Маңызды

Шымкент қаласында бекітілген дамудың Бас жоспарына сәйкес тәулігіне 20 мың жолаушы өткізетін жаңа айналма теміржол вокзалы салынады.


Жоба тұжырымдамасы халықаралық бастамашыл топпен, жоба жетекшісі, экономика ғылымдарының докторы, профессор Алихан Бижанов пен техника ғылымдарының докторы, профессор, «Байланыс жолдарын дамыту ғылыми-зерттеу институты» ЖШС-нің директоры Алтайбек Оразбеков, ҚР сәулетшілер одағының ОҚО филиалының төрағасы Асқар Мамырбаев және «Қазақстан темір жолы» Ұлттық компаниясы» АҚ өкілдерімен бірлесе әзірленді.
Заманауи үлгіде бой көтеретін қаладағы екінші теміржол желісінің техникалық құрылысының сипатын Оңтүстік Қазақстан облысының әкімі Жансейіт Түймебаевқа «Байланыс жолдарын дамыту ғылыми-зерттеу институты» ЖШС-нің директоры А.Оразбеков таныстырды.
Олардың айтуынша, бұл жоба зерттеу қорытындысы бойынша Президенттің «Төртінші өнеркәсіптік революция жағдайындағы дамудың жаңа мүмкіндіктері» атты Жолдауына сәйкес екен. Өйткені темір жол желісін жүргізу кезінде көлік салудың және пайдаланудың озық «цифрлық» технологиялары енгізілсе, көлік процесінде инновациялық технологиялар, соның ішінде жоғары технологиялық цифрлық инфрақұрылымды енгізу көзделген.
Шымкент қаласының бас жоспарына сай «Батыс Еуропа-Батыс Қытай» халықаралық көлік дәлізінің бойында салынуы тиіс вокзалдың жобасы аясында «Шымкент-2» жаңа теміржол вокзалы мен жүкті сұрыптау станциясы және үлкен автовокзал салынады деп жоспарлануда. Сонымен бірге жалпы алаңы 16 гектарды құрайтын жобада қонақ үй мен әкімшілік ғимарат, 1000 автокөлікке арналған тұрақ қарастырылған.
Жоба жетекшісі Шымкент қаласының 2020 жылы болатын ТМД елдерінің мәдени астанасы жылына орай, жобаны іске асырып, пайдалануға беру мүмкіндігін айтты.
Өз кезегінде облыс әкімі бұл жобаның әлеуметтік маңызы бар екенін, жолаушыларға қызмет көрсетуді жақсартуға және туристерді аймаққа тартуға мүмкіндік беретінін атап өтті. Осыған байланысты ол тиісті ведомство басшыларына жобаны жүзеге асыру үшін жұмыс тобын құруды тапсырды.
Қазіргі таңда жоба республикалық мемлекеттік-жекешелік әріптестік жобаларын жоспарлау алгоритміне сәйкес Қазақстан Республикасының уәкілетті мемлекеттік органдарымен жұмыс үйлестіру сатысында тұр.

ОҚО әкімінің баспасөз қызметі.

Үстіміздегі жылдың 22-25 мамыры аралығында Шымкенттегі «Тұран» шағынауданы, №192 орам, №979 жер телімінде орналасқан «Адия» тұрғын үй кешенінде тапсырылатын 201 пәтерге қол жеткізу үшін қосымша өтінімдер қабылданады.

Шыны сарайдай салынған пәтәрлерге қол жеткізуге ниет танытқандар, өтінімдерін әрлі-берлі жүріп сабылмай ақ, «Е-gov» порталына тіркеліп, ЭЦҚ кілті арқылы жүзеге асыруға әбден болады. Мұндай жүйе негізінде үйлі болуға тиісті құжаттарды электронды түрде тапсырудың тетігі туралы мардымды мәлімет алу халыққа қызмет көрсету орталықтарындағы «Е-gov» пункттерінде және Шымкент қалалық әкімдігінің құрылымдық бөлімінде, атап айтқанда тұрғын үй қатынастары бөлімінде жүргізіледі.
Жоғарыда аталған нысандағы бұл үйлер «Самұрық -Қазына» жылжымайтын мүлік қоры» АҚ арқылы берілетіндігін айта кетейік. Ондағы 201 пәтер Тип – 1, Тип – 2, Тип – 5, Тип –6 түрлерге бөлінеді. Алғашқы екі тип бір бөлмеден болса, қалған екеуі үш бөлмемен қамтылған пәтерлер болып табылады. Соған сәйкес адамдар өтінімді толтыру кезінде төлем қабілеттілігіне байланысты пәтердегі бөлме санын өзі таңдайды. Пәтерлерді азаматтардың сатып алу құқығымен жалдау бойынша арендалық төлем бес, жеті, он және он бес жылға жалғасады.
«Адия» тұрғын үй кешенінде тапсырылатын бұл пәтерлерге қол жеткізу үшін элек-тронды түрде өтінім қалдырғандар Ұлы Отан соғысының мүгедектері мен қатысушыларына теңестірілгендер, мүгедек балалары бар немесе сондай азаматты тәрбиелеп отырған отбасылар, зейнет демалысына шыққан зейнеткерлер, жетім немесе ата-анасының қамқорлығынсыз қалған балалар, оралмандар, табиғи катаклизм салдарынан баспанасынан айырылғандар, көп балалы отбасылар, толық емес отбасылар, мемлекеттік, әскери қызметшілер, арнаулы мемлекеттік органдардың, бюджеттік ұйымдардың қызметкерлері сынды санаттарға жатуы тиіс.
Б. СӘДУАҚАСҰЛЫ.

