Маңызды

Әскер қатарында қызмет етіп, Отан алдындағы парызды өтеуге әрбір азамат міндетті. Себебі, туған жерді, елді, атамекенді қорғау – қасиетті борыш. Әрбір ер азамат әскерге баруды абыройлы міндет ретінде сезіне отырып, ел алдында берген антты орындайтын үлкен асу баспалдағы тұрғанын естен шығармауы тиіс.
Осыған орай Отырар ауданы әкімдігінің мәжіліс залында өткен жиында осы және өзге де келелі мәселелер кеңінен сөз болды. Аудан әкімі Ерлан Айтахановтың төрағалығымен өткен жиынға Отырар ауданына арнайы келген ұлттық қауіпсіздік комитеті шекара қызметінің өкілдері майор Нұржан Қалжанов пен майор Сәкен Мамирасилов және ҚР Ұлттық Ұлан гвардиясының өкілі Ерғазы Айқожаев қатысты.
Жиында аудандағы әскер қатарына шақырылған жас Отан қорғаушылармыздың жай-күйі мен кейбір азаматтардың әскери міндеттерін өтеуден бас тартуының себептері жан-жақты сөз болды.
Кездесуде сөз алған аудан басшысы жастардың санасына патриоттық тәрбиені сіңіріп, оларды Отан алдындағы азаматтық борышын өтеуге тарту жұмыстарында бірқатар кемшіліктердің бар екенін айта келе аталған жұмыстардың ауқымдылығы мен маңыздылығына тоқталды. Сондай-ақ, аудан көлемінде әскери қызметке жастарды шақыру жұмыстарын жүргізуді, үгіт-насихат шараларын азаматтар арасында кеңінен ұйымдастыруды ауыл округі әкімдері мен қорғаныс істері жөніндегі бөлім қызметкерлеріне жүктеп, нақты тапсырмалар берді.
— Аталарымыздан ұрпақтан ұрпаққа ғасырлар бойы жалғасып келе жатқан аманат — Отанды қорғау жолында бесаспап жауынгер болып қызмет ету бүгінгі күннің басты талаптарының бірі. Мұны әрбір жас жете біліп, санасына сіңіріп өсуі тиіс,- деді аудан әкімі.

Отырар ауданында сыбайлас жемқорлыққа қарсы «Адал жол» өңірлік эстафеталық марафоны өтті. Жастарды рухани адамгершілікке және жоғары моральдік этикалық құндылықтарға тәрбиелеу, Отанымыздың игілігі үшін адал қызмет етуге шақыру және бүкіл қоғамды сыбайлас жемқорлыққа қарсы күреске тарту, жемқорлыққа қарсы мәдениетті қалыптастыру мақсатында өткен шараға ауданның 150-ге жуық белсенді жастары қатысты.
Игілікті шара аудандық мәдениет сарайының алдынан бастау алып, «Сыбайластыққа жол жоқ» деп ұрандаған жастар аудан орталығындағы Әл Фараби алаңына жиналды. Шара барысында аудан әкімі аппаратының басшысы Айдос Мәулен мемлекеттің дамуын тежейтін бұл індетпен қоғам болып күресу әрқайсысымыздың азаматтық міндетіміз екенін айтып, жалынды жастарды сыбайластықпен бірлесе күресуге шақырды.
«Тек бір мемлекеттің ғана емес бүкіл әлем бойынша өзекті мәселенің бірі болып отырған сыбайлас жемқорлықпен күрес ел экономикасының, әлеуметтік жағдайының дамуына үлкен зардабын тигізетін дертке айналып отыр. Біз онымен қоғам болып күресіп, оған әр азамат атсалысса сонда ғана еліміздің келешегі кемел болады деп сенемін. Елбасымыз Н.Ә.Назарбаев «Болашақ жастардың қолында» деп сіздерге үлкен сенім артқан болатын. Бүгінгі шарада белсенділік танытып, сыбайластықпен күреске әрдайым дайын екендіктерін танытқан белсенді жастарға шынайы алғысымды білдіремін»,- деді аппарат басшысы. Сондай-ақ шарада аудандық ардагерлер кеңесінің хатшысы Жаңабай Сатыбалды да сөз алып, еліміздің дамуы жолында сүбелі еңбек етіп жүрген жастарды ата-бабамыз сақтаған ар-намысты кірлетпеуге үндеп, ақ батасын берді.
Мұнан соң шара аудан өнерпаздарының концерттік бағдарламасына ұласып, шараға қатысушылар патриоттық әндерді қосыла шырқады.

