдырығын алғаш аттаса, 1772 оқушы 11 – сыныпты бітіретіндер.
Бүгін 1 – қырқүйек білім күні мерекесінде Келес ауданы Абай ауылындағы №110 жалпы орта мектепте салтанатты шара өтіп, жиынға аудан әкімі А.Есбаев, аудандық білім беру, денешынықтыру және спорт бөлімі басшының м.а. М.Омаров, Абай ауылы әкімі Е.Абдирахманов қатысты. Аталмыш білім ордасы 2009 жылы Елбасымыздың «100 мектеп 100 аурухана» мемлекеттік бағдарламысы бойынша құрылған. Білім ордасында биыл 638 шәкірт білім алады. Оның ішінде бірінші сыныпқа келген 58 бүлдіршін үшін алғашқы қоңырау соғылып, жоғары сынып оқушылары да оқу жылының басталуымен бір-бірін құттықтауда. Қазақстан Республикасының Әнұраны шырқалып, Қазақстан Республикасының Мемлекеттік туы көтерілді. Мектеп директоры П.Айтқұлов жаңа оқу жылында жаңа табыстарға жетуге тілектестігін білдіріп, өткен оқу жылының жетістіктерін атап өтті. Өз кезегінде сөз алған аудан әкімі А.Есбаев:- Құрметті оқушылар! Елдің ертеңі, жарқын болашағы өздеріңсіңдер. Дәл қазір сендердің білім мен өнерді, спортты үйренетін кездерің. Алтын уақыттарыңды пайдалы істерге жұмсауға үйреніңдер. Елбасымыз Н.Назарбаев «Мұғалім балаларды қалай тәрбиелесе, мемлекетіміз солай болады» деген болатын. Ендеше сол ертеңгі елдің тізгінін ұстайтын балаларымыз білімді, білікті азамат болып қалыптассын,- деп тілек білдірді. Жиын соңында аудан әкімі 1 – сынып оқушыларына Елбасымыз Нұрсұлтан Әбішұлы Назарбаевтың сыйлығын тарту етті.

(с) Келес ауданы әкімінің баспасөз қызмет

Бүгін Білім күні мерекесінде Жетісай ауданындағы 70 мектепте 43 мың 159 оқушының қатысуымен алғашқы қоңырау соғылды. Оның 3100-і 11-сыныптың, ал 9 мыңдайы 1-сыныптың табалдырығын аттап отыр. Сондай-ақ, 5634 педагог оқу-тәрбие жұмыстарына кірісті. Ендігі міндет – шәкірттерге сапалы ілім беріп, жан-жақты білім иесі етіп тәрбиелеу. Бүгін бұл туралы Қызылқұм ауылдық округі Ақтөбе ауылындағы 300 орындық №126 жалпы орта мектебінде өткен алғашқы қоңырау салтанатты жиынында Жетісай ауданының әкімі Жамантай Бейсенбаев мәлім етті.
Бүгін ақтөбелік ата-аналар «Жаңадан салынған мектебіміз аудан тарихында қалатын болды» деп ерекше қуануда. Айтатындай-ақ бар. Аталған білім ұясының лентасын 24-тамыз күні Түркістан облысының әкімі Жансейіт Түймебаев кессе, бүгінгі алғашқы қоңырау шарасына аудан әкімі Жамантай Бейсенбаевтың өзі арнайы қатысты. Ақтөбеліктердің қуанышына ортақтасқан аудан басшысы жаңа мектеп ұжымына артылар сенім де зор екенін ескертті.
«Баршаңызды тамаша мереке – Білім күнімен шын жүректен құттықтаймын! Ел келешегі — жас ұрпақты жан-жақты білім иесі етіп тәрбиелеудің маңызы зор. Заманауи осындай керемет ғимаратта білім алу – оқушылар үшін үлкен бақыт. Ендеше оқу жылының соңында аталған мектептің шәкірттері үздіктер қатарынан көрініп, сенімді ақтауы тиіс. Ол үшін тыңбай ізденіп, талмай оқу қажет. Осы ретте ұстаздар қауымына да үлкен жауапкершілік жүктеліп отыр», — деді Жамантай Қанайұлы.
Жаңа мектептегі оқу күні «Қазақстаным – жүрегім, Түркістаным – тірегім» атты ашық сабақпен бастау алды. Ашық сабаққа аудан басшысы да қатысып, оқушылармен тілдесті.
Айта кетейік, бүгінгі таңда Жетісай ауданында білім бөліміне қарасты 70 мектеп жұмыс істейді, оның 69-ы жалпы орта, 1-уі негізгі орта мектеп саналады. Соның 63-і типтік, 7-уі ыңғайластырылған ғимаратта орналасқан. Аталған 70 мектептің 65-і екі ауысымда, 4-уі 1 ауысымда білім береді. Ал бұған дейін үш ауысымда білім беріп келген Жаңаауыл ауылдық округіндегі Ынтымақ ауылында орналасқан Тұрар Рысқұлов атындағы жалпы орта мектебіне 600 орындық жаңа ғимарат салынып, алдағы желтоқсан айында ел игілігіне беріледі деп күтілуде.
Ауданымыздағы 70 мектептің 28-і табиғи газбен, 41-і қатты отынмен (көмірмен) 1 мектеп сұйық отынмен жылытылады. Биылғы жылы тағы да 6 мектеп табиғи газға қосылуы тиіс.
Аудан бойынша 2018-2019 жылдардағы жылу беру маусымының дайындығын қамтамасыз ету мақсатында барлық білім беру мекемелерінде гидравликалық сығымдау жұмыстары жүргізіліп, соның нәтижесінде ақауы анықталған 15 мектепте жылу жүйесіне ағымдағы жөндеу жұмыстары жалғасуда. Аталған ағымдағы жөндеу жұмыстарына 26 млн 925 мың теңге қаржы қаралған болатын.
Сондай-ақ, бүгінде ауданымыздағы барлық мектеп толығымен жаңартылған білім беру мазмұнындағы оқулықтармен толық қамтылды. Бұл мақсатқа 420 млн. 109 мың теңге бөлініп, 70 мектепке 330 742 дана оқулық сатып алынған.
(с) Жетісай ауданы әкімінің баспасөз қызметі