Айшылық алыс жерлерде ауқымды
арналар
таратылады

Елбасы бекіткен «Цифрлық Қазақстан» кешенді бағдарламасының басты мақсаты – көптеген салаларды барынша дамыту болып табылады. Осы бағытта еліміздің бірқатар салаларын цифрландыру процесі ырғақты жүргізіліп жатыр. Өз кезегінде бұл телекоммуникация нарығына да үлкен өзгерістер әкелуде. Қазақстан Республикасының Ақпарат және коммуникациялар министрлігі эфирді цифрлы телерадио хабар таратуға көшіру жұмыстарын бастап кетті. Соның негізінде ауыл мен қала халқының телерадиолардан хабар алу алшақтығы айтарлықтай азая түспек. Аталған министрлік осы жылдың өзінде еліміздегі үш облыс цифрлы хабар таратуға ауысатынын мәлімдеп отыр. Олардың қатарында Маңғыстау, Жамбыл облыстарымен қатар Оңтүстік Қазақстан облысының болуы көңілге қуаныш ұялатып отыр.
«Цифрлық Қазақстан» мемлекеттік бағдарламасы шеңберінде Оңтүстік Қазақстан облысының цифрлық телевизиямен қамтылуы жергілікті жұрттың ақпараттарды жоғары сапада қол жеткізуіне зор мүмкіндік тудырып тұр. Айталық егер облысымыз цифрлық телевизияға көшірілсе орталықтағы аумақтар 30 арнаға дейін, ал шалғай ауылдағы көрермендер бұрынғыдай 3-4 арнаны місе тұтпай, бас-аяғы 15 телеарнаны тамашалай алады. Таралымы ауқымды әрі қазіргіден бірнеше есе көп телеарналар үшін халықтан қаржы талап етілмейді. Яғни, телеарналарды тамашалау абонеттік өтемақысыз жүзеге аспақ.
Бүгінде осы бағытта нақты іс-шаралар жоспары бекітілген. Соның негізінде республикада 800-ден астам радио және телевизия стансасын салу және жаңғырту жоспарға енгізілген. Ақпарат және коммуникациялар министрлігі дәл қазіргі таңда 356 станса салынғанын, жыл аяғына дейін тағы 292 стансаның құрылысын бітіру межеленіп отырғанын алға тартты. Мұның өзі ел халқының 90 пайыздан астамын сандық технологияға негізділген телевизиямен қамтылуына кең мүмкіндік беретінінен хабар береді. Алға қойған ауқымды шара бойынша қалған стансаларды модернизациялау 2019-2020 жылдары толықтай аяқталып, пайдалануға беру жоспарланған.
Стансаларды жаңарту ақпараттық өнімнің сапасын едәуір арттыра түспек. Соның негізінде көк жәшіктегі көріністер мен дыбыстардың сапасы барынша арта түспек. Қала халқы мен ауыл жұртының арасындағы ақпараттық алшақтықты айтарлықтай азайта түсетін сандық эфирлік телерадио хабарларын таратуға толықтай көшуге ең алғаш Маңғыстау облысы қол жеткізетін болады. Бұл ағымдағы жылдың қазан айында жүзеге асады. Ал Жамбыл мен Оңтүстік Қазақстан облыстарының цифрлы телевизиямен қамтылуы үстіміздегі жылдың желтоқсан айында іске асады.
Төрткүл дүниедегі көптеген мемлекеттерде қолға алынып жатқан мұндай жүйеге Қазақстанның кезең-кезеңімен толықтай көшуі 2020 жылға дейін іске асады.

Сандық жүйе
саннан сапаға
көшіреді

Мемлекет басшысы өзінің «Қазақстанның үшінші жаңғыруы жаһандық бәсекеге қабілеттілік» атты Жолдауында Үкіметке «Цифрлық Қазақстан» жеке бағдарламасын әзірлеуді тапсырған болатын. Ол цифрлы технологияның көмегімен кез келген қазақстандықтардың өмір сүру деңгейін айтарлықтай арттыруға ерекше серпін береді. 2017 жылдың желтоқсанында бекітілген бағдарлама «Экономика салаларын цифрландыру», «Цифрлы мемлекетке көшу», «Цифрлы Жібек жолын іске асыру», «Адами капиталды дамыту», «Инновациялық экожүйені құру» сынды бес негізгі бағыт бойынша жүзеге асатыны белгілі.
Кешенді бағдарламаның «Цифрлы мемлекетке көшу» бағытының басты межесі –азаматтардың мемлекеттік қызметтерді халыққа қызмет көрсету орталықтарына сабылмай-ақ электронды портал көмегімен қол жеткізуі болып табылады. Соның негізінде қолға алынған нақты жұмыстар нәтижесінде Оңтүстік Қазақстан облысында ауыз толтырып айтарлықтай тірліктер түзіліп келеді. Нәтижесінде халыққа қызмет орталықтарының жұмыс жүктемесі едәуір азая түскен. Бүгінде «Азаматтарға арналған үкімет» мемлекеттік корпорациясының еліміз бойынша 341 фронт офисі (ХҚО) азаматтарға 621 мемлекеттік қызмет түрлерін ұсынатын болса, соның ішіндегі 452 қызметті азаматтардың электрондық үкімет порталы арқылы алуларына мүмкіндік жасалған. Аймақтағы халыққа қызмет көрсету орталықтары жергілікті жұртқа екі жыл ішінде 10 миллионнан астам қызмет түрлерін көрсеткен. Оның 7 миллионы электрондық нұсқада іске асқан. Осы негізде штаттық кестенің тиімділігі мен мемлекеттік қызметтерді көрсету сапасын артыру үшін ағымдағы жылдың сәуір айынан бастап облыстағы 29 фронт офистің қызметі тоқтатылған. Олардың 4-уі Шымкент қаласында, қалғандары Сайрам, Бәйдібек, Қазығұрт, Мақтарал, Сарыағаш, Ордабасы, Созақ, Түлкібас, Шардара аудандары мен Кентау, Арыс қалаларында болғанын айта кетейік.

Жаңашылдықты жұрт жылы
қабылдауда

Мемлекетімізде «Азаматтарға арналған Үкімет» Мемлекеттік корпорациясының» құрылғанына биыл екі жыл толып отыр. Осы уақыт ішінде ол өзінің тиімділігін толықтай дәлелдей алды. Мәселен, жыл басынан бері облыстағы халыққа қызмет көрсету орталықтарында 1 миллион 600 мыңнан астам қызмет көрсетілсе, оның көпшілігі, дәлірегі 1 миллионы электронды нұсқада жүргізілген.
Бұл туралы Оңтүстік Қазақстан облысы өңірлік коммуникациялар қызметінде өткен брифингте облыстық «Халыққа қызмет көрсету орталығы» департаментінің директоры Еркебұлан Әлсейітов мәлім етті.
Сонымен қатар, ол үстіміздегі жылдың ақпан айында халыққа цифрлық қызмет көрсету орталықтары ашылғанын да айтып өтті. Соған орай азаматтарға ыңғайлы болу үшін өзіне өзі қызмет көрсету секторының жұмысы жолға қойылғанын айта кетейік. Мамандар бұл сектордың адамдар үшін өте ыңғайлы жоба екенін алға тартуда. Себебі екі жыл ішінде «Connection point» яғни, өзіне өзі қызмет ету секторы жүйесі аясында 1 млн. 800 мың қызмет көрсетілген.
«Цифрлық Қазақстан» мемлекеттік бағдарламасы шеңберінде бағдар етілген бес негізгі бағыт аясында 17 нақты міндет пен 120 жоба жасалған болатын. Соның негізінде түзілген пилоттық жобалар да жұрт талғамынан шығып отыр. Оған бір реттік пароль қызметі, түнгі халыққа қызмет көрсету орталығы, есту және сөйлеу қабілетінің бұзылуы бар азаматтарға мемлекеттік қызмет көрсету жобалары жатады. Мұнымен қоса дүние есігін енді ашқан сәбилерге туу туралы куәлікті «sms» арқылы алуды аймақтағы 3-мыңнан астам ана сәтті қолдана білген.
Халықтың цифрлы сауаттылығын көтере түсетін мұндай ауқымды шараларды нәтижелі іске асыру алдағы уақытта да жалғасын табатын болады.