Отырар ауданының әкімі Ерлан Айтаханов «Маңғыстау облыстық отбасылық үлгідегі балалар ауылы» мекемесінің басшысы Мәди Ташовты қабылдаған. Осы қабылдауда М.Ташов отырарлық жаны жайсаң, қолдары ашық, тарыққан жандарға көмек қолын созуға даяр аудандық мәслихат депутаттары мен кәсіпкерлеріне арнайы алғыс айтқан болатын.
Сол кезде аудан басшысы Ерлан Қуанышұлы бұл балаларға алдағы кезде де көмек қолын созатынын, имандылық пен ізгілікке толы қайырымдылық шарасы алдағы уақытта да жалғасын табатынын жеткізген еді.
Бүгін Алматы қаласында жазғы демалыстарын өткізіп, Ақтауға қайтып бара жатқан осы мекеменің балаларын «Алматы-Маңғыстау» жолаушылар пойызынан Шымкент және Темір стансасынан бір топ отырарлықтар күтіп алып сый-сияпаттар жасады.
Аудандық мәслихаттың депутаттары Болат Тұрмаханбетов пен Жолбарысхан Мырзапейіс, жеке кәсіпкерлер Есбол Қамбаров, Мейрамбек Жанатаев және бір топ отырарлық азаматтар Жұмабай Сәрсенбаев, Сандуғаш Төрегелді, Нұрсұлтан Ахаев, Айдос Ерқұлов, Нартай Өтегеновтер жеміс-жидектер, қауын-қарбыз, түрлі сусындар мен палау дайындап, өмірдің ащы дәмін жастай сезінген балаларға ұсынды.
Жаны жайсаң, қолдары ашық отырарлық азаматтарға ізгі тілегі мен алғысын айтқан балалар сапарларын одан әрі жалғады.