Жетісай ауданына қарасты Қызылқұм ауылдық округіндегі Ябек Есенбеков атындағы ескі мектеп алдағы уақытта 200-ге жуық оқушынының жазғы демалысын қамтамасыз ететін лагерге айналмақ. Ол үшін бір жылдан бері қолданыссыз жатқан мектепте барлық мүмкіндіктер бар. Яғни оқу ғимараттары мен ойын алаңшасын қайта қалыпқа келтіруге болады. Аумағы екі жарым гектарды құрайтын нысанды қайта құрылымдау үшін тез арада жобалық сметалық құжаттама әзірленуі тиіс.
Сондай-ақ, Ж. Ералиев ауыл округіне қарасты қазір қолданыстан алынған «Сырдария» орта мектебін де 100 оқушыға лайықты лагерь ету мәселесін қарастыруымыз қажет. Бұл туралы аталған білім ошақтарын аралап көру барысында Жетісай ауданының әкімі Жамантай Бейсенбаев мәлім етті.
Алдымен аудан басшысы Ябек Есенбеков мектебінің бүгінгі жай-күйімен танысып, ескі нысандарды қайта құрылымдап, лагерге икемдеуге болатынына көз жеткізді. Осы ретте әкім мектеп аумағына күзетті күшейтіп, қажетті құрылыс материалдарының қолды болып кетпеуін тапсырды.
Алдағы 1 айда аталған екі нысанға да сметалық құжаттама әзірлеп, аудандық құрылыс бөліміне тапсырылмақ. Егер жоба толық іске асып жатса, Жетісай ауданындағы 300 оқушыны жазғы демалыс орнымен қамтамасыз етуге мүмкіндік тумақ.
(с) Жетісай ауданы әкімінің баспасөз қызметі