Жаңа жүйе Жер Ананы емдейді

«Цифрлық Қазақстан» бағдарламасының игілігін барлық салада тиімді пайдалану кезек күттірмес мәселе. Осы бағытта еліміздегі «Азаматтарға арналған Үкімет» мемлекеттік корпорациясының жер кадастры құрылымы ауқымды жобаны жүзеге асыруды қолға алудыбастап кетті. Өз кезегінде олар мемлекеттік жер кадастрын өзекті мәліметтермен қамтамасыз етуге белсене кіріспек. Соның негізінде республикамыздағы жер ресурстарының табиғи және шаруашылық ахуалы туралы деректер базасы іске қосылмақ. Мемлекеттік тапсырыс аясында іске асып жатқан бұл зерттеу жұмыстары туралы толық ақпарат «Жер кадастрлық сызбасы» сервисі арқылы www.aisgzk.kz сайтындағы бірыңғай мемлекеттік жер реестрінде тіркеледі. Ол жерде тіркелген жер телімдерінің кадастрлық нөмірі, құқықтық түрі, сапасы мен орналасқан жері тез әрі дәл анықталатын болады. «Азаматтарға арналған Үкімет» мемлекеттік корпорациясының Жер кадастры департаменті айналысып жатқан бұл жұмысты еліміздің кез келген азаматы, әсіресе ауылшаруашылық ісімен айналысатын адамдар өз игілігіне жарата алатын болады. Егер диқандар шаруашылық жүргізуді мақсат еткен жер телімінің генетикалық құрылымымен хабардар болу арқылы, ол аумаққа нендей дақылдың тез тамыр тартып кете алатынын, қайсыбір өнімнің бітік шықпайтынын дәл білетін болады. Бұл мемлекет үшін де диқан үшін өте тиімді екені айдан анық. Бұдан корпорация атқарып жатқан жер кадастры ғылыми өндірістік жұмыстарының маңыздылығының жоғары екенін айқын аңғаруға болады.
Бүгінде Қазақстанның жер аумағы 272,4 млн. гектарды құраса, оның 81,3 пайызы ауылшаруашылық алқаптары болып табылады. Корпорация мамандары жасап жатқан кешенді жобада сол алқаптағы топырақтың құрамы мен құнарлылығы түгел тұтас елек-екшеліп, ол арнайы құрылған деректер базасына ендіріледі. Қазірдің өзінде арнайы жүргізілген зерттеу негізінде топырақтанушы, геоботаник мамандары 630 мың гектар егістік алқабының тұзданып, сор топыраққа айналғанын анықтаған. Соған сәйкес ол жер телімдерінің иелеріне жердің тұздануына қарсы күресті күшейту туралы ұсыныстар берілген.

С. НҰРАЙ.

Биыл Елбасының бастамасымен Ақмола қаласының тәуелсіз Қазақстанның астанасы болып таңдалуы туралы тарихи шешімнің жүзеге асқанына 20 жыл толып отыр. Сол шешім негізінде 1997 жылдың қарашасында мемлекеттік рәміздерді Алматыдан Астанаға алып келу сынды рәсім шаралар өткізіліп,  Президент Әкімшілігінің, Парламенттің, Үкіметтің жұмыстары жаңа астанада басталып кеткен еді. Міне содан бері арада 20 жыл өтті.

Осы уақытта Сарыарқа төсіне қоныстанған Астана сәні мен салтанаты жарасқан қалаға айналды. Сәулет өнерінің ғажап үлгісі болып табылатын әсем ғимараттар мен түрлі тұғырлар бой көтеріп, Елорданың көркін көз тоймайтындай дәрежеге көтеріп тастады. Бұл ретте «Ақорда», «Астана триумфы», «Хан Шатыр», «Бәйтерек» сынды айналаға айдындана қараған ғимараттарды тілге тиек етуге болады.
Ел кіндігі – Арқа төсіндегі ару қала Астананың осынау аз уақыт ішінде тек Қазақстанның ғана емес, төрткүл дүниенің толғақты проблемаларын талқылап, тиімді түйіннің шығарылуына сеп болатын жаһандық орталыққа айналды. Бұған Астанада ЕҚЫҰ саммитінің, VII Қысқы Азия ойындарының, Ислам конференциясы ұйымы форумының, Астана экономикалық форумы, Әлемдік және дәстүрлі діндер лидерлерінің съездерінің өткізілуі сол сөзіміздің құрғақ еместігін аңғартады. Былтыр ел төрінде «Астана «ЭКСПО-2017» халықаралық мамандандырылған көрмесінің өтуі де Елорданың ертеңі еңселі қала екенін тағы бір қуаттай түседі.
Ендеше 20 жыл ішінде қаншама биік-биік белестерді бағындырған бас қаламыздың торқалы тойын ел-жұрт болып атап өту үлкен мәнге ие болып отыр.
Дүниежүзін тамсандырып, таңдай қақтырған шаһардың 20 жылдық мерейлі мезетін атап өту үшін республикалық бюджет есебінен 19 миллиард теңгеге жуық қаражат бөлінетіні белгілі. Еліміздің мәдениет және спорт министрлігі мен Астана қаласының әкімдігі ел қазынасынан бөлінетін бұл қаржы торқалы той үшін әзірленген арнайы шаралар үшін бөлініп отырғанын, және ол санаулы күнмен шектеліп қалмай, бірнеше айға жалғасатынын мәлімдеп отыр. Бүгінгі таңда осы республикалық мерекеге орай 645 шара өткізу белгіленген. Олардың ішінде Мария театрының гастрольдік сапары, халықаралық Канн кинофестивалі – 2018 аясындағы қазақ киносының апталығы, Нью-Йоркте болатын Ә. Қастеев атындағы мемлекеттік музей қорындағы картиналардың көрмесі, Voise of Astana эстрада әндерінің халықаралық фестивалі, «Қазақстан барысы» республикалық қазақша күрес турнирі, XIV халықаралық «Еуразия» фестивалі, I халықаралық Wide World театрлар фестивалдерін өткізу белгіленген. Мұнымен қатар, The Spirit of the Dance этностық музыка мен халық биі фестивалі, халықаралық ақындар айтысын ұйымдастыру да мақсат етілген.

Б. СӘДУАҚАСҰЛЫ.

«Шымкент Сити» жобасы негізінде келешекте «Шымкент сити» қалашығы аумағында 324 тұрғын үй салынатыны белгілі. Бастапқы жобада ондағы үйлердің бірқатары 50 қабаттан тұратыны мәлімделген болатын. Алайда инвесторлардың нақты деректерге сүйене келтірген ұсыныстары бойынша олардың қабаттары айтарлықтай төмендетілетін болды.