Бүгін Жетісай ауданы, Жетісай қаласындағы орталық саябақта «Қауын фест» облыстық фестивалі өтті. Бұл туралы Түркістан облысы әкімінің баспасөз қызметі хабарлады.
Елбасымыздың «Болашаққа бағдар: рухани жағыруы» бағдарламасы аясында тұңғыш рет өткізіліп отырған фестивальге облысымыздың аудандары мен қалаларынан және еліміздің өзге өңірлерінен де қонақтар келіп қатысты. Іс-шараны Түркістан облысы әкімдігінің тікелей бастамасымен ірі қолдауымен Мақтаарал және Жетісай ауданы әкімдіктері бірлесіп ұйымдастырды. Фестивальдің мақсаты – бақша дақылдарынан өндірілетін өнім түрлерін көбейтіп, кәсіпкерлікті дамыту, бақша өнімдерін, терең өңдеуді қолға алу және диқандардың өзара тәжірибе алмасуына жағдай жасау. Еңбекші қауымның еңсесін көтеруге бағытталған фестивальдің ашылу салтанатында Түркістан облысының әкімі Жансейіт Түймебаев өңірдің ауыл шаруашылығы саласының потенциялы жоғары екеніне тоқталды.
— Облысымызда өсірілетін бақша дақылдарының 40 пайызға жуығы егістік алқаптарында қалып қояды. Диқандардың еңбегі еш кетпеуі үшін біз бақша өнімдерін терең өңдеу саласына аса мән бергеміз жөн. Осы мақсатта қауын мен қарбыздың отаны саналатын Жетісай және Мақтаарал аудандарында бақша өнімдерін терең өңдеумен айналасытын шағын кәсіпорындар мен цехтарды іске қосуымыз қажет. 2018 жылы Түркістан облысында «Рухани жаңғыру» бағдарламасы аясында атқарылатын жобалар мен іс-шаралар қайта қаралып, ұлттық құндылықтарымызды ұлықтауға негізделген болатын. Соның нәтижесінде биылдан бастап облыстың әр аймағында ауқымды шара өткізу және оларды дәстүрге айналдыру қолға алынды. Бүгінгі облыс тарихында тұңғыш рет өткізіліп отырған «Қауын fest» облыстық фестивалі сол игі бастамалардың жалғасы. Алдағы уақытта жыл сайын тамыз айында «Қауын fest» фестивалін, «Қауынғақ», «Қауында да қауын бар», «Қарбызды Оңтүстікте дарбыз дейді» сияқты байқаулар мен жәрмеңкелер ұйымдастырамыз, — деді облыс әкімі.
Жалпы Жетісай және Мақтаарал аудандарының ауа-райы бақша дақылын өсіруге тиімді. Бұл фестивалге аталған аудандарынан бөлек, облыстың өзге қала, аудандарынан қауын-қарбыз егумен айналысатын шаруалар жиналды. Олар қауынның 27 түрінен 30 тонна көлемінде қауын әкелді. Фестиваль барысында келушілерге карвинг және қауын-қарбыз көрмесі ұсынылды. Сондай-ақ, шара аясында тосап дайындаушылар сайысы, «Ең үлкен қауын», «Ең дәмді қарбыз», «Ең тәтті тосап», «Ең үздік бақша өнімдерін ұсынған ауыл әкімдігі» атты номинациялар бойынша жарыстар ұйымдастырып, бас жүлдеге «темір тұлпар» тарту етті. Шараға Жетісай ауданының 9 ауыл округі әкімдігі мен облыстың 8 аудан, қалаларынан бақша дақылдарын өсіретін ірі шаруа қожалықтары шақырылған.
Облыс дихандары өткен жылы 1250,0 мың тонна бақша өнімдерін өндірген. Дегенмен, аталған дақылдардың өнімін қайта өңдеу кәсіпорындары аз. Оның үстіне бүгінде қауынқақ, қауынқұрт әзірлеу секілді далалық әдіс-тәсілдер ұмыт болып бара жатыр. Биылғы фестиваль арқылы ұмытылған кәсіптер қайта жанданбақ.
Биыл түркістандық шаруалар жалпы 61,4 мың гектар жерге қауын мен қарбыз еккен. Оның ішінде бақша дақылдарын жинаудан жыл сайын рекордтық көрсеткішке қол жеткізетін Жетісай мен Мақтаарал аудандарында 19 500 гектарға қауын, 7 564 гектарға қарбыз егілген.
Түркістан облысының диқандары осы жылдың 7 айында Ресей, Беларусь Республикасы, Латвия, Германия сынды елдерге 80 мың тоннадан астам қауын бен қарбыз экспорттады. Соның ішінде Ресей мемлекетінің нарығына 60 мың тоннадан астам бақша дақылы шығарылған.
Фестивальде қатысқан тұрғындар мен қонақтар дəмі тіл үйінен қауыннан дəм тартып, іс-шараға ризашылықтарын білдірді.

Батыс Қазақстан облысы әкімдігі, облыстық мәдениет, архивтер және құжаттама басқармасының қолдауымен, облыстық халық шығармашылығы орталығының ұйымдастыруымен Орал қаласында өткен Қазақстан Республикасының Халық әртісі, «Отан» орденінің иегері, Мемлекеттік сыйлықтың лауреаты,әнші-композитор Ескендір Хасанғалиевтің әндерін орындаушылардың Х Халықаралық «Атамекен» ән фестивалінде өңіріміздің талантты әншілерінен құралған «Сарын» тобы жүлделі бірінші орынды иеленді.
Сахна саңлақтарының арасындағы додада жүлделі орынға қол жеткізу оңайға соқпағанын айту қажет. Сондада болса өнерге деген ынтызарлықтың арқасында сәттілік серік болған «Сарын» тобының бәйгеде бағы жанды.
Фестивальдің мақсаты – танымал композитор Ескендір Хасанғалиевтің әндерін насихаттаумен бірге қазақ ұлттық эстрада орындаушыларының шеберлік деңгейін көтеру, талантты жастардың өнеріне жол ашу.
Айтулы өнер бәйгесінде өңіріміздің намысын қорғаған Ш.Қалдаяқов атындағы облыстық филармония әншілерінен құралған «Сарын» тобы бұған дейін де бірнеше республикалық, облыстық байқауларда жүлдегерлер қатарынан көрінген.