Бүгін Жетісай ауданының әкімі Жамантай Бейсенбаев Жылысу ауыл округінің тұрғындарымен кездесті. Кездесу барысында алдағы мақта теру науқанына дайындық шаралары пысықталып, ауыл шаруашылығы мақсатындағы егістік жерлерді цифрландыру, ауыз су, жол жөндеу мәселелері талқыланды.
Алдымен ауыл округінің әкімі Ермек Толыбаев соңғы 7 айда атқарылған жұмыстарды баяндады. Оның айтуынша, бүгінде округте 6477 гектар жерге мақта егілсе, 905 гектарға бақша, 447 гектарға дәндік жүгері дәні себілген. Алайда округ бойынша 229 гектар егістік жер игерілмей жатыр.
Биыл шаруаларға 850 тонна жанар-жағармай мен 1357 тонна слитра үлестіріліп берілген. Десек те, округте ауыл шаруашылығы алқаптарын цифрландыру бойынша атқарылған жұмыстар көңіл көншітпейді. Атап айтсақ, округтегі 1077 шаруа қожалығының иелігіндегі 9406 гектар егістік жердің небәрі 6348 гектары ғана Ауыл шаруашылығы министрлігінің сайтындағы электронды картаға енгізілген. 17 мемлекеттік акт кемшіліктері бойынша Әділет басқармасының қарауында, 64 акт жылжымайтын мүлік орталығында жатыр.
Аудан басшысы аталған кемшіліктерді тез арада шешуді тапсырды. Сондай-ақ, алдағы жылы округте іске асуы жоспарланып отырған жобалардың барысын сұрастырды. Бұл ретте де ауыл округі әкімі мардымды жауап бере алмады.
«Ауыл шаруашылығы жерлерін электронды картаға енгізу жұмыстары округте 65,6 пайызға ғана орындалған. Қанша рет тапсырма берілді. Бірақ нәтиже шамалы. Егер бұл жұмыстарды дер кезінде аяқтамасаңыздар шаруалар мемлекеттік жеңілдіктерге қол жеткізе алмайтын болады», — деді Жамантай Қанайұлы.
Жиын барысында округ тұрғындары дренаждарды ескіргендігін, жол, ауыз су мәселелерін көтерді. Сала басшылары тұрғындардың сауалдарына нақты жауап беріп, бірқатар мәселелер жөнінде ұсыныстар әзірленіп жатқанын мәлім етті.
(с) Жетісай ауданы әкімінің баспасөз қызметі

 

Түркістан облысының әкімі Жансейіт Түймебаев жұмыс сапарымен Мақтаарал ауданына барды. Өңір басшысы алдымен Иіржар ауылдық округі Наурыз ауылындағы жаңадан салынған Н.Бекежанов атындағы 200 орындық мектептің ашылуына қатысып, жергілікті жұртты жаңа оқу жылы қарсаңындағы қуанышты жаңалықпен құттықтады.

«Түркістан өңірі ең көп халық тығыз орналасқан аймақ. Туу көрсеткіші де жоғары. Мәселен, биылдың өзінде облыс бойынша бірінші сыныпқа 55 мыңнан астам оқушы келеді. Яғни, мектепке келетін оқушы саны 19 мыңға артқан. Демографиялық өсімге байланысты 2018-2025 жылдары аралығында өңірде 184 мектеп салу қажеттілігі туындап отыр. Биыл білім беру саласына қажетті 83 нысанның құрылысы қолға алынған. Оның 40-ы жыл соңына дейін пайдалануға беріледі. Міне, бүгін де Мақтаарал ауданында жаңа мектеп ашылып, ауыл оқушыларына есігін ашады», — деді Жансейіт Қансейітұлы.

Кейін облыс әкімі Мақтаарал ауданындағы Азаттық ауылында орналасқан логистикалық орталыққа аялдады. Аграрлы ауданда шаруалардың өнімін сақтап, әрі қарай сату үшін қолайлы жағдай жасау мақсатында қолға алынған жобаға 9 гектар жер телімі қарастырылған. Орталықта жаңа үлгідегі жеміс-жидек сақтау және уақытша сұрыптау қоймалары, мұздатқыш камера мен жүк көліктеріне арналған тұрақжай, техникалық қызмет көрсету стансасын салуға жалпы құны 1 миллиард теңгеге жуық инвестиция тарту көзделген. Алдағы уақытта автопаркинг, электронды таразы, жүк сақтау қоймалары, тұрақжай, құжаттандыру орталығы, қонақ үй, асхана, сауда үйі, авто жуу орны салынатын болады.

(с) Түркістан облысы әкімінің баспасөз қызметі