Қала басшысы Нұрлан Сауранбаевтың төрағалығымен «Шымкенттің Бас жоспарын өзектендіру» тақырыбы бойынша өткен жиында шаһардың бас сәулетшісі Нұрлан Архабаев осылай деп мәлімдеді.
Сонымен қатар, қалалық сәулет және қала құрылысы бөлімінің басшысы Н. Архабаев қалашықтағы үйлердің қабаты 3-тен 16 қабатқа дейін болатынын келтіріп кетті.
Кешендегі көп қабатты тұрғын үйлердегі пәтер саны 6000-ға жуықтайтына да белгілі. Бүгінде Елбасының бақылауында тұрған бұл жобаны жүзеге асыру үшін жеке инвесторлар қарқынды құрылыс жұмыстарын жүргізуді бастап кеткен. Осыған байланысты аталған аумақта инженерлік-коммуникациялық инфрақұрылым толықтай тартылып, 31 тұрғын үйдің құрылысы жүргізіліп жатыр. Құрылысы қарқын алған тұрғын үйлердің 14-і биыл аяқталады деп жоспарланып отыр. Су жаңа үйлерді халыққа үлестіру Елбасының бес әлеуметтік бастамасында көрсетілген «7-20-25» бағларламасы аясында жүзеге асады.
Аталған кешенде көп қабатты үйлер мен мектеп, балабақша, спорткешені, конгрес-холл, саябақтар және т.б нысандар бой көтеретінін де айта кетейік.

С. НҰРАЙ

12 шақырым жер демалыс аймағына айналады

Шымкент әкімі Нұрлан Сауранбаев облыс басшысына «Қарасу» және «Қошқар ата» өзендерінің жағасын абаттандыру жұмыстарының жобасын таныстырды. Жобаға сәйкес келешекте өзен жағалауының енінен 10 метр, ұзындығы 12 шақырымға жалғасқан өзен жағасы халық қыдырыстайтын демалыс аймағына айналады.
Жалпы ұзындығы 78 шақырымды құрайтын Қошқар ата өзенінің Шымкенттегі аумағын абаттандыру мәселесі осыдан бірнеше жылдан бері көтеріліп жатқаны белгілі. Өзен жағасындағы кейбір жерлер бірқатар азаматтарға жекеменшікке берілген. Соғай байланысты онда бірнеше нысандар бой көтерген. Қала келбетін бұзып тұрған ол нысандарды сүру, жерлерді мемлекет меншігіне қайтару бойынша жергілікті билік өкілдері қатарынан бірнеше ай бойы тұрғындармен түсіндіру жұмыстарын жүргізіп келген болатын. Мұның өзі оңай-оспақ жұмыс емес. Нәтижесінде жоғарыда аталған жоба бойынша кедергі келтіреді деп танылған өзен жағасындағы 96 жер учаскесінің иелері әкімдік ұсынған «өгіз өлмейтін, арба сынбайтын» ұсынысты мақұлдап, жер учаскелерін өз еркімен босатуға келісімдерін берді.
Босатылған 96 жер учаскесінің 33-і гараж, 28-і бос жатқан аумақ, 20-сы үй, 14-і жеңіл құрылыс нысаны болған. Олардың ішінде 20 жекеменшік жер учаскесінің иелері екі сөзге келмей өз учаскелерін мемлекет мұқтажы үшін тапсырған. Бұл үшін бір тиында ақы сұрамаған. Өз кезегінде қала әкімінің орынбасары Ғабит Мәуленқұлов жергілікті азаматтардың бұл ірілігі олардың Шымкентті шырайландыруға қосқан үлесі деп танып, мұның өзгелерге үлгі боларлық іс екенін алға тартты.
Сондай-ақ, ол бейбіт түрде жүргізілген бұл жұмыстардан соң «Қарасу» және «Қошқар ата» өзендерінің жағасын абаттандыру жұмысы қарқын алатынын да мәлім етті.

«Ескі қалашықта» еңселі үйлер
салынады

Шымкенттегі Қошқар ата өзенінің жағасын абаттандыру тек қыдырыстайтын аумақ құрумен ғана шектеліп қалмайды. Жоғарыдағыдан бөлек мұнда іргесі әбден сөгілген, қабырғасы қисайған, қирауға шақ тұрған үйлер жетерлік. Шымкент қаласының 2016-2020 жылдарға арналған даму концепциясы бойынша ондағы үйлер бұзылып, орнына заман талабына сай көп қабатты үйлер бой көтеретіні көрсетілген болатын. Бұл үшін «Қошқар ата» тұрғын үй кешені жобасы жасалғаны белгілі.
Осы аптада Шымкент әкімі Нұрлан Ермекұлы аймақ басшысы Жансейіт Түймебаевқа «Қошқар ата» тұрғын үй кешенінің макетін таныстырды. Макетте аталған кешен негізінде 208 мың шаршы мертді құрайтын, 3976 пәтерлі 61 көп қабатты тұрғын үйдің бой көтеретіні көрсетілген.
Өз кезегінде тұрғын үй құрылысын жүргізу үш кезеңді қамтитынын айта кетейік.

«Түркістан»
моншасы
демонтаждалады

«Ескі қалашықты қайта құру» жобасына сәйкес Түркістан көшесі бойындағы «Түркістан» моншасы алдағы аптадан бастап сүрілетін болады.
Бұл туралы журналистерге Шымкент қаласы әкімінің орынбасары
Ғабит Мәуленқұлов мәлім етті.
Соның негізінде қаладағы Д. Қонаев даңғылы жалғасының құрылысы басталады. Екі кезең бойынша жүргізілетін жол құрылысының бірінші кезеңінде Түркістан көшесінен Әйтеке би көшесіне дейін жол салу жұмыстары жүзеге асады. Оның жалпы ұзындығы 580 метр, ал ені 42 метрді құрайтын болады. Жұмыс ауқымын орындау кезінде 73 нысанның сүрілетіні анықталды. Бүгінгі таңда Шымкент қалалық әкімдігі оның 33-нің иесіне заң аясында белгіленген өтемақыны төлеп үлгерді. Өтемақы алғандардың қатарында «Түркістан» моншасының иесі де бар. Жобаның екінші кезеңінде Әйтеке би көшесінен Володарский көшесіне дейін ұзындығы 480, ені 42 метрді құрайтын жол салынатын болады.
Естеріңізге сала кетсек, Түркістан моншасының сүрілетіні туралы мәселе 2014 жылдан бастап көтеріліп келген болатын. Бірақ монша иесі мемлекет мұқтажы үшін оның сүрілуіне келісім бермеуіне байланысты, мәселе май шаммен қаралу үшін сот қарауына жолданған еді. Нәтижесінде мемлекет мүддесі бірінші орынға қойылып, нысанның демонтаждалатыны анық болды.

Н. ҚАМБАРОВ

Елбасының жыл сайынғы Жолдауы – бірін-бірі толықтырып тұратын, біртұтас дүние. Маңызды құжат ел дамуына жаңа бағыт, жаңа міндет, жаңа талап жүктейді. Жолдау жүктеген тапсырмаларды тыңғылықты орындау атқарушы биліктің негізгі міндеті. Біз осы орайда Шымкент қаласы әкімінің орынбасары Қайрат Ырзақұлұлы Нұртаймен сұхбаттастық.