ХХІ ғасырдың басты капиталы – білім алу екенін Елбасымыз Н.Ә.Назарбаев «Болашаққа бағдар: рухани жаңғыру» атты бағдарламалық мақаласында «Табысты болудың ең іргелі, басты факторы білім екенін әркім терең түсінуі керек. Жастарымыз басымдық беретін межелердің қатарында білім әрдайым бірінші орында тұруы шарт» — деген болатын.
Осы мақсатта «Қазақстан Республикасында білім беруді және ғылымды дамытудың 2018 – 2019 жылдарға арналған мемлекеттік бағдарламасында айқындалған міндеттерді орындау мақсатында, бүгін қалалық мәдениет үйінде «Төртінші өнеркәсіптік революция жағдайындағы адами капитал» тақырыбында білім беру саласы қызметкерлерінің дәстүрлі тамыз кеңесі өтті.
Аталған кеңеске қала әкімінің орынбасары Р.Айтбаев, қалалық мәслихат хатшысы А.Байтанаев, облыстық әдістемелік орталығының бөлім басшысы Г.Бекболаева, ауылдық округ әкімдері, қалалық мәслихат депутаттары, мекеме және бөлім басшылары, зиялы қауым өкілдері, білім беру мекемелерінің басшылары мен қызметкерлері, ардагер ұстаздар және БАҚ өкілдері қатысты. Жиын барысында 2018-2019 оқу жылындағы өзекті мәселелері мен алдағы жаңа оқу жылының басты міндеттері туралы қойылған міндеттер мен мақсаттар бойынша қалалық білім бөлімінің бас маманы Ә.Момбеков баяндама жасады. Сонымен қатар жиында білім саласына еңбек сіңірген ұстаздар және бірқатар азаматтар жарыссөзге шығып, өз ойларын ортаға салды.
Жиын соңы мәдениет үйінің қызметкерлері ұйымдастырған концерттік бағдарламаға ұласты.
Арыс қаласы әкімінің баспасөз қызметі

Елбасы Нұрсұлтан Әбішұлы Назарбаевты «Болашаққа бағдар: рухани жағыру» бағдарламалық мақаласы аясында және аудан әкімі Н.Тұрашбековпен бекіткен іс-шара жоспарына сәйкес, ағымдағы жылдың 22 тамыз күні мемлекеттік қызметте көп жылдар бойы жемісті қызмет етіп жүрген және жас мемлекетттік қызметшілер ауданымыздың киелі және тарихи жерлеріне саяхат жасалды. Шараның мақсаты ауданымыздың киелі және тарихи жерлерінің тарихымен танысу.
Саяхат «Түркібасы әулиесінен» бастау алып, «Әулиебастау», «Көктерек әулиесі», «Ақтас әулиесі», «Тамшы әулиесі», «Ұлы отан соғыс ардагерлері» аллеясы, Түлкібас ауданының шығыс және батыс қақпасы, Ақсу-Жабағылы қорығының мұражайында жалғасып, «Болашаққа бағдар: рухани жаңғыру» стелласында аяқталды.Табиғат аясында өткен саяхатшылар туған жердің көрікті де киелі жерлерін аралап, керемет көңіл күймен қайтты. Саяхаттан ауданымыздың ардагер мен жас мемлекеттік қызметшілері оң әсер алып, алдағы уақытта осындай игі шаралар жиі ұйымдастырылып тұрса деген ұсыныстарын білдірді

Бүгін Түркістан облысы әкімінің Әдеп жөніндегі уәкілі Әлішев Әмірдин Мұхиденұлы ауданымызға арнайы іссапармен келіп, жергілікті атқарушы органдардың мемлекеттік қызметшілерімен семинар өткізді.
Семинарға, аудан әкімінің орынбасары Жанесен Марат Сүгірәліұлы, аудан әкімі аппаратының қызметкерлері, дербес бөлім басшылары, ауылдық округ, поселке әкімдері, аудандық аурухана басшысы, мектеп директорлары, балабақша меңгерушілері, СВА, ФАП меңгерушілері мен жергілікті бұқаралық ақпарат құралдарының өкілдері қатысты.
Семинар барысында Әмірдин Мұхиденұлы жергілікті атқарушы органдарда Әдеп кодексі талаптарының орындалуы туралы қысқаша баяндамасын жасап, ауданымызда жүргізген анонимдік сауалнаманың қорытындысына тоқталып, талқылап өтті. Семинарға қатысушылар көкейіндегі сұрақтарды қойып, әдеп уәкілі тарапынан тұщымды жауаптар алды.Жиынды қорытындылаған аудан әкімінің орынбасары М.Жанесен, Әмірдин Мұхиденұлына ауданымызға арнайы ат басын бұрып, семинар өткізгені үшін ауданның мемлекеттік қызметшілері атынан алғысын білдіріп, семинарға қатысушыларға мемлекет мүддесі жолында атқарып жатқан еңбектеріне сәттлік тіледі.