– Қайрат Ырзақұлұлы, Мемлекет басшысы Нұрсұлтан Назарбаевтың Қазақстан халқынаЖолдауында төртінші өнеркәсіптік революция жағдайындағы дамудың жаңа мүмкіндіктерін айтып қана қоймай, нақты 10 бағыт бойынша маңызды міндеттерді атап көрсетті. Биылғы Жолдаудың ерекшелігі неде деп ойлайсыз?

– Мемлекет басшысы Нұрсұлтан Назарбаевтың халыққа арнаған биылғы Жолдауы бұған дейін жарияланып келген бірнеше маңызды құжаттың заңды жалғасы деп түсінемін. «Мәңгілік ел» идеясымен үйлесім тауып, «Болашаққа бағдар: рухани жаңғыру» бағдарламасымен қабысып жатқан стратегиялық құжат деп білемін. Қарап отырсаңыз, қазір дүниежүзі, бүкіл адамзат төртінші революция дәуіріне қадам басуда. Жолдаудың маңызы да сол, индустриялық революцияға дайындалудың қамы. Оның өзектілігі неде?
Төртінші индустриялық революция дегеніміз не? Алдымен мұны қара-
пайым тілмен түсіндіріп көрейікші. Адамзаттың даму тарихына бойлап қараңыз. Біріншіден, кез-келген даму адами
мұқтаждықтан, адамның ақыл-ой жемісіне байланысты болады. Мәселен, біздің әжелеріміз кезінде қолдан ұршық иірді, кілем тоқыды, киіз басты т.б. Біле білсеңіз, бұл да бір алғашқы өнеркәсіптің түрі. Яғни, ол қол еңбегі еді.
Осы манифактураның орнын кейін машина алмастырды. Бұл өнеркәсіптік революцияның алғашқы кезеңі. Көмір мен бу арқылы қозғалтқыш күші келіп, рельспен жүретін алғашқы логистика экономиканың барлық саласын дамытты. Қызмет көрсету, сауда, тауар алмасу секілді сала нығая түсті. Кейін керемет жаңалық болған бу қозғалтқыштарды электрлендіру дәуірі алмастырды. Энергетиканың келуі ғаламат жаңалықтарға, жұмыс күшін жеңілдететін автоматтандыруға, жаңа технологияға жол ашты. Алысты жақындатты, баяуды жылдамдатты, ауырды жеңілдетті. Сөйтіп адамзат екінші өнеркәсіптік революцияны тудырды. Ал, үшінші индустриялық революцияның шарықтау шегін компьютерлендірумен келген Интернетпен байланыстырамыз. Расында интернет дүниені өзгертті. Ақпараттар ағыны әлемді шыр айналдырды. Тіпті керек десеңіз, қазір адамзат қажеттілігіне берілетін энергияны да интернет арқылы алатын дәрежеге жетті. Ал мұндай қарқын Төртінші өнеркәсіптік революцияны тудырып отыр. Өйткені әлемдегі даму үнемі жедел өзгерістерге тәуелді боп отырады. Ғылым мен техниканың, технология мен инновацияның шапшаңдығы таң қалдыруда. Тіпті байқайсыз ба, кейде уақыттың өзі жылдам жүріп жатқандай көрінеді. Дүние өзгерісін мұқият қадағалап отырған сарапшылардың өзі таңның атқаны мен күннің батқанын санап үлгермейсің, дейді. Уақыттың мұнша жылдам өтуінің сыры неде деп таңырқайтын болдық. Мұның бәрі де ақпарат ғасырының әсері.
Жаңа Жолдаудың басты бағыты – әлеуметтік дамудың барлық салаларына енетін экономиканың жалпы цифрландырылуы. Қоғам цифрлы дәуірге еніп жатыр. Өнеркәсіп немесе мемлекеттік басқару болсын, осы он міндеттің барлығында цифрландыру бағыты анық көрсетілгенін баса айтқым келеді.

– Иә, елімізде Жолдаудан туындайтын тапсырмаларға сәйкес нақты іс-шаралар жоспары құрылып, жүзеге асырылуы тиіс міндеттер айқындалуда. Осы орайда Шымкент қаласында қандай жұмыстар атқарылуда?

– Қуатты Қазақстан дегеніміз – ең әуелі өңірлердің қуаттылығы. Елдің болашағы экономикадағы келешегі зор салалардың дамуымен байланысты. Облыс әкімі Жансейіт Түймебаевтың тарапынан облыста Жолдауды өңір тұрғындарына кеңінен түсіндіретін ақпараттық насихат топтарын құруды, медиа-жоспар дайындап, насихат жұмыстарын жандандыру жүктелді.
Сонымен қатар Жолдауда көрсетілген 10 міндетті облыс көлемінде жүзеге асыру жөнінде барлық салалар бойынша ұсыныстарды жинақтап, іс-шаралар жоспарын әзірлеп бекіту тапсырылды. Қазір осы тапсырмалар бойынша Шымкент қаласында да бірқатар жұмыстар қолға алынуда. Ақпараттық-насихаттық топ құрылып, жұмысқа кірісті.
Шымкентте 2018-2021 жылдары іске қосылатын кәсіпорындарға цифрлы технологияларды пайдалану механизмдері ұсынылмақ. Осы мақсатта қала кәсіпорындарына «Цифрлық» технологияларды ендіру атты бизнес-тренингтер ұйымдастырылады. Шетел инвесторларына қаланың инвестициялық мүмкіндіктерін таныстыру үшін «Халықаралық инвестициялық бизнес форум» өткізу жоспарлануда. Ал, ресурстық әлеуетті одан әрі дамытуға сәйкес, Шымкентте түнгі жарық шамдарын толығымен LED шамдарға ауыстыру, күн сәулесінен қуат алатын технологияларды қолдануға басымдылық беріледі.
Қазіргі кезде әлем елдері көлік логистикасынан көп табыс алады. Елбасымыз айтып өткендей, Қазақстан транзиттен жүктің көлемін екі есе арттырып жыл сайын 5 млрд. доллар табыс алуды көздеп отыр.
Шымкент қаласы Ұлы-Жібек жолы бойында орналасқан сауда мәдениеті ежелден-ақ қалыптасқан шаһар. Қала бойымен Батыс Еуропа және Батыс Қытай магистралды тас жолы өтеді. Сонымен қатар, аэропорт маңында сауда-логистикалық орталық ашылды. Қазіргі таңда көршілес Өзбекстанмен қарым-қатынас күн санап жақсарып келе жатқанын айтып өтуіміз керек. Осы жәйттердің бәрі бізге үлкен мүмкіндіктер береді. Ол дегеніміз, өзіміздің тауарларды жылдам жеткізу және сервистік қызметтерден табыс табуға жол ашады.

– Бір байқағанымыз, Жолдауда «білім» сөзі 24 рет кездеседі екен. Бұл білім саласы басты назарда екенін көрсетсе керек. Әсіресе, мұғалімдердің жалақысы біліктілігінің расталуына байланысты 30 пайыздан 50 пайызға дейін өсетіні туралы хабарды халық ерекше ықыласпен қабылдады. Шымкент қаласында білім беру саласының басқару ісінде жаңа тәсілдер қолданылып келеді. Мәселен, мектеп және балабақша директорларын конкурс арқылы қабылдануда. Мұның өзі ашық қоғам құрудың белгісі. Осы жаңалықтар өз нәтижесі мен тиімділігін көрсетіп келе ме?

– Жалпы әлеуметтік салаға 2018 жылы Елбасы Жолдауында айтқандай мемлекеттік бюджеттен 4 триллион ақша бөлінді. Шымкент қаласында да ең көп қаражат әлеуметтік салаға оның ішінде білім саласына бағытталған. Өйткені халқы тығыз орналасқан Шымкент қаласында жыл сайын мектеп салу мәселесі өзекті. Өткен жылы үш ауысыммен оқитын 8 мектептің 6-ның мәселесі шешілді. Ал, қалған 2 мектептің біреуі құрылысы биыл басталып, 2019 жылы шешілетін болады. Сонымен, үш ауысымды білім беретін мектептер мәселесі күн тәртібінен алынады.
Биыл Шаңырақ елдімекеніндегі 600 орындық және Қызылжардағы 900 орындық 2 мектеп пайдалануға беріледі. Сонымен қатар, жер телімдері дайын тұрған Асар-2, Тұран, Сайрам тұрғын алаптарындағы 3 мектептің жобалық-сметалық құжаттары дайындалуда. Дайындығына қарай, бюджеттен қаржы бөлінеді. Басқа да шағынауданда мектеп құрылысын салу үшін жер құжаттары рәсімделуде. Біз мектеп салуды қажет ететін шағынаудандардың әлеуметтік картасы мен кешенді жоспарын жасап шықтық. Яғни, 2017-2020 жылдары құрылыстарын жүргізіп, пайдалануға беру жоспарланып отырған білім нысандарының картасы менің кабинетімде ілулі тұр. Ол әбден зерделенген жоспар. Бұл мәселе өте жіті бақылауда.
Айта кетерлігі, цифрлық реформа және электронды қызмет көрсету Шымкент қаласында дамып келеді. Бұл бүгінгі талап мен міндет. Елбасы атап өткендей қазіргі заманғы қоғам мен ашық мемлекеттік басқаруды қалыптастырудың басты элементтерінің бірі болып табылады.
Республикада тұңғыш рет Шымкент қаласында білім беру саласында мектеп және балабақша директорларын жұмысқа конкурс арқылы қабылдау жүйесі құрылды. Конкурстық комиссияға қоғам белсенділері, бұқаралық ақпарат құралдары өкілдері қатысады. Ал мектепке мұғалімдерді жұмысқа қабылдау электронды жүйеге ауысты. Жұмыс іздеген кез-келген мұғалім www.thunter.shymkent.gov.kz сайтына кіріп, бос жұмыс орындарымен танысып, электронды құжат тапсырады. Сұранысы қабылданған соң конкурстық комиссиядан өтеді. Комиссия шешімімен мектеп директорына ұсыныс беріледі. Мұның өзі жұмысқа тұруда пара беру, тамыр-таныстыққа жол беру сияқты жағымсыз құбылыстарды болдырмаудың жолы.
Сонымен қатар Шымкентте мектептік электронды бақылау жобасы жұмыс істеп тұр. Осы жоба арқылы ата-аналар балаларының оқу үлгерімі мен сабаққа қатысуын бақылап отырады. Оқушылар оқыту үрдісіндегі ақпараттарға кіруге мүмкiндік алады. Мектептік электронды бақылау жобасының авторы Strategic Consultants &K компаниясы. Бұл жүйе Microsoft корпорациясының өнеркәсіптік шешімдерінің негізінде іске асырылды.
Жүйе жұмысы онлайн тәртібінде орындалады. Ол қалай жұмыс істейді? Ата-аналарға сабаққа қатысу мен үлгерімі жөнінде СМС және электронды хат түрінде жедел хабарламалар жіберіледі. Осы жоба арқылы балалардың сабаққа үлгерімі мен қатысу деңгейі артып келеді. Сонымен бірге оқушылардың қауіпсіздігі үшін өте қажет дүние. Яғни, кәмелетке толмаған балалар ата-ана мен мектептің назарында болуы қажет.
Электронды қызмет көрсету және цифрландыру жүйесі Шымкенттегі білім саласына дендеп еніп келеді. Одан бөлек, балабақшаға құжаттар қабылдау да электронды жүйеге өткен. Бұл дегеніміз әкімшілік кедергілерді және адами факторларды төмендетеді. Бұл әдіс жүйелі түрде жалғасын табады.
Осы ретте Шымкентте қолданылып отырған жаңа технология басқа өңірлерге үлгі ретінде ұсынылуда. Түптеп келгенде, бұл жаңалық республика бойынша енгізілмек. «Ұстазы жақсының ұстанымы мықты». Мектептің түп қазығы – ұстаз. Сондықтан, адами капиталды дамытуды балабақшадан, орта мектептен жалғастыру маңызды. Ол үшін педагог мамандарды даярлаудың Елбасы Жолдауындағы талаптарын ескеруіміз қажет. Қоғамның алдында барлық жағдайда ұстаздардың мәртебесі жоғары болып тұрғаны жақсы.

– Мегаполис үшін қоғамдық көлік қозғалысы қашанда үлкен маңызға ие. Шымкенттік шенеуніктер екі ай бойы қоғамдық көлікпен қатынап жүрдіңіздер. Не көріп, не түйдіңіздер? Жалпы қаланың транспорт саласын реттеуге байланысты биыл қандай жұмыстар қолға алынбақшы?

– Бірінші кезекте шет аймақтардағы елдімекендерге жүретін автобустарды көбейтуіміз қажет. Бұл халық сұранысы. Осы мақсатта жеке инвестордың есебінен жақында ғана 100 жаңа автобус алынды. Оның отызы әкелінді. Қалғаны таяу күндері жеткізіледі. Жақын арада шет аумақтарға баратын 10 бағытқа көлік қою жоспарлануда. Біз жақында ғана арнайы Форум өткіздік. Шетелдің үздік практикасын зерттеп, көп мәселелерді талқыладық. Өздеріңізге белгілі, қоғамдық көлік қызметі бәсекелестік ортаға берілген. Қызметтің сапасы нарықпен реттеледі. Алайда, қалалық әкімдік тарапынан қызметтің сапасына бақылау күшейтіледі. Талапты орындамаған компаниялармен келісімшартты бұзып, орнына әлеуеті жақсы компаниялар тартылып, жүйелі жұмыс жасағандарға қолдау көрсетіледі. Қазір көлік қозғалысының кестесі реттелді. Талап күшейтілді. Әрине, қоғамдық көлікте қызмет көрсету мәдениетін әлі де жақсарту қажет. Ол үшін кондукторларды арнайы мәдениетке, арнайы стандартқа оқытып, сертификат беріп, көше, аялдамалардың атауын дұрыс айтуды үйрету керек. Ол үшін материалдық жағынан ынталандыру керек. Бұл бойынша ауқымды шаралар жүргізу талабын қойып жатырмыз.
Қоғамдық көліктегі мәселелерді шешу үшін болашақта электронды билет жүйесін енгізуді жоспарлап отырмыз.