Қазақстан Республикасы Парламенті Мәжілісінің депутаттары, «Нұр Отан» партиясының фракция мүшелері:
Оспанов Берік Серікұлы, Мыңбай Дархан Қамзабекұлы, Қайназаров Уалихан Анарбайұлы бүгін Түркістан қаласына арнайы іс сапармен келіп, бірқатар кәсіпкерлік нысандарды аралады.
Алдымен іс сапарын индустриялды аймақтан бастаған депутаттар «Гранд микс» жиһаз фирмасының жұмысымен танысты. «Гранд микс» мекемесі таңдаулы жиһаз өнімдерінің бірнеше түрін шығаратын, жылына 1,5-2 млрд. қаржының өнімін еліміздің 14 облысына таратып жатқан өркенді өндіріс орны.
Содан кейін қала басшысы Ә.Өсербаев мәжіліс депутаттарын Оранғай ауылдық округінде орналасқан «Яссы» құс фермасының жұмыс барысымен таныстырды. Жұмыртқа өндіру бағытында жұмысын жүргізіп жатқан «Яссы» құс фермасында Германиялық «Ломан ЛСЛ» тұқымды 18 мың дана тауық өсіріліп, күндігіне 16 мың дана жұмыртқа өндірілсе, жылына 3-3,5 млн жұмыртқаны нарыққа шығаруда. Құс фермасының жалпы жер көлемі 15,0 гектар жерді құрайды. Ал үстіміздегі жылы құс фермасының 2 кезеңінің құрылысына 30 млн теңге қаржы жұмсалып, 76 млн теңгеге Бельгиялық «Вали» фирмасының құрал-жабдықтары алынып, орнатылды. Бүгінде құс фермасының 2-кезеңі толығымен іске қосылды. Екінші кезеңіне 30 мың дана Голландиялық «Декалб» тұқымды шөжек әкелініп, өсірілуде. Екі кезеңнің жылдық өнімі 6-7 млн дана жұмыртқаны құрайтын болады.
Облыстық орталықтың статусын алған Түркістан қаласының келешек келбеті кімді болсада қызықтыратыны сөзсіз. Сапар басырында халық қалаулылары да тарихи шаһардың осы заманғы жаңа тынысы мен келешек келбетінің жоспарларымен танысып, тамашалады.

Спорт күніне арналған салтанатты шараны аудан әкімінің міндетін атқарушы Айкен Темір ашып, мерекеге арналған спорттық жарысқа қатысушыларға сәттілік тіледі. Ол өз сөзінде спорт сүйер қауымға «Бірінші байлық — денсаулық , денсаулық адамның ең қымбат дүниесі. Сондықтан біз денсаулығымызды нығайту үшін спортпен айналысуымыз керек. Футбол ойнауда, шаңғы тебу де де, гимнастикамен айналысу да т.б. спортпен айналысу жатады. Тіпті, қар күреу, ағаш жару секілді үй шаруасын атқаруда спортпен шұғылданғандай пайда болады»,- деп аймақ жастарын салауаттылыққа шақырды. Аудандық балалар және жасөспірімдер спорт мектептері қызметкерлері арасындағы аудандық жарыста спорттың алты түрінен, атап айтар болсақ волейбол, арқан тарту, үстел тенисі, асық ату, ләңгі тебу, шахматтан спортшылар жарысқа түсті. Оған аудандық балалар мен жасөспірімдер мектептерінен 60 спортшы қатысты.
Сондай-ақ салтанатты шарада ауданымыздағы спорт саласының саңлақтарына, спорт ардагерлеріне, спорт жанашырларына және ауданымызда спортты насихаттап жүрген бірқатар азаматтарға аудан әкімінің, аудандық мәслихаттың, «Нұр Отан» партиясы аудандық филиалының және аудандық дене шынықтыру және спорт бөлімінің «Алғыс хаты» табысталды.

М.САДЫҚБЕКОВ