– Қайрат Ырзақұлұлы, Сіз үшін сананы жаңғырту дегеніміз не?

– Қоғамдық сананы жаңғырту жөніндегі Мемлекет басшысының идеясы бүгінгі таңда өте қажетті және орынды идея. Біз саяси ұлтты қалыптастыру жолындамыз. Әлемде алдыңғы қатардан табылу үшін біздің әрқайсымыз және баршамыз бірігіп өзіміздің санамызды, ой-өрісімізді өзгертіп, ескірген таптаурыннан арылуымыз керек. «Қазақстан – 2050» Стратегиясында Қазақстан Президенті «Дәстүр мен мәдениет – ұлттың генетикалық коды» деп көрсеткен. Жаңа тұғырнамада жаңғырудың басты шарты – өз мәдениетіңді, өзіңнің ұлттық кодыңды сақтау екені ерекше көрсетілген. Қоғамның рухани жаңғыруы озық дәстүрлер мен ұлттық-мәдени негіздерге арқа сүйеуі керек. Бұрынғы инновациялар бүгін дәстүрге айналды, бүгінгі инновациялар ертең дәстүрге айналады. Мұндай ұстаным халқымыздың өткенін, қазіргі күні мен болашағын жалғауға, ұлттық сананың әралуан полюстерін жақындатуға мүмкіндік береді. Елбасы қоғамды да, сондай-ақ әрбір азаматты да жаңғыртудың бірқатар негізгі бағыттарын ерекше бөліп көрсетіп отыр ғой. Біріншіден, бұл – бәсекеге қабілеттілік, компьютер-
лік сауаттылық, шет тілдерді білу, мәдени ашықтық сияқты факторларға негізделген тың жаңалықтарды әлемге ұсыну қабілеті. Екіншіден, бұл – прагматизм. Ол бірқатар әдеттер мен таптаурындықтардан бас тартуды да, сонымен бірге ұлттың прагматикалық мінез-құлқы мен ұтымды ойлауын, ата-бабалар дағдыларының тарихи тәжірибесін де қамтиды. Білімділік – ұлттың жетістігі. Эволюциялық даму біздің өркендеуімізге жол ашады, бұл жаңғыру идеологиясының қағидаты және Қазақстанның әрбір азаматының ішкі сенімі. Ал сананың ашықтығы дегеніміз қоғамның және әрбір адамның өзгеріске дайын болуы деп түсінер едім. Бұл көзқарастар қоғамдық сананың жаңғыруы үшін іргелі негіз болады. Мемлекет басшысы алдағы жылдарға арналған бірқатар нақты жобаларды айқындады. Алдымен, бұл – қазақ тілін жаһандық ақпарат және байланыс әлеміне жол ашатын латын әліпбиіне көшіру. Елбасының «жаңғыруға деген ішкі ұмтылыс – біздің дамуымыздың ең басты қағидасы» деген тезисі бүгінгі таңда өте өзекті. Сананы жаңғырту біздің мақсаттарымыздың бірлігін, құндылықтарымыздың ортақтығын және қоғамдық келісімнің қуатын айшықтайды.

– Қайрат Ырзақұлұлы, Шымкент қаласы 2020 жылы ТМД елдерінің мәдени астанасы болуға қаншалықты дайын?

– Иә, 2020 жылы «Шымкент – Тәуелсіз мемлекеттер достастығының мәдени астанасы» болып белгіленді. Бұл бір жағынан біз үшін мақтаныш, екінші жағынан үлкен жауапкершілік.
Аталған іс-шараны өз деңгейінде өткізу үшін облыс әкімі тарапынан бірқатар тапсырмалар берілді. Қазіргі таңда қалада дайындық жұмыстары басталып кетті.
Осы мақсатта облыс әкімінің тапсырмасымен қалаға жаңа көрік беретін «Арбат», «Цитадель» жобаларын іске асыру бағытында жұмыс жасаймыз.
Қала қонақтарына сапалы қызмет көрсету үшін Шымкент әуежайын қайта құру жоспарға қойылды.
Қаламыздың орталық бөлігіндегі пайдаланбай жатқан «Фосфоршылар» және «Металлургшілер» сарайларын қала меншігіне қайтару жұмыстары жүргізіледі.
Одан бөлек, «Қошқар-ата» өзені бойын көріктендіруге аса мән берілетін болады.

Сұхбаттасқан
Айгүл ЖАРЫЛҚАСЫН.
shymkala.kz

«Үйің жаман болса, күйің жаман» деген. Қарапайым тұрғындардың осы бір жағдайын жақсартпай, отыздыққа ұмтылу елдігімізге үлкен сын.

Сондықтан да еліміздегі бұқараны баспанамен қамтитын бағдарламаларды қарқынды жүзеге асыру мәселесі үлкен назарға алынған. Республиканың әр өңірінде күн ұзартпай халыққа пәтер кілттерінің табысталуы сол сөзіміздің жарқын мысалы.
Жуырда Шымкенттегі «Тұлпар» мөлтекауданындағы жаңа «Тұлпар» тұрғын үй кешенінде екі тұрғын үй пайдалануға беріліп, 72 отбасы баспаналы болды. Пәтер иелеріне оның кілтін салтанатты жағдайда табыстау үшін облыс әкімі Жансейіт Түймебаев пен Шымкент қаласының әкімі Нұрлан Сауранбаев арнайы келді. Үш қабаттан тұратын бұл тұрғын үйлер «Нұрлы жер» бағдарламасы шеңберінде «Самұрық Қазына» жылжымайтын мүлік қоры» акционерлік қоғамы мен «Ақмойнақ» жауапкершілігі шектеулі серіктестіктерінің есебінен бой көтерген.
Жаңа үйдің кілтін ұстап, жүздері бал-бұл жанған тұрғындардың қуанышына облыс, қала басшылары шынайы қуанып, тұрғындарға ақжарма тілек арнады. Әр шаңырақта тек шаттықтың орнауын, берекенің болуын тіледі.
Әп-сәтте балаларға толып базар болған «Тұлпардағы» бұл екі тұрғын үйдің үш қабаттан тұратынын айтып өттік. Әрбірінде 36 пәтер бар. Құрылысты сегіз айдың ішінде бастан-аяқ мердігер мекеме «Эристайл Қазақстан» ЖШС жүргізген. Тұрғын-үй үшінші санатты бір, екі және үш бөлмелі пәтерлерден құралған.
Елімізде ең басты әлеуметтік мәселе әрбір отбасының «өз үйі, өлең төсегенің» болуы. Осы бағытта мемлекеттің тиімді жобалардың жүзеге асуын қамтамасыз етуді қарқынды жүргізудің маңыздылығы жоғары.
Мұны сарабдал саясаткер Елбасы Нұрсұлтан Назарбаев терең түсініп қана қоймай, оның түйінін тарқату бағытында көп тер төгіп келеді. Үстіміздегі жылдың наурыз айында өзінің бес әлеуметтік бастамасы туралы халыққа арнаған үндеуінде сол қырын тағы бір рет дәлелдеді. Әлеуметке әл кіргізетін үндеудің бірінші бастамасында мемлекет басшысы «Біз соңғы жылдары қазақстандықтардың баспана алу мүмкіндіктерін кеңейту үшін көп нәрсе жасадық. 2017 жылы 11,2 миллион шаршы метр тұрғын-үй пайдалануға берілді. Бұл – рекордтық көрсеткіш. Дегенмен, оның өзі жеткіліксіз, әлі күнге дейін көптеген отбасы баспанасыз жүр» дей келе, «жұмыс істейтін әрбір адам несиеге пәтер сатып алып, оның отбасылық бюджетінің мүмкіндіктері аясында төлей алатындай болуы үшін арзан ресурстар ұсынатын тетіктер қажет. Сондықтан, мен «7-20-25» бағдарламасын ұсынамын» деген болатын. Соған орай несиемен үй алуға ниеттенген әрбір отбасының несие өсімінің мөлшерлемесі ендігі кезекте қазіргідей 14-16 емес, жылына 7 проценттен аспайтын болады. Және бастапқы жарна көлемі 20 пайызды құрамақ. Ал төлем уақыты 25 жылға дейін жалғасады.
Өз кезегінде бұл Шымкенттегі кісі есігін жалдап тұратын мыңдаған отбасы үшін ақжолтай жаңалық болды. Жұмыс қамы, бала бағымы сынды қу тіршіліктің соңында жүрумен қатар, бұған дейін бастапқы жарнасы 30,50 пайызды құрайтын тұрғын үйге қол жеткізуге әрекеттеніп жүрген қаншама отбасы осы бір сүйінші хабарды естігенде тақияларын аспанға лақтырып қуанғаны белгілі. Биыл Шымкентте халықтың сол қуанышы көп ұзамай қоныс тойын тойлаумен жалғасатыны қандай ғанибет десеңізші.
Өйткені биылдың өзінде өңірде жеке салушылар есебінен 104 көп қабатты тұрғын үйдің құрылысы басталып кеткен. Оның 16-сы жыл аяғына дейін толықтай аяқталып, халыққа «7-10-25» бағдарламасы шеңберінде үлестірілетін болады. Жалпы облыста құрылысы жүріп жатқан тұрғын үйлердің жалпы саны 277-ні құрап отыр.
«Тұлпар» тұрғын үй кешенінде халыққа пәтер кілтін табыстау бойынша өткен шарада облыс әкімі Жансейіт Түймебаев осылай деп мәлемдеді.
Естеріңізге сала кетсек, бүгінде «Тұлпар» мөлтекауданында жоғарыдағы үйлермен қатар, 5 қабаттан тұратын 48 пәтерлі тағы екі үй бой көтерген. Бұл аумаққа Шымкенттегі хайуанаттар бағы, ипподром, дендробақ сынды қыдырыстап, тынығатын орындар жақын. Мектеп, балабақша, емхана сынды әлеуметтік нысандар да бар. Мұның өзі тұрғындардың қуанышын еселей түсуде.

Б. СӘДУАҚАСҰЛЫ.

Үстіміздегі жылы Шымкенттегі 20 көпқабатты тұрғын үйдің қасбеті ретке келтірілетін болады.

Қаланың келбетін аша түсетін мұндай әрлеу жұмыстары үшін жергілікті билік бір тиынын да шашау шығармайды. Тұрғындар тарапынан да теңге жиналмайды. Барлық шығынды «Бизнестің әлеуметтің жауапкершілігі» аясында жаны жомарт жандар көтеретін болады.
Қасбеттерді әрлеу жүмыстары қалалық сәулет және қала құрылысы бөлімі бекіткен эскиз негізінде жүзеге асады. Мамандардың бекіткен эскизінде балкондар қоңыр түспен, ал үй қабырғалары ақшыл сары түспен боялатыны көрсетілген. Мамандар түстерді бұлай үйлесім табуын жолға қою үй ажарын аша түсетініне бек сенім білдіріп отыр. Қаланың сәулетіне ерекше сән кіргізетін бұл жоба осыдан бір жыл бұрын әзірленген екен.

С.НҰРАЙ.

     Отыздыққа нық қадам басып келе жатқан Қазақстанның барлық өңірінде жол жағдайы жақсара түсуі тиіс. Бұл туралы Елбасы өзінің кезекті Жолдауында «Ішкі өңірлік қатынастарды жақсарту үшін атожолдардың жергілікті желісін жөндеу мен қайта салуға арналған қаржы көлемін көбейту керек…. Бұл жұмысқа өңірлердегі барлық әкімдіктердің белсенді қатысуын қамтамасыз ету керек» делінген. Осыған байланысты еліміздің көптеген аумақтарында кең ауқымды жол құрылыс жұмыстары қолға алынуда.

Ал Шымкент қаласында бұл мақсаттағы жұмыстар үшін қазынадан 700 млн.нан аса қаржы қаралған болатын. Қалалық әкімдіктің баспасөз қызметі жолдарды орташа жөндеуден жүргізетін мекемелер мемлекеттік сатып алудың электрондық байқауы негізінде белгілі болатынын мәлімдеген болатын. Сондай-ақ, онда қаралған қаржыға сәйкес шаһардағы 50 көшенің асфальт қабатын қалпына келтіру жол жабындыларын түзету, бұзылған жол төсемдерін және басқа да құрылыстарды қалпына келтіру жұмыстары атқарылатыны айтылған.
Соның негізінде ағымдағы жылдың 20 сәуірінен бастап Шымкенттегі Сайрам көшесінде орташа жөндеу жұмыстары басталды. Осыған орай Шымкент қалалық жолаушылар көлігі және автомобиль жолдары бөлімі Сайрам көшесінің Тәуке хан даңғылынан Ш. Уәлиханов көшесіне дейінгі аралығында көлік қозғалысына уақытша шектеу қойылатындығы хабарлап отыр.
Естеріңізге сала кетсек қаладағы көлік ағынын қамтамасыз етудегі маңыздылығы жоғары бұл көшені жөндеу туралы мәселе бірнеше жылдан бері көтеріліп келе жатқан болатын. Тұрғындар қырық жамау көшеде жүріп өту жаяу жүргіншілерге де, көлік тізгіндегендерге де ыңғайсыздық тудыратыны туралы мәселені жергілікті бұқаралық ақпарат құралдары арқылы бірнеше рет көтерген еді. Жыл басында қалалық әкімдіктің осы салаға қатысты құрылымдық бөлімі бұл проблемаға нүкте қою осы жылдың жұмыс жоспарына енгізілгенін, құрылыс биыл басталатынын атап өткен болатын.